سلف و دين بقلم /لولو_محمد

الحلقه ٢

(((((((( سلف و دين )))))))))))
#لولو_محمد
الحلقه الثانيه
عمر / فى ايه
على / مش عارف
عمر / تفتكر عملت وحش فى النتيجه
على يبصله
عمر / نتيجه الثانويه العامه بانت النهرده
على يبص على ندى
عمر/ مش هى ثانويه عامه برده
على ينفخ و يدخل و عمر وراه يعدوا من على شويه شباب بيتفرجوا عالتليفزيون
واحد / اخبار الجو ايه يا علوه
على يقف و يبص اللى جنبه يزغده عمر يزق على و يدخلوا اوضتهم
......................
فى اوضتهم
عمر / بقولك يا على مبتفكرش تكمل تعليمك
على يبصله و يدحك
عمر / ايه يا عم قولت نكته انا
على / هتفيدنى بايه بقى الشهاده ان شاء الله و بعدين هو انا لاقى وقت اصلا
عمر / الوضع اتغير انت معدتش مسؤل عن مصاريفى خلاص تقدر تفضى نفسك الصبح تروح الكليه
على / بعد مشاب ودوه الكتاب يعنى
عمر / فكر فيها كدا انت لما هتروح تتقدم لندى هتقولها ايه ثانويه عامه
على / ندى !!!
عمر / انت ناوى تتقدملها صح
على / اتقدم ايه يابنى انت شطحت اوى كدا ليه
عمر / مش فاهم
على / انا معرفهاش انا اطول حوار دار بينى و بينها كان لو سمحت ...حاضر ... ممكن استنى هناك عشان الزحمه ... حاضر ... اتفضلى... شكرا ....و جبرت على كدا
عمر / ههههههههههههههههههههههههه
على /انت بتدحك انا اول مبتقرب بس بحس انى اتخشبت و لسانى اتمسمر بمسمارين عشره سنتى
عمر / ايوه و اخرتها يعنى هتفضل تعملها فى سندوتشات لحد ميعزموك على فرحها و لا ايه
على / فرح ايه
عمر / البنات مبتقعدش يابا فوق عاوز البت اتحرك
على / انت هربت منك خلاص يا عمر ... ياربى ماشى عاوزها اتحرك اعمل ايه بقى
عمر / كلم ابوها يابنى قوله يا عمي انا يشرفنى و يسعدنى انى اطلب ايد بنتك ايه مبتشوفش افلام
على / اه عشان اخد الشلوت التمام اللى يخلينى امسح السلم بهدومى مش كدا
عمر / ههههههههههههههههه دانت ضايع
على / و من زمان
عمر / نام نام دانت مسخره ههههههههههههههههه
على /  هقوله ايه يا عمر
عمر يتعدل فقعدته
على / هتجوزها فين يا عمر هجيبها تنام جنبى هنا بلاش دى لما يسالنى عن اهلى هقوله ايه متجاوب
عمر / قوله الحقيقه الحقيقه اللى متعيبناش انا و انت عارفين كويس ان لحم كتافنا من خيرنا احنا و مفيش مخلوق و لا حتى اهلنا له فضل علينا ان محترمش فيك رجولتك يبقى هيحترم صراحتك و اصلا هو يطول يجوز بنته لراجل زيك هو هيلاقى احسن منك فين اساسا
على / ان كان عالاحسن فدول على قفا من يشيل
عمر / لو فاكر ان عيل امه هتجهزه احسن منك تبقى غلطان و لو مقتنع بده تبقى اكبر غلطان غلطان فى حق نفسك و غلطان فى حقها عشان انت فرطت فيها
على / تعرف تنام
عمر / اعرف بس انت هتعرف ؟؟؟
على / انت عاوز ايه يا عمر
عمر / عاوزك مبسوط يا على عاوزك تتحرك يابنى ... ياربى دانت بطلت السجاير اللى كنت بتقفل تلت علب فى اليوم عالاقل لما عملتلك قال ايه مقروفه مالسجاره
على / لا انا طفيت السجاره لما عملت مقروفه بس بطلت لما عملت ممتاز
عمر / يارب هتنقط هتشل هتفقع على نام مش ناقصك عالمسا
على / احسن احسن
عمر ينام و على يبص عالسقف و يسرح
///////////////////////////////////
من سنتين
على واقف قدام سيخ الشاورما بيعمل سندوتشات و ينتبه على صوت دحكه بناتى عاليه قريبه منه يبص يلاقى ندي بتدحك هى و تلاته صحباتها
ندى / يخرب عقلك انتى مسخره
بنت 1/ يابنتى انتى بتتكلمى جد و لا بتهزرى
ندى / لا طبعا و لا فالحلم حتى
بنت 2/ ليه يعنى
ندى / عشان انا
على / 25
ندى / انا ... انا
على / اتفضلى
ندى / شكرا
ندى تاخد الكيس و تجرى على صحباتها
بنت 3/ مش كنا جبنا من اى حته تانيه
ندى / عمرها مهتبقى حلوه زى دى يلا بينا بقى نشوف هنروح فين
ندى و البنات يتحركوا و على عينه مع ندى شاب جنبه يزغده
الشاب / اسمها ندى
على / ايه
الشاب / ندى يا علوه بنت الاستاذ مصطفى زغلول اللى فالتانى يا راجل دا الشقه قصاد الشقه ايه انت هتصيع عليا
على / انا مش عارف انت بتتكلم عن مين
الشاب / بقى كدا و ماله انجز انجز خمسه شاورما فراخ فرنساوى بسرعه
على / حاضر
..........................
بالليل شويه
على / هتعوز حاجه يا حج
صاحب المحل / تسلم يا على كفايا عليك كدا
على / سلام انا بقى
على يطلع و فى ايده كيسه يدخل اوضته يلاقى عمر بيزاكر
على / العشا
عمر / تسلم ايدك والله كنت جعان
على / هطلع اشرب سجاره و ارجع
عمر / مش هتاكل
على / مش جعان
عمر / هعينلك منابك
على يطلع البلكونه و يحط سجاره فبقه و لسه هيولعها يسمع صوت صريخ يبص عالصوت يلاقى بنت فى الشارع بتصرخ و بتبص لفوق يبص لفوق يلاقى ندى كانت هتقع و هى بتحدف مفتاح للبنت اللى فالشارع و نايمه عالسور و ماسكه بايدها الترابيزين و بالايد التانيه حبل الغسيل و تعدل نفسها و بايدها ترفع شعرها من على وشها و تبص تلاقى على السجاره وقعت من بقه و مخضوض عليها تشاورله هاى لا ارادى يشاور زيها تشاور على بقه و بصوابعها على طرفين بقها ادحك يبتسم تعمله ممتاز بايدها و تشاورله باى و تدخل و هو بيعمل باى
///////////////////////////////////
على يتقلب و ينام
...............................
بعد فتره
وقت زحمه و على مشغول فى الشغل يبص بعيد يلاقى ندى واقفه بتبصله تبتسمله يفضل باصص تعمل تلاته بايدها يهز راسه حاضر يعمل السندوتشات و هو مبتسم عالاخر و يحطهم فكيس و يستاذن من الزحمه اللى حواليه
ندى / مش عارفه اشكرك ازاى انت هتدخل الجنه حدف انا قولت مستحيل هوصل
على باصصلها و مبتسم و هى تاخد الكيس و تمشى و هو عينه عليها لحد متدخل العماره و يرجع شغله تانى
..............................
فى الشارع بتاع أية تحت بيتها محل موبايلات و الراجل اللى كان بيضرب عمر واقف فيه و عمر واقف الناحيه التانيه بيبص عليه و عينه مليانه دموع يبص فوق يلاقى أية واقفه بتبص عليه يرفع عينه و يبصلها و يمشى تقعد فى ارض البلكونه بتعيط
.......................................
بعد فتره فى المحل
صاحب المحل بيتكلم مع ابو ندى
صاحب المحل / يا راجل كل ده عشان جالها تجاره طب تدفع كام و اقولك خبر بمليون جنيه
مصطفى / والله انت فايق و رايق دانا دفعت دم قلبى فى مصاريف الدروس و فى الاخر تجاره
صاحب المحل / الله نصيبها كدا و خير مين قالك ان نصيبها و حش ما عندك عمر اخو على
صاحب المحل يشاور على على و هو بيشتغل
صاحب المحل / لسه متعين السنادى معيد فى تجاره دفعه السنه اللى فاتت
مصطفى / ايوه بس
صاحب المحل / استنى استنى ... على يا على
على يسيب اللى فى ايده و يروحلهم
صاحب المحل / بقولك يا علوه عاوز منك خدمه
على / اؤمرنى
صاحب المحل / الاستاذه ندى بنت الاستاذ مصطفى دخلت تجاره كنت عاوزك توصى عموره عليها
على / بجد !!! ينهار ابيض دانا اوصيه و اوصيه و اوصيه كمان
مصطفى / تسلم يا على
على / حضرتك بس تؤمر والله تؤمر
مصطفى / كتر خيرك هستاذنك انا بقى
على / ثوانى ثوانى
على يجرى يحط تلت سندوتشات فى كيس و يجيلهم لمصطفى بسرعه
مصطفى / ايه ده
على / والله مهم راجعين اقسم بالله مهم راجعين
مصطفى / ايوه بس
على / متقول حاجه يا حج
صاحب المحل / خلاص بقى يا مصطفى خدهم للانسه ندى انا عارف انها بتحبها
مصطفى / بتحبها بس دى مدمنه داحنا هندخلها مصحه قريب تتعالج مالشاورما بتاعتكوا دى
صاحب المحل / ههههههههههههههههههه انت ناوى تخرب بيتى بقى
مصطفى / انا اقدر سلام ... شكرا يا على ... صح على
على / على اه حضرتك على ... على
مصطفى يهز راسه و يمشى يروح
صاحب المحل / نهار ابيض الراجل خد الشاورما و نسى الفول و الطعميه العشا
على / انا هطلعهمله بعد اذنك
على يخطف الكيس و يطلع يجرى ورا الراجل يقف باب الشقه و يعدل هدومه و يضرب الجرس و يقف و هو بينهج و متوتر ندى تفتح الباب يتنح بتاكل ساندوتش شاورما و هى مبتسماله و هو متنح
ندى / لو جاى تاخد الشاورما انسى انا خلاص كلتها
على / ههههههههه الف هنا اجيبلك تانى
ندى / ههههههههههه
على / ال... العشا ... بابا ... هههههههههههههههه
مصطفى يطلع من جوه
مصطفى / مين يا ندى ... على ازيك اتفضل
على / حضرتك نسيت الكيس ده تحت
مصطفى / تعبت نفسك والله من ساعه ما دخلت الشقه و انا حاسس انى ناسى حاجه ههههههههههههههه
على يبص على ندى و هى بتدحكله
على / طب .... طب انا بقى يعنى .
مصطفى / ادخل اتعشى معانا
على / الف شكر الف شكر عن اذنكوا ... اسف انا اسف
على ينزل السلم و كل شويه يبص على ندى اللى بتقفل الباب بالراحه خالص
/////////////////////////////////
من اربع سنين
فى شارع مامه على ... على مروح و شايل كيس ساندوتشات يبص يلاقى ناس متجمعين و بنت 18 سنه غرقانه دم واقفه على سور البلكونه فى الدور الرابع و عماله تعيط كيس السندوتشات يقع منه و السندوتشات تتبعتر فى الارض و يجرى علي البيت البنت تشاورله باى و ترمى نفسها يقع على الارض على ركبه فنص الشارع عربيه تفرمل جنبه بالظبط و هو مصدوم ماللى حصل
////////////////////////
على يقوم مفزوع
على / لااااااااااااااااااااااااا
عمر / على على
عمر يجرى عليه و يناوله ميه على بيعيط
عمر / انسى بقى يا على انسى هتفضل فى الكابوس ده لحد امتى
على يبصله باستغراب و يقوم يدخل الحمام و يقفل على نفسه عمر يقف على باب الحمام واحد من اللى معاهم فى الشقه يدخل
الشاب / هو كويس
عمر / صحيناك معلش
الشاب / الله يعينه على اللى هو فيه تصبحوا على خير
الشاب يمشى و على يطلع من الحمام و راسه غرقانه ميه
عمر / انت كويس
على يهز راسه و يدخل ينام على السرير
عمر / ممكن انام جنبك
على يستاخر جوه و عمر ينام جنبه
على / متسالى فى الكليه ينفع اكمل دراستى و لا لا يا عمر
عمر / ههههههههههههههه
على / انت بتدحك على ايه يا جزمه انت قوم من جنبى
عمر / انت عاوز تكمل عشان كلامى اللى قولته قبل كدا و لا عشان ندى دخلت تجاره
على / مهو الكلام اللى قولته انت كان انى اكمل عشان ندى
عمر / تصدق صح هات بوسه بقى
على / هات
عمر / اوعى كدا الله يقرفك
على / هههههههههههههههههه
عمر / انا بحبك اوى يا على
على / و انا كمان يا عمر ... دانا مليش فى الدنيا غيرك ياله
عمر يروح ينام فى سريره
............................
فى شقه ندى بعد فتره
الست / مين مى منير اللى على موبايلك دى
مصطفي / انتى بتفتشى فموبايلى و لا ايه
الست / ازاى ميصحش لكن يصح انها كل مره تتصل بيك تنزل تجرى و تروحلها مش كدا
مصطفى  / ان كان عاجبك
الست / و ان مكانش عاجبنى
مصطفى  / الباب يفوت مليون جمل
الست / دى اخرتها يعنى
مصطفى / بصى انا مش ناقص وجع دماغ اقولك انا سيبهالك و نازل
الست / مانتش نازل يا مصطفى
مصطفى / و انتي بقى اللى هتمنعيني
الست / اه همنعك انا من حقى امنعك
مصطفى يزقها تقع فى الارض و يفتح الباب و يمشى ندى تطلع من اوضتها وتقوم مامتها من على الارض و هى بتعيط مامتها تسيبها و تدخل اوضتها و تقفل على نفسها الباب
.............................
بعد فتره فى الكليه عند عمر
فى اوضه المعيدين عمر قاعد مع شاب اكبر منه
عمر / هههههههههههه مالموضوع طلع سهل اهو امال فى ايه بقى
الشاب / هههههههههههه اى خدعه يا عم كمل انت بقى انا ماشى عاوز حاجه
عمر / متحرمش
الشاب يمشى و تدخل معيده شابه فى سن عمر و تقعد و هى بتنفخ
عمر / للدرجادى
البنت / سبنى فى حالى بالله عليك يا عمر
عمر  يبصلها و هى بتبص الناحيه التانيه و بعدين تبصله
البنت / طب هشهدك
عمر / و انا سامعك
البنت / طلبت من مروه تخلينى انقل التحضير بتاعها تقوم تبصلى من فوق لتحت و تقولى التحضير ده لازم يعبر عن تفكيرك و دماغك و تسيبنى و تمشى
عمر / دا اللى مدايقك اوى كدا
البنت / هى يعنى اول ما اتعينت عرفت تحضر لوحدها من اول مره يعنى و لا فى حد ساعدها
عمر / طب هدى نفسك خدى تحضيرى انا
البنت / انت لحقت تحضر
عمر / هههههههههههههههههههه انتى هتنقى عليا و لا ايه هتنقلى و لا لا
البنت / و الله و رخصت يا تفاح الله يرحم ايام مكنت بصورلك السكاشن و المحاضرات و تنقلهم انت منى
عمر / هههههههههههه الله الله الله انتى هتعايرينى من اولها خلاص ياختى خدى انقلى و نبقى خالصين
البنت / هههههههههههههههههه شكرا يا سيدى
عمر / بقولك ايه انا جعان هروح اجيب بسكوت و لا حاجه
البنت / و على ايه اقعد اقعد انا جايبه سندوتشات من البيت استنى
البنت تطلع لانش بوكس من شنطتها و تفتحه متقسم نص سندوتشات و ربع تفاح متقطع و ربع شرايح خيار و جزر و تطلع ترمس صغير من شنطتها غطاه على شكل كبايه و تجيب المج بتاعها من جنبها و تصب فيهم و تطلع ازازه ميه و تحطها
عمر / هى الشنطه دى منفده عالمطبخ عندكوا و لا ايه ... فى ايه تانى جوه
البنت / هههههههههههههههههه فى مناديل و شاحن الموبايل و الموبايل و المحفظه و ...
عمر / كفايا أية هى شنطه على بابا
البنت / استنى استنى لقيت بسكوت كمان يلا كدا فطار محترم
عمر / انا عاوز شنطه زى دى
البنت / هههههههههههههههه شوف انا معاك بقالى كام سنه مفيش حد قدر يدحكنى زيك يا عمر
عمر / طب هناكل و لا هنقعد نتفرج عالاكل ده و لا ايه
البنت / ههههههههههههههههههه ازاى اتفضل يا سيدى الف هنا
عمر يشد كرسى و يقعد جنبها ياكل معاها
......................................
بعد فتره عند الكافيتريا فى الكليه عند عمر
على بيتكلم فى التليفون و فايده كبايه شاى
على / يابنى انا بقالى ساعه مستنى عند ام الكافيتريا دى انت فانهى داه....
حد يخبط على من ورا الشاى يقع على ايده يلسعه الموبايل يقع فى الارض يمسك كبايه الشاى بالايد التانيه يوطى يجيب الموبايل صوت من وراه
ندى / انا اسفه والله انا اسفه جدا هى اللى زقتنى بجد سورى اوى انا اسفه هو اتكسر
على يبص يلاقيها ندى
ندى / انت ... هههههههههه انت اشتغلت هنا
على / احم لا لا انا بدرس هنا
ندى / انت بتشتغلنى .... لا .... بتتكلم جد .... واو بجد انا كنت فكراك كبير
عمر يدخل
عمر / اخيرا لقيتك ... اوووه اهلا
ندى / هاى ... سورى تانى بجد سلام
ندى تمشى و تشاور لعلى باى يشاور لا ارادى لحد متختفى من قدام علينه
على / انت ايه اللى جابك يا زفت انت دلوقت
عمر / لا يا شيخ بجد !!! طب تصدق انا الغلطان يلا يا ياض من هنا
على / خلاص خلاص جبت الورق
عمر / جبت الزفت خد خساره فيك كنت سبتك تدوخ ... و لا على ايه كفايا اللى انت فيه الله يعينك
على / انا يادوب ارجع الشغل سلام
على يشاور لتاكس و يركب قدام و اول مالتاكس يبدا يتحرك يلاقى ندى و صاحبتها واقفين بيوقفوا تاكس على يطلع فلوس و يديها للسواق
على / وصلهم هما ... شكرا
السواق يركن جنب البنات و على ينزل و يفتح الباب الورانى و يمشى و ندى بصاله
السواق / يا استاذه هتركبى ؟؟؟ عشان الطريق
ندى و البنات يركبوا
........................
عند البيت
ندى تيجى تدى السواق فلوس
السواق / الاستاذ اللى كان راكب حاسب
ندى تفكر ثوانى
ندى / شكرا
ندى تنزل مالتاكس و تروح تبص على على متلاقيهوش لسه وصل تطلع شقتها و تقف فى البلكونه شويه و ينزل من تاكس و يطلع شقته ندى تجرى تدخل المطبخ تلاقى مامتها بتعمل الغدى
ندى / ماما انا جعانه
مامتها / ثوانى و الاكل يكون جاهز
ندى / لا انا مش هستنى هنزل اجيب ساندوتش اتصبر بيه
مامتها / انتى من كتر الشاورما هتبقى شبه السيخ
ندى / هههههههههههههههههههه مش هتاخر
ندى تنزل تاخد المحفظه و تنزل تجرى تشوف على خارج من العماره تجرى عليه قدام البوابه يقف
ندى / انت تحاسبلى بمناسبه ايه هاه ؟؟؟
...................................
على / انا ... انا
ندى / امسك فلوسك
على يبصلها
ندى / امسك
على ياخد الفلوس بحزن ندى تبتسم يستغرب و تطلع شقتها و تجرى و على ماسك الفلوس و مستغرب لحد ميشوف ندى واقفه فى البلكونه بتبص عليه و هو واقف فى مكانه يحط الفلوس فجيبه و يروح يشتغل و هو مدايق ندى فوق تنفخ و تدخل لمامتها
مامتها / ايه فين الشاورما
ندى / لقيت الواد التانى هو اللى واقف عليها و الواد ده بخيل بيلحس الساندوتشات
مامتها / على العموم متزعليش نفسك انا خلصت الاكل
ندى تغرف
ندى / انا هاكل فى البلكونه تراوه
ندى تاخد الطبق و تفضل واقفه تبص على على و هو بيشتغل
.........................
بالليل فى اوضه على
عمر / انا هغسل عندك حاجه اخدها معايا
على / اه ثوانى
على يقوم يجيب هدوم من ورا الدولاب و يمسك البنطلون و يطلع منه الفلوس و المحفظه و يحطهم فى درج الكومدينو و يدى لعمر البنطلون و يروح ينام مكانه عالسرير
عمر / انت كويس يا على
على / يا اخى البنات دول ايه مفيش دم خالص كدا
عمر / بنات مين هو ايه اللى حصل
على / ياعم كنت راكب تاكس و مروح لقيتها واقفه محتاسه هى و صحباتها نزلت مالتاكس و حاسبت جايه تتخانق معايا و تدينى الفلوس
عمر / هههههههههههههههههههه
على / انت بتدحك طب انت لو مكانى كنت هتعمل ايه
عمر / مش عارف
على / قفلتلى اليوم والله
عمر / بقولك ايه كبر مخك
عمر ياخد الهدوم يروح يحطها فى الغساله و يجى يجيب المسحوق يلاقى العلبه فاضيه
عمر / اووووف
عمر يدخل الاوضه و يفتح المحفظه و يبص لعلى بيلعب فى الموبايل
عمر / على معاك فكه انزل اجيب مسحوق بدل مفك
على / خد من الدرج اللى انت عاوزه
عمر يفتح الدرج يلاقى المحفظه و الفلوس اللى ندى ادتها لعلى بتطبيقتها ياخدها و ينزل
.............................