سامر: هي مو أمي؟ هذا الي أعرفة وأعرف هم أن الأمهات مقدسات ؟؟ فركت راسي بقوة كل هذه التساؤلات تمزق تفكيري
بس مثل كل مره ما اكدر اجاوب عليها ، كانت تاخذني زوجة ابو حسن بين مدة ومدة تسبحني وتوكلني لان بقية الأطفال يتنمرون عليه
لأن مو نظيف وتطلع مني ريحة ، ام حسن جانت تشفق علية لان تعرف ما ينطوني اهلي اكل ولا يخلوني اسبح حتى
ومن ارجع للبيت نظيف وشبعان يعنفوني اهلي هوااي لان رحت لجوارينا ، يشگگ خدي من الضرب ، ابوي جسمة كلش ضخم يكدر يسحگني جوة رجلة
لحد الأن اتذكر ضرباتة الي توجع وأيدة الجبيرة وأصابعة الي تنطبع على خدي
جانوا جيرانة يسمعون صوت صراخي وبجيي العالي جان كل يوم يجون يحجون وي ابوي بس للأسف اكو فايدة ؟ اكيد لا
- كافي عنه يا ابو سامر اتقي ربك هذا طفل صغير عجيب هذا ضناك شلون تسمح لنفسك ان تضربة بهالعنف ما عندك گلب يا رجال ؟؟ اتق الله بي رجاءا
- يا ابو سامر اذا متعاجزين منه كولي وانا اخذة اربي عندي وهاي اوعدك ما تشوفة بعد
والي يسوي ابوي يعيط عليهم ويتعارك ويسد الباب بوجهم كل يوم بس هم مستمرين يجون ويرجع علية يضربني وما يعوفني لحد ما اطيح مغمى علية
مره من المرات اتذكر جنت كلش جواعان ورجعت من المدرسة تعبان اتذكر ماخذ بالأملاء 8 وانا وكم طالب ماخذين 8 البقية كلها راسبة واقل لان الأمتحان من 8
واجيت فرحان انطيت الدفتر لامي هي بس شافتها بدون ما تسألني من شكد ضربتني على راسي بالجدر الي جانت توها حاطتة ع النار وبي زيت طاح منه على ايدي
تدري دكتور لحد الأن كل ما يمر هالموقف ببالي تجيني رجفة الألم نفسها ، وعلى بالك اكتفت لا وانا اتلوع من الألم كعدت تضرب وتضرب
حمت السچينة وخلتها على ايدي اليمين وكالتلي كل ما اشوفها بعد ادرس واجيب درجات عالية وبيومها بقت تحجي هم عايش علة على گلبي وهم درجاتك زبالة مو زين ومخلينك بالمدرسة وانت اول وتالي ميت جلب حقير وبلشت تضرب اقوى وانا اصرخ من وجع ايدي وراسي
الدكتور: ما عرفت شنو سبب عصبيتها بهذاك اليوم
سامر: جانت معصبة من ابوي قبلها بيوم اجا من الشغل معصب وشافها كدامة وكعد يضرب بيها دماها ادمي وانا من خوفي لبدت ورا الكنتور بس لكاني وكتلني
الي خلاني استغرب مو ضربها ولا الچوية لان متعود الي استغربتة ان ما يوم هم اهتمو لدراستي جبت درجات ما جبت مو مهم رحت للمدرسة او لا ولا ملابسي مغسولة ولا دروسي محضرها وي امي
اصلا حتى جارنا سجلني بالمدرسة وي احفادة من بعد الحاح مميت وي اهلي بس حتى ياخذون المستمسكات مالتي وي اهلي ويسجلوني بالمدرسة
شنو الي خلاها هسه تهتم بي
الذنب الثاني..!
Start from the beginning
