سلف و دين بقلم /لولو_محمد

الحلقه ٤٨

(((((((( سلف و دين )))))))
#لولو_محمد
الحلقه ٤٨
عند ندى فى المستشفى
ندى تفتح عينها تلاقى الممرضه جنبها بتدى للنونه رضعه
ندى / هاتيها
الممرضه / خليكى المره الجايه ما رضيتش اصحيكى قولت اسيب المسكن يشتغل
ندى / كتر خيرك
الممرضه / على فكره سمو الامير جه بنفسه يطمن عليكى و طلب بياناتك لما عرف ان باسبورك ضاع و قال هيخلص الموضوع ده مع السفاره بنفسه و انك هترجعى بلدك اول ما تقومى بالسلامه و كل تكلفه اقامتك و علاجك انتى و حبيبه على حسابه لحد ما توصلى باب المطار و تركبى الطياره و تروحى بالف سلامه
ندى / الله يخليه و يرزقه من وسع انا مديوناله بحياتى و اكتر
الممرضه / انتى شكلك طيبه و تستاهلى كل خير بس انا مش قادره افهم جوزك فين
.......................
ندى / ما اعرفش
الممرضه / ما تعرفيش
ندى عنيها تتملى بالدموع
ندى / ما اعرفش هو فين و ما اعرفش ازاى بقيت على الطريق ده و ما اعرفش باسبورى راح فين و ما اعرفش حاجه
الممرضه / اهدى بس و استهدى بالله الله يعينك طب ما تعرفيش حد هنا تكلميه فى التليفون تطمنيه عليكى
ندى / ما اعرفش نمر حد هنا حتى بيتى ما كنتش حافظه نمرته و لا عنوانه جوزى كان بيوصلنى و يجبنى
الممرضه / طب اهلك فى مصر معكيش ارقامهم هما كمان
ندى / مليش حد فى مصر كان ليا بس ما عادش
الممرضه / يا كبدى اقولك ايه بس هو فى كدا على العموم ما تزعليش على الاقل عندك حبيبه
ندى تبتسم الممرضه تقوم و تحط حبيبه فى سريرها نايمه و عين ندى معاها تمسح دموعها
...................................
فى شقه حسام
حسام نايم فى سريره تليفونه يرن
حسام / الو
محمد / انت فين يا حسام يا بنى
حسام / فى البيت خير فى جديد
محمد / انا قولت هتروح شويه و هترجع لكن هتسيب عمك فى الحاله دى و ما تقفش جنبه
حسام/ ممكن يا بابا تغير الموضوع
محمد / عمك ما لوش اى علاقه باللى ندى عملته هو كمان الله يعينه بنته الوحيده اللى تعب و شقى عليها اكيد ما كانش حد يتصور ابدا انها تعمل كدا
حسام / هو فاق؟؟؟
محمد / اه فاق و دخلنا بصينا عليه بس فى السريع عشان هو فى العنايه و كدا لحد ما يطمنوا عليه خالص ينقلوه اوضه عاديه
حسام / ربنا يقومه بالسلامه
محمد / انا مقدر يا ابنى الظروف اللى انت بتمر بيها و الصدمه بتاعتك و عارف كويس انت حاسس بايه
حسام / متاكد انك عارف
محمد / بحاول بس فى الاول و الاخر ده اخويا الصغير يابنى
حسام / اؤمرنى يا بابا
محمد / تعال على نفسك و تعال بص عليه و خليه يشوفك ما تديش فرصه لحماتك تقول عنك كلمه المستشفى هنا والعه لوحدها
حسام / قولها حسام اللى بنتك باعته و خطفت بنته و هربت عدى على الحسابات و هو مروح و دفع تكاليف المستشفى بالكامل مش عشان خاطر عيونها و لا عشان عيون بنتها عشان انا متربى و ابن اصول
محمد / يابنى كلنا عارفين اخلاقك و ما حدش يقدر يقول عليك كلمه بس الحوار مش سهل على الكل انا نفسى لسه مش قادر اصدقه
حسام / ما تصدقش ما كانش المفروض حد يصدق اصلا كان المفروض تلاقى اللى يرد غيبتها
محمد / انت بتقول ايه يا حسام انت كويس يابنى
حسام / تفتكر ينفع اكون كويس انا اسف يا بابا بس بجد عاوز انام
محمد / ماشي يابنى تصبح على خير
حسام / و حضرتك من اهله سلام
حسام يقفل فى نفس اللحظه موبايله يرن يبص و ينفخ و يرد
حسام / الو ايوه يا اروى
اروى / ايه يا حسام قلقتنى عليك مش قولتلك هكلمك لما تروح
حسام / ههههههههههههههههههههههه حقك عليا
اروى / بجد دماغى عمال يروح و يودى بيكلم مين بيكلم مين بيكلم مين
حسام / بكلم ابويا هكون بكلم مين يعنى
اروى / خير فى اخبار جديده و لا حاجه
حسام / مفيش غير ان عمك خرج من العمليات و دخل العنايه
اروى / طب الحمد لله خبر حلو اهو
حسام / الحمد لله
اروى / الا قولى هو المحشى بتاعى ما وحشكش
حسام / هو المحشى بوجه عام وحشنى هههههههههههههههههههه
اروى / ليه هى ندى ما كانتش بتعملهولك و لا ايه
حسام / هههههههههههههههههه ندى اخر مره دخلت فيها المطبخ عملت صينيه بطاطس بالقرفه ما اقولكيش يعنى هههههههههههههههههههه
اروى / ههههههههههههههههه و دى طعمها ايه دى
حسام / قرفه
اروى / بس انت مش كنت جايبلها خدامه
حسام / اه بس برده الاكل من ايديها ما كانلوش طعم ما يفرقش كتير عن اكل السوق برده اللمه بتفتح النفس
اروى / هى كمان ما كانتش بتاكل معاك
حسام / ساعات كنت برجع متاخر بتكون اكلت و نامت و ساعات ما بتبقاش قادره تقوم من السرير فبتاكل فى السرير الحمل بتاعها ما كانش سهل
اروى / الحمل برده يلا هى هتروح من ربنا فين
حسام / تعرفى ان نور مش مصدقه ان ندى تعمل كدا
اروى / نور طول عمرها طيبه و على نياتها و كان جزاتها ايه مروان اتجوز عليها و مراته حملت و راحتلها تغيظها و فى الاخر ضربها بالقلم قدام الجيران و طلقها
حسام / عرفتى جراله ايه بعدها
اروى / لا اخر حاجه انه نقل عفش مراته التانيه مكان عفش نور و عاشوا فى شقتها
حسام / اتحبس فى تهمه بنت كلب
اروى / يستاهل .... على العموم ايه رايك انا هعملك محشى بنفسى تيجى تتغدى معانا بكره
حسام / ما اقدرش اوعدك بحاجه اديكى شايفه الظروف ممكن تاجليها شويه
اروى / انا بس مش قادره اشوفك فى الحاله دى
حسام / انتى ليه محسسانى انى ماشى فى الشارع بكلم نفسى
اروى / بعد الشر بس على فكره لو قدرت تكدب على الدنيا كلها و تقولهم انك كويس ما حدش هيحس بيك قدى فبليز احترم ذكائى شويه
حسام / من عنيا حاضر
اروى / انا هقفل معاك دلوقت و اسيبك تنام و الصبح هكلمك تانى اطمن عليك
حسام يضحك
اروى / سلام
حسام / سلام
حسام يقفل السكه و يفرد ضهره و يبص فى السقف
..................................
تانى يوم فى شقه انور
باب الشقه يخبط سمر تروح تفتح تلاقى على
على / الحجه صاحيه
سمر / لا نايمه و بصراحه ما اقدرش اصحيها
على / ماشى ... فى اى حاجه ناقصه البيت
سمر / ادخل ثوانى هكتبلك ورقه بالطلبات لحسن ما اقولكش فى حاجات كتير اوى ناقصه
على / حاضر
على يدخل يقعد ثوانى و باب اوضه يتفتح و تطلع منال من جوه على يقوم يقف
على / صباح الخير
منال / صباح النور سمعت صوتك طلعتلك عامل ايه
على / الحمد لله جيت اشوف لو ناقصكوا حاجه
منال / ربنا يخليك يابنى مش ناقصنا حاجه تسلم
على / طب ياريت تقعدى عاوزك فى موضوع
منال تقعد جنبه
منال / خير يابنى
على / انا قبلت ان الحج يدينى المحلات و الفلوس و الشقق عشان اريحه بس انا مش مرتاح يا حجه
سمر تطلع من جوه و تدى لعلى ورقه
سمر / خد ورقه الطلبات اهى هاتها بسرعه بقى عشان اللحق اعمل الغدى .... انتى صحيتى يا حجه
منال / اه صاحيه من بدرى بس كنت قاعده بقرا قران جوه
سمر / دا انا محضره الفطار من بدرى و مكسوفه اخش اصحيكى تاكلى ثوانى هجيب الصينيه من المطبخ
سمر تمشى
على / عامله معاكى ايه
منال / زى ما انت شايف غلبانه
على / ما افتكرش بس ماشى ربنا يهدى
منال / اسمع يا على يابنى الحاج اداك الحاجات دى عشان عارف انك تستحقها و كل يوم بتثبتلى انك تستحقها بجد كفايا يا ابنى سؤالك عليا
على / ما انا هسال عليكى برده يا حجه
منال / هعمل ايه بالفلوس يا على هعمل ايه خليهم يا ابنى و انا لو عوزت حاجه هطلبها انا الحمد لله مش ناقصنى حاجه
على / طب مش عاوزه تطلعى حج عمره اى حاجه
منال / اه اهو ده كلام احب اسمعه هو حد يرفض يا ابنى
على / يعنى امشيلك فى الموضوع
منال / ما يتقالهاش لا دى يابنى امشى على بركه الله
سمر تدخل شايله الصينيه
منال / اقعد افطر معانا يا على
على / هتروحى امتى يا سمر
سمر / شايفه يا حجه مفيش اى اعتبار لفرق السن
على / هتروحى امتى يا طنط
سمر  / لا ما تعملش اعتبار احسن قال طنط قال
منال / ههههه ضحكتينى و انا مليش نفس
سمر / تدوم يارب ... بص يا على اعمل حسابك مش هسيب الحجه الا لما اطمن عليها خالص او هى تطردنى
منال / تنورينى يا ست سمر
....................................
فى الكليه
غاده / ممكن افهم البيه كان فين اليومين اللى فاتوا ايه هى الشركه دى ما لهاش صاحب
عمر يبصلها و يروح يقعد مكانه و هو ساكت
غاده / انا بس عاوزه افهم فى ايه
عمر / اولا يا غاده انا لولا عامل حساب للعشره ما كنتش سمحتلك ابدا تتكلمى معايا بالاسلوب ده انا مش بشتغل عندك انا بشتغل معاكى بساعدك لكن لو فاكره ان شغلى فى الشركه هيخلينى اتنازل عن كرامتى تبقى غلطانه
غاده / انا ما قصدش كدا انا اقصد
عمر / عارف قصدك بس بفكرك عشان تراجعى نفسك
غاده / انا بجد قلقت عليك امبارح و اول اتصلت كتير كنت غير متاح
عمر / اقعدى يا ستى و انا احكيلك اصلا مش هتصدقى اللى حصل
غاده / للدرجادى خير احكى
تليفون عمر يرن
عمر / ثوانى تليفون ... ايوه يا اية خير ..... ليه ....... على فكره الست جوزها لسه متوفى مش ...... اااااااه ان كان كدا ماشى ...... خلاص اركبى تاكس و روحى عارفه العنوان صح... معاكى فلوس ..... تمام روحى و لما توصلى طمنينى سلام
غاده / خير
عمر / الحكايه بدات يا ستى ان على عزمنا على الغدى عند .........
..............................................
فى المحل عند على
احمد / انا مش معاك يا على
على / ليه
احمد / انك تعمل تلت ايام فى المحل اكل ببلاش للغلابه هتحكمها ازاى يعنى
على / هعلق يافطه و اكتب اطعام للغلابه على روح الحاج انور و الجعان يتفضل و احطها على باب المحل
احمد / بس الناس كدا هتاكل و هتفترى و هيدخل عاطل مع باطل
على / كدا كدا خدنا الثواب
احمد / ما تسمع منى يا ابنى احنا نعمل سندوتشات و اكياس و الطيارين ياخدوهم يفرقوهم فى الشوارع على الغلابه احسن
على / هى هياها برده وقت ما هتطلع الاكل توزعه الناس هتتلم و مش هتعرف مين محتاج و مين بياخد دناوه و اكيد مش هتعلق يافطه و تقول الاكل ده بمناسبه ايه لكن كدا على الاقل الناس تدعيله و اقولك انا هعمل الاتنين قول لحد يروح للخطاط يعمل اليافطه عشان نعلقها فى الشارع هنا و واحده تانيه عند المحل التانى و كام واحده فى الشوارع اللى جنبنا و قول للرجاله تزود الكميه و تظبط الاكل و ما يخافوش اليوميه الضعف خصوصا للطيارين
احمد / تمام هنفذ
على / انجز انا عاوز بكره يكون كل حاجه جاهزه
احمد / اعتبر اليفط اتعلقت انا هروح اقف على ايد الراجل بنفسى
.................................
فى شقه منال
الباب يخبط سمر تروح تفتح تلاقى أية
سمر / اتاخرتى كدا ليه
أية / والله مسافه السكه
سمر / طب ادخلى امسكى مصحف و اقعدى جنب الحجه و اقرى قران
أية / حاضر
أية تدخل تقعد جنب منال منال تصدق و تحضنها
سمر / انا قولت بدل ما هى قاعده لوحدها هناك تيجى تقعد جنبك و تونسك و اهو نقعد كلنا نقرا قران على روح الحج انور
منال / خير ما عملتى
سمر / يلا يا أية خديلك مصحف و اقراى يلا يا بنتى
..................................
فى شقه مامه مروان
تليفون بيرن نهاد تجرى ترد
نهاد / الو .... لا حضرتك انا نهاد مرات مروان ....... اه موجوده اقولها مين ......... طب ثوانى
نهاد تحط السماعه و تدخل تنادى لحماتها اللى تطلع من ىالاوضه جرى
الست / ايوه يا حج طمنى عملت ايه
الراجل / لقيت مشترى للارض بسعر كويس اوى
الست / ياما انت كريم يارب
الراجل / شوفى تقدرى تيجى امتى تمضى العقود
الست / اجى حالا هلبس و اركب و اجيلك
الراجل / على بركه الله و على فكره الراجل هيدفع كلو كاش بس تهاوديه فى السعر
الست / والله على عينى ابيع ارض المرحوم بس اعمل ايه بس دا ابنى الحيله
الراجل / صحيح هو مين اللى ردت عليا فى التليفون دى
الست / دى نهاد مرات ابنى
الراجل / نهاد مين
الست / حكايه طويله يا حج هحكيهالك لما اجى جهز انت بس العقود و الفلوس و المشترى و انا مسافه السكه و اكون عندك
الراجل / على بركه الله
الست تحط السماعه و تقوم تجرى على جوه و نهاد وراها
نهاد / هو مين ده يا ماما
الست / دا عمك الحمد لله لقى مشترى للارض
نهاد / هيبيعها بكام
الست / مش مهم ما سالتش المهم الاقى فلوس اديها للمحامى عشان نخلص مروان حبيب قلبى اتبهدل اوى فى الحجز
نهاد / يعنى ايه يا ماما هتبيعى الارض بالميت و تسبيهم يسرقوكى
الست / عندك حل تانى ما انا بعت الدهب كلو قدامك و على تمن الارض ربنا يسهل ما نحتاجش نبيع الشقه
نهاد / ما احنا لو مسكنا فى السعر ممكن نجيب تمن كويس ما نحتاجش نبيع الشقه
الست / ما فيش وقت دلوقتى احنا فى عرض ثانيه
نهاد / طب ممكن اجى معاكى
الست / تعالى يلا انجزى اللبسى بسرعه يلا
نهاد تطلع من الاوضه جرى
................................
فى القسم
مروان / انت بتعمل ايه هنا
حسام / جاى اشوفك
مروان/ ليك عين
حسام يشاور على عينه اليمين و بعدها عينه الشمال
مروان / انا اديت لاختك حقوقها كامله و من غير محاكم و لا بهدله كان ممكن ابهدلها ده جزاتى
حسام / لا مهو عشان كدا انا جاى اساعدك البهدله بتاعه الكام يوم دول كانوا بس عشان القلم اللى اديتهولها و كدبك عليا
مروان / هو فى فى الدنيا كداب زيك
حسام / ما هو عشان مبروم على مبروم ما يرولش انا كنت عارف انك بتكدب
مروان / و رقيتنى و نيمتنى لحد ما وقعتنى
حسام / هى طلعت اذكى منك و استقالت مع انى كنت مرتبلها حاجه حلوه تليق بيها
مروان / انت عاوز ايه يا اخى
حسام / طلق البت دى لو عاوز تخرج من هنا
مروان / و ابنى
حسام / ابقى ردها لما تخرج ما يخصنيش بس امسك ورقه طلاقها من هنا هتمسك ورقه اخلاء سبيلك من هنا
مروان / انت بجح اوى يا اخى
حسام / القلم اللى انت اديته لاختى هيطرقع على خد السنيوره بتاعتك يا كدا يا ما تنساش تبلغ سلامى لعشماوى بالاذن
حسام يخبط على الباب عسكرى يفتح و يطلع بره و العسكرى يدخل ياخد مروان
............................
فى شقه منال على الغدى
على و عمر و منال و سمر و أية قاعدين
سمر / انا عملت لقمه بسيطه كدا و قولت اكيد اللمه هتفتح نفسك يا ست الكل
منال / والله هعوز اكتر من كدا ايه ولادى حواليا والله فيكى الخير يا ست سمر
سمر / الله طب ما تمدى ايدك دا حتى كلو فضله خيرك دا انا طبخاه باديا الحج محمود الله يرحمه ما كانش بيحب ياكل الا من ايدى
سمر تقطع حته فرخه و تحطها قدام منال
سمر / اغرفى لجوزك يا أية
أية تغرف لعمر و سمر تغرف لعلى
على / كتر خيرك
منال / عارفين القاعده دى مش ناقصها غير نور
سمر / طب ما تكلميها تيجى حتى أية بتحبها اوى و بتشكر فيها بتقول طيبه و بنت حلال
منال / لا ما ينفعش اخوها لسه جاى من السفر و زمانها قاعده معاه دلوقت ما ينفعش اقولها تسيبه
سمر / اه والله معاكى حق طول عمرك بتفهمى فى الاصول
على / صحيح يا حجه
منال / خير يا ابنى
على / انا هعمل تلت ايام من بكره باذن الله اطعام للغلابه على روح الحج
منال / و ماله يا ابنى
على / و هشوف كام مسجد كدا و احط قدامهم كولدير و اتفقت مع مكتبه هتجيبلى خمسه و عشرين مصحف نفرقهم على المساجد صدقه جاريه يعنى
منال / والله فيك الخير يا ابنى
عمر / هو احنا ممكن نعمل صوان تحت و نجيب اكل فى الشارع و نعمل اطعام برده
سمر / والله فكره حلوه اوى يا عمر و انا بنفسى هقف على ايد الطباخ و اغرف للناس بنفسى
على / مفيش داعى انا كدا كدا كلمت كل الطيارين هيشتغلوا ورديتين و هيلفوا البلد كلها يوزعوا فيها على الغلابه و ربنا يسهل
منال / اعمل اللى انت شايفه صح يا ابنى
سمر تبص لعلى و تحشر معلقه رز فى بقها
........................................
تانى يوم فى القسم
مروان / و طلب منى انى اطلقك مقابل انه يخرجنى من هنا
مامته / انت بتقول ايه يا مروان
مروان / اقسم بالله حسام هو اللى ملفقلى التهمه دى و قالى بعضمه لسانه امبارح لو عاوز تخرج تطلق مراتك و تسلمها ورقتها تستلم ورقه اخلاء سبيلك و قالى لو عاوز تردها بعد كدا انت حر
الست / انا مش مصدقه
نهاد / و انت ناوى تعمل ايه
الست / انا هطلع من هنا على بيتهم انا متاكده انهم مستحيل يقبلوا بوضع زى ده
نهاد / عشان تبقى تجبرينى اتنازل عن المحضر تقدرى حضرتك بقى دلوقت تخليهم يتنازلوا و يخرجوه انا الغلطانه انى سمعت كلامك
الست / ملحوقه لو ما رضيوش نعمل اللى هو عاوزه
نهاد / يا سلام يعنى عشان ارضى غرورهم اطلق
الست / و فيها ايه تطلقى و تانى يوم ما جوزك يخرج يتعملك فرح كبير بمناسبه خروجه و ان كانوا بيكيدوكى تكيديهم بس نقول ايه ستات امخاخها على قدها
نهاد / و تضمنى منين ان بعد ما يطلقنى هيخرج مروان من الحبس
الست / مت هو تضمنى منين ان المحامى هيخرجه هو كمان ادينا ماشيين فى كل السكك
نهاد / و انت رايك ايه يا مروان
مروان / مش عارف
الست / ما تشلش انت هم و خلى دول معاك
الست تدى لمروان فلوس يحطها فى جيبه
........................
فى شقه حسام
الباب يخبط حسام يطلع من الاوضه يفتح يلاقى اروى
اروى / الحمد لله انك هنا
حسام / ايه خير فى ايه
اروى/ موبايلى فصل شحن و كنت جايه اقعد شويه مع نور و بخبط بقالى ياما ما حدش بيفتح
حسام / كلهم راحوا المستشفى لعموا انتى ازى مش عارفه دول متفقين مع عمتى من امبارح
اروى / ما قالتليش حاجه اووووف هعمل ايه انا دلوقت يعنى اروحلهم المستشفى و لا اروح و لا اعمل ايه اخاف اروح المستشفى الاقيهم مشيو
حسام / ما تكلميهم فى التليفون
اروى / قولتلك موبايلى فاصل
حسام / طب خشى كلميهم من جوه و بالمره حطى موبايلك فى الشاحن عشان ما تمشيش فاصله كدا
اروى تدخل و هى مبسوطه اوى
حسام / انا جوه لو عوزتى حاجه نادينى خدى راحتك
اروى تروح تحط الموبايل بتاعها فى الشاحن و تمسك موبايل حسام و تقفله و تروح ورا حسام اوضته تلاقيه نايم على السرير اول ما يشوفها يقوم يقعد
حسام / عاوزه حاجه يا اروى
اروى / حطيت الموبايل فى الشاحن قولت ادخل المطبخ اشرب شويه ميه عشان مشيت فى الحر و كدا سورى لو كنت ازعجتك
حسام / الشقه هنا زى تحت بالظبط المطبخ فى نفس المكان
اروى / هو انت زعلان منى يا حسام
حسام / ابدا
اروى تروح تقعد جنبه على السرير
اروى / امال ليه ما كلمتنيش من اخر مره اتكلمنا فيها هو انا قولت حاجه غلط
اروى تحط ايدها على ايد حسام حسام يبصلها اروى تشيل ايدها
اروى / زمان الموبايل شحن انا همشى بقى
اروى تقوم حسام يمسك ايدها و يشدها فى حضنه
....................................