و كلها دقائق و تعبت الدار بكل أهل سمر و عيلتها
و صديقاتها إلي حاولوا يرفعولها معنوياتها ويدعوا رب العالمين أن العملية الجراحية تنجح و يتمنولها الشفاء العاجل
🌿🌿🌿🌿🌿🌿🌿🌿🌿🌿
الساعة 10:10 صباحا
في مكالمة هاتفية
سليمان كان مقعمز في داره في المزرعة إلي بات فيها مع شباب آل رزق الله
بعد لا دوش و بدل حوايجه رن على رغدة
لأنه كان يبي يحسسها بإهتمامه و أنه واقف معاها
في الظروف الصعبة إلي تمر بيها عيلتها :
متخافيش رغودة بعون الله الأمور كلها حاتنحل
و بنات عماتك الإثنين حيتخطوا هالأزمة
رضا قالي أنه الدكاترة إلي بيديروا عملية سمر على أعلى مستوى و كلهم متخصصين و ناجحين
مسألة وقت بإذن الله بس و حترجع زي قبل و أحسن
و بالنسبة لأسيل صح مازال مش عارفين شي لكن بعون الله أول ما نشدوا رأس الخيط حنتبعوه لن نوصلوا فيها
و مش حنرتاحوا لن نردوها لحوشها و عيلتها
رغدة : تصدق أنا واجعتني أسيل واجد
أكثر حتى من سمر
قلبي موجوع عليها بشكل غريب كأني نعرفها ليا زمان
سليمان: أكيد يقولوا أنه الدم يحن
و بعدين رغودة إلي أني نعرفها و إلي قلبها أبيض من الحليب طبيعي حايوجعها على بنت خالتها
رغدة : ياريت عاشت معانا بعد لا ماتت خويلة فيروز الله يرحمها، ، كان الحال قعد غير الحال
و ما عاشت حياة صعبة كيف يلي عاشتها
سليمان: تعرفي بعد كل شي عرفته عليها
نشهد بالله أنه حياتها صعبة هلبا الحق
لكن متخافيش خوك رعد حيلقاها و حينقذها
و حيعوضها عن كل لحظة وجع و لا قهرة عاشتها
أني صاحبي و نعرفه
إلي تلين قلب حجر زي قلب رعد هذه حتعيش ملكة
و رعد حيدللها و يعيشها على كفوف الراحة
رغدة : يارب يا سليمان يارب
تلاقوها بسرعة و تطمن قلوبنا عليها
سليمان بصوت هادئ و مليان عشق:
حتى أني رغدة نبي ندللك و نعيشك على كفوف الراحة
و نبيك تولي ملكتي المدللة
رغدة لما خداها سليمان على حين غرة تحشمت و سكتت
صح ليهم هلبا يهدرزوا مع بعض
مكالمات عادية و مكالمات فيديو و مسجات متبادلة طول الوقت
لكن ديما كان حذر في التعامل معاها و حاطين حدود بينهم
صح مع اهتمامهم ببعض
و معرفتهم لأدق تفاصيلهم عن بعض
لكن كانوا ديما متأنيين في التعبير عن مشاعرهم
عاطيين لأنفسهم فرصة يتعرفوا على بعض أكثر
سليمان : خيرك رغدة نعستي ؟
رغدة بخجل : لا مش ناعسة لكن
و سليمان ضحك بصوت عالي على خجلها و حروفها إلي واضح فيهم
رجفة صوتها :
ههههههههه و الله ماك عادية باهي
هكي اضحكيني
توا يسمعوني خوتك يقولوا شن هالمهبول يضحك بروحه ميحسابوش أنه أختهم هبلتني معاها
رغدة بخجل : نعترف لك بشي
سليمان قعمز على حاشية سريره :
يا سلام اعترفي هي
رغدة : لما كنت نسمع في اللهجة الغرباوية ديما نحس فيها غريبة و صعبة
بس بعد قعدت نسمع فيها منك حبيتها هلباااااااااا
و سليمان الكلام جري على لسانه بتلقائية
: و قسما برب الكون أني إلي نحبك واااااااااااجد
و رغدة مقدرتش تسمع أكثر من كثر الخجل
صكرت التليفون و هيا إيديها يرجفوا
و قلبها دقاته زادت بشكل غريب 💕
YOU ARE READING
حين يعصف العشق❤
Romanceروايتي الأولى 😍😍 شخصيات روايتنا عايشين في 2 مدن ليبية، المدينة الجبلية الشامخة يلي سطرت قصص آمال وآلام ،، يلي كانت فيها نهاية حلم ،، وبداية حب❤ قصص حفرت بشموخ في جبالها وصنعت بإصرارها وديان جارفة زي طوفان انتقام آتي من بعيد... ومعالم حالمة حترسم...
