قناص بغداد ( مهمة وطن )

المُـهمة الثالثة والعشرين

گمت افتر احتاريت اروحن وارد اعاين الروحي
-الـجـازي: مادري ما أعتقد تفيد

-سُـمانه: لعد گومي لبسي لبسنا مال أيام الريف دشاديشنه الخليجية الي تجنن لبسيها وتجاهلي فد مرة وعوفي ونزلي

اقتنعت بفكرتها گمت على السريع طلعت دشادشة تصير خفاش وتوصل لحد مفصل الرجل ولبست حجل ولبست گلادة قل الي جابها الي عاشور وسوار أمي جان عبارة عن حياية ملتفات على بعض وشمرت الحجاب شمر مثل قبل واطلع شعري منه ظليت بالحجرة مهما يكون ما المفروض اتجاوزه واسوي مثل ما گال اظل ناطرة بالحجرة واخلي يشوف شلون راح انزل ممكن ينحل بس اذا نزلت وتجاوزته اطلع انه الغلطانة وبدال ما انه صاحبة الحگ اكون بالعكس

سمعت حركة يم الباب سويت روحي علساس جاي البس الخفخاف مالتي اريدن أنزل
عبرته أريد اطلع من الحجرة شغل الضوه وكضني من زندي حيل

گال بنبرة حادة ومرعبة كل حنيته والحب الي بعيونه تبخر
-ديـوان: شنو صار وصلتي مشاعل الهاي المرحلة شنو حچيتي وياها ؟

حچيت بهدوء لان هو عصبي وانه عصبية تكبر ما تصغر فكرت
من احچي بهدوء واحچي عدل اصير انه صاحبة الحگ والراهي على گولة أمي

-الـجـازي: حچت شلون أنتَ ظليت يمي بالغرفة ومانزلت وأنتَ أخوها وچانت تنام يمك وكل وقتك الها بس هسه أنتَ وياي وأن مالي حگ اخليك بالغرفة هيچ فترات طويلة رديت عليها كتلها مثل ما الج حگ عليه انه هم الي حگ عليه وشي طبيعي كل متزوجة تنام يم رجلها رادت تضربني دفعتها ونعتتها بالمسودنة والنريضة وهاي هي ديوان هذا الصار

حطيت ايدي على اصابيع ايده بهدوء وخرتهن جر نفس وگال

-ديـوان: مشاعل لا تحچين وياها شنو ماتگول عني وعن علاقتي بيها تگليلها اي ماتحسسيها ان أنتِ ماخذتني منها أبد حسسوها أن أنه طول الوقت يمها والها الجازي مشاعل حاله خاصة رجاءً هي تجيها فترات تنتكس حيل

ماحجيت شي عفته رد صاحلي
-ديـوان: حطي حجابچ عدل وفتحي خيط التخصير وخففي مكياجچ شعدنا حفلة

جريت نفس وزفرته بهدوء
-الـجـازي: ديوان لا تلود عليّ زايد حتى اظلن آدمية تمام  خلينا حبايب

عاط بعصبية
-ديـوان: جاي اگلچ لبسي مثل الاوادم ورتبي نفسچ ومشاعل خط أحمر محد يتقرب منها سمعتي أختي محد يتقرب منها عندي كلشي ولا مشاعل تتأذى

رد گال بهدوء وهو يگعد يدخن اعاين لعيونه صارن حمر ومليانة دموع

-ديـوان: عوفي مشاعل فدوة يتأذه گلبي على ألمها روحي تلوب على لوبتها بحضني عوفيها الخاطري شفته حط ايديه على عيونه

رحت گعدت يمهه وخر ايديه من عيونه ويدخن واعصابه ترجف

-الـجـازي: انه آسفة أذا سويت شي غلط جان من حگي كـ زوجتك ما اتقبل أحد يحچي وياي بهاي الطريقة بس يالله مو مشكلة الي يريحك