حين يعصف العشق❤

14

الجزء الرابع عشر

الساعة 12:20ص

كانت متكية في سريرها وسط كتاباتها بعد لا راجعت في آخر قاعدة خدوها في اللغة الإنجليزية وغدوة بيديروا فيها اختبار شفوي

بعد لاكملت فتحت النت في تليفونها وكالعادة لازم من دورة عالفيسبوك والانستغرام و في نفس الوقت تتراسل مع أسيل عالفايبر
حست روحها جعانة ناضت دارت سندوتش جبنة بعد لاقالت لأسيل بتنوض شوية وبترجع تكلمها خلت تليفونها عالسرير وطلعت
ولما رجعت للدار سمعت نغمة فايبر مااهتمتش توقعتها أسيل
حطت سندوتشها عالطاولة هو وطاسة الشاهي بعد لانتشت منه ومشت لمكان كتاباتها بش تغير جدولها
فاتت حوالي سبعة دقائق سمعت فيهم ثلاثة مرات نغمة الرسائل على تطبيق الفايبر استغربت لأنه مش من عادتها أسيل تبعت في مسجات ورا بعضهم
كملت ترتيب جدولها ونزلت الشنطة من عالسرير وولعت السهارة ومشت طفت ضي الدار وخشت لسريرها
خدت نتشة من سندويتشها وشدت تليفونها بتشوف أسيل شن باعتتلها،،، لكن المسجات مكانوش من أسيل كانوا من رقم ...
.....جابر

أميرة من الفرحة والمفاجأة في نفس الوقت غصت بلقمتها حطت السندويتش وقامت شيشة الأمية وشربت وهيا مازالوا عيونها في مسجات جابر الأربعة إلي كانوا تباعا

-(السلام عليكم )

-(مرحبا أميرة كيف الحال)

-(لما لقيتك نشط عالفايبر تشجعت نبعت لك )

-(إن شاء الله رسالتي متكونش في وقت غير مناسب أو مش مرغوب فيها)

أميرة طول طلعت من محادثته وحطت على رقم أسيل واتصلت بيها وأول ما انفتح الخط تكلمت أسيل بصوت ناعس: خيرك ميرو مش قلت لك بنرقد يادراه نوضت...
وقطعت عليها أميرة بفرحة : سيلا صحصحي معاي بالله عليك لقيت جابر توا باعتلي عالفايبر كاتبلي لما لقاني نشط بعتلي وقالي ان شاء الله رسالتي مش مرغوب فيها

أسيل ضحكت وتكلمت بصوت واطي لأن عمتها راقدة جنبها هيا وبنتها: مش قلت لك بيكلمك
قوليلي شن رديتي عليه
أميرة بحيرة: مارديتش كلمتك طول
أسيل:ياحمارة خليتي طلعت له seen ومارديتيش فيسع اكتبيله أي حاجة عيب ياغبية

أميرة:خايفة يا سيلا والله حتى من إيديا يرعشوا مش عارفة حنقدر نكتب له ولا لا
أسيل:لا لا عيب ره توا يقول شافت وطنشتني بري ردي عليه توا نفتح نت كان تبي حاجة اكتبيلي عالفايبر
أميرة: تمام باي توا
أسيل وهيا نعسانة: باي
أميرة طول فتحت على محادثة جابر لقاته مازال نشط
كتبتله
(مرحبتين جابر كيف حالك أنت؟)
جابر
(بخير الحمد لله لما مرديتيش توقعتك يا إما مشغولة أو رسالتي ضايقاتك)
أميرة
(لا علاش بتضايقني الفكرة أنك بعتت واتصلت بيا أسيل رديت عليها وأول ماسكرت منها الخط رديت عليك.. آسفة عالتأخير)
جابر
(مش مشكلة طمنيني عليك شن أخبارك)
أميرة طلعت من محادثته وكتبت لأسيل