سلف و دين بقلم /لولو_محمد

الحلقه ٣٧

(((((((( سلف و دين  ))))))))
#لولو_محمد
الحلقه ٣٧
فى الشركه عند مروان تانى يوم
نهاد / سبنى فى حالى عشان انا فاضلى تكه و اولع فى ام الشركه دى باللى فيها
مروان / ليه ايه اللى حصل
نهاد / طبعا ليك حق ما انت من اول ما جيت و انت فى المكتب المكيف الجديد و الناس نازله فيك مباركات
مروان / و ده اللى مضايقك دا بدل ما تباركيلى يا نهى
نهاد / ما انت مش عارف ايه اللى حصل مش حاسس بالمصيبه اللى انا فيها
مروان / ابوس ايدك انا مش ناقص ايه يعنى اللى حصل
نهاد / اجى الشركه الصبح الاقى ياسر الزفت مشطب عليا قال ايه هو اللى مسك مكانك الجزمه نسى نفسه دا من سنتين بس كان لسه متعيين تحت الاختبار و انا اللى بدربه يرقوه و يخلوه الريس بتاعى
مروان / ياسر ياسر الاهطل
نهاد / تخيل انا اصلا ما سكتش جريت على المدير
مروان / طبعا دا هيخربها
……………………
نهاد / بيقولى انتى بتعملى ايه هنا مش قولنا هتستلمى فى اسكندريه و لما قولتله انى مش عاوزه اسافر قعد ساعه يقنعنى انى اسافر و قد ايه انا محتاجه الترقيه دى و انها فى مصلحتى
مروان / و انتى قولتيله ايه
نهاد / ما قولتش انا استاذنت و مشيت طبعا عاوزنى اقول ايه طبعا
مروان / اللى اتفقنا عليه امبارح انك هتكملى فى مكانك
نهاد / بتهزر يا مروان انت عاوزنى اشتغل تحت ياسر الاهطل دا حمار و فاكر نفسه ابو العريف و هو عبيط و برياله
مروان / يعنى قررتى ايه فى الاخر
نهاد / لو ده اسلوب نسايبك عشان يطفشونى من الشركه يبقوا غلطانين على فكره انا ما بستسلمش بالبساطه دى تعرف انا هقدم استقالتى حالا و مش هسافر اسكندريه و يورونى استفادوا ايه
مروان / عين العقل و احنا اصلا كنا متفقين على كدا من الاول
نهاد / انا ياسر الاهطل يبقى ريس عليا لا دى باظت باظت و ظاتت كمان
........................
فى المستشفى عند ندى
ندى تصحى تلاقي حسام قاعد جنبها اول ما تفتح يجرى يقرب منها تنفخ و تبص الناحيه التانيه
ندى / انت ايه اللى جابك بدرى طيارتك لسه بعد بكره
حسام / و هو ينفع اسيبك فى الظروف دى
ندى / اه والله ينفع عادى يعنى
حسام / ان كنتى انتى بترتاحى فى بعدى انا بموت فى بعدك يا ندى
ندى / بتحبنى ازاى و انت انانى بالشكل ده و انت ما بيهمكش مشاعرى و لا راحتى و انت خانقنى و معذبنى انا بس مش عارفه افهم انت عاوز منى ايه
حسام / انا مش عاوز اكتر منك
ندى / و انا عمرى شوف عمرى لو هموت لو انت اخر راجل فى الدنيا عمرى ما هكون ليك
حسام / مسيرك هتغيرى رايك او هموت بحاول
ندى / امين يا شيخ امين ربنا ياخدك و يريح البشريه كلها من شرك كتك مصيبه
حسام / ربنا يسامحك
ندى / نور عامله ايه
حسام / حلينا الموضوع
ندى / الحمد لله عقبالى
حسام / عقبالك ... اوعدينى مش هتعملى كدا تانى
ندى تبصله باستهزاء
حسام / مش عشانى عشانك
ندى / كنت بتحاول تعمل ايه تحبسنى ادينى عرفت اخرج
حسام / هى الدنيا بتمشى معاكى عند يعنى
ندي / اه مش انت بتلوى دراعى انا هقطعهولك
حسام / كويس انك عارفه ان وجعك بيوجعنى
ندى تبص للسقف و تنفخ بخنقه حسام يضحك
حسام / دى تزاكر سفر مصر
ندى تبصله
حسام / و قدمت على اجازه من الشغل كمان
ندى / و المقابل
حسام / تصبرى لحد ما الشقه تخلص تلت شهور بس هننزل قبل معاد الولاده
ندى / انا عمرى مأ هكون مراتك يا حسام عمرى
حسام / ما تكونيش كفايه انك تكونى ام لبنتى كفايه اوى
ندى تبصله
حسام / انا بتكلم جد
ندى / انت عاوز تقول ايه اقبلى بالامر الواقع و عيشى معايا فى الحرام عشان خاطر بنتك صح ده اللى بتحاول تقوله
حسام / لا بقولك نبدا صفحه جديده
ندى / كان زمان و جبر
حسام / طب تمام انتى عاوزه ايه
ندى / تطلقنى و تنسانى
حسام / حاضر و بعدين
ندى / ما لكش فيه
حسام / لما بنتك تسالك عن ابوها كل العيال ليهم اب الا انا هتقوليلها ايه
ندى / مات
حسام / و انتى كدا مش بتظلميها
ندى / المفروض اقولها ايه ان ابوها حيوان و زباله اقولها انها بنت حرام اقولها ان ابوها انسان مريض و مكانه مستشفى المجانين او السجن
حسام يبتسم
ندى / النهايه الوحيده للى احنا فيه ان كل واحد يروح لحاله
حسام / بس انا ما يهمنيش النهايه انا عاوز طريقه عشان نستمر
ندى / مفيش انسى انا بكرهك و بحتقرك
حسام / انا عندى حب يكفينا احنا الاتنين و اه يا ندى لو عاوزه تموتى موتى انا اصلا شايف ان ابوكى و امك زهقوا من الدنيا و كفايه عليهم كدا
ندى / قصدك ايه
حسام يسيب المكان و يطلع بره و يقفل الباب وراه و ندى تبص للسقف و هى بتعيط
...................................
فى شقه اروي
اروى بتتصل بالموبايل يرد عليها حسام
اروى / الو
حسام / ايوه يا اروي اخبارك
اروى / زعلانه منك اوى يا حسام كدا تسافر من غير ما اسلم عليك انا حتى ما لحقتش اقعد معاك خالص
حسام / ملحوقه يا ستى اول ما الشقه تخلص هجيب ندى و ننزل مصر اجازه طويله و نقعد نشبع من بعض كلنا حلو كدا
اروى / ندى !!! هى عامله ايه صحيح
حسام / كويسه الحمد لله بتسلم عليكى اوى
اروى / الله يسلمها بقولك يا حسام انت شوفت جهاز ندى
حسام / لا بس سمعت انك نقيتى معاهم كل حاجه
اروى / انا نقيت كل حاجه كا انها حاجتى بالظبط
حسام / عارف
اروى / انا لازم اقفل بقى عشان الرصيد
حسام / اه اسف ابقى ابعتيلى واتس بعد كدا و انا هكلمك
اروى / بجد يا حسام
حسام / طبعا يا بنتى
اروى / انت مش هتصدق انا مبسوطه قد ايه اننا هنتكلم سوا
حسام / و ايه يمنع يعنى
اروى / هنشوف يلا سلام
حسام / سلام يا رورو
حسام يقفل و اروى تحدف نفسها تنام فى وسط السرير و تاخد دبدوب كبير ابيض فى حضنها و هى فى منتهى السعاده
...............................
فى الشركه عند مروان
فى مكتب حسين الباب يخبط
حسين / ادخل
نهاد تدخل ماسكه ورقه ففيل
حسين / صباح الخير اتفضلى
نهاد / انا عارفه ان وقت حضرتك مليان عشان كدا انا هدخل فى الموضوع علاطول
حسين / دا موضوع كبير بقى
نهاد تديه الورقه
حسين / ايه ده ؟...... استقالتك
نهاد / انا اسفه
حسين / انا رايي تفكرى تانى فى القرار ده
نهاد / فكرت و لقيت ان جو الشركه ما عادش مناسب ليا انا اسفه
حسين / لو انتى شايفه كدا انا ما قداميش حل تانى
حسين يمضى الورقه بسمه الثقه تتمسح من على وش نهاد
حسين / تقدرى تعدى على الحسابات تاخدى باقى حسابك
نهاد تقوم و تبتسم و تمشى
..................................
بعد كام يوم فى شقه عمر
عمر بيجهز شنطته و أية بتساعده و كل شويه يبصوا لبعض و يبتسموا
أية / هتوحشنى على فكره
عمر / بس احنا هنتكلم كل يوم
أية / اما نشوف
أية تروح تجيب رصه هدوم من على ترابيزه المكوه و عمر يروح يحضنها من ضهرها
عمر / عارفه لما هرجع هنعمل ايه
أية تبتسم
أية / ايه ؟؟؟
عمر / هاخدك و نروح ننقى فستان الفرح
أية / علاطول كدا
عمر / مفيش قدامنا غير اقل من شهرين
أية / ماشى
عمر / بس زى ما اتفقنا
أية تلفله و تحط ايدها حوالين رقبته
أية / هزاكر و اركز و اعمل اللى عليا و زياده
عمر / هنشوف
أية / هتشوف
الباب يخبط أية تفك ايديها و هما بيضحكوا و تروح تفتح تلاقى امها
سمر / الغدى على السفره مش هتاكلوا
عمر / تسلم ايدك
عمر يعدى يطلع بره و سمر بتبص عليه باستغراب
...........................
فى شقه ندى
حسام و اخلاص مسندين ندى لحد ما توصل لسريرها تنام عليه
حسام / الدكتور قال مفيش حركه
ندى / يارب
حسام يشاور لاخلاص تخرج
حسام / انا هقدم السبت عيشى يا ندى لو انا اللى تعبك انا هبعد خالص يكفينى اطمن عليكى من بعيد بس تاخدى بالك من نفسك
ندى تشد الغطا يساعدها تستغطى
حسام / هسيبك ترتاحى عن اذنك
حسام يطلع بره
.........................
في شقه نور
مروان / حمد الله على السلامه اتفضلي
نور تدخل تلاقي مروان مالي الشقه ورد و السفره عليها اكل و فاكهه
نور / انت اللي عملت كل ده
مروان / جابت نتيجه
نور / يعني هههههههههههههه
مروان / انا بحبك يا نور و عاوز احافظ على البيت ده ساعديني انا لوحدي مش هقدر اشيله
نور تهز راسها الباب يضرب مروان يروح يفتح يلاقي منال شايله صينيه عليها سلطه فواكه نور تروح تحضنها و تاخد الصينيه
نور / تعبتي نفسك
منال / نورتي بيتك كنت بنشر شوفتك ما قدرتش امسك نفسى قولت اجى اسلم بس انا همشى علاطول
نور / لا ازاى اتفضلى
منال / مره تانيه الجايات اكتر حمدالله على السلامه
منال تبوس نور و تمشى و نور تقفل الباب و تبص لمروان
مروان / بزمتك دى جيره تتساب
نور / ست طيبه اوى
مروان / حقيقه المهم كنا بنقول ايه
نور / كنا بنقول اننا هنعمل كل اللى نقدر عليه عشان نحافظ على البيت ده
مروان / و بالنسبه لنهاد اطمنى قدمت استقالتها و سابت الشركه و دلوقت انا ليا مكتب لوحدى ما فيهوش ستات
نور / هههههههههههههههههههه
مروان / تهمنا راحتك سمو الاميره
نور / فكرنى ابعت رساله شكر للى بعت الرساله عشان واضح انه قدملى خدمه هههههههههههههههههه
مروان / انا مش عاوز اكتر من كدا اننا نبقى سعدا و الضحكه ترجع تملا البيت ده بدل النكد و الزعيق و القمص و العياط
نور / و انا كمان والله مش عاوزه اكتر من كدا
مروان / خلاص اتفقنا يلا بقى لحسن زمان الاكل برد من بدرى
نور / هاخد على كدا
مروان / ادعيلى انتى بس اترقى كل يوم و كل يوم من دا
نور / هههههههههههههههههه هنشوف
.................................
بعد كام يوم فى الغردقه
عمر بيتكلم فيديو كول مع أية
أية / واو المكان تحفه فعلا يكون فى علمك انت هتجيبنى هنا فى شهر العسل
عمر / على حسب مجموعك ياختى
أية / انت اوفر اوى انا اصلا ادبى
عمر / لا واضح ان سفرى جاب نتيكه عكسيه و انى لما هرجع هنفخك
أية / هههههههههههههههههههه انا اقصد اقولك حط فى بطنك بطيخه صيفى كدا كدا انا عاوزه تجاره عشان نبقى سوا و لعلمك انا مش ناويه على اى كلام انا ناويه ابقى معيده معاك عشان تبقى قدامى فى البيت و فى الشغل انا بقولك اهو
عمر / و هو احنا نطول
غاده تدخل و تقعد
غاده / مش هتبطل تصوير بقى اللي يشوفك يقول بتراقب طيور القريدس
عمر يلف الشاشه لغاده
غاده / اوووه سورى كملو كملوا
أية / ازيك يا غاده عامله ايه
غاده / الحمد لله على فكره المكان هنا تحفه مش ناقصه غيرك
أية / ما انا اتفقت انا و عمر خلاص اننا هنقضى شهر العسل بتاعنا هنا
غاده / بجد والله ما تنسوش بقى تعزمونى
أية / لا ازاى معقول امال مين هتيجي معايا عند الكوافير و تساعدنى
غاده / اكيد طبعا عن اذنكوا ثوانى
غاده تقوم
عمر / ايه العسل ده
أية / بعاملها حلو عشان خاطرك
عمر / و هى تستاهل على فكره
أية / صحيح يا عمر لحد دلوقت ما بعتليش ولا صوره مع الوفد الايطالى خالص
عمر / و مش هبعت هههههههههههههههههه
أية / ليه بقى ان شاء الله
عمر / اااااااخ لازم اقفل المترجمه بتنادينى اما اروح اشوف عاوزه ايه
أية / مترجمه ؟؟؟
عمر / و هو انا بتكلم ايطالى ياختى سلام
أية / لا استنى هنا شكلها ايه المترجمه دى
عمر / سلاااام سلام
أية / سلام اوووووف
...........................
فى شقه نهاد
نهاد / والله لو ما كنت جيت النهرده كنت زعلت منك اوى
مروان / انا ما اقدرش على زعلك بس والله انا عامل زى الطور المسحوب فى ساقيه
نهاد / للدرجادى ايه هى رجعت تنكد عليك تانى
مروان / ابدا دى اتغيرت خالص انا بتكلم عن الشغل لا عارف ازوغ و لا فى ماموريات و لا اى حاجه
نهاد / دول عاملين عليك كماشه بقى
مروان / مش فارق معايا قد انى بروح كل يوم الشغل مش بلاقيكى تحسى ان الشركه بقت كئيبه اوى حقيقى
نهاد / على العموم و لا يهمك انا جيبالك خبر هيخليك تنسى كوووووووووووول حاجه و تطير من الفرح
مروان / الحقينى بيه لحسن انا على اخرى
نهاد / مبروك هتبقى اب
البسمه و الحماس يروحوا من على وش مروان
نهاد / مالك كنت فكراك هتفرح
مروان / لا فرحان فرحان طبعا انا بس اتفاجات
نهاد / ليه
مروان / مش بدرى اوى
نهاد / هههههههههههههههههه انت فاكر زى التليفزون هتستنى اما ادوخ و ارجع و كدا
مروان / لا ما اقصدش انا اقصد
نهاد / انت مش فرحان انى حامل يا مروان
مروان / لا والله مش قصدى
نهاد / انا كنت فاكره ان ده حلمك زى ما هو حلمى و ان كان ده سبب المشاكل اللى بينك و بين مراتك لو انت مش عاوز خلفه اتجوزتنى ليه نور كان ناقصها ايه
مروان / لا طبعا الموضوع مش كدا خالص انا بس كنت محتاج شويه وقت عشان
نهاد / عشان تمهد لنور موضوع جوازنا صح
مروان / مش بالظبط
نهاد / ما هى اكيد فى يوم من الايام هتعرف هنفضل متجوزين فى السر كدا لحد امتى يعنى و بعدين انت ليه بتبص للموضوع من النحيادى ما تبص ان هيبقى عندنا ابن تاخده لنور و تحطه فى حضنها و هى ساعتها هتلاقى الامومه اللى اتحرمت منها و هتنبسط ليه لازم تبقى النهايه وحشه معقول هى انانيه اوى كدا معقول مش عوزاك تحس بنعمه الابوه و اصلا يا مروان هو انت متجوزنى عرفى و لا حتى مقضينها دا شرع ربنا مثنى و ثلات و رباع و انت ما اتجوزتنيش شهوه انت اتجوزت عشان تبنى اسره و تعف نفسك و تبقى اب انت مش غلطان عشان تستخبى
مروان يبصلها
نهاد / فكر فى كلامى كويس يا مروان احنا اتجوزنا فى السر عشان نراعي مشاعرها مش خوف منها و لا من اخوها
مروان / ايوه طبعا خوف ايه
نهاد / خلاص يبقى تنسى كل حاجه و تفكر بس فى ابننا اللى جاى و الدنيا الجديده اللى هنعيشها سوا
مروان يهز راسه
...................................
بعد فتره فى المستشفى
على و اقف مع منال و نور و هما بيعيطوا
على / ايه اللى حصل
منال / ما اعرفش دخل يتوضى سمعت صوت حاجه بتقع جريت اشوف فى ايه لقيته واقع فى الحمام اتصلت بالاسعاف و بعدين اتصلت بيك
على / انا هروح اتكلم مع الدكتور و اطمن
منال / ماشى
نور / ما تخافيش باذن الله هيبقى كويس
منال / يارب يا نور يا بنتى يارب دا انا مليش غيره فى الدنيا
نور / ما تخافيش
...............................
فى الكليه عند عمر
عمر يدخل المكتب و غاده قاعده بتشتغل على اللاب يفتح دولاب و يطلع عصير و بسكوت
عمر / انا واقع من الجوع
غاده / لا واضح ان نفسك مفتوحه
عمر / لا هو الواضح انك عامله دايت بقالك فتره
غاده / دايت فى عينك انا مش محتاجه لدايت
عمر / ههههههههههههههه طبعا هو حد يقدر يقول غير كدا
غاده / لا بقى بجد انت مزاجك رايق اوى الفتره دى واضح ان الغردقه عملت شغل
عمر / لا بصراحه انتى اللى عملتى
غاده / انا ؟؟؟
عمر / اه انتى الواحد ما بيعرفش قيمه صحابه و الناس اللى حواليه الا فى الاوقات اللى زى دى صدقينى يا غاده انا عمرى ما هنسى اللى عملتيه عشانى
غاده / انا بدات اقلق هههههههههههههههه
عمر / الفتره اللى فاتت انا كنت تايه مش عارف انا عاوز ايه و لا بفكر فى بكره ماشى و مقضيها كنت خايف اوى و مخنوق زى ما اكون غرقان و مش لاقى قشايه يتعلق بيها بس انتى فوقتينى خلتينى اشوف الحقيقه اللى مكنتش بحاول ابصلها
غاده / أية
عمر / كان معاكى حق انا بحبها و مهما هحاول اعمل انا مكانى معاها سعادتى جنبها
غاده / مبروك
عمر / عقبالك
غاده / انا ما بفكرش فى الموضوع ده خالص
عمر / ليه يعنى هو الحب و الجواز وحش
غاده / على حسب
عمر / مش فاهم
غاده / لو هتحب و تتجوز حد بيحبك يبقى الحب جميل اوى لكن لو هتحب حد و هتتجوز حد تانى يبقى وحش فهمت
عمر / اسمه نصيب و سبحان الله يمكن تلاقى نصيبك بيخبط على الباب مين عارف
صوت خبط على الباب و طالب يستاذن يدخل عمر يقوم و هو بيضحك و غاده تبتسم باستهزاء لعمر و تشاور للطالب يدخل
.....................................
فى المستشفى
منال و نور قاعدين على يدخل
منال / خير يا على طمنى الدكتور قالك ايه
على / هيدخلوه عمليات دلوقت بس باذن الله خير
منال / يالهوى عمليات
نور / هو الموضوع كبير اوى
على / لا باذن الله خير اهدوا بس
مروان يدخل بيجرى على نور
مروان / خير فى ايه سبت كل حاجه و جيت على ملى وشى
منال / فيك الخير يابنى
مروان / ما لك يا نور ايه اللى حصل
نور / انا كويسه الحاج انور هو اللى وقع و نقلوه المستشفى
مروان / الحمد لله
الكل يبص لمروان
..................................