ابو رعب

#_البارت13

ريناد: ها .. اي ايي واني هم .. قصدي يعني ما اعرفهم

هزت راسها صرنة 3 على جهة واكفين وهاي واكفة ووجهة تعتلي ملامح الخوف وتباوعلنة وتخزر

رديت الها النظرة بابتسامة جانبية
.. خليتها تموت بدمها

واسمع المشرفة تحجي وي المديرة

.. ست هذا التصرف اللي صار ابد مو لائق وهاي مشكلة كبيرة لو طلع كلام البنات صحيح .. لازم تضبطين الطالبات وهاذي الطالبة اللي اسمها نبأ استدعي ولي أمرها واحجيلهم اللي صار لأن لو سوتها مرة تسويها الف مرة بغير بنات

المديرة: اعتذر وان شاءالله هل موضوع ميتكرر .. حتى اني صدقا مستغربة لأن اول مرة يصير هيج شي بمدرستنة ، طالباتنة كلهن مسالمات .. وارجع اعتذر لأن صار هل موضوع بوجهج

ضلت هواي تحجي وياها وتتعذر.. مديرتنة تكوم ترجف من تجينة مشرفة لو مشرف تربوي

اللي صار خابروا ولي امر الطالبة اللي اشتكينا عليها واجة ابوها للمدرسة .. واضطرينة نعيد الفلم كدامة على اساس بنتة متهجمة علينة
انطتها المديرة رزالة ناشفة ونقصتها من دفتر السلوك وهذا احتمال يأثر على معدلها وقبولها الجامعي
.. ورجع ابوها يرزلها كدامنة وكدام المدرسات وهي تبجي

مدري ليش انكسر خاطري عليها .. يمكن لان ذكرتني بتعامل ابوي وياي وشلون يهيني على أبسط الأشياء وكدام اي واحد

لأول مرة احس بذنب من اسوي هيج شغلات .. برغم احنة من جنة نسوي هيج بالابتدائية والمتوسطة ما اهتم بس هسه الوضع اختلف

اخاف من تروح للسادس يأثر على معدلها واكون اني السبب واظلم البنية ..

انتهى الدوام واحنة بهاي المشكلة رحنة للمغاسل غسلنة من التراب ورتبنة شالاتنة ورحنة للصف اخذنة جنطنة وطلعنة صعدنة بالسيارة .. وخلصت الطريق كله ضايجة وانتابني شعور ندم فضيع

ريناد تحجي وياي ما ارد عليها
.. وصلنة لبيتهم نزلت هي و ريتاج
صحت وراهن

لبوة: لحظة انتظروا

باوعت لحربي كتلة
.. اني راح انزل وي ريناد اذا رحت للبيت وسألوك كلهم حلت على عمة سهير

حجيتها ونزلت بعد ما فهمته وراح
دارتلي

ريتاج: شعجب حليتي علينة ؟ مو عوايدج صار هواي مجاية لبيتنة

لبوة: ضايجة اشتاقيت لعمتي شنوو ميصيرر اجي ؟؟؟

انصدمت من ردة فعلي وتباوعلي متفاجأة

ريتاج: بسم الله شبيج هو اني شحجيت .. يابة هلا بيج قابل طاردتج اني

انتبهت لنفسي ودرت وجهي ومشيت كدامهن واسمعها تحجي وي ريناد

..  شبيها اليوم لبوة ؟ شو ضايجة ومالها خلك احد

ريناد: لا هيج بس علمود الامتحان اخذت درجة مو زينة