حين يعصف العشق❤

1

الجزء الأول

يوم الأحد 11 يناير

كان رعد واقف عالشباك ويتفرج على معالم المدينة في المكتب المتواجد في
الدور الثاني في شركة أمنية للحراسات وتأمين المنشآت العامة والخاصة

أختلفت المدينة في 7سنوات يلي غابهم عنها
لكن الاختلاف الحقيقي إلي حاس بيه كيف
تغير بيه الحال من آخر يوم
سيب فيه المدينة لحد هاللحظة..

وموجود معاه مدير الشركة صديقه
المقرب سليمان عبد الواحد
يشوف لمجموعة أوراق محطوطة
على سطح مكتبه ويقلب فيهم
باهتمام بعدين قام
عيونه لصديقه وقال:
توا أني هذا كله فهمته ومعاك فيه
لكن لازم ادير بالك على حاجة صالح العابد مش هوين وعيونه في كل مكان
ومش صعب يسمع بيك جيت وممكن يشك في رجعتك للبلاد وإلي رجعك للمدينة
هذه تحديدا وحني مدابينا منحطوش
العين علينا
رعد تكلم بثقة:
شوف يا سليمان نا قبل لا نجي هنا فكرت في كل شي ،
أنت صديق قديم وأنت سبب جيتي
هذا يلي حيكون واضح للكل شراكتي معاك في الشركة هذي،
وأعتقد هذا سبب مقنع و كافي ،
أما يلي بيننا فلازم نكونو حريصين واجد
فيه ونحسبو للخطوة قبل لا نعفسوها،
وزيدك يا زايد مفيش حد يعرف أن نحنا عندنا علم أن يلي صاير ليا
زمان من كان وراه هما واثقين لعند تو أن سرهم ما انكشف..

سليمان بتذكر: صح لولا سعد الله يرحمه مكناش عرفنا شي وزيادة بكل التفاصيل إلي وصلنا ليها.
لكن خليني نقولك تعديل على خطتك حينفعنا لقدام بحيث أنك تتحرك براحتك هني
بدون ماتكون العين عليك
ولا تكون محل شك

رعد: الفضل ليك من بعد الله يابوصاحب
لولا اهتميت وسعيت ورا الموضوع
لا كنا وصلنا للمرحوم سعد
ولا وصلت للأوراق هذه برغم سريتها
بالنسبة ليهم والأهم هذا كله
وهما غافلين عن سرهم إلي عرفناه وبالتفصيل .
خبرني يلا شن هو جديدك؟؟

سليمان: حيكون لوجودك سبب وسبب مقنع طبعا
باعتباره واخد الشهادة من مجموعة ال........
العسكرية
إلي ادربت فيها في كندا أنت حتساعدني في تدريب
القوات الخاصة إلي أني مسؤول عنها
أني خديت لك الموافقة المبدئية
من المسؤولين باقي عندك تمشي للمقابلة
وتوقع معاهم بهكي حتقدر تتحرك براحتك في المدينة بدون ماتكون محل شك
ولا نخاف عليك من شي وتقعد
ديما قريب مني بش لو لا سمح الله
صارلك أي طارئ تلقاني قريب عليك
رعد وهو يفكر في اقتراح سليمان:

كيف هكي على حسب علمي تدريب تابع للقوات الخاصة التابعة لكليتكم محتاج أوراق رسمية وشهادات معتمدة
سليمان: هذا للطلبة النظاميين في الكلية لكن القوات هذه تعتبر النخبة وأني حصلت لك استثناء
لأن تدريباتك وشهادتك بالرغم مش
معترف بيها هني لكنها مهمة وفقا للمكان إلي ادربت وقريت فيه في كندا
وهما مادابيهم تكون عندهم قوات خاصة صح
وتدريبك ليهم فرصة
يعني بدل ميبعتوهم ياخدوا دورات برا جيت أنت لاعندهم
وعلى فكرة يبوك متفرغ بشكل كامل
ومستعدين يعطوك المبلغ إلي تبيه