حين يعصف العشق❤

57

سمر نزلت من عينها دمعة :
مازلت مش مصدقة لعند توا أنه باتي وافق على زواجنا
حاسة كأني في حلم حلو و خايفة نفيق منه يا رائد
رائد باس كف يدها : لا يا سمحة
مش حلم باتك صدقيني وافق صح
و العيلة كلها موافقة و فرحانة لينا ..
أنتي ما عليك غير تهتمي بصحتك بس
و بعدها نوعدك أيامنا كلها حتقعد فرح
و هناء و سعادة و حب
سمر : ياريت ربي يكملها معانا
وجعتني أسيل بنت خالتي واجد
ماما قعدت الليل كله تبكي و تدعيلها
كانت خايفة نسمعها و نتضايق
بس أنا كنت متأكدة أنها ما نعست لحظة
و طول الوقت تدعي ليا و لأسيل ربي يكون معانا

رائد : آمين يارب العالمين يا عمري
أنا قبل لا نجيك اتصلت برعد رد عليا رضا
قال أنه طول الليل قضاه في المزرعة متع صاحبه
مخشش جوا معاهم أبدا مع أن الجو مصقع واجد
كلم ليلته دخان و قهوة و توتر و أرق

سمر : مسكين ربي يكون معاه إلي فيه مش سهل أبدا
رائد : معاكي حق
و أنا إلي ما لحق الواطي هذاك ياخذك معاك كل مانتذكر الموقف دمي يغلي
هذا و أنتي ربي نجاك منه
رعد كيف صاير فيه و أسيل مش عارف كيف صاير فيها
و لا وصلاته أي معلومة تريحه
و انتبه لسمر إلي كانوا دموعها ينزلوا:
أووووو قعدت نخبط أنا
سامحيني يا قلبي آسف حبيبي حقك عليا
عارف إلي مريتي بيه كان صعب عليكي واجد
بس نوعدك وعد شرف يا مورتي حنشيل من عقلك
كل ذكرى مش حلوة
و حنبدلهن لكي بذكريات تخليني ما نشوف غير ضحكتك الحلوة إلي تفرح قلبي
بعدين شوفي كيف نسيتيني ..
شوفي شن جايبلك معايا
سمر أول ما شافت الباقة إلي كانت منسقة بشكل حلو و جذاب و خاصة أنه رائد مركز على الورد باللون الأصفر لون سمر المميز
الفرحة ملت وجهها
و شدت يد رائد قربتها منها و باستها بحب :
ربي يخليك ليا يا رائد .. شكرا حبيبي
رائد : أنتي قوليها ليا حبيبي بس و أنا مستعد نجيب
الكون كله يقعد تحت أمرك و باس يدها حتى هوا
و طق الباب و رائد بعد وجهه شوية على سمر
: تفضل
الممرضة خشت قربت من سمر : صباح الخير
سمر : صباح النور
الممرضة : آنسة سمر جيت نخبرك عشان تكوني جاهزة
يا دوب عشرة دقائق و حنرجع لكي مع ممرضات غيري
عشان نجهزوك و نلبسوك ملابس العملية
الفريق الطبي كله قعد موجود و يجهزوا
يعني معاكي حوالي ساعة تقعدي فيها مع عيلتك

و ماتنسيش أهم شي تقعد روحك المعنوية عالية
و على فكرة السيد رائد مسيبكش لحظة من لما دخلتي للمستشفى حتى ملابسه يبدل فيهن هنا
و حتى بعد تقعد الزيارة ممنوعة
هوا يقعد واقف على باب الدار أو مقعمز على كراسي الإنتظار إلي جنب الباب
إنسان كيف هذا يستاهل تكوني قوية و تقاومي عشانه
و قاطعها صوت مليان ثقة و تفاؤل باللهجة المصرية:
و أنا موافقة جداااااا على كلام الnurse
حب زي دا يستاهل أن أحنا نعمل كل حاجة نئدر عليها
عشان نفضل معاه أو حتى منئدرش مش فارئة(فارقة)
المهم يكفينا شرف المحاولة
حتى لو أنتي مئدرتيش أستاذ رائد أكيد حيئدر
صباح الخير يا سمورة صباح الخير عليكم جميعا
و خشت وقفت جنبهم بش تدعم سمر بكلمات
تشجعها و تحسن نفسيتها