كرم :اختي المزززة العسسل الماف زيها ال ....(قبل م يتم كلامو قاطعتو )
رسيل :ولااا مزة ولا عسل ولا بعرفك وخالص م بغسل ليك ملابسك براي فترانة وم عندي حيل +متين وسختة الملابس دي كلها ..
كرم :رسيل عليك الله غسليهم لي عشان خاطر اخوك (وقعد يترجاها وم باقي ليه الا يتدردق ليها 🤣🤣)
رسيل:طيب طيب خلاص بغسلهم ليك م تنق لي في راسي وبعدين حول لي معاك رصيد انشط بيه شريحتي الداتا مفلسة الايام دي....(كرم سكت مسااافة وعمل فيها م سامع ـ رسيل عاينت ليه من فوق لتحت وقالت ليهو سااامعني?? ?)
كرم :سامعك سامعك طيب تمام (قعد ينقنق تحت تحت وطلع )
رسيل شغلت الغسالة وبدت تغسل في ملابس اخوها وبتدندن ..طير ياطير الخلا جيبو لي اخبار ورا قليبي الدمرو دمرو العرب الوراا...
م شاء الله روااق ههههه ابسطينا معاك (دة اخوها كريم توأم كرم )
رسيل : هههههه والله بس مبسوطة سااي كدة ـ ولو عندك ملابس وسخانة جيبهم اغسلهم ليك مع ملابس كرم..
كريم :لالا بغسلهم بعد يومين وكرم دة متين وسخ ملابسو دي كلها ..
رسيل :والله انا زاتي م عارفة بوسخ ملابسو سريع كدة كيف ـ خالتو حواء(المرة البتغسل ليهم) قبل خمسة يوم غسلت ليه ملابسو كلها ..
كريم :ربنا يكون في عون البعرسها
رسيل :هههههه فعلا
*رسيل جار النبي عمرها 22سنة بتدرس هندسة طبية باقي ليها اخر سمستر وتتخرج وحاليا جامعتهم فيها مشاكل عشان كدة مؤجزة ليها اكتر من شهر -ملامحها جميلة شديد لونها اسمر وبشرتها صافية زي بشرة الاطفال عيونها واسعة وجذابة عندها شامة فوق شفايفها محلياها جدا وزايداها جمال ـ متوسطة الطول وجسمها مفعم بالانوثة ..
اخوانها كريم وكرم (تؤام) عمرهم 25سنة بتشابهو شديد بس فرقهم كريم شعرو اشقر وكرم شعرو اسود وأي واحد شخصيتو مختلفة عن التاني ..كريم طبيب اسنان زول جادي ودغري م بحب اللف والدوران ومهتم بشغلو جدا بالصباح بشتغل في مستشفى حكومي وبالمساء بشتغل في مستشفى خاص يعني حالتو المادية ممتازة جدا ..
أما كرم عكس اخوه كريم درس اقتصاد لحدي المستوى التاني وبعدها وقف دراستو وقال م عايز يكمل عايز يشتغل بس للاسف هو انسان هزلي وم جادي وكل فترة والتانية ببدا شغل جديد وم بواصل فيه وقروشو البطلعها بضيعها في الجمبات وعزومة البنات والكلام الفارغ ...
عندهم بت خالتهم متربية معاهم وزي اختهم اسمها وجن عمرها 17سنة اتربت معاهم من لما كان عمرها 10سنين امها اتوفت وخالتها اللي هي ام رسيل طلبت من ابو وجن عشان تربيها وتبقى زي بتها و هو وافق وبعدها اتزوج وشاف حياتو وحاليا عندو ولدين وبت ...وجن زولة هادية شديد ومنطوية م بتتكلم كتير السنة دي ممتحنة ثانوي ـ مجتهدة وبتحب القراية ...
أمهم اسمها رقية مديرة في مدرسة ثانوية زولة طيبانة وعلى نيتاتها بتحب وجن شديد اكتر من اولادها لانها قطعة من اختها المرحومة ..
ابوهم جار النبي شغال محامي وعندو مكتب محاماة خاص بيه وطبعا هو مشهور لانو معروف انو محامي شاطر جدا ...
*الرواية حتكون بلسان رسيل *
بعد م غسلتة لكرم ملابسو الكهرباء قطعت طوالي قلتة الحمد لله قطعت بعد م خلصتة غسيل ـ بس الجو كان سااخن شديد دخلتة استحميت وغيرتة ملابسي ـ بعد طلعتة لقيت وجن مكمكمة بالتوب ومتغطية في السخانة دي مشيت قعدتة جمبها وبحاول ازح التوب من وشها بس هي م راضية ـ ف عرفتها بتبكي لانو لما تكون زعلانة بتتغطى بالتوب وبتكومو في وشهاـ قلتة ليها المزعل الجميل دة منوو احكي قبل م اكلكلك ههههه ..
وجن :رسيل لا زحي مني عايزة انوم
رسيل :م زاحة من هنا لو م وريتيني مالك بتبكي وم تنسي انا اختك الكبيرة ف لازم تحكي لي المزعلك شنو لانو م برضيني اشوف اختي السمحة تكون بتبكي وزعلانة يلا احكي سرييع ...
وجن :رسيل صدقيني ماف شي بس مصدعة شوية
رسيل :وجن انا م شافعة عشان تغشيني تمام ف احكي ..
وجن :طيب ح احكي ليك بس م اسي لبعدين ممكن
انا م حبيت اعصر عليها اكتر من كدة ف قلتة ليها طيب تمام ..
مشيت اطبخ الغداء عشان ماما بترجع متأخرة من المدرسة وبتكون فترانة ومرهقة ف ما بخليها تعمل حاجة قطعتة البصل واللحمة عايزة اعمل دمعة ـ وجن جات داخلة المطبخ وبدت تساعدني وكانت عادية كانو م كانت بتبكي وانا م سألتها اتونسنا عادي لحدي م خلصنا طبخ ...
جوان حساسة شديد وأقل شي بأثر عليها ودموعها قريبة شديد يعني بكااية عشان كدة تعاملنا معاها ب لين وحذر خاصة انها في فترة المراهقة بالاضافة لانو م عايزنها تحس انها فاقدة امها ـ كريم اقرب زول ليها في البيت ـ مثلا لو اصرت على حاجة ونحن م قدرنا نقنعها بنكلم كريم ومجرد م يحكي معاها بتقتنع سريع وبتسمع كلمتو من دون اي اعتراض لانو كريم اسلوبو في الكلام جميل شديد وحنون ♥...
بالليل قبل م انوم قلتة ل وجن قبيل مالك كنت بتبكي ـ سكتت مسافة حتى بعدها قالت لي اتذكرتة امي واشتقتة ليها ولحضنها ـ أنا قمتة من سريري ومشيت قعدتة جمبها وحضنتها علي ـ قلتة ليها طبيعي تشتاقي لامك ربنا يرحمها ويغفر ليها بس بدل م تبكي ,ادعي ليها وصلي ركعتين واقري ليها قران بنية صدقة لروحها ـ وماتنسي انو أمي دي كمان امك ... حكيت معاها مسافة وبعدها نمت ....
يتبع ....
