ابو رعب

#_البارت22

اي هذا صوتهم هم اني متأكد وهذا ؟!
ايدي كامت ترجع ووكع التليفون من ايدي
هذا اني !!

..

امشي بالشارع واني كل اطرافي ترجف وعقلي رافض يصدك اللي شافتة عيوني

مدنك راسي واحجي وي نفسي واهذي بكلمات اني بنفسي ما فهمت معناها .. العالم اللي بالشارع تباوعلي مستغربة وناس تضحك عبالهم مخبل ..

وصدك هذا اللي صار ! .. اني تخبلت

راح يضيع مستقبلي وتضيع حياتي واخسر نفسي
زين اهلي وسمعتهم ؟ وشلون لو دروا اني ابيع مخدرات ؟؟

بس مو بقصدي والله مو بقصد جنت غافل وما حاس على الدنيا وللي يصير داير مدايري
.. لعبوا بعقلي و ورطوني
وحدة بس من الصور لو من المقاطع اذا انتشر كفيل بان يدمرني ...

شسوي ؟ ووين اروح ؟ وين انطي وجهي واني ما الي احد هنا اصلا ؟؟

اباوع رجلية رجعتني للبيت واني حتى ما حاس ع الطريق .. طبيت جوة واني الخوف والقلق عاميني

كعدت بالزاوية واضوية الغرفة مطفية ..
حاوطت رجليه بأيدي ومدنك راسي وبجيت
.. بجيت بحركة وخوف من اللي جاييني

مصيري تحدد بأيد ناس وصخة مثل مأمون وجماعتة

.. ضليت بالنص ساعة على نفس الوضعية وكل ما اتذكر الفيديو جسمي كلة يقشعر وترجع دموعي تنزل على حالي

دك التليفون !

احس باهتزازة بجيبي .. طلعتة واني ايدي كلها ترجف واباوع للأسم .. ضليت ابلعم وكلبي يدك سريع

انكطع الاتصال .. هنا
جريت نفس
ما هي إلا لحظات ورجع دك .. بين الحيرة والتردد رفعت اصبعي ورديت .. خليت التليفون على اذني واجاني صوتة

الباشا: ها لك كواد طفرت ؟ هههه .. ميخالف راح اعديها الك هل مرة بس شفت المقطع وانت* .. هههههههه
بس والله للأمانة انت تعجب

كورت قبضة ايدي بقهر
.. صرت مثل بلاع الموس لا اكدر اردة ولا اكدر اضل ساكت واسمعة يحجي ويستفزني

بعد سكوت دام لثواني كتلة بصوت مبحوح من البجي

يوسف: شتريد ؟

الباشا: اهاااا هسه انت عيني .. اسمع ولك انطيك ياها من الاخير خاف عبالك تلعب بذيلك وعود تروح تبلغ المركز وهاي السوالف التعبانة ترة متفيد وياي .. خليت عليك ناس تراقبك بكل طلعة وطبة بس فكر تسويها وتلكة روحك بعالم البرزخ

ختم كلامة بصيغة امر وهو يكول .. من باجر تجيني لنفس المكان اسلمك بضاعة وتوصلها لأصحابها مثل كل يوم ولا كأنو شي صار

فارت اعصابي وما تحملت فوكاها هو أبو الراهي ويتأمر .. كمت اصيح وافشر عليه وهو يضحك
الباشا: ها كملت ؟ حظر نفسك حتى تشوف مقاطعك وصورك منشورة ع الفيس