سلف و دين بقلم /لولو_محمد

الحلقه ٤١

((((((((( سلف و دين )))))))))
#لولو_محمد
الحلقه ٤١
فى شقه عمر
عمر / أية كفايه كدا و نامى حبه و اصحى الفجر كملى
أية / خلاص فاضل اخر باب
عمر / هتضيعي وقتك على الفاضى نامى و ارتاحى و الصبح تركيزك هيبقى اعلى هتخلصى اسرع
أية / انت شايف كدا
عمر / اه تعالى نامى
أية / لو انا مضيقاك ممكن اكمل فى الصاله
عمر / لا مش مضيقانى انا عاوزك ترتاحى عشان تعرفى تركزى تعالى نامى
أية تقفل الكتب و تروح تنام فى حضن عمر
عمر / انتى عملتى اللى عليكى مش عاوزك تخافى من اى حاجه تانيه
..................
أية تهز راسها
عمر / ما تفكريش فى حاجه و نامى و اهدى
أية / انا بحبك اوى يا عمر
عمر / و انا والله يا أية بحبك اوى
أية / قولها تانى
عمر / بحبك يا أية
أية / قولها تانى
عمر / ههههههههههههههه بحبك يا أية
أية / كمان مره
عمر / اخر مره
أية / مره كمان و خلاص
عمر / اكتبهالك
أية / ما تقول بقى ما تبقاش بخيل
عمر / بحبك يا أية بحبك يا أية بحبك يا أية نامى بقى
أية تنام و هى مبتسمه على الاخر
........................................
فى شقه نهاد
نهاد / انت معذب نفسك ليه ما تقولها و خلاص لو مش عارف تفتح معاها الموضوع سبنى انا اكلمها
مروان / يابنتى بتقولى ايه
نهاد / بص خلاص فى شقه حلوه معروضه للبيع و سعرها كويس اوى
مروان / منين
نهاد / انت مش قولت قبل كدا عندك ارض فى البلد بيعها و انا عندى دهب هبيعه و ربنا يسهل فى الاخر
مروان / ايوه بس
نهاد / يابنى هو انا بقولك بيع الارض و ادينى تمنها ما انا كمان هبيع دهبى و ندخل شركه اعتبره استثمار
مروان / بس امى كانت بتعيش من الاجار بتاع الارض على معاش ابويا
نهاد / خلاص يا مروان اعمل اللى يريحك
مروان / انتى بتتنرفزى عليا ليه دلوقت
نهاد / سورى بجد يا مروان انت عارف الحمل بيبوظ الهرمونات و انا طول اليوم مش مظبوطه بجد اعزرنى
مروان / لا يا قلبى مفيش مشكله انا مقدر بس انتى كمان قدرى موقفى
نهاد / مقدره انا مش عارفه النوم كابس عليا ليه كدا
مروان / خلاص يا روحى ارتاحى  و انا هقوم اروح
نهاد / مش عوزاك تمشى و انت زعلان
مروان / لا ابدا و لا زعل و لا حاجه يلا تصبحى على خير
نهاد / و انت من اهله يا حبيبى
..................................
فى شقه نور
نور / مالك يا مروان سرحان فى ايه
مروان / ولا حاجه
نور / لا بجد فى مشاكل فى الشغل ؟؟؟؟
مروان / واحد معانا فى الشركه كان بيوزع شيكولاته فى الشركه بمناسبه ان مراته ولدت
نور / اه
مروان / ده ما كانش النهرده دا كان يوم ما قولتلك نروح للدكتور كلهم عمالين يقولولى عقبالك عقبالك
نور / انت عاوز تتجوز يا مروان
مروان / ايه ؟؟؟
نور / طنط منال قالتلى
مروان / رجعنا تانى لماما قالت و طنط عادت رجعنا تانى
نور / طب على الاقل اسمع يمكن كلامها
مروان / انا مش عاوز اسمع لحد كل اللى حواليا بيقولوا اتجوز كلهم بيقولوا حقك و كل اللى حواليكى بيقولوا مش ذنبك انا عارف انه مش ذنبك
نور / انت بتزعقلى ليه هو انت ليه بتلومنى على حاجه انا ما ليش ذنب فيها انا كمان نفسى اكون ام اعمل ايه يعنى
نور تعيط مروان يقعد يطبطب عليها
نور / انا مش هقدر امنعك تبقى اب لو عاوز تتجوز اتجوز ده حقك لكن انا مش هقدر اشوفك فى حضن واحده غيرى مش هقدر اشاركك مع واحده غيرى مش هقدر استحمل اكون استراحه فى حياتك بتيجى و تمشى وقت ما تحب انا مش هقدر استحمل ده
مروان / حتى لو عشان خاطرى
نور / هقولك ماشى و هاجى على نفسى و هتبقى النتيجه واحده اصلا افرض اتجوزت و ربنا برده ما اذنش بالخلفه هتعمل ايه
مروان / ما انا هنقى واحده متاكد انها بتخلف
نور / طب ما طنط منال ما عندهاش مشكله و لا عموا انور و فى الاخر ربنا ما اذنش يا مروان انا
مروان / انتى ايه بتخيرينى بين انى اقبل انى اعيش من غيرك او انى اعيش باقى عمرى ببص على العيال فى ايدين الناس بتطلبى منى ...
نور / انا ما طلبتش حاجه انا بس
مروان / انا مش هروح انقى عيله اصغر منك انا هشوف واحده ارمله او مطلقه اتجوزها و صدقينى البيبى ده مش هياثر على اللى بنا مش هتحسى انى قصرت فى حقك عارفه البيبى اللى هيجى ده هيملى حياتك زى ما هيملى حياتى هتحسى انك ام
نور / ام لطفل مش منى ازاى
مروان / منى يا نور منى و انا و انتى ايه مش واحد
نور / طب نكفل طفل يتيم فى بيتنا و ينوبنا ثواب برده
مروان / مفيش فايده من الكلام
نور / اللى انت عاوزه اعمله بس على الاقل فكر تانى
مروان / انا اسف انى كلمتك كدا انا بجد تعبان و مخنوق بقالى فتره
نور تمسح دموعها
نور / انا تعبت و هدخل انام تصبح على خير
مروان / انا هاجى معاكى
مروان يحضن نور و يدخلوا اوضتهم
...................................
عند ندى تانى يوم
حسام يدخل يلاقى ندى قاعده فى الصاله بتتفرج على مسرحيه العيال كبرت و بتضحك يقفل الباب بالراحه و يدخل اوضته اخلاص تشوفه تروح وراه
اخلاص / اعملك الاكل يا سيدى
حسام / هى ندى اكلت
اخلاص / اه اكلت و قاعده قدام التليفزيون من بدرى
حسام / بلاش تضايقيها سبيها مدام مبسوطه و ما تفتحيش معاها اى حوار
اخلاص / والله يا سيدى انا كدا كدا بقيت بخاف اقرب منها بس باين عليها مبسوطه الفتره دى و هاديه كدا على غير العاده
حسام / ما عرفتيش برده بترمى الورق اللى بتكتبه فين
اخلاص / قلبت عليه الزباله كانها بتكتبه بالحبر السرى بس جبتلك اول ورقه زى كل مره
حسام / لا انا عاوزك دلوقت تروحى تجيبى النوته بالراحه و تجيلى
اخلاص / حاضر
...............................
فى شقه امانى
امانى / انا قولتلك ما بتسمعيش كلامى
نور / يا ماما انتى بتقولى ايه
امانى / هو فاكر نفسه امله اوى داحنا واخدينه جبر خواطر
نور / هو ما غلطش
امانى / يعنى انتى هتسبيه يتجوز
نور / لا طبعا انا قولتله ان ده حقه بس انا مش هقدر اكمل فى وضع زى ده
امانى / اسمعى يا نور انتى تلبسى و تطلعى على بيت امه و كانك رايحه تزوريها عادى و اتكلمى معاها عادى
نور / اقولها ايه
امانى / قوليلها انك اتكلمتى مع مروان و عاوزه تاخدى رايها
نور / و بعدين
امانى / هتفهمى فى حد فى حياته و لا لسه هيدور
نور / و تفرق فى ايه
امانى / تفرق يا روح امك تفرق لو لسه هيدور يبقى مسكين و غلبان و يصعب علينا لكن لو عينه على واحده يبقى ربنا يستر و ما تطلعش اللى فى بالنا
نور / و انا هعرف ده ازاى
امانى / اهو طولى فى الكلام على قد ما تقدرى تعرفى انا مش عاوزه اظهر فى الصوره غير كدا كنت جبتلك قرار الموضوع ده بس على يدك المره اللى فاتت طلع نفسه الملاك البرئ و انا الشيطانه ام اؤيئ
نور / لا يا ماما مروان بس تعبان نفسيا لكن مفيش حد فى حياته انا ما صدقت ان حياتى اتعدلت مش هرجع ادخل الشك فى قلبى تانى
امانى / انا ما بقولش تدخلى الشك انا بس مش عوزاكى تبقى زى الاطرش فى الزفه عارفه انا اتغفل بمزاجى انما حد يغفلنى لا يمكن ابدا
نور تهز راسها
.................................
فى شقه عمر
أبة تدخل بتعيط سمر تقابلها
سمر / مالك يا بت فى ايه
أية / مفيش حاجه انا داخله انام
سمر / تنامى ايه انتى عكيتى فى الامتحان و لا ايه
أية / ما اعرفش بقى سبينى فى حالى
أية تدخل الاوضه و تقفل الباب سمر تجيب التليفون و تتصل بعمر
عمر / الو
سمر / اللحقنى يا عمر
عمر /خير فى ايه أية جرالها حاجه
سمر / أية جت من الامتحان مفلوقه من العياط و دخلت قفلت على نفسها الباب
عمر / ليه بس طب اديهانى اكلمها
سمر / ثوانى اخبط عليها يمكن ترضى تفتح
سمر تاخد الموبايل و تروح تخبط على أية
سمر / افتحى يا أية عمر عاوز يطمن عليكى
أية تفتح الباب و تاخد التليفون
أية/ ايوه
عمر / فى ايه يا قلبى مالك
أية / مش عارفه انا كنت مزاكره كل حاجه و جاوبت و بعدين لما خرجت رجعت
عمر / بصى انتى حليتى و سلمتى الورقه و خلاص اللى يحصل يحصل و اى كانت النتيجه قولتلك امبارح انك عملتى اللى عليكى
أية / بس انا وعدتك
عمر / وعدتينى انك هتعملى اللى عليكى و انا شوفت تعبك انسى اى حاجه تانيه انسى
أية / بس
عمر / ايه يعنى مش قولنا عاوزين تجاره عشان تبقى معايا فى البيت و الشغل و بعدين انا مش عاوز عياط عشان عنيكى ما تورمش و تطلعى وحشه فى صور الفرح
أية تبتسم
عمر / اتغدى و نامى و انا هخلص السيكشن اللى عندى و هجيلك عاوزين نركز فى اللى جاى ماشى
أية / ماشى
عمر / يلا يا قلبى اغسلى وشك مش بحبك زعلانه
أية / حاضر
عمر /يلا ادينى مامتك بقى
أية تدى سمر التليفون
عمر / خليها تاكل و تنام ما تكلميهاش فى اى حاجه
سمر / حاضر سلام
عمر / سلام
...........................
فى شقه ندى
اخلاص تجيب النوته لحسام يكتب فيها و يديها لاخلاص ترجعها مكانها
حسام / حطيها مكان ما اخدتيها بالظبط
اخلاص / هههههههههههههه و النبى انتوا زى العسل بتبعتوا لبعض جوابات و انتوا متجوزين
حسام / هانت كلها تكه و نرجع مصر و كل حاجه ترجع لطبيعتها
اخلاص / ربنا يهدى سركوا يابنى والله انت جدع طيب و ابن حلال و تستاهل كل خير
حسام / تعيشى يلا بسرعه بقى قبل ما تحس
اخلاص / هوا
..........................................
فى شقه مامه مروان
الجرس الباب يضرب تروح تفتح تلاقى نهاد
نهاد / ازيك يا ماما
الست / مين حضرتك
نهاد / مش حضرتك برضه والده مروان انا نهاد مراته
الست تبصلها باستغراب
نهاد / انا اسفه انى جيت من غير معاد بس انا قولت ما ينفعش نفضل طول الفتره دى من غير ما نتعرف على بعض
الست / طبعا اتفضلى
نهاد / ميرسى كلك زوق
الست / اتفضلى اتفضلى تشربى ايه
نهاد / ميرسى و لا حاجه
الست تقعد قدام نهاد
نهاد / الحقيقه مروان حكالى كتير اوى عن حضرتك بس الحقيقه احلى كتير هههههههههههه
الست تبتسم
نهاد / اكيد طبعا ما كانش نفسى نتقابل بالطريقه دى و اكيد حضرتك بتقولى عنى كلام كتير فى عقلك بس انا والله مش كدا انا و مروان حبينا بعض و حاولنا نبعد كتير انا عشت فتره صعبه قبله اتجوزت و فشلت و اطلقت و المجتمع ما رحمنيش مروان هو اول شخص يعاملنى كويس من غير ما يكون له اى مصلحه معايا
الست / انا ...
نهاد / والله يا امى انا مش ناويه على خراب بيته انا وافقت على انى اتجوز من غير لا شبكه و لا مهر و لا اى حاجه حتى اتجوزنا فى شقتى و استقلت من شغلى لما حاولوا يفرقونا عن بعض بس عشان اكون جنب مروان انا كنت بقبض مرتب قد مروان بالظبط و كان معروض عليا اترقى زيه بالظبط بس رفضت لانى عاوزه اعيش معاه
الست / يا بنتى
نهاد / انا مش خطافه رجاله انا اتجوزت فى السر من غير فرح و لا معازيم بس عشان اراعى ظروف مراته لكن ارجوكى ما تحرمنيش من ان يكون ليا ام اللجالها فى ظروفى دى انا اهلى مش هنا و مش هقدر اربى ابنى لوحدى من غير مساعده حضرتك انا فكرت كتير قبل ما اجى لحضرتك و مع ان مروان رافض الفكره بس انا قولت ان مصلحه ابنى فوق اى شئ و اكيد حضرتك طبعا نفسك تشوفى اولاد مروان و تفرحى بيهم
الست / والله نفسى بس انا لازم اقولك ان مروان عقله و روحه فى نور لو نور سابته هيبقى الحمل عليكى تقيل اوى و ساعتها و لا انا هقدر اساعدك عشان تخليه ينساها
نهاد / و مين قال انى ممكن اقبل بخراب بيته او تعاسته انا سعاده مروان عندى فوق كل اعتبار حتى لو ناوي يطلقنى و يفضل مع نور انا هربى ابنى لوحدى و ربنا هيرزقنا من عنده و برده مش هحرم مروان من ابنه اللى بيحلم بيه انا اتجوزت مروان و انا مرتبى قد مرتبه فى شقتى لانى لا طمعانه فيه و لا فارق معايا اى حاجه غير انى اكون جنبه
الست / والله يا بنتى انا ما عارفه اقولك ايه على قد فرحتى بيكى و باللى فى بطنك على قد خوفى من بكره انا ياما اتحايلت على مروان يتجوز ياما جبتله عرايس و هو كان دايما يرفض كان بيخاف على زعل نور فوق اى شئ تانى
نهاد / هو مش بيخاف على زعل نور على قد ما بيخاف من عيلتها
الست / ايه الكلام ده
نهاد / انا بقول لحضرتك الحقيقه انا شوفت اخو نور لما نزل مصر عمل ايه و لولا نزوله مروان ما كانش هيصالح نور فى خناقتهم الاخرانيه
الست / هو حسام نزل مصر
نهاد / هو حضرتك ما تعرفيش ان حسام هو السبب فى نقلى من القاهره و انى قدمت استقالتى
الست / لا ما اعرفش و حسام ماله و مال الشركه
نهاد / ما اعرفش بس ده اللى حصل و حضرتك تقدرى تسالى مروان بنفسك
الست / ايوه بس حسام شاب محترم و ما شوفناش منه اى حاجه وحشه هى اه امها عصبيه شويه بس اهى حمى زى كل الحموات
نهاد / ما اعرفش
جرس الباب يضرب الست تقوم تفتح تلاقى نور
الست / نور
نور / ازيك يا طنط وحشتينى قولت اجى ازورك
الست / اهلا اهلا
نور / هو انا ممكن ادخل
الست / تدخلى ؟؟؟
نهاد تطلع من جوه
نهاد / انا همشى انا بقى
نور / انتى بتعملى ايه هنا
الست / دى دى
نور / ردى عليا بتعملى ايه هنا
نهاد / انا هنا زيى زيك بالظبط
الست / نهاد لو سمحتى
نهاد / هتفضلوا مخبيين عليها لحد امتى
نور / انتى بتقولى ايه انتى مش خلاص سبتى الشركه و خلصنا منك
نهاد / شركه ايه انا مالى و مال الشركه
نور / انتى لابسه دبله فى الشمال ؟؟
الست / تعالى بس يا نور تعالى ادخلى نتكلم جوه
نور / مش داخله الا لما افهم البتاعه دى بتعمل ايه هنا
نهاد / بزور حماتى ايه عندك مانع
نور تبص للست
نور / حماتك !!!!
الست / يا نور يا بنتى
نور / انتى اتجوزتى مروان
نهاد / عندك مانع
نور / كلامى مش معاكى انا كلامى مع النطع اللى اتجوزك عن اذنكوا
الست / يا نور نور استنى يا بنتى هفهمك اصل ,,,,,
نور تمشى و الست تبص لنهاد و تنفخ
نهاد / انا اسفه ما كنش قصدى الموضوع يوصل لكدا بس كنت اقول ايه يعنى
الست / لو سمحتى امشى
نهاد / يعنى كان المفروض استخبى ورا الستاره و لا تحت السرير و كانى واحده عامله جريمه هو ذنبى انها
الست / لو سمحتى يا نهاد لو سمحتى يا بنتى انا محتاجه اكون لوحدى نتكلم وقت تانى من فضلك تمشى
نهاد / حاضر عن اذنك
نهاد تمشى و الست تقفل الباب و تروح تجيب التليفون و تتكلم فيه
...............................
فى شقه ندى
ندى تقوم تدخل اوضتها و تفتح التلاجه بتاعتها و تطلع علبه عصير و تفتح و تشرب شويه و تحطها على الكومدينو جنبها و تمسك النوته و تفتحها تلاقى في اول صفحه كلام
حسام / بالله عليكى تقرى الكلام للاخر النهرده اسعد يوم فى حياتى عارف انى وعدتك انى هبقى بعيد هسيبك تعيشى فى حالك مدام ده يرضيكى هكتفى انى ابص عليكى من بعيد تبقى جنبى حتى لو مش ليا مدام ده هيسعدك انا راضى يكفينى انى اطمن عليكى و ارجع اشوف ضحكتك من تانى انا اتعاقبت عقاب شديد اوى الفتره اللى فاتت عقاب مفيش قلب فى الدنيا يستحمله عارف انك بتقولى احسن و انه مش كفايه انا عارف انا غلطت بس ارجوكى ما تحكميش عليا بالموت انا مش هطلب فرصه اصلح غلطى لانى عارف انك عمرك ما هتقبلى بس ارجوكى ما تبعديش عنى ارجوكى و بالله عليكي عشان حبيبه ادينى فرصه اثبتلك ان كنت زوج و حبيب فاشل انى ممكن اكون اب كويس انا بحبك و مستعد اعمل اى حاجه عشان ارضيكى الا انى ابعد عنك اطلبى منى اى حاجه الا انى ابعد عنك و هتشوفى قد ايه مستعد انى انفذ انا بحبك يا ندى
ندى تتنهد و تحط النوته جنبها و تسرح
/////////////////////////////////
ندى / انت اخويا يا حسام انا ما ليش حد غيرك دلوقت ساعدنى ساعدنى ارجوك ..............بابا اللى مضى بايده و بصمنى غصب ............. اعمل حاجه يا حسام
حسام / طب انا اعمل ايه دلوقت المعازيم و الناس العيله صحابى زمايل بابا و صحابه دى فضيحه انتى متخيله الموقف ........ هقول ايه لاهلى انتى متخيله لو بابا عرف دا ممكن يقاطع عمى خالص بلاش ابوكى منظره ايه قدام الناس و قدام زمايله فى الشغل دا كلها كام ساعه و القاعه تبقى امم فوق بعض ......... نتجوز النهرده و نعمل اننا عرسان حلوين و الكل ينبسط و المعازيم تتعشى و تروح و بعدين شهر التانى ما اتفقناش ما عجبكيش العيشه فى الغربه اى حجه نطلق تنزلى مصر و يا دار ما دخلك شر
.....................
ندى / انا بتجيلى كوابيس ....... كوابيس وحشه اوى يا حسام ........... بحس انى متكتفه و مش قادره اتحرك .........و فى حد ... فى حد بي... بي.... بيغتصبنى ......... ببقى حاسه بس مش قادره اعمل اي حاجه كانى مشلوله بصرخ بس من غير صوت انا نفسى مش سامعه صوتى
حسام / و المفروض كنتى هتقولى ده لمامتك ازاى هتقوليلها ايه اصلا ينهار اسود ............الو ماما انا بحلم ان فى حد بيغتصبنى و انا بنت مع انى متجوزه من حوالى شهرين مش كدا
..................
حسام / انتى كبتيه تانى .........ما تفرقش كدا احسن كفايا كدب بقى
ندى تحاول تقوم من السرير حسام يشدها جنبه و هى بتصرخ
.....................
ندى / ما كانتش كوابيس ............ازاى ما شوفتش حقيقتك طول الفتره دى ازاى قدرت تضحك عليا طول المده دى ازاى .......انا ندمانه على كل لحظه احترمتك ووثقت فيك فيها اول ما ارجع مصر هقول للكل على حقيقته هفضحك فى كل حته
حسام / هههههههههههههههههههههههههه ترجعى مصر ؟؟؟ لمين ؟؟؟ لابوكى و لا لامك فوقى يا ماما ان كنت انا شيطان فابوكى ابليس
ندى / انا بكرهك بكرهك بكرهك
........................
ندى / انت ازاى بارد كدا ازاى اصلا قادر تبص فى عينى انت اغتصبتنى
حسام / و مش فخور بس انتى اللى اجبرتينى
ندى تتف فى وش حسام يضربها بالقلم على وشها تقع فى الارض يقوم يمسكها من شعرها و هى بتعيط
حسام / انا صبرت عليكى كتير و خلاص فاض بيا اخر الكلام من النهرده مش هدادى تانى و لازم تفهمى انك بتاعتى و مفيش قوه فى الدنيا دى هتاخدك منى
...........................
ندى / انت حيوان
حسام / و انتى مجنونه و لو ما عقلتيش يا ندى انا مش هقدر احميكى و زى ما انتى عندك استعداد تهدى المعبد انا كمان ممكن اهده و تلاقى نفسك مرميه فى اعفن مستشفى مجانين هنا او حتى فى مصر .......عندى بدل الشاهد على جوازنا مليون عندى بدل الشاهد انك جيتى معايا هنا برضاكى و متجوزانى و سعيده معايا هنا مليون شاهد لكن انتى مين هيصدق تخريفك ده فجاه بعد ما حملتى اكتشفتى اننا مش متجوزين فجاه ..........اعقلى عشان وشى التانى هيزعلك
.........................
حسام / انا هنزل مصر تحبى تيجى
ندى / انت بتتكلم جد يا حسام و لا بتعشمنى زى كل مره انا ما عدتش مستحمله
حسام / انا كان ممكن اسافر من بره بره و ارجع و اسيبك هنا على فكره .....بس انا شايفك عقلتى اخيرا
حسام يقف فى ضهرها و يبوسها من رقبتها تبعد عنه
ندى / انت بتعمل ايه ما تبطل قرف بقى يا اخى انت ايه
حسام / و انا اللى جاى و فكرك عقلتى
ندى / انا ابقى مجنونه لو طاوعتك لو فاكر انى ممكن استسلملك تبقى غلطان الطريقه الوحيده اللى هتطولنى بيها هى غصب عنى عشان اللى زيك ما ينفعش غير انه يكون حرامى
حسام / الله ما البوليس جالك لحد عندك ما بلغتيش عنى ليه  ايه خفتى يحبسوكى الا قوليلى السجن اهون و لا مستشفى المجانين اهون يا ندى خفتى من انهى اكتر ايه اللى سكتك فيهم
ندى / كنت متاكده انك مش هتقولى تنزلى مصر من غير مقابل على العموم انت لازم تفهم ان على قد ما انا زعلانه عشان نور لازم تفهم ان ده حقى منك ربنا بيخلصه بس للاسف بيخلصه من اختك اللى ذنبها الوحيد فى الدنيا انها اختك زى ما ذنبى الوحيد انك ابن عمى اتفو عليك
حسام يسقف / حفظتيها لوحدك و لا حد ساعدك انا داخل انام هسيب باب الاوضه مفتوح يمكن تعيدى التفكير تانى  تصبحى على خير
////////////////////////
ندى / ازاى عاوزنى اسامحك بعد كل ده ازاى عايزنى اكمل معاك بعد كل ده
ندى تمسح دموعها و تنام
..............................
فى شقه منال
منال تفتح الباب على شايل حاجات كتير
منال / ايه ده كلو يا على هو انت كل مره يابنى تعمل كدا هات عنك هات
على / لا عنى ايه افتحى بس انا هدخلهم
منال توسع على يدخل فى نفس ذات اللحظه الاسانسير يوصل و يتفتح و نور تطلع منه و هى بتعيط تفتح باب شقتها و ترزع الباب
منال / نور مالك يا بنتى نور نور
.......................