عشقهُ خنجر في خاصرتي

البارت الثاني و الاربعون

-اشو مستفلتة يولي وطلع لسانج،  تذكري بيوم جنت جوه رحمتي ، لو ما اني انت هسه بفضيحة مدفونة

-مشكور ما قصرت ابن عمي ،  وفضلك على راسي اانت ،  بس هالسالفة سدها لا تخليني اسدها بمعرفتي ..

-ليش ترفضيني؟؟

-شبيك فراس صدك تسولف عفيه

-متشاقين قبل اني وياج

-لا والله بس سالفتك مدري شلونها

-ليش شبيها اتزوجج يعني كفر

-اي تكفر بالعشرة ..زوجتك شكد زينه وياك وويه اهلك وويه كل ناسك خلفة عندك ورد عيشتك دحمد ربك يمعود انت شناقصك

-ما مسوي حرام

رافع حاجبه ومكتف ايديه لصدره ما اهتم ابد للي حجيته ..تجاوزته افوت واني اهدده
-شيلها من راسك احسن الك ...

دخلت من باب بيتهم ، وكعدت يمهن ،  شدن شافت وجهي مكلوب سالتني ما جاوبتها كلت الها ما بيه ...

عيني على مرته حاطه ابنها بحضنها تطعمه ..بالله هذا هم يعرف يشكر نعمته عمى اي والله مو زلم مجلوبين هالنوب من شافوا غدير كلهم تشجعوا ذاك غسان هم الله خبله وشاد على ضمياء زوجيني!!

كلام فراس بقى ينخر راسي ، وحسيته يكدر يقنع اخواني هالمره ، لازم عليهم لزمات هو وهم ورط غافر بدين جبير ، من عنده احتاج من ديشتري محلات بصف محلاته ..

راد مني ما كدرت انطيه لان فلوسي نص يم غدير ونص انطيتهن لجدتي من استدان منها محمد مره ثانية ...

وهسه ديستخدم فراس هالشي ضغط عليهم ..ومو بعيد يحسبوهن مهري اي اهلنا اسوء من اسوء تفكير قروي بدائي ..

عدهم المره ما تورث ، وما تتزوج الا اللي يختاروه ،  وحتى توصل بيهم المواصيل يبيعوها مثل ما سوه بغصن ..

اللي ما تدري وغافلة بان اخوها حاسب زواجها تجارة وربح ومكسب  ..كلنا نعرف شيخ رياض شكد دفع مهرها  ؟؟؟

مرت ايام وعزموهم لبيت عمي ابو محمد لبيتنا اول مره ، بعد العقد وهم كملوا عقد المحكة هنا ...

جوي كلهم لبيتهم اللي تركوه الفترة المرت من صاروا خلفتهم كلهن ببغداد بين دراسه وسكن همه هم حولوا لهناك ..

طبعا عزموا الزلم بعمامي وجدتي وعمتي صابرين بس ما رضت يجن ، لخاطر شدن اللي من سمعت ديجون تخبلت وتخربطت ..

وسمعت بيها متخربطة من الصبح وترد من راسها واكعه مريضة المسكينة شكد موقفها كان صعب!!