حين يعصف العشق❤

4

الجزء الرابع

بعد مرور ثلاثة أيام

🌿🌿🌿🌿🌿

الأحوال كانت عند أبطالنا عادية وماشية الحياة،، هيا في النهاية أقدار مكتوبة حنعيشوها بحلوها ومرها،، يمكن المر ياخد وقت طويل لكن مهما طال لازم يجي بعده الحلو ،،
ماهي دنيا ودوام الحال من المحال ،، باهي علاش تأخر ؟؟ تعبنا صح !! هلباااااااااا..

وهلبا وجع حاس بيه رعد توا لما كان يتذكر كيف كان وشن كانت طموحاته وفي يوم وليلة بطعنة غدر من ناس حط فيهم ثقته ،، دمروه وهجروه عن أهله وعيلته قهرا...
لفقوله قضية هو لا ليه فيها ناقة ولا جمل
طلع من البلاد هارب و مظلوم
بعد ماكان كل حلمه
يكون واحد من ضباطها ويفديها بدمه
فجأة لقي نفسه مسجون ولقي في سجنه
أسوء معاملة فيها إهانة وتحقير لإنسان معتز بنفسه وبشخصيته وبرجولته
أيام قاسية ومرة وصعبة عاشها
صنعت منه رعد ثاني قاسي ومايسمعش غير
في صوت عقله ومايعترفش بشي اسمه
إحساس أو رحمة ولا مشاعر

هلبا وجع عند رائد إلي كان واقف في بلكونة داره يشوف في العمال يركبوا في الخيمة في الجنان الكبير لفيلا آل رزق الله..
ويشوف في خوه رضا حاط فونه على أذنه ويعزم في واحد من أصحابه على العرس وهو في قمة سعادته
على ماقد ماكان فرحان بخوه على قد ما حاس أنه حرم نفسه من هالفرحة ..
نادم من زواجه بأم رهف (جلنار ) !! ممكن
نادم لأنه لو كان فكر بعقله شويتين
زيادة كانت هلبا حاجات في حياته تغيرت
راهو عيلته فرحوله
زي ما هما فرحانين توا لخوه رضا
وكانوا معاه في أهم وأحلى أيام حياته وحاله وحال بنته كان أحسن..
بدال الغربة والألم إلي حاس أنه جابهم لروحه
بروحه في لحظة تهور..
لكن هاللحظة قلبت مسار حياته
إلي كان مرتبها ويحبها تمشي بالمسطرة
في لحظة كل شي تلخبط
وجزء كبير من أحلامه انهارت
لكن شن يفيد الندم وإلي كان كان..

هلبا وجع في قلب أسيل
وهيا في عيد ميلاد أميرة صاحبتها..
العيد ميلاد كان بسييييط جدا..
يادوب طاولة عليها قالب تورتة حجم متوسط وباكوين عصير وشيشة مشروب وطاسات
ومترد فيه بيتزا وشاورما
وخبزة كسكاس
مدايرتهم(فاطمة)
أم أميرة في الحوش
بوها كان جايبلها ساعة يد بسيطة جدا
وأمها وأختها آيات جمعوا فلوسهم مع بعض وشرولها لابتوب هو صح مستعمل لكن أميرة طارت بيه للسماء..
وأسيل ليها أكثر من 6شهور
تجمع في فلوس بش تشري لها بوت
أميرة كانت هابلة فيه ومتمنية تشريه
حجزتهولها من صفحة من النت
الوجع في قلب أسيل لأنها محرومة من هاللمة
محرومة من حنان الأم والأب
اللمة بالرغم من بساطتها
خلت في قلبها وجع بألف وجع ..
وجع اليتم😔😔

هلبااااا وجع في قلب سمر إلي من يوم
إلي صار مع رائد مقدرتش تحط عينها في عينه.. روحت لحوشهم ومقدرتش تمشي لفيلا جدها
إلا لما تتأكد من أنه طلع وماتقعدش غير وقت بسيط قبل لايروح ..
وجع قلبها من أنها مش حتقدر في يوم تحسسه بحبها ولا هو حيحس بيها واحتمال كبير يحب من جديد ويتزوج ويقعد رائد الحلم محال التحقيق 💔