رواية جماره

١٧

غير ورث ستك الله يرحمها ودول برضك حلال صافى ..غير دهب ستك اللى مرضيتش افرط فيه واصل ولا اوريه حتى لمرتى ..

غير دهب امك الله يرحمها الى جبتهولها من شقاى وعرقى وشغلى فأرض ابوى وانى فعمر الشباب ..

الحجات داى كلها فلوسها حلال وعمرها ماتخلطت ولا صرفت منيها ولا عليها قرش حرام ..

وعليم الله كل قرش كان عيتصرف على الارض داى كان من ريعها ..وكل قرش كانت عتجيبه طول سنين كنت عركنه على جنب لحاله مع الدهبات ..وسكت ياخد نفس وكمل ..

كنت خابر زين ان لازمن كل الفلوس اللى عميلتها من حرام هياجى يوم وتغور مره وحده، ومهيقعدليش غير الفلوس داى ..قولت لما اكبر اتوب توبه نصوحه واروح احج منيهم واكمل باقى حياتى اصرف منيهم واطهر بدنى من الحرام بالحلال ..بس الشيطان غواى واللى تزغلل قلبه الفلوس عيفضل عبد ليها طول عمره ..

سكت ياخد نفس وجاهين هز دماغه بأسى وهو موطى كيف مايكون خجلان من الحديت وابوه كمل .

الغرض ..انى لما عرف ان يومى قرب بعت الارض داى من ورا شاهين وطلبت من الشارى ميجبش سيره لشاهين انه اشترى الارض دلوك واصل عشان انت مكنتش هتقدر  عليه ولا تقدر تاخدها من يده بعد موتى لو حوصول ايه ..

وعشان اضمنلك حقك وان الفلوس تزيد متخسش وتعرف تتصرف فيها فأى وكت وفأى زمان حولتهالك سبايك دهب ...اشتريتهم بكل الفلوس ومفضلش منيهم غير التنين جنيه اللى اديتهم لعيالك ..مرضيتش اقرب عليهم واصل ..وسكت ياخد نفس وكمل ..

السبايك داى انى حطيتها فجره ..والجره داى دفنتها فالبيت اللى انتو قاعدين فيه دلوك ..بيت ابوى الله يرحمه ..موطرح حوض الطلمبه القديم ..وانى اللى صممت على شاهين يديك البيت ويخليك تتنقل فيه وقنعته بحجة ان ديه هيأثر على هيبته وسط الناس ومشيخته ..

فضل سنين معارفش، لكن اهنه قريب صاحب الارض اتزنق وحب يبيعها ومن اهنه شاهين عرف انى بعتها من وراه وقبضت حقها اتهوس وبقا كيف الغول يحوم فوق راسى عاوز يعرف وديت حقها فين ...

ولما ملقاش فايده جاب عقود وشهود وخلانى ختمتله وبصمت على باقى الارض كلها وحولها باسمه خاف احسن ابيعها من وراه هى كمان  ...وسكت ياخد نفس وكمل ..

انى قولت زى بعضه هى اكده اكده الارض جاهين مهيقربهاش ولا عايز منيها ..

ودلوك ياولدى الدهب ديه حلال محلل واحلفلك على كتاب الله ماداخله قرش حرام ..ولو فيه قرش حرام انى اللى هتحمل ذنبه قدام ربنا مش انت ..ومد يده على المصحف وحلف يمين الله وحلف بقرآنه بأنه مكدبش فحرف واحد من كلامه ..

بَعَد كتاب الله عنه وحطه على حاشية السرير واتنهد بارتياح كنه جبل وانزاح من فوق كتافه وبص لجاهين اللى كان مدنقر فالارض وساكت وعيلعب فشعر دقنها ..