အလံနီ (ဇာတ်သိမ်း)
ယုံကြည်ချက်ရှိရင် ထားသွားလိုက်။
*****
အမွန် စဥ်းစားပြီးပြီ။ နေခြည်က အမွန့်အတွက် ချစ်သူတစ်ယောက်ဆိုတာထက် ပိုတယ်။ သူ့ကို ချစ်လည်းချစ်တယ်။ မမုန်းရက်နိုင်ဘူး။
ဒါပေမယ့် အမွန့်စိတ်ထဲ သူ့အပြုအမူ၊ သူ့လုပ်ရပ်တွေတိုင်းကို မေးခွန်းထုတ်လာမိတာ ဘာကြောင့်ပါလိမ့်။ ဘေးလူတွေရဲ့ စကားကို နားထောင်လွန်းအား ကြီးသွားတာလား။
တစ်ရက်တော့ ဒီလို ချုပ်ကိုင်ချယ်လှယ်ခြင်း အခြေအနေကို နေခြည်နဲ့ မျက်နှာချင်းဆိုင် ရှင်းလင်းကြဖို့ အမွန် စီစဥ်ဖြစ်ပါတယ်။
နေခြည်၊ အမွန် သူငယ်ချင်းတွေနဲ့ ခရီးသွားမလို့။
ဘယ်ကိုလဲ၊ ဘယ်တော့လဲ၊ ဘယ်သူတွေနဲ့လဲ။
နေခြည့်အသံဟာ အတက်အကျမရှိ။ အမွန့်ကိုလည်း သူ မကြည့်နေ။
ကေခိုင်တို့နဲ့ပဲလေ။ အမွန့် သူငယ်ချင်းတွေကို နေခြည် အကုန်သိတယ်မလား။ သွားမှာက တောင်ကြီး၊ အင်းလေ၊ ကလော။ ၅ညအိပ် ၆ရက်။
သြော်၊ ဟုတ်ပါပြီ။ ဂရုစိုက်သွား။
တစ်ခုခုတော့ လွဲနေသလိုပါပဲ။ နေခြည်ဟာ အမွန့်ကို အဲ့လောက် လွယ်လွယ် လွှတ်မပေးတတ်ဘူး။
ဒါနဲ့ နေခြည်လည်း အဲ့ရက်တွေမှာ ခရီးသွားမယ်၊ နေခြည့် သူငယ်ချင်းတွေနဲ့ပဲ။ ဘယ်ကိုသွားဖြစ်မလဲတော့ မသိသေးဘူး။
စလာပါပြီ။ နေခြည့်အသံဟာ ဖုံးကွယ်လို့မရအောင် လက်စားချေမှု ငွေ့ငွေ့ကလေး ပါနေတယ်။ နောက်ပြီး အမွန် သိရသလောက် သူ့အုပ်စုက ၁၀ ယောက်ဆို ၅ယောက်လောက်က သူ့ကိုကြိုက်နေတဲ့သူတွေလေ။
ဒါပေမယ့် အမွန် သူ့ကို ယုံပါ့မယ်။ ယုံနိုင်အောင်လည်း ကြိုးစားထားတယ်။
ဟုတ်ပါပြီ။ ဂရုစိုက်သွားပါ။
နေခြည့်ကို ထားခဲ့ပြီး အမွန် နေရာက လှည့်ထွက်ခါနီးဆဲဆဲအထိ သူငယ်ချင်းတွေရဲ့ စကားဟာ အထင်လွဲမှားတာပဲ ဖြစ်မှာပါလို့ တွေးနေခဲ့တာ။ နေခြည်ဟာ အမွန့်ကို ချုပ်ကိုင်နေတာမျိုး မဟုတ်ဘူး။ သူ အမွန့်ကို ချစ်တာ။ ချစ်တာပါ။
ချစ်တာလို့ ထင်ခဲ့ပေမယ့်..။
အမွန်၊ ငါ ခရီးမသွားတော့ဘူး၊ နင်လည်းမသွားနဲ့တော့။
စာတိုတစ်ကြောင်း ဖုန်းထဲဝင်လာခဲ့တယ်။ ဆိုလိုရင်းကို နားလည်သလိုလို၊ သေချာမရှင်းသလိုလို။ လူတွေပြောပြောနေတဲ့ နေခြည့်ရဲ့ အလံနီတွေဆိုတာ အခုကစတာများလား။
ဘာလို့လဲ၊ ငါက ချိန်းထားပြီးသားလေ၊ ဖျက်ဖို့ခက်တယ်။
ဒါပေမယ့် ငါမသွားတာမို့ နင်လည်းမသွားနဲ့။
မရဘူး နေခြည်။ ငါတို့က ကလေးမဟုတ်ဘူး။ နောက်ပြီး အခုလို မသွားလာဖြစ်တာလည်း ကြာပြီ။
နင် ငါ့ကိုရွေးမှာလား၊ ဘာမဟုတ်တဲ့ နင့်သူငယ်ချင်းတွေကို ရွေးမှာလား။
အဲ့အချိန်ကာလမှာ အမွန်လေ သိပ်ငိုချင်တာပဲ။ နေခြည်က အရမ်းအနိုင်ကျင့်နေသလို ခံစားရတယ်။ သူ့ကိုချစ်ရင် သူကလွဲပြီး အရာရာကို စွန့်လွှတ်လို့ အကြပ်ကိုင်နေသလိုပဲ။
အမွန်လည်း လူပါ။ အချစ်ကို ကိုးကွယ်ပေမယ့် ဖြူစင်တဲ့ သူငယ်ချင်းသံယောဇဥ်တွေကိုလည်း အလေးထားပါတယ်။
Sorry! ဒီတစ်ကြိမ်တော့ ငါသွားမှဖြစ်မယ်။
ဒါဆို ငါ့ကိုပြတ်လိုက်။
နေခြည်၊ နင်အဲ့လိုပြောရမှာ ဖြစ်မှာလား?
သူတို့က နင့်ကို ပျော်အောင်ထားနိုင်မယ်လို့ ယုံကြည်ချက်ရှိရင် ငါ့ကိုပြတ်လိုက်။
