" مكنتش فاكراها كدا خالص .. انا عارفة انها ست شديدة شوية بس كنت بحسها بنت اصول و مكنتش أتخيل إنها ممكن تفتري كدا و تقف في وش واحدة غلبانة زي صفية "
أبدت أماني لسماح استياءها الشديد بينما يجلسان معاً في المطبخ يعدان طعام الغداء بعد أن حكت لها سماح ما قالته نهال لولدها شهاب في زيارتها الأخيرة و اضافت اليه ما سمعته من صديقتها التي تعمل في منزل الدكتورة نهال و التي اكدت لها إصرار والدة شهاب على اتمام زواجه من الطبيبة نورهان و التي لا تمانع هي الاخرى رغم وضع شهاب المعقد ، ثم أضافت أماني :
" بعدين هي الدكتورة نورهان دي انا فاكراها كانت حلوة اوي و صغيرة كمان ايه يخليها تقبل بالوضع دا ، و ترمي نفسها على واحد متجوز و عند عيال ، ليه ترخص نفسها كدا "
" الدكتور شهاب اسم الله عليه طول بعرض حلو و غني يا ست أماني و راسي كدا مش خفيف "
اجابتها سماح ضاحكةً ببلاهة .
" قطفي طيب يا حبيبتي الملوخية بلا خفيف بلا تقيل " خرجت أماني من المطبخ و تسللت الي غرفتها لتتصل سراً بصفية على الرقم الجديد التي ارسلته اليها مؤخراً .
" أيوة يا حبيبتي عاملة ايه دلوقتي ؟"
"انا كويسة يا ماما .. مم .. الولاد عاملين ايه ؟ " سألتها صفية بحزن .
" كويسين يا حبيبتي متقلقيش عليهم ، انا يعني مش هعرف اربيهم و اهي سماح بتساعد و شهاب كمان الله يباركله " خفضت صوتها قليلاً على ذكر اسم شهاب و عندما قابلتها صفية بالصمت . أكملت : " ايه الأصوات اللي جنبك دي انتي فين ؟ "
" انا في البحر يا ماما ، بغير جو بس شوية "
"لوحدك؟؟؟" سألتها أماني بقلق .
" لوحدي اه ، الدكتورة صابرين جت معايا بس هو يوم و رجعت على طول تاني عشان شغلها و قالت كام يوم و ترجعلي "
" انتي في الشاليه بتاعها يعني ؟"
" ايوة متقلقيش عليا خالص"
" طيب يا صفية انا ..مم عايزة اقولك بس حاجة .. متزعليش بس مني "
" خير يا ماما اماني انا ازعل منك ازاي بس ، دانا مضايقة اوي اني سبتك كدا تتبهدلي بالولاد "
" مفيش بهدلة ولا حاجة يا روح ماما ، انا بس سمعت كلام كدا و قلت انبهك احتياطي.. مم حماتك ام شهاب .. عايزة تجوزه نورهان البت الدكتورة الملزقة دي "
" ما يتجوز ولا يتفلق يا ماما ، مليش دعوة بعدين هما يستاهلو بعض اصلا الموضوع ميخصنيش اصلاً "
اجابتها صفية بغضب شديد ثم استعادت هدوءها بالتدريج امام صمت أماني المفاجئ :
" معلش يا ماما مش قصدي أعلى صوتي عليكي ، ااأنا آسفة . انا بس مش عايزة اتكلم عنه دلوقتي ، معلش سامحيني "
YOU ARE READING
صفية 🥀
Romance"أنا صفية عمري ٣٢ سنة عزباء أو عانس يعني تخطيت العمر الرسمي للزواج في مصر- بكام سنة كدا- مع إني مش وحشة اوي يعني بس مش راضية تظبط معايا .. دايما دايما بيحصل حاجة غلط عموما مش دي القصة خالص أنا أصلًا استلسمت من زمان جدا ... بطلت معافرة .. بطلت أجري...
