အလံနီ (၅)
ပြတ်နိုင်ရင် ပြတ်။
မပြတ်နိုင်ရင် အဲဒီဆက်ဆံရေးတွေကို
ရပ်တန်းက ရပ်။
*****
နေခြည်ကတော့ သူ့ကိုယ်သူ ၁၂/အရမ်းပြတ်သား(နိုင်) လို့ သတ်မှတ်ထားပါတယ်။
အရာရာနဲ့ ယှဥ်လာရင် အမွန့်ကိုသာ ပထမ ဦးစားပေးမှာဖြစ်ကြောင်း၊ တခြားလူတွေဆိုတာ အလွယ်တကူ ဖြတ်တောက်လို့ရတဲ့ သံသရာတစ်ကွေ့က နွယ်ကြိုးမျှင်များသာဖြစ်ကြောင်း၊ အမွန်သာ နံပါတ်တစ် နှစ် သုံး ဖြစ်ကြောင်းကို တဖွဖွလည်း ပြောတတ်ပါတယ်။
တကယ်လည်း အမွန့်ကို သူပြောသလို ဆက်ဆံပါတယ်။ သူ့ကို လိုချင်ကြတဲ့ လူတွေအများကြီးထဲ အမွန့်ကိုပဲ ရွေးရှာတဲ့အခါ၊ တခြားအရာတွေထက် အမွန့်မျက်နှာကို တစိမ့်စိမ့် ထိုင်ကြည့်တဲ့အခါ၊ အမွန်က တစ်ယောက်ယောက်နဲ့ သူ့ပတ်သက်မှုကို မေးခွန်းထုတ်ရင် အဲ့တစ်ယောက်ကို ချက်ချင်း block လိုက်တာတွေက အမွန့်ကို အပျော်ဆုံး လူသားတစ်ယောက်လို ခံစားရတာတွေပေါ့။
ဒါပေမယ့် ကိစ္စတွေက ထင်သလောက် မရိုးရှင်းပါဘူး။
သူဖြတ်တောက်နိုင်တဲ့ ဆက်ဆံရေးတွေဟာ သူ့ကိုလိုချင်နေကြတဲ့ ဆက်ဆံရေးတွေဖြစ်ပြီး သူဖြတ်တောက်လိုက်တဲ့ အမွန့်ဆက်ဆံရေးတွေကတော့ သွေးရိုးသားရိုးများသာ ဖြစ်ပါတယ်။ ဘာလို့ဆို အမွန်က သူ့ရဲ့ "ရိုးရိုးသားသား" များကို ဘယ်တုန်းကမှ မေးခွန်းမထုတ်ခဲ့ဖူးဘူးလေ။
ဒီကိစ္စနဲ့ပတ်သက်ပြီး တစ်ခါက ရန်ဖြစ်တော့ နေခြည်က အမွန့်ကို တစ်ခွန်းပဲပြောတယ်။
"ငါ့ကို ပြတ်ရင်ပြတ်၊ မပြတ်ရင် အဲ့ဆက်ဆံရေးတွေကို ရပ်တန်းက ရပ်"
အမွန် ငိုချင်တယ်။ သူနဲ့မခွဲနိုင်။ ဝေးဖို့ကို မစဥ်းစားရဲ။ အဖြေကလည်း တစ်ခုတည်း။ ရပါတယ်။ အဲ့လူတွေက နေခြည်နဲ့ယှဥ်လာရင် ဘာမို့လို့လဲ။
အမွန့် ရွေးချယ်မှုတိုင်းက အမြဲတမ်း နေခြည်ပေါ့။
