سلف و دين بقلم /لولو_محمد

الحلقه ٣٦

(((((((( سلف و دين ))))))))
#لولو_محمد
الحلقه ٣٦
امانى / انا بنتى ما لهاش عيش مع الحيوان ده
حسام / خلى نور تسمعه و اللى هى هتحدده انا هقبل بيه بس ارجوكى الجو مش ناقص توتر
امانى / و دى اخرتها يا حسام انا اللى بوتر الجو انا اللى عامله المشاكل
محمد / ما خلاص بقى يا امانى مش وقته الواد فيه اللى مكفيه
امانى / ما البركه فى نسايبنا الحلوين اللى كل واحد فيهم ما بيفكرش غير فى نفسه و بس
مصطفى / قصدك ايه يا امانى
حسام / جيبانى ليه منزلانى مصر على ملا وشى ليه
امانى / حسام
حسام / مدام حضرتك قررتى خلاص ما طلعتيش على المحامى ليه
مروان / للمره التانيه انا اسف و انا بعترف انى غلطت و اتعصبت و جاى لحد عندك اعتزر
امانى / كدا كدا ما تفرقش معايا و لو نور قبلت ترجع معاك براحتها اصلا اللى بيشيل قربه مخرومه ما يجيش يشتكى عن اذنكوا
امانى تدخل و حسام ينفخ و نور تطلع
حسام / اقعدى لو سمحتى
نور تقعد
مروان / انا اسف انا ما كانش المفروض اتعامل مع الموضوع بالطريقه دى بس لما تسمعينى اكيد هتقدرى
محمد / و احنا كلنا قاعدين نسمعك اتكلم يابنى
.....................................
فى المستشفى عند ندى
الدكتور / الحمد لله جت سليمه هى هتاخد الحقن دى يوم بعد يوم عشان نطمن على الحمل و باذن الله هتبقى كويسه
اخلاص / شكرا يا دكتور الف شكر
الدكتور / ابقى خدى بالك و انتى بتنضفى مش معنى انك فى الشهور الاخيره ان الحمل ثبت بالعكس الفتره دى مهمه زيها زى باقى التسع شهور
اخلاص / هتاخد بالها ان شاء الله مش كدا يا ندى
ندى / لو سمحت هو فى هنا تليفون
اخلاص / هتكلمى مين
ندى / هكلم جوزى اطمنه عليا ايه ممنوع
الدكتور / التليفون جنب حضرتك تقدرى تتكلمى براحتك
ندى / شكرا
اخلاص / لا مؤاخذه يعنى هى ممكن تروح امتى
الدكتور / انا رايي تخليها النهرده تحت الملاحظه و بكره باذن الله تروح علاطول
اخلاص / شكرا
الدكتور يمشى
ندى / كان معاكى المفتاح مش كدا و ياترى خبيتى شاحن موبايلى فين
اخلاص / انا عبد المأمور
ندى / هتقولى ايه لربنا
اخلاص / هقوله كنت بحميكى هقوله راجل جالى و امنى امانه انى اخد بالى من مراته التعبانه و كل يوم بعيشه معاكى بتاكد اكتر ان كل كلامه عنك حقيقى بتاكد انك مستحيل تكونى بتتصرفى تصرفات طبيعيه انتى كنتى بتحاولى تموتى نفسك فى واحده عاقله تعمل كدا
ندى / ما عادش يفرق معايا
اخلاص / هتقولى ايه لربنا لما تروحيله لما يقولك موتى كفره هتقوليله ايه
ندى / هقوله انت شاهد باللى بيا هقوله ما قدرتش استحمل
اخلاص / ربنا يهديكى يا بنتى
ندى / ربنا ياخدكوا
اخلاص تليفونها يرن
ندى / و كمان معاكى تليفون
اخلاص تطلعه و تبص تلاقيه حسام
اخلاص / روحت فى داهيه دا سى حسام
ندى / هاتيه
اخلاص / هنقوله ايه بس قطعتى عيشى
ندى / هاتيه
ندى تاخد التليفون و ترد
ندى / الو
حسام / ندى ازيك اتصلت كتير انتى فين
ندى / وانت مالك
حسام / عمى عاوز يكلمك
ندى / هاته
مصطفى / ندى قلب ابوكى يا بنتى ازيك
ندى تعيط
مصطفى / قولى حاجه يا ضنايا طمنينى عليكى
ندى / فارق معاك وحشاك اوى مش انت اللى رمتنى هنا
مصطفى / انا قولت لحسام هنجهز الشقه و هتنزلى تولدى فى مصر خلاص كل اللى انتى عوزاه هيحصل يا بنتى
ندى / اشمعن دلوقت لازم اموت يعنى عشان ترتاحوا
مصطفى / بعد الشر عنك يا بنتى انا ما يهمنيش الا مصلحتك
ندى / انا تعبانه و مش قادره اتكلم
مصطفى / سلامتك يا حبيبتى الف سلامه
ندى / مع السلامه
مصطفى / مع السلامه
حسام ياخد منه التليفون و ندى تقفل السكه
حسام / الو الو
حسام قفلت
محمد / الحمد لله انك اطمنت عليها يا مصطفى
مصطفى / ابدا يا محمد البت صوتها تعبان اوى قطعت قلبى
حسام / ياريت نخلينا فى الحوار اللى قدامنا الاول عشان نشوف هيخلص على ايه عشان اللحق ارجع
مروان / و دا يا ستى عنوان الشقه اللى روحناها عشان نشتريها و رقم تليفون السمسار اللى كان معانا تقدرى تكلميه او تروحيله و تساليه بنفسك
حسام قاعد يبص على نور
نور / و ما قولتش ليه لما سالناك
مروان / يا نور مش كل حاجه بينا تدخلى فيها امك انا ما كنتش هقولك عشان ما تضايقيش
نور / و مدام حاجه هتضايقني بتعملها ليه
مروان / يا نور نتكلم بالعقل انتى يعنى ما بتعمليش حاجه تضايقنى مش كل حاجه فى بيتنا بتروحى لجارتنا تحكيلها لما ركبتى مع الواد ده مش فاكر اسمه انا اضايقت و عاتبتك روحت بقى عيطت لامى و لا جبت اهلك و شهدتهم عليكى
حسام / واد مين ده
نور / كنت جايه هنا و كنت عند الجيران فعرضوا يوصلونى و انا رفضت بس ما كنتش لاقيه تاكس و الشمس فركبت ورا و عاملته زى التاكس بالظبط و قولتلك ما خبتش عليك
مروان / و هى المره دى بس يا نور نسيتى لما رد عليا فى التليفون تخيل انت يا حسام تبقى مسافر و تتصل بمراتك تلاقى راجل بيرد عليك
نور / كنت مخنوقه و ماشيه زعلانه و سرحانه ما اخدتش بالى خبطنى ودانى المستشفى و اتصلت بماما جتلى ووصلنى انا و ماما ما كنتش لوحدى يعنى
مروان / سبحان الله نفس الشاب
نور / صدفه
مروان / اهو يا سيدى ما عملتش فيلم انا و قولت مراتى بتخونى مع الواد ده و بدات اراقبها و انكد عليها عارفه ليه ما عملتش كدا
نور / عشان انا ما عملتش حاجه غلط
مروان / لا عشان انا واثق فيكي و فى نفسى وواثق فى البيت اللى جيتى منه
حسام يبتسم
نور / و موضوع الخلفه اللى كل شويه تعايرنى بيه
مروان / هو نفس الموضوع اللى كل يوم تتخانقى معايا بسببه بيحصل و لا لا انا ما قصرتش فى حاجه و على يد الكل دكاتره و روحت فلوس و صرفت ربنا مش رايد خلاص نسكت بقى مش لازم كل ما حاجه تحصل تربطيها بالخلفه
نور / انا ؟؟؟
مروان / اه انتى تحبى افكرك تحبى اعدهملك
حسام / خلاص احنا ولاد النهرده انتى ايه يرضيكي يا نور
نور / انا قولت من الاول البت دى تخرج من حياتنا
مروان / و انا ما اقدرش طول ما هى زميلتى فى الشركه ما اقدرش يعنى لو قالتلى صباح الخير اقولها اسف مش هينفع ارد عشان مراتى بتزعل
حسام / بس ما تروحش معاها يعنى عشان عاوزه تنقى شقه قولها مش فاضى تعبان اى حجه الشركه مليانه غيرك يعنى
محمد / و لا تقعد تضحك معاها فى مطعم
مروان / اهو هنجيب القديم و الجديد اهو مش قولنا ولاد النهرده
حسام / احنا بس عاوزينك تاخد بالك عشان بعد كدا ما هو التالته تابته يا صاحبى
مروان / حاضر حاجه تانى يا نور
نور / مش عارفه
مروان / اسمعى يا بنت الناس انا جيتلك لحد عندك خصوصا لما عرفت ان حسام هنا عشان انا عارف انه عاوز يحل خافى على بيتك يا بنت الناس خافى على بيتك
محمد / بصى يا نور
حسام / لا ثوانى يا بابا بعد اذنك بصوا انتوا قدامكوا تلت شهور بالكتير و انزل مصر فلو هتروحي معاه تعملوا حسابكوا مفيش مشاكل قبل ما انزل
مروان / هههههههههههههههههههههه لا باذن الله و لا حتى بعد عشر سنين خلاص اخر مره مش كدا يا نور هنعقل كدا و نهدى
نور / انا مش
حسام / المره الجايه لما هنزل مش هنزل عشان احل يا مروان المره الجايه مش هنزل عشان احل سمعت و لا اقول كمان
مروان / لا باذن الله خير
حسام / انا نازل يا عمى تحب اوصلك فى طريقى
مصطفى / مش هتستنى اما تشوف هيعملوا ايه
حسام / لا دوري خلص دلوقت دور نور اى كان قرارها احنا فى ضهرها عاوزه تديله فرصه اخيره براحتها عاوزه تنهيها براحتها مفيش مخلوق يقدر يفرض عليها حاجه
نور تبص لحسام يوطى على راسها يبوسها
حسام / لو زعلتها تانى اقسم بالله ما هرحمك عن اذنكوا
مصطفى / ماشى انا جاى معاك بالاذن انا
محمد / ما خلصناش كلامنا
مصطفى / وقت تانى بالاذن
مصطفى و حسام ينزلوا
محمد / انا هقوم و اسيبكوا لوحدكوا شويه
محمد يقوم
.....................................
فى المحل عند على
على / بس انت ايه اللى طلع الموضوع ده فى دماغك
عمر / جيت عليها كتير اوى يا على
على / ما انا قولتلك
عمر / و هى استحملت
على / ربنا يهدى سركوا و يبعد عنكوا امها
عمر / بقولك انا قولتلك على حوار الغردقه
على / لا مش فاكر
عمر / انا مسافر مع الشركه عشان نستقبل جماعه طليان عشان نخلص حوار كدا فى الشغل
على / قشطه
عمر / مش هوصيك بقى
على/ و لا تشيل هم هتغيب يعنى
عمر / لا باذن الله نمضى العقود و ارجع علاطول
على / ماشى بقولك صحيح
عمر / قول
على / انت قولت لأية على حوار الفرح ده
عمر / لا هى كانت طلبت و انا رفضت و هى سكتت بس انا نويتها باذن الله
على / طب ما تقولهاش بقي لحد ما ترجع
عمر / اشمعن
على / اهو يمكن تجد فى الامور امور و تعجبك واحده طليانيه و لا حاجه
عمر / ههههههههههههههههههههههههههههههههه
على / عجبتك اوى
عمر / تصدق انها مقلقه من غاده و مش فارق معاها الطليان خالص
على / قول بجد
عمر / ههههههههههههههههههههه
على / البت دى غلبانه اوى
عمر / عارف مش كدا برضه
عربيه حسام تقف و حسام و مصطفى جواها  و عمر و على يبطلوا ضحك و يتابعوا
حسام / اقسم بالله ما كان قصدى اى حاجه من اللى فهمتوها بس حضرتك شوفت السحله اللى انا فيها و هكلم المطار اشوف اول طياره امتى عشان اللحق ارجع
مصطفى / حصل خير
حسام / لو كانت الشقه خلصت كان زمان اليوم ده اتغير خالص يا عمى و على يدك اعمل ايه اختى و مراتى هعمل ايه
مصطفى / خلاص يا حسام خلاص مدام اطمنا على البنت خلاص مع ان والله و لا اطمنت و لا حاجه بالعكس قلقت اكتر
حسام / هانت كلها ساعات و ابقى عندها و اطمنك عليها بنفسى من هناك اهدى بقى
مصطفى / خلاص يا حسام قولنا حصل خير
حسام / عشان خاطرى بقى يا عمى بلاش تكبروا الموضوع انا ما اتكلمتش عشان عاوزك تديني فلوس و باذن الله اول ما هوصل هناك هبعت لحضرتك
مصطفى / خلاص يا حسام الموضوع ده اتقفل و عمتك داخله جمعيه الشهر الجاى هديهم لابوك على دول و هو يكمل
حسام / يا عمى
مصطفى / خلاص يا حسام سلام انت عشان تلحق تشوف هتعمل ايه
حسام / يا عمى
مصطفى يفتح الباب و ينزل و يروح يقعد على القهوه ثوانى و حسام يمشى
.................................
فى شقه امانى
نور / انا تعبت يا مروان
مروان / انتى اللى تاعبه نفسك يا نور انا اترقيت النهرده روحت جرى عشان اقولك و نحتفل سوا بس ما لقتكيش
نور / مبروك
مروان / حاف كدا
نور تبصله بحزن يقوم يبوس راسها
مروان / حقك عليا يا ستى خلاص بقى
نور / ما اعرفش
مروان / طب بصى تعالى ننزل نغير جو و نتعشي سوا فى اى حته و لو لسه مش مرتاحه هوصلك بنفسي تانى لحد هنا ايه رايك
نور / ما اعرفش
مروان / تحبى ادخل لامك استاذنها نخرج سوا عدننا لسه مخطوبين هههههههههههههههههههههه
نور مش بتضحك
مروان / بهزر معاكى يا بت ايه مال دمك تقيل اوى كدا ليه
نور برده بتبصله بحزن
مروان / على فكره انا روحت اكشف على النمره اللى بعتتلك الرساله و مش هسكت هروح ابلغ عنه
نور / يا ترى مين
مروان / حد غيران مننا يا نور حد مش عاوزنا نكون مع بعض
نور / ما عدتش عارفه
مروان / كل حاجه مش عارفه مش عارفه فى ايه يا نور مالك
نور / تعبانه يا مروان تعبانه اعصابى ما عادتش مستحمله لا توتر و لا خناق و لا شك
مروان / ما هو انتى لو بتثقى فيا ما كانش كل ده حصل ما هو لو تبطلى ترمى ودنك لكل حد شويه هترتاحى انتى اللى تاعبه نفسك يا نور
نور / انت شايف كدا
مروان / جدا و مش لوحدى على فكره على العموم جربى جربى مره واحده بس تسمعى لقلبك و تثقى فيا و انتى هتشوفى حياتنا ازاى بتتغير قدامك انا باقى عليكى و شاريكي و جايلك لحد عندك مع انك كل مره بتحصل مشكله بتجرى و تغضبى ما تزوديش المسافه بنا يا نور اتمسكى بيا زى ما انا ما متمسك بيكي حسسينى ان ليا قيمه عندك
نور / امال كل ده ليه غيرتى دى معناها ايه
مروان / لا يا نور انتى مش بتغيرى عليا عشان بتحبيني انتى اهم حاجه عندك كرامتك قدام الناس الناس ما تشمتش فيكي
نور / انا ؟؟؟
مروان / بصى انا هسيبك النهرده تفكرى فى كلامى و هاجى بكره و اهو برده ما تبقيش سبتى اخوكى اللى جاى من السفر من غير ما تشبعى منه حبه بس لو عاوزه تخرجى برده ما عنديش مانع انا بصالحك اهو استغلى الفرصه بقى و اطمعى و انا اى كان اللى يرضيكي هعمله
نور / انا مش عاوزه حاجه
مروان / انا بقى عاوز عاوزك جنبى لانى محتاجك و بحبك
نور / كل مره بتقول كدا
مروان / لان هى دى الحقيقه مفيش غيرها .... ها امشى و لا ايه
نور تبصله
مروان / فكرى بالراحه و بعقلك مش بعقل حد تانى و قررى و زى ما قال حسام التالته تابته اخر فرصه تحبى تديهانى و لا ايه
نور تهز راسها مروان يبوس راسها و يمشى امانى تطلع من جوه
امانى / جدعه يا بت انك ما روحتيش معاه صنف نمرود ناقص ربايه
نور / عن اذنك يا ماما انا تعبانه يوم طويل و مقرف
امانى / صحيح من جوزك لعمك لمراته يا ميله بختك يا امانى فى جوازات عيالك
نور / عن اذنك
امانى / و لا اخوكى اخوكى اللى انا مسنوده عليه البيه جاى
نور / اخويا الله يكون فى عونه سايب مراته تعبانه و جه مخصوص
امانى / امال يعنى مش راجل البيت
نور / لا يا ماما بابا ربنا يديله الصحه و طوله العمر هو راجل البيت
امانى / و هو ابوكى حد بيعمله حساب من طيبته خلانا ملطشه بلا وكسه
نور / عن اذنك
نور تدخل اوضتها و تقفل الباب
امانى / الواحد ما بقاش عارف يلاقيها منين و لا منين مقفله زى الدومنه
......................................
تانى يوم الصبح
نور نايمه فى اوضتها حسام يدخل يقعد جنبها و يعدى ايده بالراحه من على وشها تصحى تلاقيه مبتسم تبتسم و تقوم تقعد و هى بتتمطع و تتاوب
نور / صباح الخير
حسام / صباح النور يا قمر جيت لقيتك نايمه
نور / انت اتاخرت اوى بصراحه
حسام / كنت مخنوق شويه امبارح كان اصعب يوم فى حياتى
نور / الله يعينك انا مقدره
حسام / ندى وقعت و نقلوها المستشفى
نور / ياربى ازاى امتى
حسام / ششششششششششش وطى صوتك امبارح بالليل
نور / و هى عامله ايه النونو عامل ايه
حسام / كويسه ادوها حقن تثبيت و هتمشي عليها لاخر الحمل
نور / انت لازم تسافرلها حالا يا حسام انا بجد اسفه اوى ما كانش المفروض تيجى
حسام / شششششش ايه يا بنتى انتى هبله انتى اختى الوحيده ما فيش اغلى منك
نور / انا بجد
حسام / نور انا ما قولتش لحد غيرك عشان بثق فيكى خصوصا بعد كميه الخناقات اللى حصلت امبارح عمى لو عرف ان ندى جرالها حاجه و لا عمتى مها
نور / دى تبقى مصيبه
حسام / انا حجزت على اول طياره راجعه
نور/ خير ما عملت
حسام  / بس مش هقدر اسافر الا لما اطمن عليكى مش عاوز احس ان مجيتي جت على الفاضى
نور / بص يا حسام ماما اصلا غلطت لما كلمتك انت فى ايه و لا فى ايه
حسام / هنرجع للهبل اهو
نور / يا حسام مروان معاه حق انا لازم اتعلم اواجه مشاكلى بنفسى انا بحس ان ماما مسيطره على حياتى انا بخاف اخد اى قرار من غير ما ارجعلها
حسام / ماما بتحبك و يهمها مصلحتك
نور / عارفه بس
حسام / انتى حاسه ان مروان يستاهل فرصه تانيه
نور / انت ايه رايك
حسام / انتى لسه قايله انك لازم تتعلمى تواجهى مشاكلك بنفسك انتى رايك ايه
نور / انا بقول اخر فرصه و التالته تابته
حسام / عين العقل و على فكره نهاد و مروان مش هيجمعهم شغل تانى
نور / ازاى
حسام / طلبت خدمه صغيره من مدير الفرع و هو حبيبى ما اتاخرش
نور / مش فاهمه
حسام / مش مهم المهم عندى انك ما تشيليش هم
نور / و اللى عندها اخ زيك تشيل هم برده
حسام يلعب فى شعرها و يسيبها و يقوم
........................................
فى شقه عمر
سمر / بتتكلمى جد
أية / طبعا قالى اول ما النتيجه تبان و اجيب مجموع هنعمل فرح ما حصلش
سمر / ايوه بقى
أية / و هنحجز اسبوع فى اى حته اختارها
سمر / تركيا
أية / تركيا ايه يا ماما انا كنت بقول اسكندريه و لا السخنه
سمر / فقريه من يومك و بعدين
أية / و لا قبلين بس كدا
سمر / اهى خطوه برده احنا كنا فين
أية / ماما
سمر / يا عيون ماما
أية / عمر بيفكر ان حضرتك يعنى ترجعى شقه بابا محمود الله يرحمه
سمر تبصلها و ترفع حاجبها
أية / لا لا هو يقصد بعد الجواز و كدا مش دلوقت خالص
سمر / و انتى عاوزه ايه يا أية
أية / انا مش عاوزه غير انك انتى و عمر تتصالحوا انا ما ينفعش اختار بين جوزى و امى
سمر / لا يا أية انتى اختارتى فعلا فاكره و لا نسيتى فاكره لما سبتى ايدى و اختارتيه فاكره لما حطيتي  سكنيتهم التلمه على رقبتى و سبتيهم يدبحونى بيها
أية / ماما ما تفتحيش فى اللى فات
سمر / و هو اللى جاى ينفع من غير اللى فات
أية / و اللى فات يا امى فى صفهم هما تعالى يا ماما نبدا صفحه جديده و حبى عمر و اتعاملى معاه كويس هو كمان بيعزك و ما يرضالكيش البهدله انتى برده ربتيه
سمر / يعنى انتى عاوزه ايه من الاخر
أية / بالله عليكى بلاش مشاكل
سمر / يادوب اداكى ريق حلو بقيت انا الشريره انا بتاعه المشاكل
أية / يا ماما انا ما قولتش كدا انا اقصد ما تديهوش فرصه يمسك عليكي غلطه عشان خاطرى انا
سمر / بصى يا أية  اللى بيشيل قربه مخرومه انتى عارفه بيجراله ايه و انا مش هعيشلك العمر كله
أية / بعد الشر
سمر / شوفى مصلحتك يا بنتى و اللى هتشوفيه فى مصلحتك انا فى ضهرك و عمرى ما هعمل اى حاجه تضرك ارتاحتى كدا
أية / ربنا يخليكى ليا يا ست الكل
.............................
فى الشركه عند مروان تانى يوم
نهاد / سبنى فى حالى عشان انا فاضلى تكه و اولع فى ام الشركه دى باللى فيها
مروان / ليه ايه اللى حصل
نهاد / طبعا ليك حق ما انت من اول ما جيت و انت فى المكتب المكيف الجديد و الناس نازله فيك مباركات
مروان / و ده اللى مضايقك دا بدل ما تباركيلى يا نهى
نهاد / ما انت مش عارف ايه اللى حصل مش حاسس بالمصيبه اللى انا فيها
مروان / ابوس ايدك انا مش ناقص ايه يعنى اللى حصل
نهاد / اجى الشركه الصبح الاقى ياسر الزفت مشطب عليا قال ايه هو اللى مسك مكانك الجزمه نسى نفسه دا من سنتين بس كان لسه متعيين تحت الاختبار و انا اللى بدربه يرقوه و يخلوه الريس بتاعى
مروان / ياسر ياسر الاهطل
نهاد / تخيل انا اصلا ما سكتش جريت على المدير
مروان / طبعا دا هيخربها
……………………