تجارة مع الله

بارت الربع والثلاثون

گمت من مكاني ردت أشيلها الدكتور ما قبل أتقرب منها وراها نقلوها من الطوارئ للعناية المركزة
الاجهزة مشكلة بجسمها وراسها ملفوف ونايمه ما تدري بالدنيه وضيمها الولد الداعمها باقي بالمستشفى ما رايح ومن سألو على الحادث گال جنت أمشي بالفرع والفرع ضلمه وما شفتها من أنضربت يله حسيت بيها ومن گد ما خفت عليها وعلى حالتها ما عرفت بتمن ولا سألت على أهلها جبتها وأجيت للمستشفى وخابرت على أهلي ودليتهم المكان الصار بيه الحاث وأهلي جاين منطين خبر الاهل المحلات على الشارع واحد من أهل المحلات مخابر على رزاق گايله بنت أختك طلعت مدعومه وهي هسه بالمستشفى رزاق راجع مخابر ماهر ومدليه على المستشفى وماهر والولد جاين وراهم

رجع الولد گالهم إني هنا ما أروح وشتفصلون البس
رائد كاله توكل يابه مو ذنبك هذا قدر وصار وأحنه الغلطانين الولد ما قبل يروح بقى وياناا بالمستشفى
العرفته ريحانه من طالع رائد هي زاحفه وراه وطالعه تريد تروح وياه

هو جان مستعجل ومعصب ما منتبه عليها
بعد هي باقيه بلباب تلعب لحد ما أنظربت

بقينا ننتظرها تگعد أربع ساعات يله صحت
أول ما گعدت بجت بس صوتها كلش ناصي
گمت عليها بقيت لازمت أديها وابوس بيهن
اخ يا بعد الدنيا وناسها اخخخ يا كسره عمري
اخخ يا تعب سنيني يا يمه أحجي وياها وأبجي

رائد ضمدوله جرحه لكوه طاك دم وعلگوله مغذي وأنطوه مسكن لان انتهى الضغط معلگ عنده والوجع مال العمليه موته ولا ماكل ولا شارب شي
راد يبقى يمنا يبات بس محد قبل لا أهله ولا أني كوه عليه رجع لان اذا بقى يمنه ما راح يسوي شي بس يتعب أكثر هو وأسامه وأمه وعمتي دنيا رجعو
وأني وعمتي ساهرة بتنا وياها

دنيا : أول ما صعدنا بالسيارة رائد تجه راسه على الكرسي حيله مهدود المسكين منا عمليته وحالته التعبانه ومنا تبارك وسوايتها وجملت عليه عركته ويا ماهر والختاميه ريحانه الاخذت حيله كله
أنوب عمتي من صعدنا ما سكتت بقت تحجي
على براء ما عجبتها تصرفاتها

ام رائد : مكتوب عليك شلعان الگلب ما جنك ترتاح يمه رائد أسمع مني وإني أمك عوفها ما تفيدك

دنيا أسمعها وإني ميته من القهر ما اگدر ارد عليها هي هم حقها براء فقدت وتجاوزت عليهم كلهم والمره أنقهرت منها وهي تشوف أبنها مريض و متعذب يركض من صفحة الصفحه

ما جاوبها رائد بقى ساكت

_ يمه أنت متلوع من تبارك شلك بالوعات الجديدة عوفها وأشتري راحت بالك

رائد : واليرحم أمج وأبوج أسكتي مني

_ يمه لا تحترم ولا تهاب أحد أدعي عليك گبالي
وكدام العالم كلها تصيح مريض

دنيا : عمه أنتِ هم على كيفج هي محترگ گلبها وحجت هيج

_كلشي واله شي دنيا بت إخوج صلفه ما تهاب لا جبير ولا زغير عقلها زغير ما تفكر هو زلمه اله أسمه وسمعته شلون يضل يركض وراها بس حتى ما تزعل