_ Bonjour madame Janette, vous allez bien ?
_ Très bien. Toujours à l'heure monsieur Pierre.
_ Le temps compte pour nous. Allez faites entrer les colis.
دخلو زوز رجال هازين جوابات و كرادن مسكرين و علاهم أسامي و ختم بالشمع بالأحمر. حطوهم فوق بيروها. انا في اللحظة هذيكا بقيت ناكل. كاس اليموناضة كي هزيتو بارد يدمع. بلار و عندو ساق مدورة ملوطة : المطعم حلو و بارد و صافي مافيهوش فتفات القارص. تزيد تعديه مع كعبة كعك ورقة تحس جوعك بدا يطفا بالشوي بالشوي.
_ C'est pour vous madame.
_ Ah oui ?
خذات جوابها كبير و مدور و معاه بوكي ورد ملفوف في جريدة تحسها باهتة فيه شوي و فرحانة كالصغير لي جابولو حاجة باهية.
_Madame Margot vous passe le bonjour. Elle a insisté que je cultive les fleurs moi même du jardin municipal.
_Oh merci !
_ A très bientôt.
_ Merci encore une fois.
_Je n'ai fait que mon travail.
عمل هكا نحا الكبوس من فوق راسو و طبسو متع حب يقول بسلامة و خرج. وقتها تفكرت لي أنا مازلت بحذاها و غدرتني تلفتتلي وقت فمي معبي تقول راس نفيخة.
_ إن شاء الله عجبك الحلو؟ بنين؟
_ بنين يعطيك الصحة.
_ جاني جواب اليوم من عند مرت القنصل الفرنساوي. تو بنتي فيسع تتعلم اللغة و تولي تفهمني فاش نحكي مع الخارج و تولي تعاوني حتى الهنا.
قلتلها في قلبي هخخخخ نفهم فيكم تهنا.
أيا كمل كاسك بش نمشيو. دخلت الجوابات لبيت الصغيرة للداخل دخلت للكابين الكل حلت كل وحدة بالمفتاح و جبدت الفلوس حطتهم في صرة مزيانة بعد حلت الكاسة لي على بيروها جبد منها فلوس لكلهم صرف. عندها قفة عبتها بحاجاتها و رجعتلي.
_هيا نمشيو ؟
دخلت الماعون غسلتو و أنا خبيت أكا الجواب و لقيت خبز عربي ملفوف في منديلة تفكرت إلي لمرا لي كلمتها في التاكسيفون قتلي باعثتك بش تهز الخبز وليت تلعب بالتليفون. وليت مديت الخبز لجنات و خبيت الكتاب و سكرت صاكي. صكرت هي الباب بالبلج القديم كي تراها كيفاش مرا فينو تفارع في الحديد أذاكا يشدك الضحك. دوت دزت دزت لي تسكر بعد عناء طويل. و لي يعجبك فيها لا تغشت لا وجها تقلب بقات كيما هي هادية و بالها واسع. يا ميمتي أنا حطيت ساقي البرا و ضربتني ريحة البحر تفحفح ريحة قوية لين الملح تحسو في لسانك و الدنيا سخونة البرا. سيدي بوسعيد متبدلة عليا شوية أما باقي مزيانة.
الغريب في هذا إني نساير في الأحداث بكل هدوء و ماشية مع المرا منعرش حتى لوين. حاسة روحي هذا الكل نعرفو و ريتو أما فاقدة الذاكرة. مخي يقلي يا بنتي وين ماشية و مخي يقلك برا على روحك مطمن و مرتاح، و كي القلب غلاب كي تبدى الروح مطمنة.
تبعنا الظل تحت الشجر الدنيا سخونة أما منسمة و بقينا هابطين. عطاتني شديت أكا الجواب لي جابوهولها العسكر قبيلا و شادتو تقول شادة كنز خايفة عليه و هي تمشي شادة القفة باليسار و يدها اليمين حاطتها على كتفي كاينها معنقتني و كل مرة تحكيلي حاجة. قتلي مازالي كان الهروس معملتوش أتو اليلة و إلا غدوة باقي الفاحات حاضرين. و أنا نجاري فيها.
لين وصلنا قدام دار بابها بفردتين أزرق و خارج من تحتو ماء. دقدقت على الحلقة مرتين لين جاوبنا صوت الداخل هاو جيييت و تحل الباب. مرا في آخر الأربعين تشبهلي في الوجه تقول نسخة صافنة جبتها و وراها طفلة أخرى تسيق من تالي يبردو في الحوش حاصيلو.
كي شافتني قتلي لتوا إنت نقود لبوك ؟
ياخي طلت عليها جنات وجها تقلب و فرحت و ولات تبوس و تعنق و قالتلها
_ شعملت فيك ؟
_ بنوتي عاقلة جات ونستني يعطيها الصحة
_ أيا أدخل أفطر بحذانا
_ و الله ما نجم يستناو فيا على الفطور
_ أشرب حاجة على القليلة .
_ العشية نجي و نقعد و نشرب، أسمعني توا البنوتة بش نهزها تقيل عندي.
_ و الله يا عزيزتي كان يجي بوها و ميلقهاش يعملي شوهة.
_ يجي مخر هو و راجلي عندهم الحصيدة يروحو كان نصف الليل و ممكن زادة بايتين
_ أو خوها هبط بقضية و راجع و من الصباح يسإل عليها ماك تعرف.
_ حمدة يقول عليا أنا لا. أيا متكسرليش كلمتي الدار فرغت عليها نهزها تونسني.
تحسها قبلت على مضض دخلت بطات شوي و رجعت بصحن ملفوف و فوقو جردقتين خبز.
_ يعيشك يا علاه تشقي في روحك. تو هكا باعثة بنتك مع فطورها تي أنا مل البارح قاضيتلها ناوية نضيفها عندي توا رانا عيلة وحدة .
_ ربي يستر حبيت نذوقك أنت.
حطت صبعها على عينها متع هنيني و قتلي : أبقا عاقلة و عاون طاطاك جنات.
كهو و صكرت الباب و هبطنا أحنا في الزنقة.
ياخي أنا وين و بنت شكون و شكون هذم ؟
بالوعة 2
ابدأ من البداية
