"البعض لا يرحل ابدا"

p. 6

/______________\

استيقظت علي فراش في غرفه ورديه اللون بجانبها هاتفها وتنظر اليها الفتاه الصغيره بابتسامه بلهاء..

- انتي صحيتي؟

التفتت حولها تحاول الاعتدال او الاتكاء علي اي شئ.. راسها يؤلمها لعلها صدمت راسها بشئ وقت السقوط، لا تتذكر سوي انعكاسها البائس في المرآه وبعض الجمل تتكرر في ذهنها ببطء..

- عايزه العب بالقطر وماما قالتلي مفتحهوش الا لما تصحي علشان بيعمل صوت.. انتي صحيتي اشغله!

وضعت كفها علي راس الصغيره وسألتها..

- انتي اسمك ايه؟
- رنا.

ظنت انها تهذي او تحلم، اعتدلت ومسكت بهاتفها فوجدتها العاشره ليلا "يا ربنا انا نمت كل ده؟‟.. انتفضت من الفراش وجلست لترتدي حذائها فلم تجده بجانبها، ولكن الصغيره ركضت نحوها تمسك بيدها الحذاء، وضعته بجانبها ثم ذهبت لتجعل قطارها الصغير يطلق صفاره، حينها دخلت سمر والده الصغيره تنادي «رنا‟.. اجابت هي والصغيره في نفس واحد فابتسمت سمر وقالت بهدوء..

- هي صحتك انا اسفه.. انا كنت داخله ازعقلها.. دي رنا بنتي هي مكتوبه في الشهاده راندا بس بنقولها رنا علي اسمك.
- وهو بيسمي علي اسمي ليه؟
- انا بره الموضوع.. دي مشاكلكم انتم.
- انا عايزه اروح.. هو فين عايزه اخلص من كل القرف ده.
- احمد قاعد بره من ساعتها وزعل جدا من اللي حصل، اوعي تفتكري احمد مبيحبكيش.. كانت صدمه إنك جيتي اصلا.

وقفت تترنح قليلا حتي استعادت توازنها ثم اتجهت خارجه لتجده يجلس امام التلفاز في شرود واضح ولكنه فور رؤيتها اعتدل وقال بقلق شديد..

- انتي كويسه دلوقتي؟
- مش عايزه اي مقدمات.. دماغي مليانه كفايه ممكن اخلص.
- يعني ايه؟
- قول الموضوع مره واحده.. مش عايزه تطويل في الاحداث.. مش عايزه اعرف حسيت بإيه ولا هي عملت ايه عايزه اعرف انا مين.. بس انا مين.
- انتي بنت اتنين إحنا منعرفش عنهم حاجه.. لا انا ولا نجوي.
- انا مش بنت ماما!!!!!!

وقفت وهي ترتعش فوقت هو الاخر وجاءت سمر مهروله لتلومه بعيونها مره اخري..

- هي اللي قالتلي قولي علطول من غير مقدمات..
- مش اي حاجه تطلب ننفذها.. انت كبير وعاقل محدش يعمل كده!

جلست تبكي بكاء طفل يفقد كل شئ تدريجيا وقالت وهي تتلعثم من فرط البكاء..

- انتوا بتعملوا كده ليه؟ انا ليه اوصل للمرحله دي..

اقتربت منها سمر واحتضنتها بقوه..

- محدش فيهم قدر يزعلك.. بيحبوكي..
- امال ماما كانت حامل في مين؟ مين اللي خلفتها.

جلس احمد علي الكرسي كما كان وقال بهدوء..

- نجوي مكانتش حامل يا رنا.. نجوي مبتخلفش وعرفت ده بعد ما سفرت لما كان الكل مستنيها تطلع حامل وفي الاخر محملتش.. راحت لدكتور وقالها إن في مشكله ومش هتتحل هنا والحل بياخد سنين طويله.
- امال انا جيت ازاي؟ لوحدي!! فجأه!
- لا طبعا.. هي خافت اسيبها او ازهق قالتلي انها حامل واتصرفت في طفل.. هي وصحبتها سلوي قرروا يخدعوني ويفهموني إني هبقي أب، استنوني سافرت وقالت إنها حامل.. رتبت كل حاجه وكان في واحده من دار ايتام غالبا حملت بشكل مش رسمي وبدل ما تسقط اتفقت سلوي معاها إنها هتاخد الطفل ويكتبوه بأسمي.. اصلهم بيحبوا الخير قالوا يعملوا عمل إنساني.
- من غير اي تعليقات جانبيه يا احمد من فضلك.. البنت مش مستحمله..
- المهم إن هويه البنت الحامل فضلت مجهوله علشان سمعتها وبلغوني بمعاد حمل مختلف عن الطبيعي بتاع البنت ولما البنت ولدت خدوكي وروحوا ونزلت انا وفرحت بيكي وعشت معاكي سنتين كاملين من عمري علي إنك بنتي وانا اللي سميتك رنا.
- ااه.. علشان كده بدلتني وجبت رنا تاني.