سلف و دين بقلم /لولو_محمد

الحلقه ٢٦

(((((((( سلف و دين )))))))))
#لولو_محمد
الحلقه ٢٦
سمر / قالت كلت بره
عمر / طيب
عمر يدخل الاوضه يلاقى أية قاعده مربعه على السرير و بتعمل الواجب تبصله و تكمل
عمر / انا بكره اجازه ما وراييش شغل
أية ما تردش
عمر / بقول لو ناقصك حاجه اخدك بكره نجيبها ما انا مش اهبل عشان اديكى فلوس انتى و لا امك
أية ما تردش
عمر / كويس وفرتى انا تعبان و عاوز انام لو لسه وراكى مزاكره اطلعى كمليها فى الصاله عاوز اطفى النور
أية تبصلها و تقفل الكتب و تحطها على الارض جنبها و تنام
عمر / يارب دايما
أية تقوم تقعد و تبصله
أية / يارب دايما ايه
.......................   
عمر / هاديه كدا و ساكته و ما تصدعيش نفوخى
أية / كفايا عليك صداع ست غاده هبقى انا و هى
عمر / اااااااااااااااااااااااه غاده شوف و انا اللى فاكرك زعلانه عشان سبتك على السلم طب مدام غاده بقى يبقى اتفلقى
أية / مش بمزاجك
عمر / هههههههههههههههههههههه امال بمزاج مين
عمر يقعد جنبها و هو مبتسم و يبصلها
عمر / انا ربنا ادانى اخ و اخت بس على الورق ما اتعلقتش بيهم ما اتوجعتش اوى بموت عبير لانى تقريبا ما اعرفهاش بس انتى ياللى مش اختى و ياللى عشت عمرى كله بعتبرك اختى و بعمل كل اللى اقدر عليه عشانك وجعتينى
أية / لحد امتى يا عمر
عمر / مش عارف لو اعرف هرتاح بس انا عن نفسى مش عارف مش عارف لحد امتى هفضل اتوجع كدا لحد امتى هفضل كدا مش عارف
أية / بتريحك دموعى يعنى لو بتريحك قولى و انا ما اخليهاش تقف ابدا
عمر / دموع التماسيح بتاعتك ما بتاثرش فيا و تمثيلك الفاشل ما بياكلش معايا محتاجه تشتغلى على ادائك شويه
أية / حاضر حاجه تانى
عمر / لا كتر خيرك انا هروح اغير هدومى و اجى انام تصبحى على خير
أية / و انت من اهله يا عمر
أية تنام على ضهرها و شويه و عمر يدخل الاوضه و ينام على ضهره و أية بتبص عليه و هو باصص فى السقف تروح و تحضنه و هى بتعيط
عمر / عاوز انام
أية / و انا كمان عاوزه انام
عمر / ما تنامى يا أية
أية / مش عارفه ما نمتش من امبارح
عمر / اه صح قولى كمان ما اكلتش من امبارح
أية / ما اكلتش جبت كيس شبسى و ما قدرتش اكله
عمر / احسن .. الشيبسى كله زيت و قرف
أية / هو انا وحشه اوى يا عمر
عمر / اه
أية / اوى
عمر / اوى
أية / ربينى يا عمر رجعنى أية بتاعتك تانى
عمر / بحاول
أية / ماشى
عمر / روحى نامى مكانك بقى
أية / دا مكانى
عمر / ارحمينى يا أية بجد تعبان
أية تقوم و تبصله و تروح بعيد يلف و يديها ضهره ثوانى و ترجع تحضنه من ضهره يفتح عينه و يغمضها تانى و هو بيتنهد و ينام و هى حضناه
........................................
تانى يوم
فى المحل عند على
عمر / هو انت ليه طاوعتنى لما قولت هتجوزها
على / و ليه امنعك
عمر / المفروض تساعدنى انساها
على / كنت نسيتها لو هتقدر كنت نسيتها من زمان
عمر / سمر هاديه اوى
على / هههههههههههههههههههه عادى اديها شويه وقت لحد متا لاقيلها مدخل و هترجع ريما لعادتها القديمه
عمر / تفتكر أية ممكن تكون المدخل ده
على / اكيد مفيش مدخل اسهل من ده
عمر / تعبانى
على / انت اللى تاعب نفسك
عمر / انت كمان
على / هو انت اللى ضعيف و لا انا اللى جبله
عمر / هههههههههههههههههههه ايه ده
على / انا و لا انت كل واحد حياته اصعب من التانيه بس انا ما عادتش حاجه بتوجعنى عادى ايه اللى هيجد يعنى اشمعن ده اللى هيفرحنى اشمعن ده اللى هيتحقق اشمعن ده بقيت بتوقع المصايب فلما بتيجى ما بتفاجاش
عمر / ليه يا على ربنا كرمك الفتره اللى فاتت اخر كرم
على / ادانى اه الحمد لله بش مش ده اللى كنت عاوزه يا عمر الفلوس ما كانتش تفرق معايا خصوصا فلوس ما تعبتش فيها تعرف حتى فلوس بابا اللى رجعناها من الحيه و بنتها ما كانتش تفرق معايا اصلى ما اتمتعتش بيها فى حياته فمش فارقه بعد مماته ما لهاش طعم انا كل همى انها ما تتمتعش بيها هى و خلاص
عمر / عارف
على / ما افتكرش ان عمرى كان ليا حلم اصلا عايش يومى بيومى بس كان نفسى عبير تكبر و تبقى عروسه و اعملها اكبر فرح و ازفها لعريسها كان نفسى اتجوز ندى كان نفسى تبقى سعيد يا عمر بس سبحان الله مهما عملت و لا حاجه اتحققت عبير ماتت و ندى اتجوزت و انت اهو حالك يصعب على الكافر بس انت الامل اللى باقى يا عمر انى اشوفك سعيد مبسوط اى كان اللى هيسعدك يا عمر انا عمرى ما هقف قدامه حتى لو جيت و قولتلى انا اتجوزت أية عشان بحبها مش عشان انتقم منها زى ما قولتلك
عمر / انت بتقول ايه يا على حب ايه هى هربت منك و لا ايه احبها بعد كل اللى عملته
على / ما انا لسه بحب ندى بعد كل اللى عملته
عمر / ندى ممكن تكون مغصوبه ممكن اهلها يكونوا ضغطوا عليها ممكن تلاقيلها مليون عزر
على / و أية كمان ممكن تلاقيلها مليون عزر بس لو انت عاوز تلاقى الاعزار دى هتلاقى ممكن تقول انها كانت صغيره ممكن تقول انك على ما حكتلى كنت مدلعها و تعمل كل مصيبه و التانيه و تشيل انت قرفها و هى واخده على كدا ممكن تصدق كدبها انها قالت لابوك فعلا و ابوك اللى طنش عشان انت جيتلى
عمر / كانك بتحطلى السم فى العسل
على / هو نفس الطبق انت بقى تقرر دا سم و لا عسل
عمر / يعنى ايه
على / بص انا مخنوق اليومين دول زياده الكوابيس ما بتفارقنيش
عمر / ما تشوفلك دكتور الموضوع زاد اوى فعلا
على / بفكر اسافر كام يوم اغير جو
عمر / انا عندى شغل بكره
على / عارف ما انا ما قولتش نسافر قولت اسافر هخلى احمد مكانى و اخلع كام يوم
عمر / فين
على / اسكندريه لينا مكان غيرها .... هبعد عن الناس و الدنيا ... هههههههههههههههههه هستفرد بكوابيسى شويه هشوف انا و لا هى هههههههههههههههههههههه
عمر / شوف دكتور يا على
على / هروح لبنى ادم زيى اشكيله همى ليه يعنى
عمر / ما اسمهاش تشكيله همك هو اكيد يعنى
على / مفيش مخلوق هيقدر يساعدنى و على فكره انت كمان كدا لو فاكر ان فى حد هيساعدك و يريحك تبقى غلطان سيطر على حياتك يا عمر خلى كل الخيوط فى ايدك حكايه انك تكون رده الفعل مش الفعل دى هتبهدلك و انت مش ناقص
عمر يضحك
على / اضحك اضحك ما خيبتك تضحك فعلا
عمر / ههههههههههههههههههههههههههههههه
...................................
فى شقه ندى
حسام يدخل اوضه ندى تبص الناحيه التانيه و ينفخ
حسام / طب على الاقل شوفى جايبلك ايه معايا
ندى / اى حاجه غير ورقه طلاقى و تزكره سفرى لمصر غور بيها
حسام / معنى انك تطلبى الطلاق تبقى معترفه بالجواز و ده فى حد ذاته يسعدنى
ندى / انت ايه يا اخى بجد ايه ما بتحسش ما عندكش دم انت ايه
حسام يطلع موبايل لندى
حسام / ده تليفونك كلمى مامتك و باباكى و كل اللى انتى عوزاهم هو صحيح مش متسجل عليه لسه غير رقمى بس اهو يمكن تحتاجى لحاجه و انا فى الشغل
ندى / لا يا شيخ
حسام / انا وعدتك ان اول ما الورق يخلص هطلعلك تليفون انا ما بكدبش يا ندى و ادى تليفونك انا مش حابسك و لا مانعك تكلمى اهلك انا مش عدوك
ندى / لو مش انت مين
حسام / انتى انتى عدوه نفسك لما تقعدى تتعبيها و تعذبيها معاكى بالشكل ده يبقى انتى عدوه نفسك انا عملت المستحيل عشان اقدر اسعدك قوليلى فى ايدى ايه تانى اقدر اقدمهولك و ما عملتوش
ندى/ انك ترجعنى مصر يا حسام
حسام / مش بايدى لو رجعتك بظروفك دى ابقى بقتلك يا ندى بقتلك
ندى / انا عاوزه اموت يا اخى انا حره
حسام / لا مش حره حياتك ما تخصكيش لوحدك حياتك تخصنا كلنا حياتى مرتبطه بيكى
ندى / غنى غنى
حسام / ربنا يسامحك
ندى / السنادى ضاعت عليا خلينى ارجع اللحق السنه الجايه بلاش تضيع مستقبلى يا حسام بلاش تضيعنى رجعنى مصر
حسام / الله يعنى دلوقت عاوزه ترجعى عشان الدراسه و لا عشان عيلتك و لا عشان احنا مش متجوزين و لا ايه بالظبط
ندى / انسى يا حسام انسى الكلام معاك زى قلته
حسام / ماشى يا ندى ادى التليفون و الاكل فى المطبخ و انا خارج عشان اشوف اكل عيشى ادعيلى
ندى / ربنا ياخدك
حسام يبصلها و يضرب كف على كف و يمشى و ندى تبص فى الموبايل تلاقيه مليان جيمز و عليه نت
ندى / دا عبيط و لا ايه هو بيراضى عيله
ندى تنفخ و تخط الموبايل جنبها و تنام
................................
فى العيد ميلاد بالليل
مروان داخل و مانج نور نهاد تروح تسلم عليهم
نهاد / اهلا نورتوا
نور / بيتك حلو اوى يا نهاد حقيقى عجبنى الديكور
نهاد / ميرسى دا من زوقك
نور تدى نهاد بوكس صغير متزوق
نور / كل سنه و انتى طيبه
نهاد / تعبتى نفسك
نور / تعبك راحه يا حبى افتحيها افتحيها
نهاد تفتحها تلاقى فيها علبه صبغه نفس درجه شعرها نهاد تبص لنور
نور / نفس الدرجه مش كدا انا قولت اجيبلك حاجه تنفعك
نهاد / ميرسى اتفضلوا اتفضلوا
نور و مروان يدخلوا يقعدوا
مروان / ايه ده
نور / ايه صبغه
مروان / بجد
نور / دى ماركه على فكره مش اى كلام و بعدين فى ايه البنات بوجه عام بتعشق الميك اب دى انسب هديه لاى ست
مروان / بس مش صبغه يعنى
نور / بكره تحتاجها لو مش النهرده يبقى بكره عادى يعنى يا مروان انت مدايق نفسك اوى كدا ليه
نهاد تدخل و معاها طبقين جاتوه
نهاد / اتفضلوا
نور / ميرسى
نهاد / تيجى افرجك شقتى
نور / اوى اوى
نور تسيب شنطتها و تقوم مع نهاد
نور / انتى عايشه هنا لوحدك
نهاد / اه بابى و مامى فى الكويت و انا اشتغلت بعد ما اتخرجت علاطول
نور / بس الكويت حلوه اسمع يعنى
نهاد / جميله جدا بس هنا اهلك و صحابك و حبايبك يعنى انا مرتاحه هنا اكتر
نور / طبعا حقك ترتاحى يعنى لا اب و لا ام و لا حد يقولك رايحه فين و لا جايه منين
نهاد / مش للدرجادى يعنى انا عارفه حدودى كويس تعالى افرجك على الشقه
نهاد تاخد نور و توريها اوضه
نور / اوضه نومك دى
نهاد / اه ايه رايك
نور / مش عارفه بنصحك تغيرى الالوان تحسيها كئيبه اوى
نهاد / اول واحده تقولى كدا
نور / يمكن عشان ما بعرفش اجامل
نهاد / تعالى افرجك على المطبخ
نور / و ماله
نهاد و نور يروحوا المطبخ
نهاد / ايه رايك انا مجنونه برامج الطبخ اى حاجه بشوفها فيها بشتريها علاطول
نور / بجد
نهاد / اه اصل انا ما اتعودتش يبقى نفسى فى حاجه و ما اخدهاش مهما كان تمنها
نور / اعرف واحده بتبيع الحاجات دى مستعمل هبقى اديكى رقمها
نهاد / مستعمل
نور / كنت فكراكى بتحبى الحاجات المستعمله
نهاد / معقول ايه اللى اداكى الاحساس ده
نور / مش عارفه شوفى انتى بقى
نهاد / حقيقى مش عارفه انتى بتحاولى توصلى لايه بس اديكى شايفه كل حاجتى سينيهات
نور / هو انا ممكن اسالك ليه ما اتجوزتيش لحد دلوقت
نهاد / ههههههههههههههههههههههه اتجوزت
نور / تصدقى اتفاجات
نهاد / اتجوزت سنتين و بعدين انفصلت
نور / التجديد مطلوب برده
مروان يدخل و نور مدياله ضهرها
نهاد / اتطلقت عشان سقطنى كنا بنتخانق زقنى وقعت سقطت ما قدرتش اكمل مع راجل ما قدرش نعمه الاطفال
مروان / تليفونك بيرن يا نور
نور تبص تلاقى مروان وراها
مروان / يلا
نهاد / ما لسا بدرى
نور / معلش اصل مروان كان متفق معايا من بدرى اننا نتعشى بره النهرده بس ما رضيتش ازعلك و قولت اجى
نهاد / نورتونى
................................
فى اوضه عمر
عمر يدخل يلاقى أية رابطه راسها ونايمه على بطنها و بتزاكر
عمر / استغفر الله العظيم ايه المنظر ده دانا هنام احلم بكوابيس النهرده باين
أية / بص سبنى فى حالى النهرده مش طايقه روحى عندى امتحان بكره فى الدرس و مش عارفه احفظ جملتين على بعض
عمر / امتحان ايه
أية / ادب انا مالى انا بالقرف ده بجد انا مالى
عمر / هههههههههههههههههه طب اهدى بس و هتعدى هو يعنى امتحان اخر السنه
أية / انا عاوزه اجيب مجموع السنادى زى ما وعدتك
عمر / اتمنى
أية / اخبار على ايه
عمر / رايى تخليكى فى الادب بتاعك يمكن تفلحى
أية / تعبت و زهقت
عمر / و ماله تعالى فوقى عليا شويه
أية تقفل الكتاب و تقوم تقعد قدام عمر
عمر / ايه ؟؟؟ فى ايه ؟؟
أية / بفوق عليك
عمر / انتى كدا بتخرعينى يا ماما
أية / يووووه انت هتافور ده اللى تاعبك اهو
أية تفك المنديل
عمر / ما فرقش كتير
أية / بطل رخامه بقى يا عمر انا مخنوقه بجد والله
عمر / طب و انا مالى
أية / الله بقولك مخنوقه يا عمر
عمر / يعنى انا كعمر اعمل ايه لسموك اقوم اتحزم و ارقص مثلا
أية / بتعرف ؟؟؟
عمر / صبرنى يارب بت اتعدلى
عمر يمسك أية من البجامه و هى بتضحك
أية / هههههههههههههههههههههههه شكلك بيبقى عسل اوى و انت كدا
عمر / انتى مجنونه و لا شاربه حاجه و لا ايه
أية / زهقانه يا عمر
عمر / قومى ارقصى
أية / والله فكره اوعى
أية تقوم تقف و تحاول تتحزم بالطرحه عمر يشدها يقعدها
أية / الله
عمر / استنى اما اخد البجامه و اخرج مش ناقص موعان نفس على المسا
أية / ليه بس انا برقص حلو اوى والله
عمر / هههههههههههههههههههههههههههههههه
أية تبتسم و تبصله بدلع
أية / مزاجك رايق النهرده
عمر / مش طول اليوم بعيد عن خلقتك
أية / بتلف تلف و ترجعلى
عمر / عملى الرضي
أية / توب
عمر / هانت كل شئ بمعاد
أية / اتعشيت
عمر / اه شاورما
أية / اخص عليك انا بحبها اوى
عمر / و انا مانعك ما تاكلى بكره خلى امك تعملهالك
أية / طب ما تعزمنى بكره على الغدى
عمر / مش فاضى
أية / يعنى بكره مش هتاكل
عمر / لا بكره هحاول اصالح غاده
أية / ما تتفلق غاده انا و لا غاده
عمر / غاده
أية تقعد مكانها و تبص لعمر
عمر / كملى مزاكره يمكن يمكن تفلحى
عمر يسيب الاوضه و يمشي و أية بتبص عليه
.................................
فى شقه نور
مروان / ممكن افهم ايه لزمه اللى عملتيه ده ملو مش طيقاها اوى كدا ما كناش روحنا بدل ما نروح و نهزء نفسنا
نور / انت محموق عشانها اوى كدا ليه
مروان / لا يا هانم انا مش محموق عليها انا مضايق عشان شكلى اللى بقى زى الزفت ما تنسيش ان كل زمايلى فى الشغل كانوا حاضرين
نور / الهانم بتقولى انا اى حاجه نفسى فيها بجيبها مهما كان التمن
مروان / و انتى بذكائك الخارق سبتى كل حاجه ممكن تكون تقصدها و قولتى هوبا بس هى تقصد مروان جوزى اصل مصر بالتسعين مليون بتوعها ما فيهمش غير مروان جوزى عشان تعجب بيه مش كدا
نور / مهو سى مروان مديها ريق حلو
مروان / صبرنى يارب يابنتى افهمى انا و هى زمايل فى نفس ام الشركه فى نفس ام المكتب وشى فى وشها طول الوقت عاوزانى اعمل ايه اعاديها ابوز فى وشها بصى لو ما كانش نهاد هيبقى غيرها ففوقى بقى و بطلى
نور / يا مروان انت ليه محسسنى ان مفيش غيرك انت و هى فى المكتب ما معاكوا اتنين موظفين كمان ايه مش محسوبين ما بتشوفهمش
مروان / الكلام معاكى ما منوش اى فايده اقولك انا داخل انام
نور / تصبح على خير
مروان يشوح بايده و يسيبها و يمشى و هى تقعد و هى بتنفخ
................................
فى اوضه أية
أية قاعده بتزاكر عمر يدخل
عمر/ خلصتى و لا قدامك كتير
أية / خلصت
أية تلم الكتب و تحطها على الارض جنبها عمر ينام و يديها ضهره
أية / عمر
عمر / نعم
أية / انت قولت كدا عشان تضايقنى صح
عمر / قولت ايه
أية / ان غاده اهم عندك منى
عمر / نامى يا أية
أية / هو انت مش هتضايق لو جيت فى يوم و قولتلك انى قابلت حد و الحد ده بقى اغلى عندى منك
عمر / ربنا يهنى سعيد بسعيده و اللى بيشيل قربه مخرومه يستحمل بقى
أية / قصدك ايه
عمر / يعنى هو مين فى الدنيا ممكن يبص لواحده متجوزه غير واحد بيلعب بيها يا ست البنات
أية / و مين يعرف انى متجوزه يا عمر
عمر / كمان لا دانتى وصلتى 
أية / ما تعاملنيش وحش يا عمر انا ما استاهلش منك كدا
عمر / امال تستاهلى ايه يا أية قوليلى قيمى نفسك كدا و حطى نفسك مكانى و قوليلى لو الوضع معكوس هتتعاملى معايا ازاى
أية / ولا حاجه يا عمر انسى تصبح على خير
عمر / و انتى من اهله
عمر يدى ل أية ضهره و ينام و هى تفرد ضهرها و تبصله و تبص للسقف فى حزن
...................................
فى اوضه ندى الصبح
حسام يدخل و ندى نايمه يقعد جنبها و يفضل بصصلها تفتح عينها و تتفزع
ندى / عاوز ايه عاوز ايه
حسام / اهدى يا ندى اهدى بطمن عليكى اهدى
ندى / اطلع بره اطلع بره
حسام / انا مش عدوك فوقى بقى انا بخاف عليكى انا جوزك
ندى / انا تعبانه سبنى فى حالى ابوس ايدك ارحمنى ارحمنى بقى
حسام / انا كنت جاى اقولك انى لازم اسافر تبع الشغل اسبوع مؤتمر طبعا لو كانت ظروفك احسن من كدا كنت هاخدك اكيد كنتى هتنبسطى بس
ندى / الحمد لله سافر يابنى سافر روح شوف شغلك شهر اتنين تلاته سنه عشره العمر كله بس ابعد عنى ابوس ايدك ابعد عنى
حسام / ماشى يا ندى ماشى الموبايل جنبك و فى واحده هتيجى من بكره الصبح تساعدك و تشوف طلباتك ما تقلقيش مش هتبقى لوحدك
ندى / برافو ما نستش حاجه سبت مكانك واحده تراقبنى
حسام / هههههههههههههههههههههههه كنتى بتتفرجى على افلام عربى كتير باين عليكي لو احتاجتى اى حاجه اى حاجه فى اى وقت كلمينى هتصرف حتى لو فى اخر بلاد المسلمين هعرف اتصرف ما تخافيش
ندى تهز راسها حسام يحاول يبوس راسها تحاول تزقه يمسك جامد لحد ما يبوس راسها و هى مضايقه
....................................