بقات كتبقشش فالانسطا حرام واش حاط شي تصويرة من غير لي فالبروفيل لدرجة سكريناتها وزوماتها كيبان مبوكص الصراحة، اعلب بوسطاتو على السيستم والمشاريع وداكشي فاش كيستثمر تالقات واحد الفوطو لابس الكلاص مع واحد سعودي كبير شوية فشي افتتاح ديال شي شركة، بقات كتزومي عليها وعاد اغب بوسطاتو مكتوبين بالانجليزية قليل فين كدوي بالعربية، عوجات فمها هادا باين ماكيعطيش دخلة بزاف واخا كونطو طالع وفيه شي ميات الف واحد متابعو معروف غير بالاستثمار والخدمة، طبعا داخلة غير تبركيك اما مستحيل تسيفط ليه، موالفة تخلي بنادم هو لي يسيفط، دخلات تقلب فالمتابعات ديالو لقاتو متابع شي بنات وباينين تاهوما بيزنيز وومن، عوجات عينيها باينة كيديها غير فالبنات لي من نفس مرتبتو، عاد بقا يديها فيها هي ..
بقات هاكاك دور ودور تامحسات داتها عينيها، فاقت مبوقة على صوت جميلة : ويلي اصاحبتي الخميرة نوضي تعدي خلاص
نهى : افف راسي غادي ينفاجر عليا
جميلة : بسيف ساهرة تالزك ليل اش كاتسناي
نهــى : ( كتفكر ليلة البارح ) اوفففف
جميلة : ( حطات الشراوط لي كتجمع وكلسات ) اجي بعدا البارح مفقاني كيسحت الليل كتسولي على ولد خالو ما ولد خالو ديال خالد اش كاين تما ثاني
نهى : ( عضات على شفايفها رجعات شعرها مور ودنيها وربعات رجليها بزربة كتهضر بالحس) اويلي اصاحبتي فخبارك البارح دخل العب معانا مهم سولهومً عليا زعما شكون وكدا وكدا تاسبني داك الخانز زعما انا غير طميميعة دالفلوس نضت يالالة منين خرجت جا سيفطليا وقاليا كنعتاذر على ولد خالتي زعما زعما ..
جميلة : ايااااه الالة وهو زعما ولد خالتهوم واحد لي عندهوم من الامارات
نهى : عمرني عرفت هاد البلان ولا عاوديتيليا الحمارة
جميلة : وماجاش فبالي اصاحبتي اصلا عمرني شفتوً وماكيجيش عندهوم ماكيحاشيهاش ليهوم اصلا
نهى : اويلي واسيد ميليونير اصاحبتي دخلت للعندو للانسطا كيحط غافداكشي ديال الخدمة وشكرات مستثمر كبير تما
جميلة : لا من غير هاكاك القدية كبيرة كنا تعاودنا واحد نهار انا وحاتم عليهوم دابا هي مو مشات تزوجات ايماراتي خانز فلوس ولكن ديجا مزوج وباها مكانش باغي وصافي مابقاتش علاقتهوم مزيانة كتجي ولكن مرة مرة ومع ذلك مهلية فيهوم اصاحبتي راه الفلوس عندهم مشعترة
نهى : ايياه
جميلة : اييه وزيدها راه خالد من ديما ماكرهش ادخل معاه ولكن داك ماجد ماكسوقش ليه السيد جا عندهوم مرة وحدة ودارو فضيحة داك يسرى راه صافي بدات تحلم بيه كنعقل كتقولينا شحال مابقا غايديني انا
نهى : ادي الصبع تحشيه مع زكــ*ها اييه كملي
جميلة : كخخخ اويلي منيتك ايديها اصاحبتي السيد غاتكون عينو على شي وحدة بحالو
نهى : من غير لكان الزين ( غمزاتها )
جميلة : على اساس هوما ماكيديروش الشفط والفشط والبوتوكسً والنفخ
نهى : افف مالكي كتهرسي فالمعنويات الخرجة الخليجين كموتو على المغربيات
جميلة : المهم اصلا السيد ماغاتلقايش ليه دخلة حيت ماكيعمرش مع هاد خالتو عندو واحد خالو كيعمر مع ولادو بزاف ولكن هادي لا وتاخالد ماعندوش معاه وزيدها فين غاتشوفيه فالاحلام
نهى : ( طلعات حاجب فيها ) ايوا يالالة ولاجبتوليك اشنو تقولي
جميلة : (ناضت كتهز الحوايج ) نهيلة الاحلام فيها وفيها هادا ازين راه ماكاينش تاباش تحلمي بيه ااه حقا شتي داك الكافي لي مصورة فيه فالانسطا ديال king دوليكس على لاكوط لي خاسرة فيه نص صالير باش تعشاي تم
نهى : مالو
جميلة : راه ديالو احبيبة العام لي فات جا لعند خالتو غاباش اديرو والا مامشتاقش فيها
نهى : ( حلات فمها على طولتو ) اواااااه السيد معلق
جميلة : كنقوليها مليونير وهي كتقوليا معلق
نهى : ( سهات كتفكر صافي طارليها الفرخ )
جميلة : ( طرطقات صبعها ) منين تسالي من الاحلام الوردية جمعي فراشك وتقادي ماما اتبقا اليوم نهار كامل فالخدمة دوزي نديروليها تخميلة للدار ..
مشات خرجات ونهيلة رجعات دخلات للانسطا كتشوف فيه وتكبر على تصويرتو عضات على شفايفها كتفكر فهضرة جميلة ودورها مزيان الى كانت هادا يسرى كتحلم توصليه وماقادراش اذن نهى جات باش تحقق الاحلام ..
نهى : ماغايكونش سميتي نهى الى ماجبتكش اسي ماجد تالعندي
ناضت جمعات شعرها وغسلات وجهها طلقو روتانا فالدار وبدات تخمل تاشوية وقفات الكراطة وشافت فجميلة : غادي نتصاحب معاه الشعيبية
جميلة : شكون ثاني هادا
نهى : ويلي على الكلخة وماجد اصاحبتي
جميلة : ( ضحكات وهزات الما رشات على وجها تاغوتات ) بنت الحي المحمدي بدات تطلق السلوكية
نهى : بنات الرباط ازين دوي على راسك، قتليك داك يسرى غادي ندمها انا ماشي غراضي فيه ولكن غراضي فيها هي تشوى وتولي هي باغا تفارق على اسامة ( رجعات وضرباتها بالكتف ) فهمتي الشعيبية، ردان دصرف خاس يكون قاصح والا راني قــحـ*بة
