غابة الذئاب& غرام الذئاب «الجزء الثالث و الرابع من سلسلة صراع الذئاب»

الفصل السادس والعشرون

قاطعه الأخر ويضغط علي حروف اسمه للتأكيد علي الآخر:
"عمر، اسمي عمر المصري يا دكتور"

"عمر علشان خاطري تعالي نروح للمستشفي عند بابي، بابي جراح شاطر جداً وعشان يقدم لك بلاغ في البلطجية اللي اتهجموا علينا"

أخبرها الصيدلي:
"مفيش داعي يا آنسة إنه يروح لمستشفي، الجرح مش عميق، يعني الحكاية مش مستاهلة"

"خلاص يبقي كدة نروح نقدم بلاغ، المشكلة كانوا ملثمين"

وعقب عمر بعد حديثها:
"و لوحة العربية بتاعتهم معليهاش ولا رقم"

حدق الصيدلي إلي عمر أولاً بنظرة مبهمة ثم إلي لوچي يخبرها:
"بالتأكيد فيه كاميرات في مكان الحادث ممكن نخلي أصحابها يفرغوها و تقدموا بالتسجيل في المحضر"

نهض عمر وقال لها:
"يلا عشان أوصلك، و أنا هارجع لأصحاب الكاميرات وهعمل المحضر بنفسي"

"لاء أنا جاية معاك عشان أحكي لهم اللي حصل قبل ما أنت تظهر و...

توقفت عندما تذكرت أمراً ما للتو فسألته:
"ألا قولي صح، أنت ظهرت فجأة كدة وقتها إزاي؟، هو أنت...

بدي علي ملامحه التوتر والقلق وعندما تابعت سؤالها:
"هو أنت كنت بتراقبني؟"

تنفس الصعداء فقال معاتباً:
"و لنفرض إن براقبك، المفروض تشكريني لأن أنقذتك من إيد العيال اللي الله أعلم كانوا خدوكي عملوا فيكي إيه"

ابتسمت إليه وقالت:
"thank you"

بادلها الابتسامة قائلاً:
"أنا بهزر معاكي مش عايز شكر، كل اللي عايزه تاخدي بالك من نفسك، و يلا عشان أوصلك"

وبعد قطع مسافة قصيرة أخبرته أن يوصلها إلي مسكن والدتها، و عندما صف السيارة أمام البناء
"بجد مش عارفة أشكرك إزاي"

ابتسم وقال:
"لو تقبلي أعزمك بكرة في النادي هابقي أنا اللي شاكر ليكي جداً"

أومأت بالموافقة:
"أوك"

رفع هاتفه قائلاً:
"ممكن تسجلي نمرتك عشان هكلمك لما أنزل هعدي عليكي أخدك من هنا"

ترددت قليلاً ثم أخذت منه الهاتف و قامت بتسجيل رقم هاتفها وقالت:
"هاستناك بكرة، باي"

فتحت باب السيارة وكادت تنزل فألتفت إليه تسأله:
"هو أنت بتلعب چودو أو كارتيه؟"

أجاب مبتسماً:
"كنت بلعب كونج فو وكنت واخد بطولة الجمهورية كمان"

هزت رأسها دلالة علي إقتناعها لما رأته فتابع:
"بكرة هانقعد نتكلم مع بعض و كل واحد هيحكي عن نفسه، و لو مش عايزة خلاص"

ابتسامة ساخرة بدت علي ثغرها:
"ما تقلقش هحكي لك، لأن محدش تقريباً هيسمعني غيرك، أشوفك بكرة باي"