حين يعصف العشق❤

1

رعد: ونا موافق هذه خطوة حتسهل
عليا وااااجد كيف ماقلت وحتخليني نتحرك براحتي
سليمان : خلاص يا رفيقي نتوكلوا على الله ونبدوا أول بأول بس أهم شي الحذر والسرية التامة

رعد رجع لف للشباك وقال: متخافش مبدئيا الدكتور عيسى يلي حنجمعك بيه قريبا
وهذا محروق بنفس النار لذلك هو
حريص زينا بالضبط
بش نوصلوا فيهم وناخدوا حقنا منهم.

وفي هالأثناء وفي الجهة الثانية من
الطريق وتحت الشركة الأمنية كانت أسيل
و أميرة طالعات من المزين
يلي مقابل الشركة،

أما رعد فكان سارح في الفراغ
قدامه لعند لمحهم طالعات يهدرزوا ويضحكوا حس كأنه شاف وحدة منهم قبل
ولأنه ذاكرته تجمع في الأشخاص
بسرعة قدر يتذكر أول لقاء ليه معاها،،
تفكرها وتفكر ملامحها الطفولية إلي كانت تفصلها عنه مرش شباك سيارته بس.
كانت يشوف فيها وفي تعابير وجهها توا
وهيا مليانة ضحك وراحة .

وماانتبهش لسليمان ينادي عليه بش يشربوا قهوتهم
فاق عليه ينادي بصوت عالي لف وقعمز عالكرسي
شربوا قهوتهم وكملوا كلام

🌿🌿🌿🌿🌿🌿🌿

يوم الإثنين 12 يناير

مكالمة هاتفية

خلاص يا دكتور بعون الله موعدنا
يوم الخميس الجاي في نفس المطعم
يلي تلاقينا فيه المرة إلي فاتت نبي نجمعكم ببعض عشان نبدوا في التنفيذ لأننا تأخرنا واجد

عيسى كان مقعمز في صالة شقته وقدامه مجموعة أوراق:
تمام يا أفندي إن شاء الله نتلاقوا في موعدنا
رعد: تم يا دكتور عينك على روحك ويوم الخميس بعون الله ندووا في التفاصيل.
عيسى: يستر الله نتلاقوا إن شاء الله.
رعد: عالخير بعون الله ...
مع السلامة وسكر الخط.

أما عيسى استمر بالشغل عالأوراق يلي قدامه وهو مش حاس بالوقت لعند سمع باب الحمام تسكر بالقوة في الأول انخلع لكن بعدين رجع ركز على أوراقه
صابرين مرته وقفت قدامه وواضح أنها معصبة وخبطت بكف يدها عالطاولة إلي جنبها.
عيسى رفع عيونه فيها وحاول يهدي نفسه:
خيرك يا لطيف!! مش المفروض مروحة من لمة صاحبتك فرحانة وجوك حلو... خيرك لاوية وجهك؟؟

صابرين بغل وتعصيب😡😡: أنت هني مبرد دمك عالآخر وأني مخليني في وجه المدفع نتحمل في كلام إلي تسوا وإلي ماتسواش.

عيسى زفر بقوة قال في نفسه(نفس الدسكة ياسبحان الله)
مسكها من يدها وقعمزها جنبه عالفراش وتكلم بهدوء:
توا أني نبي نفهم من لايم عليك المشي، مش كنتي كسبتي راحتك في حوشك خيرلك من مكان عارفة حينحرق دمك فيه.
صابرين جبدت يدها من يده ووقفت وهيا معصبة😡😠: إيه قول هكي أنت هذا إلي تبيه تبي تحبسني في الحوش وأنت طول اليوم خدمة في خدمة وأنا تبي تحرمني من صاحباتي.
عيسى كان متحسر على حالهم حاول يتمسك بهدوءه: ياصابرين هدم لو صاحباتك بجديات كنتي روحتي من عندهم فرحانة، كانوا قدروا وضعك وراعوا مشاعرك 😏😏
صابرين وهيا ترعش من العصبية وتاكل في أظافرها:
خيرها حالتي؟؟ شن فيها حالتي؟!
ماخيرني شي ماخيرني شي....وقالتها بعياط.
عيسى ناض وقف وحاول يحضنها بش تهدا لكن هيا كانت ترعش مع بعضها تكلم بمسايسة:
ياصابرين ربي يهديك مدامك عارفة أنه حالتك مافيها شي علاش هالشو إلي درتيه خليتيني نخدم على حالي راك صدعتيني بنفس الموال كل طلعة بتغيري جوك تروحي تنكدي عليا وأني والله ماني ناقص.
صابرين بعياط وهيا تفك في روحها منه :
طبعا طبعا مش فاضيلي خدمة خدمة خدمة مستشفى في الصبح وعيادة باقي النهار ولما معندكش عيادة تمشي لأمك وتوا خدمتك الجديدة لا حاس بيا ولا معبرني.