سلف و دين بقلم /لولو_محمد

الحلقه ٣٣

(((((((( سلف و دين ))))))))
#لولو_محمد
الحلقه ٣٣
عمر / ما الها الاهرامات يعنى هاه ما الها ردى عليها ما الها اثار و فرعونيه و حاجه تبهر برده
غاده / انت بتقارن ايه بايه يا سيدى اعتبر نفسك بتتفسح
عمر / قلتلك مليون مره ما تشغليش دماغك دى هتشحطتنا
غاده /والله طب تصدق كلمه كمان و هنقل الاقامه لاقصر و اهو اثار و فرعونيه و روح اتحرق براحتك بقى يا عمر
عمر / ربنا على القوى ماشى هيوصلوا امتى
غاده / كمان اسبوعين
عمر / بسرعه كدا
غاده / احنا هنتامر خلينا نمضى و ننجز
عمر / طب خلاص ما تكركبيهاش فوق دماغى هشوف ظروفى
غاده / ظروف ايه انا كلمت دكتور سعيد هيغطى غيابنا طول الاسبوع الجاى
عمر / بتهزرى
غاده / هو انا بلعب و لا ايه كدا ما لكش حجه جاى يعنى جاى يلا انا لازم اقوم بقى عشان عندي مشوار مهم
عمر / سلام
غاده / ايه ده مش هتسالنى فين
......................
عمر / انا عمر مش غاده
غاده / يا رخم برده هقولك فاكر البت صافى اللى كانت معانا فى الدفعه
عمر / ما لها
غاده /حنتها النهرده و هنروح نروش
عمر / عقبالك
غاده / كان نفسى اقولك تعال معايا بس دى جيرلز اونلى و هنولعها
عمر / هههههههههههههههههههه ماشى يا ستى الله يسهلوا
غاده / سلام
................................
فى شقه نهاد
مروان قاعد هيطق نهاد تدخل مدلعه على الاخر و فى ايدها صينيه عليها عصير
نهاد / اشرب روق اعصابك
مروان / اللى يحصل يحصل بقى
نهاد / للدرجادى خايف على زعلها
مروان / لا مش قصدى بس يعنى انتى فاهمه زى ما دخلنا بالمعروف نخرج بالمعروف انا بس اللى هيجننى مين ابن الكلب اللى بعتلها الرساله دى
نهاد /  اهدى بس اعصابك
مروان / اما لو وقع تحت ايدى ابن الحرام ده والله شوفى والله
نهاد / مروان اهدى
نهاد تقعد على ايد الكرسى اللى مروان قاعد عليه و تحط ايديها على وشه و مروان يبصلها تليفون مروان يرن نهاد تبتسم و تقوم تجيبه و تديهوله
مروان / ماما ........ الو ايوه يا ماما  ............. ممكن بس تهدى .......... مسافه السكه و هجيلك ............. سلام
مروان يرزع التليفون على الترابيزه و هو بينفخ
نهاد / انت عارف انى ممكن اخرجك من الموضوع ده فى ثانيه
مروان / ازاى
نهاد / بسيطه اهدى بس و انا هقولك
...............................
فى شقه عمر
عمر يدخل يلاقى النور مطفى و الكل نايم يغير هدومه و ينام بالراحه أية تقلق
أية / انت جيت امتى احطلك تتعشى
عمر / تسلمى انا عاوز انام
عمر ينام و أية تنام فى حضنه
عمر / انا فكرت فى موضوع الفرح يا أية
أية / بص يا عمر انا مش فارق معايا انا فكرت و مش عاوزاه
عمر / بجد
أية / انا بس عوزاك جنبى والله مش فارق معايا حد تانى و لا حاجه تانيه
عمر / انا هسافر الغردقه كمان اسبوعين
أية / الغردقه ؟؟؟
عمر / اه صفقه مهمه و انا شغال عليها بقالى فتره و فى فوج ايطالى هيجى من بره و لازم اكون موجود استقبله
أية / و هتقعد اد ايه
عمر / اسبوع
أية / هتسبنى لوحدى اسبوع
عمر / ليه هى امك هتروح فين
أية / تروح و تيجى بالسلامه
عمر / لو ما كانتش فتره المراجعه و كدا كنت خدتك معايا على فكره
أية / غاده جايه مش كدا
عمر / اكيد
أية / ربنا يوفقك
عمر / هدوئك قالقنى
أية / المفروض اتنرفز و اتعصب مش كدا
عمر / الطبيعى بتاعك
أية / و انت تجرحنى او تقلل منى مش كدا
عمر يبصلها و يسكت
أية / تصبح على خير يا عمر
أية تحط راسها على صدر عمر و تغمض عينها و عمر ثوانى و يقوم و هى بتبص عليه لحد ما يخرج من الاوضه تخرج وراه تلاقيه طلع وقف فى البلكونه
...............................
عند ندى تانى يوم
حسام يفتح باب اوضه ندى يلاقيها قاعده على السرير مقرفصه وواخده ركبها فى حضنها و بتعيط يروح يقعد جنبها
حسام / مالك قاعده كدا ليه
ندى ما تردش
حسام / كنتى عاوزه تنزلى مصر
ندى تبصله
حسام / انا هنزل مصر تحبى تيجى
ندى / انت بتتكلم جد يا حسام و لا بتعشمنى زى كل مره انا ما عدتش مستحمله
حسام / نور متخانقه مع جوزها خناقه كبيره اوى و غلط فى ماما و الموضوع شكله ابن كلب هيخلص على طلاق
ندى / البت اياها برده
حسام / اه بس المرادى وسعت منه ما عرفش يلمها
ندى / اتلم المتعوس على خايب الرجا
حسام / انا كان ممكن اسافر من بره بره و ارجع و اسيبك هنا على فكره
ندى تبصله
حسام / بس انا شايفك عقلتى اخيرا
حسام يعدى ايده من على شعر ندى تبعدها و تقوم تقف فى جنب يروح وراها
حسام / كانوا بيقولوا زمان البت بتاخد من جمال امها بس واضح انها ما اثرتش عليكى خالص واضح انك بتحلوى كل يوم عن اللى قبله
حسام يقف فى ضهرها و يبوسها من رقبتها تبعد عنه
ندى / انت بتعمل ايه ما تبطل قرف بقى يا اخى انت ايه
حسام / و انا اللى جاى و فكرك عقلتى
ندى / انا ابقى مجنونه لو طاوعتك لو فاكر انى ممكن استسلملك تبقى غلطان الطريقه الوحيده اللى هتطولنى بيها هى غصب عنى عشان اللى زيك ما ينفعش غير انه يكون حرامى
حسام / الله ما البوليس جالك لحد عندك ما بلغتيش عنى ليه  ايه خفتى يحبسوكى الا قوليلى السجن اهون و لا مستشفى المجانين اهون يا ندى خفتى من انهى اكتر ايه اللى سكتك فيهم
ندى / حسام ممكن اسالك سؤال بجد
حسام / اتفضلى
ندى / هو فى اوطى من كدا و لا كدا خلاص
حسام / ماشى انا هنزل مصر بكره و انتى خليكى هنا و فكرى فى سؤالك ده براحتك
ندى / كنت متاكده انك مش هتقولى تنزلى مصر من غير مقابل على العموم انت لازم تفهم ان على قد ما انا زعلانه عشان نور لازم تفهم ان ده حقى منك ربنا بيخلصه بس للاسف بيخلصه من اختك اللى ذنبها الوحيد فى الدنيا انها اختك زى ما ذنبى الوحيد انك ابن عمى اتفو عليك
حسام يسقف / حفظتيها لوحدك و لا حد ساعدك انا داخل انام هسيب باب الاوضه مفتوح يمكن تعيدى التفكير تانى  تصبحى على خير
حسام يمشى ندى تمسك الاباجوره و تحدفها وراه تتكسر ميه حته و هى بتصرخ و تقعد تعيط
.....................................
تانى يوم بالليل عند ندى
الست / تروح و تيجى بالسلامه يا سى حسام
حسام / عينك عليها
الست / فى عينى والله يا سى حسام
حسام / اقسم بالله لو اللى حصل و انا فى لبنان اتكرر تانى لتشوفى منى اللى عمرك ما شوفتيه
الست / والله ابدا انت هتمشى من هنا و انا هتربس كل الابواب
حسام / اتاكدى ان فى فى تلاجتها اكل و ميه و عصير و فاكهه مش عاوز يبقى ناقصها حاجه
الست / والله جبت كل حاجه النهرده الصبح و ما ليت التلاجات اكل يكفى تلت ايام هو انت هتتاخر اكتر من كدا
حسام / ان شاء الله لا
حسام يبص على باب اوضه ندى يلاقيه موارب و هى واقفه وراه
حسام / مع السلامه يا حوبى
ندى ترزع الباب حسام يضحك و ياخد شنطته و يمشى
.................................
تانى يوم فى الشركه عند غاده
غاده / مالك يا عمر مش مركز خالص تعبت كفايه و نروح
عمر / انا قررت انى هسافر معاكوا الغردقه
غاده / دا على اساس ان ما كانش ينفع تسافر اصلا مش بمزاجك يابنى
عمر / انا محتاج اوى افصل عن هنا
غاده / ليه فى ايه خير مالك
عمر / مفيش بس محتاج اقعد مع نفسى شويه بعيد عن كووووووول الهم ده
غاده / اى تولد يو على فكره انا قولتلك ان كل ده هيحصل بس انت ما سمعتش
عمر / تصدقى بعد الجمله دى هفكر تانى فى موضوع السفر ده
غاده / اه الاوفر ده هو انت هتسافر روسيا دى سهل حشيش
عمر / هى حصلت للحشيش يا غاده
غاده / قوم روح يا عمر قوم
عمر / هههههههههههههههههههههههههههه ما انا مروح فعلا هو انا هبات هنا
غاده تبتسم و تلم حاجتها و تقوم هى و عمر
...................................
تانى يوم الصبح فى شقه نور
باب الشقه يخبط محمد يروح يفتح يلاقى حسام شايل شنطه صغيره ياخده بالحضن
محمد / اهلا اهلا ايه المفاجاه الحلوه دى ادخل ادخل ما قولتش ليه انك جاى كنت روحت خدتك من المطار
حسام / مش مستهله يعنى امال فين نونو و ماما مش سامعلهم حس
محمد / نايمين يا سيدى ما انت عارفهم
باب اوضه يتفتح و نور تطلع تجرى على حسام تحضنه
نور / حسام انت جيت
حسام / و هو انا عندى اغلى منك يا بت
نور / الله امال ندى فين
محمد / صحيح ندى فين
حسام يقعد على اقرب كرسى
نور / فى ايه يا حسام
حسام / ندي الدكتور ما انعها من السفر قبل الولاده و طبعا زعلانه منى اخر زعل
محمد / هى لسه بتقول الهبل ده
حسام / هبل ايه
محمد / انت عارف اللى قالتهولى فى التليفون
حسام / هههههههههههههههههههههههههه يا بابا يعنى هو دا كلام يدخل العقل دا اى بتنجان عشان ترجع مصر دا انا كنت حجزتلها تزاكر السفر فعلا و قولت هسفرها و تانى يوم راحت المستشفى فاكره يا نور
نور / اه فاكره دا احنا اتخضينا عليها اوى
حسام / الدكتور لما شافها قالها مش هينفع تنزل و دى بقى ما اقولكوش ما ينفعش اولد بعيد عن ماما و حوار دى مخصمانى من اول امبارح و بتنام فى الاوضه التانيه قال ايه هاتلى ماما و انت جاى يا اما ما ترجعش
محمد / معزوره يابنى
حسام / معزوره ايه يا بابا بالله عليك تسبنى فى حالى انا مخنوق بما فيه الكفايه مشاكل فى الشغل و مشاكل فى البيت انا اصلا نويت ندى تولد و انزل مصر بلا غربه بلا قرف اقسم بالله لولا انى خايف يجرالها حاجه فى السفر كنت نزلت
نور / للدرجادى يا حسام
حسام / يا بنتى حاجه قرف و اسافين طول الوقت تخيلى صاحبى اللى معايا رجل برجل من يوم ما سافرت خدت ندى تتعرف على مراته و اهو ما تبقاش لوحدها و كدا
نور / و بعدين
حسام / عينك ما تشوف الا النور يوميها روحنا اتخانقنا قال ايه انا ما كنتش بسيب دبانه تعدى الا لما اصاحبها
محمد / ههههههههههههههههههههههههه
حسام / و انا لو كنت بفهم فى البنات كنت اتجوزت بالسرعه دى طب دا انا حمار شغل و اقولها يا ستى لنفرض ان ده صح ما انا اتجوزتك دلوقت تقولى يعنى بتعترف
نور / طب والله بت عسل
حسام / هو انا بحبها من شويه
نور / بس ما كانش يصح ابدا تسيبها لوحدها و ترجع يا حسام هى ما لهاش غيرك هناك و تعبانه تقوم تسيبها لوحدها
حسام / و المفروض اعمل ايه يا نور اسيبك فى الظروف دى
محمد / لا يابنى بس مراتك اولى
حسام / على العموم انا قاطع تزكره رايح جاى هما تلت ايام بالعدد باذن الله هشوف الحوار ده و اخلصه و ارجعلها
نور / حسام هى بجد ندى تعبانه
حسام / اقولك ايه بس تعرفى لو الدكتور قال ان السفر خطر على البيبى كنت سفرتها و قولت مش مشكله ربنا يعوضنا بس دا اكدلى ان السفر خطر على حياتها هى
محمد / و لا  هى و لا البيبى يا حسام ما تقولش كدا باذن الله خير اصلا مستشفيات بره انضف مليون مره و انت هتبقى جنبها هى فاضل اد ايه على الولاده
حسام / اهى فى اخر السادس اهو هانت
نور / باذن الله بنوته صح
حسام / اه باذن الله .... ايه هى ماما فى غيبوبه و لا ايه
نور / هخش اصحيها
حسام / ما لوش لزوم انا هنزل اروح مشوار صغير على ما تصحى و ربنا يستر و التلت ايام دول يعدوا على خير
نور / ليه خير
حسام / ههههههههههههههههههههههههه انتى فاكره عمى و مراته هيعدوا نزولى من غير ندى كدا بالساهل انا ما قولتلهمش اى حاجه عن تعبها
محمد / احنا ممكن ما نقولهمش انك جيت اصلا و تسافر من بره بره
حسام / يا بابا انت طيب اوى زمان ندى اتصلت بيهم و عيطتلهم نزل و سابنى و عملت فيلم
نور / كل ده بسببى
حسام / انا هنزل ساعه زمن ارجع الاقى احلى غدى لحسن بطنى نشفت من اكل السوق و انتى عارفه شطاره مراه اخوكى
نور /هههههههههههههههههههههههه من عنيا تيجي بالسلامه
حسام يقوم و يخرج و نور تقفله على الباب لحد ما ينزل و بعدين تقفل الباب و تروح تقعد مع ابوها و هى مبتسمه
..........................................
فى شقه عمر
أية تدخل اوضتها تلاقى عمر لسه نايم
أية / عمر عمر
عمر يفتح عينه
أية / انت مش ظابط منبه و انا نازله خفت يروح عليك معاد و لا حاجه
عمر / لا ما وراييش حاجه النهرده
أية / طيب نام
عمر / استنى هلبس و اوصلك و لا هتتاخرى
أية / لا لسه قدامى وقت بس
عمر /اعمليلى .... شاى شاى
أية / لا هعملك قهوه
أية تقوم و عمر بيبص عليها و يضحك و يقوم وراها ياخد غيار و يروح الحمام
......................................
فى شقه ندى فى مصر
حسام يركن العربيه قدام العماره و ينزل من العربيه على يشوفه حسام يشاورله و يبتسم و يطلع و على واقف مستغرب و بيدور بعنيه على ندى .... حسام يطلع شقه عمه و يضرب الجرس عمه يفتح
مصطفى / حسام ايه المفاجاه الجامده دى جيت امتى اتفضل اتفضل
حسام يدخل و يقعد و مها تطلع من جوه تجرى
مصطفى / فين ندى
حسام يبص لمها
مها / ندى كويسه مش كدا يا حسام فى ايه ما جاتش معاك ليه يابنى
حسام / كويسه كويسه الحمد لله ما فيهاش حاجه
مها تجرى تقعد جنبه
مها / امال ما جاتش معاك ليه
حسام / اخبار شقتنا ايه يا عمى انا شوفتها قبل ما اجى كنت متخيل هلاقيها خلصانه عن كدا مش دا كلام بابا و لا حضرتك ليا فى التليفون
مها / ما تغيرش الموضوع ندى ما جاتش معاك ليه
مصطفى / هى لسه زعلانه منى
حسام / اكيد طبعا ندى رفضت تنزل مصر
مها / مش ده اللى كانت بتقوله فى التليفون و لا بتقوله لامك
حسام / ايوه عارف ما انا ما خلصتش كلامى ... ندى عاوزه تنزل مصر فى شقتها مش عاوزه تعيش هنا و بصراحه و لا انا اقبل انها تقعد هنا
مصطفى / مش فاهم حاجه
حسام / ندى رافضه تقعد مع والدتى فى شقتنا و انا رافض انها تعيش فى الشقه هنا فنزلت اشوف وصلنا لفين عشان ننزل على شقتنا
مها / و مالها شقتنا يا حسام
حسام / زى الفل بس مش عشان انا و ندى اتجوزنا و هى حامل هننسى بسهوله هى شافت ايه هنا و مش بس بتكلم عن زعلها من عمى  انا بتكلم عن مشاعرى لو شفتها فى يوم واقفه فى البلكونه و لا بتبص من الشباك و لا حتى رده فعلى لو شوفت الكلب ده بيبص عليها و بيتهيالى ده حقى
مها / يعنى انت سبتها لوحدها هناك ده اللى بتحاول تقوله
حسام / هى اللى ما رضيتش تنزل بس مش ده الموضوع
مصطفى / لا ده الموضوع ده الموضوع انت نزلت مصر من غيرها سبتها لوحدها هناك
حسام / انا نزلت تلت ايام بس عشان احل مشكله نور
مها / مالها نور
مصطفى / وقته يا مها خلينا الاول فى ندي
مها / ايوه صح انت عاوز تقنعنى انى مش وحشاها و انها مش عاوزه تشوفنى يا سيدى اقعدوا فى فندق زى شهر العسل دول تلت ايام
حسام / تشوف امها اللى كانت بتحطلها المخدر فى العصير مش كدا
مصطفى / انت قولتلها
حسام / ندى مش هبله استنتجت كل حاجه مع الوقت
مصطفى / و انت قلتلها
حسام / ما كانش ينفع اجازف انى اخسرها
مها / يعنى بقينا احنا الشياطين و انت الملاك كل ده كان فكرتك
حسام / صح...يا ندى كل ده كان فكرتى ..عشان تكرهنى انا كمان ساعتها هيبقالها مين
مصطفى / ما كانش المفروض اسمعلك من الاول
حسام / انا ليه ما حدش فاهمنى هنا انا ما غصبتكوش على اللى عملناه كلنا اشتركنا سوا و بعدين ندى مش هتفضل زعلانه علاطول انا بس بقول انها هتحتاج وقت و انا زى ما قولتلك يا عمتى فى التليفون انا نويت ارجع نهائى خلاص
مها / و ايه اللى مانعك
حسام / الفلوس اكيد الفلوس انا ما كنتش عامل حسابى على كل المصاريف دى انا كنت ناوى اخطب و ارجع اتجوزت و عملت الفرح و سبت فلوس لتوضيب الشقه و شهر العسل و السفر و الفسح عشان اغير مودها و اخرجها من الحاله اللى كانت فيها و الحمل و مصاريفه و السكن هناك و الخدامه كل دى مصاريف فى وقت قليل جدا
صمت ثوانى
حسام / ليه مفيش شغل فى الشقه يا عمى
مصطفى يقعد قدام حسام و هو ساكت
حسام / الشقه كانت محتاجه وقت اطول من ست شهور يا عمى عشان تخلص
مصطفى / الفلوس اللى كنت سايبها خلصت
حسام / ازاى ليه دا انا لو كنت اشتريت شقه جديده بالفلوس دى يوميها كان زمانى بايعها دلوقت و كسبان فيها دانا حتى سبت فلوس تكفى حتى الفرش و الحاجات اللى اصلا بتبقى على العروسه
مصطفى / قصدك ايه
حسام / انا ما اقصدش حاجه انا بس عاوز افهم سيراميك و بياض و شويه عفش هيتكلف كام
مصطفى / و كهربا و سباكه و اجهزه كهربائيه و فرش خش شوف اوضه ندى مليانه حاجات قد ايه خش شوف بنفسك هو انا هسرقك مثلا و لا ايه
حسام / لا ما اقدش بس احنا مش بنفرش فيلا مثلا
مها تقوم و تدخل جوه و مصطفى و حسام يكملوا كلامهم
مصطفى / كل جنيه اتصرف كان على يد مامتك مفيش اشايه اشتريناها الا لما كان زوق مامتك فيها قبل زوق مها هى اللى نقت الاجهزه و هى اللى نقت الحمام و المطبخ و هى اللى نقت النجف مها ما نزلتش يوم لوحدها تشترى حاجه
حسام / الخلاصه الشقه هتخلص امتى
مها تطلع من جوه و شايله شكماجيه صغيره و تديها لحسام بعنف
مها / انا كنت عاينه حتتين دهب عشان ابيعهم و اجهز بيهم ندى
حسام / عمتى
مها / اخرس خدهم بيعهم و شوف يطلعوا بكام و كمل الشقه دى انا ما قولتش لامك تجيب تلاجه ببابين و لا قولتلها تجيب عمتك و بنتها و ينقوا اغلى حاجه انا ما انكرش انى كنت فرحانه ان بنتى بيجيلها احلى حاجه بس ما احناش حراميه و لا بنسرق فلوسك انا كنت هجهز بنتى على قدى انت اللى قولت انك عاوزلها احسن حاجه انت اللى قولت
حسام / و انا فعلا عاوزلها احسن حاجه انا ما رجعتش فى كلامى
مها / قولتلك اسكت
حسام / لا مش هسكت انا شارى ندى و مستعد اعمل عشانها اكتر و لو هعيش عمرى كله بحفر فى الصخر عشان اجيبلها كل اللى بتحلم بيه هعمل كدا و اكتر
مها / اعمل احفر فى الصخر و هاتلها و افتكر يا ابن امانى انك لو عشت عمرك كلو تحفر فى الصخر قليل اوى على ندى
مصطفى / اهدى يا مها
مها / كل جنيه اتصرف كان على ايد اهلك ما سالتهمش قبل ما تيجى تحاسبنا كاننا حراميه ليه مفيش جنيه من فلوسك اتصرف فى البيت هنا انت فاهم و لا لا
حسام / انا اسف يا عمتى لو كنتى فهمتيني غلط انا بس مستعجل على نزول ندى مصر عشان الولاده و مفيش وقت هما تلت شهور بالكتير ان ما كانش شهر و عملتها و جابتها بنت سبعه
مصطفى / انا مقدر يابنى
مها / ادينى حليتلك المشكله و اهو كدا احسن على الاقل ما حدش يعاير ندى بعدين و يقول انها اتجوزت ببلاش
حسام / ما عاش و لا كان اللى يكلم ندى ربع كلمه يا عمتى
مها / بيع الدهب اللى معاك و ادى الفلوس لابوك و خليه يكمل الشقه كدا كدا كل اللى على العروسه جبناه الحمد لله الباقى يستغلوا يسترخصوا اهو فى بيتك
حسام / و مين قال انى ممكن اقبل باقل من احسن حاجه لندى
مها / امال انت عاوز ايه سايب بنتى هناك لوحدها حامل و جاى تحاسبنا ليه لو فاكر ان الفلوس هتعجزنى عن انى اشوف بنتى تبقى غلطان انا امنتك عليها امنتك انت
مصطفى / مها
حسام / و انا ما قصرتش
مصطفى / اهدى يا حسام
حسام / انا مقدر والله و عارف هى حاسه بايه انا نزلت عشان نور عندها مشكله مع جوزها و احتمال تطلق و بعد بكره الفجر هكون راكب الطياره و راجع لندى و انا مش سايبها لوحدها معاها خدامه بتاخد بالها منها كويس اوى انا مش اهبل عشان اسيب مراتى و بنتى و لو حضرتك فاكره ان عقلى مش مشغول بندى فى كل ثانيه بتعدى يبقى حضرتك بتظلمينى و انا اسف تانى على انفعالى انا غلطت ياريت حضرتك تقدرى ان على عينى انى اضطر اسيب ندى لوحدها فى الظروف دى 
مصطفى / حصل خير يابنى انا فاهمك و انت ما غلطتش ده حقك
حسام / على الاقل انا جيت و طمنتكوا على ندى
مها / فين ده فين طمنتنا ازاى و انا ما اعرفش حاجه عن بنتى و انت بتقولى انها لوحدها
حسام / كان مطلوب منى ايه اقسم نفسى نصين اعمل ايه قولولى
مصطفى / بس بقى يا مها
حسام / كان ممكن اجى و اسافر و ما تعرفوش غير لما امشى بس ما يصحش ابقى فى مصر من غير ما اشوفكوا و اسلم عليكوا و لو كنا فى ظروف تانيه كنت جبت ندى و فضلنا التلت ايام معاكوا و لو فى ظروف تانيه كنت سبت ندى و رجعت لحد معاد الولاده او يمكن كنت نزلت نهائى بس انا عاجز مفيش فى ايدى اى حاجه و لو انا قصرت فاقسم بالله غصب عنى
مصطفى / انا مقدر يابنى
حسام / انا لازم امشى و بعتزر تانى عن اى حاجه عن اذنكوا
مها / استنى خد دول معاك
مها تجيب الدهب و تديه لحسام يحطه على الترابيزه
.........................