*في مكان تاني *
كان قاعد في غرفتو ومشغل موسيقى هادية ومندمج بكل حواسو في رسم لوحة من لوحاتو ومستمتع بالوضع جداا ...بعد تلاتة ساعات من الرسم المتواصل خلص اللوحة وعاين ليها بكل غرور وقال هكذا الرسم كما ينبغي وابتسم ابتسامة جانبية ....سمع زول بطرق باب غرفتو ـ وقف الموسيقي وقال ادخل ـ دي كانت البت الحبشية البتشتغل عندهم قالت ليه :ماما قال ليك تعال إتعشى ـ قال ليها طيب تمام شوية وبنزل ـ رتب المكان البرسم فيه وجمع ادوات الرسم ختاها في المكان المخصص ليها ـ لانو بحب النظام حاجاتو دايما مرتبة ـ بعدها نزل عشان يتعشى ...قعد في الصفرة وكان ساكت, أمو وابوه واخوانو كان بتونسو وبضحكو عدا هو كان عامل صامت ـ أبوه قال ليه مالك اليوم الحاصل عليك شنو م عايز تشاركنا في الونسة, قال ليهو ماف شي ياأبوي انا كويس, ابوه قال ليه يعني كلو ظابط?
قال ليه أيوة ظابط وسكت تاني م فتح خشمو لحدي م خلص اكل وقام وعايز يدخل غرفتو ,أمو قالت ليه اقعد ي ولدي اشرب الشاي معانا ,قال ليها لا ماعايز يلا تصبحو على خير وطلع غرفتو ...
*حوار بين أمو وأبوه لما دخلو غرفتهم *
جعفر :والله ياعلوية الولد دة حيرني عديل كلو يوم بمزاج مختلف عن اليوم القبلو ـ يوم يكون مبسوط ورايق ويوم يكون زهجان ومتنرفز وما طايق زول ويوم يكون صامت وخشمو دة م بفتحو ـ والله اشك الولد دة عندو نفسيات لانو اصلو دي م حالة زول طبيعي ,التلاتة سنين الاخيرة دي فادي دة اتغير شديد ـ دة م فادي الزمان كان بحب الناس وبحب الحياة وعلى طول كان ضاحك ـ وقدر م حاولتة احكي معاه وافهم الحاصل عليه شنو مالقيت منو اجابه ...
علوية :والله ياجعفر انا مش أمو برضو ماعارفة ولدي دة مالو بقى كدة وليه اتغير كدة وانت عارفو من وهو صغير غامض ومن الصعب تعرفو حاسس بشنو ومخبي شنو ـ زول كتوم شديد اصلا دي طبيعتو كدة من اتولد..
جعفر :ياهو بسبب مشاكلو مع اخوه فريد فصلتة ليهم شغلهم عن بعض واي واحد ممسكو قسم منفصل في الشركة وامورو ماشة كويسة ـ تاني البزهجو شنو ...
علوية :فريد دايما بحقر بيهو وانا ملاحظة الحاجة دي وحتى مرات بعايرو في لونو وأمشي ياحوري وياشنو م بعرف كذا مرة سمعتو بقول ليه كدة لدرجة اني مرة زعلتة منو شديد وشاكلتو ـ حرام عليه البعملو فريد في اخوه عرفنا الناس ما راحماه حتى اخوه عايز يكون زيو وزي باقي الناس ـ الحاجة الكويسة إنو فادي م بتأثر بالكلام البتقال ليه عن شكلو ولونو والا كان جاتو نفسيات من زمان ....
جعفر :صح والله ـ غيتو ربنا يسهلها عليه ..
علوية :اي والله ولدي دة بحنني شديد ربي يسعدو دنيا وأخرة ويديه بت الحلال الهدية الرضيةي قادر ياكريم..
**فادي جعفر :عمرو 29سنة درس علوم تجارية وشغال في شركة ابوه ـ زول جادي لمن غلط وعلى طول عابس الا م ندر مابحب يختلط بالناس ومنفرد مع نفسو ماعندو صداقات لافي اطار الشغل او خارج اطار الشغل ـ صديقو الوحيد هو كلبو (جاك) ..فادي قبل 5سنين ماكان كدة ـ كان زول مرح وبحب الناس والحياة وعلى طول بضحك ـ لكن فجاة اتغير وبقى شخصية تانية ـ شخصية كارهة للحياة والناس وحتى نفسو دي كارهة ..
هو أمهق بلغتنا السودانية بنسميه حوري (ماعندهم صبغة الميلانين لونهم ابيض شديد) جسمو وشعرو ورموشو كلها لونها ابيض ـ لكن ملامحو جميلة شديد وطوييل ـ طولو 190سنتميتر ـ بشبه الناس البجيبوهم في الافلام الاسطورية القديمة ـ رغم انو امهق (ألبينو) بس جميل شديد وعيونو لونها أزرق لمن بتحس انها بتلمع لما تركز فيها ...ولما تشوفو لأول مرة حتقول م سوداني فيهو شبه كبير من الأجانب ...
فادي عندو تلاتة اخوان اولاد واخواتو اتنين ـ اكبرهم فريد عمرو 32سنة برضو شغال في شركة ابوه لكن في القسم التاني فريد شخصية مستفزة جدا ومغرور وأناني بغار من اخوه فادي جدا وعلى طول بعاير اخوه بلون بشرتو ...اخوه التاني إسمو فؤاد عمرو 25سنة ودة قال عايز يعتمد على نفسو ويأسس شغلو براه من دون مساعدةابوه عندو محل ببيع فيهو تلفونات ـ بعديه اخوه فجر الاسلام عمرو 20سنة بدرس تانية جامعة تخدير ـ رنيم 16سنة ممتحنة تالتة ثانوي واصغرهم رتيل 14سنة ودي بتدرس أولى ثانوي ...
فادي واهلو كانو عايشين في الدوحة ورجعو السودان قبل خمسة سنة عشان يستقرو فيها يعني معظم حياتهم كانو عايشين في الدوحة ....
فادي في البداية م كان متقبل فكرة انو يعيش في السودان لكن امو وابوه حكو معاه كتير واقنعوه وفي الاخير سمع كلامهم مع انو من جواه م عايز كدة ....
****المَهَق (بالإنجليزية: albinism) (الألبينية) عند البشر (من اللاتينية albus، «أبيض»، كما يسمى الاِغْرَاب أو تعَذُّرُ التَّلَوُّن أو اللَّاتَلَوُّنِيَّة أو اِنْعِدَامُ لَوْنِ الجِلْد)، هو اضطراب خلقي يتميز بغياب الصباغ في الجلد والشعر والعيون، نتيجة غياب كامل أو جزئي أو عيب من إنزيم تيروزيناز (تايروسيناز)، وهو إنزيم يشارك في إنتاج الميلانين ويحتوي على النحاس. تعتبر هذه الحالة معاكسة لاسْوِدَادُ الجِلْد. وخلافاً للبشر، فإن الحيوانات الأخرى لديها أصباغ متعددة، وعليه يعتبر المهق حالة وراثية تتميز بغياب الصباغ في العيون والجلد والشعر، القشور، الريش أو البشرةويعرف المصاب به بعدو الشمس.******
