ﺍ
# ﻣﻮﺳﻢ _ ﺍﻟﺘﻮﻟﻴﺐ
# ﺟﻤﺎﻥ _ ﻓﺮﻳﺪ
# ﺍﻟﺠﺰﺀ _ ﺍﻻﻭﻝ
ﺃﺻﺒﺤﻨﺎ ﻭﺃﺻﺒﺢ ﺍﻟﻤﻠﻚ ﻟﻠﻪ ﻭﺍﻟﺤﻤﺪ ﻟﻠﻪ ﻭﻹﺇﻟﻪ ﺇﻻ ﺍﻟﻠﻪ ...
ﻫﻜﻲ ﺗﺒﺪﺍ ﻳﻮﻣﻬﺎ ﺑﻘﺮﺍﻳﺔ ﺍﻷﺫﻛﺎﺭ ﻭﻫﻲ ﺗﺘﻤﺸﻰ ﻓﻲ ﺍﻟﺸﺎﺭﻉ ﺍﻟﻠﻲ ﻓﻴﻪ ﺣﻮﺷﻬﺎ ﻓﻲ ﻣﻨﻄﻘﻪ ﺭﺍﻗﻴﻪ ﻭﺣﻠﻮﻩ ﻭ ﻧﻈﻴﻔﻪ .. ﻓﻲ ﺑﺤﺪﺍﻫﻢ ﻛﻞ ﺷﻲ ... ﻛﻮﺷﻪ .. ﺳﻮﺑﺮ ﻣﺎﺭﻛﺖ .. ﺣﺘﻰ ﻣﺤﻞ ﻭﺭﺩ ﺍﻟﻠﻲ ﻳﻨﺸﺮﺡ ﺻﺪﺭﻫﺎ ﺃﻛﺜﺮ ﻟﻤﺎ ﺗﺸﻮﻓﻪ .. ﺍﺑﺘﺴﻤﺖ ﻟﻤﺎ ﻟﻘﺖ ﺍﻟﻌﻢ ﻣﺴﻌﻮﺩ ﻳﻔﺘﺢ ﻓﻴﻪ ..
ﺣﻨﺎﻥ : ﺻﺒﺎﺡ ﺍﻟﺨﻴﺮ ﻋﻤﻲ ﻣﺴﻌﻮﺩ ..
ﺍﻟﻌﻢ ﻣﺴﻌﻮﺩ : ﺻﺒﺎﺡ ﺍﻟﻮﺭﺩ ﺣﻨﺎﻥ ﺑﻨﺘﻲ ..
ﺣﻨﺎﻥ ﺑﻀﺤﻜﻪ : ﺷﻮﻳﻪ ﻭﺟﺎﻳﺎﺗﻚ ... ﻭﻣﺸﺖ ..
ﺍﻣﺎ ﺍﻟﻌﻢ ﻣﺴﻌﻮﺩ ﺍﺑﺘﺴﻢ ﻭﺧﺶ ﻟﻤﺤﻠﻪ ..
ﺧﻄﻤﺖ ﻉ ﺍﻟﻜﻮﺷﻪ ﺧﺪﺕ ﺑﺮﻳﻮﺵ ﻭﺧﺒﺰﺓ ... ﻭﻃﻠﻌﺖ ﻭﺑﻌﺪﻳﻦ ﺧﻄﻤﺖ ﻉ ﺳﻮﺑﺮ ﻣﺎﺭﻛﺖ ﺧﺪﺕ ﻋﻮﺍﻟﺔ ﻓﻄﻮﺭ ﻭﻃﻠﻌﺖ ... ﻓﻲ ﻃﺮﻳﻘﻬﺎ ... ﺣﻄﺖ ﺷﻜﺎﺭﺓ ﺍﻟﺨﺒﺰﺓ ﻭﻋﻮﺍﻟﺔ ﺍﻟﻔﻄﻮﺭ ﻗﺪﺍﻡ ﺣﻮﺵ ﺑﺴﻴﻂ ﺟﺪﺍ ﻓﻲ ﻣﻘﺪﻣﻪ ﺍﻟﻤﻨﻄﻘﻪ ﻃﻘﺖ ﺍﻟﺒﺎﺏ ﻭﻣﺸﺖ ﺑﺴﺮﻋﻪ ..
ﺍﻧﻔﺘﺢ ﺍﻟﺒﺎﺏ ﻭﻃﻠﻌﺖ ﺍﻟﻤﺮﺍﻩ ﻟﻘﺖ ﺍﻟﺤﺎﺟﺎﺕ ..
ﺍﻟﻤﺮﺍﺓ ﺑﻔﺮﺣﻪ : ﻛﺎﻥ ﻧﻌﺮﻑ ﻣﻨﻮ ﺑﺲ ﺍﻟﻠﻲ ﺍﻭﻝ ﻛﻞ ﺳﺒﻮﻉ ﻳﺪﻳﺮ ﻫﻜﻲ ... ﺗﻨﻬﺪﺕ .. ﻣﻦ ﻛﺎﻥ ﻳﻜﻮﻥ ﺭﺑﻲ ﻳﻔﺘﺢ ﻋﻠﻴﻪ ﻭﻳﻔﺮﺡ ﻗﻠﺒﻪ ﻛﻴﻒ ﻣﻔﺮﺣﻨﻲ ﺍﻧﻲ ﻭﺻﻐﻮﻳﺮﺗﻲ ... ﻭﺧﺸﺖ ﻭﺳﻜﺮﺕ ﺍﻟﺒﺎﺏ ..
ﺧﻄﻤﺖ ﻉ ﻣﺤﻞ ﺍﻟﻮﺭﺩ ﻭﺧﺸﺖ ..
ﺣﻨﺎﻥ : ﻛﻴﻒ ﺣﺎﻟﻚ ﻋﻤﻲ ﻣﺴﻌﻮﺩ ..
ﻣﺴﻌﻮﺩ : ﺍﻟﺤﻤﺪ ﻟﻠﻪ ﻳﺎﺑﻨﺘﻲ ﻓﻲ ﺧﻴﺎﺭ ﺍﻟﺨﻴﺮ ..
ﺣﻨﺎﻥ ﺑﺈﺑﺘﺴﺎﻣﻪ؛ ﺩﻭﻭﻭﻡ ﻳﺎﺍﺍﺍﺭﺏ ...
ﻣﺴﻌﻮﺩ : ﺻﺤﻴﺘﻲ ﻳﺎﺑﻨﺘﻲ .
ﺣﻨﺎﻥ ﺑﺈﺳﺘﻐﺮﺍﺏ : ﻉ ﺷﻨﻮ ...
ﻣﺴﻌﻮﺩ : ﻉ ﺑﺎﺯﻳﻦ ﺃﻣﺲ ... ﺍﻧﻲ ﻭﺍﻟﻠﻪ ﻳﺎﺑﻨﺘﻲ ﺟﺖ ﻓﻲ ﺍﻟﺪﻭﺓ ﻣﻨﻴﻦ ﻗﻠﺖ ﻗﺪﺍﺵ ﻟﻴﺎ ﻣﺎﺫﻗﺘﻪ ..
ﺣﻨﺎﻥ ﺑﻀﺤﻜﻪ : ﻋﻤﻲ ﻣﺴﻌﻮﻭﻭﺩ .. ﻳﺎﻋﻤﻴﻴﻲ ﻣﺴﻌﻮﻭﺩ .. ﻭﻳﻦ ﺍﻟﻠﻲ ﻭﺻﻴﺘﻚ ﻋﻠﻴﻪ ..
ﻣﺴﻌﻮﺩ ﺿﺤﻚ .. ﻭﻣﺸﻲ ﺟﺎﺑﻠﻬﺎ ﻃﻠﺒﻬﺎ ﻭﺟﻲ ..
ﻣﺴﻌﻮﺩ : ﺗﻔﻀﻠﻲ ﻳﺎﺑﻨﺘﻲ ..
ﺣﻨﺎﻥ ﺑﺈﻧﺒﻬﺎﺭ : ﻣﻦ ﻳﻮﻣﻚ ﺫﻭﻕ ﻳﺎﺭﺍﺟﻞ ﺃﻧﺖ ..
ﻣﺴﻌﻮﺩ : ﻫﻬﻬﻬﻬﻬﻬﻬﻬﻪ ... ﺗﺴﻠﻤﻲ ...
ﺣﻨﺎﻥ ﻋﻄﺎﺗﻪ ﺣﻖ ﺍﻟﺒﺎﻗﻪ ... ﻭﻃﻠﻌﺖ ﻣﺘﻮﺟﻬﻪ ﻟﺤﻮﺷﻬﺎ ﻭﻫﻲ ﺗﺸﻮﻑ ﻟﻠﺒﺎﻗﻪ ﺍﻟﻠﻲ ﻓﻴﻬﺎ ﻧﻮﻉ ﺍﻟﻮﺭﺩ ﺍﻟﻠﻲ ﺗﻌﺸﻘﻪ " ﺍﻟﺘﻮﻟﻴﺐ "..
ﻓﻲ ﺣﻮﺷﻬﺎ ..
ﻟﺒﺲ ﻭﺗﺄﻧﻖ ﻭﻃﻠﻊ ﻣﻦ ﺩﺍﺭ ﺍﻟﻨﻮﻡ ﻓﻴﺪﻩ ﺷﻨﻄﻪ ﻭﺟﺎﻛﻪ ﻉ ﺍﻳﺪﻩ ... ﻭﻫﻮ ﻣﺎﺷﻲ ﻓﻲ ﺍﻟﻤﻤﺮ ﻭﻗﻒ ﻗﺪﺍﻡ ﺩﺍﺭ ﺑﻨﺎﺗﻪ ﻭﻫﻮ ﻳﺴﻤﻊ ﻓﻲ ﻣﻨﺎﻗﺮﺗﻬﻢ ..
ﻓﻲ ﺍﻟﺪﺍﺭ ..
ﺭﻫﻒ : ﻳﺎﻣﺴﻤﻮﻣﻪ ﻳﺎﺑﺨﻴﻠﻪ ... ﺩﻳﻤﺎ ﻟﻤﺎ ﺗﻄﻠﺒﻲ ﻣﻨﻲ ﻧﻌﻄﻲ ﻭﻻ ﻣﺮﺓ ﻗﻠﺖ ﻻ ...
ﻟﺒﻨﻰ : ﻓﻜﻴﻨﻲ ﻣﻦ ﺍﻟﺪﺭﺍﻣﺎ ﺗﺮﺍ .. ﻋﺎﺭﻓﺘﻴﻨﻲ ﺣﺎﺟﻪ ﺷﺎﺭﻳﺘﻬﺎ ﺟﺪﻳﺪﻩ ﻣﺎﻧﻌﻄﻴﻬﺎﺵ ﻗﺒﻞ ﻧﻠﺒﺴﻬﺎ ..
ﺭﻫﻒ ﺑﺘﻜﺸﻴﺦ : ﻭﺧﻴﺮﻧﻲ ﺍﻧﻲ .. ﻧﺸﺮﻳﻬﺎ ﻣﻦ ﻫﻨﻲ ﺗﻠﺒﺴﻴﻬﺎ ﻣﻦ ﻫﻨﻲ ﻭﻻ ﻧﻌﺘﺮﺽ ﻭﻻﻧﻘﻮﻝ ﻓﺤﺎﺟﻪ ..
ﻟﺒﻨﻰ ﺑﻀﺤﻜﻪ : ﻛﺎﻥ ﺍﻧﺘﻲ ﺣﺎﻟﻪ ﺩﻗﻨﻚ ﻣﺎﻋﻨﺪﻱ ﻣﺎﻧﺪﻳﺮﻟﻚ ..
ﺭﻫﻒ ﺑﺼﺪﻣﻪ : ﺻﺎﺍﺍﺭ ﻫﻜﻲ ... ﺑﺎﻫﻲ ﻳﺎﻟﺒﻨﻲ ﺑﺎﺍﺍﺍﺍﻫﻲ .. ﻭﺩﺍﺭﺕ ﺣﺮﻛﻪ ﺑﺈﻳﺪﻳﻬﺎ ﻉ ﺫﻗﻨﻬﺎ ...
ﻃﻘﻄﻖ ..
ﻟﺒﻨﻰ : ﺣﺒﻴﻴﻴﺒﻲ ﺧﺶ ..
ﻓﺘﺢ ﺍﻟﺒﺎﺏ ﻭﻫﻮ ﻳﻀﺤﻚ ..
ﻧﻀﺎﻝ : ﻧﻔﻜﺮ ﻧﻔﺼﻠﻜﻢ ﻛﻞ ﻭﺣﺪﻩ ﺩﺍﺭ ﺑﺮﻭﺣﻬﺎ .. ﻭﻏﻤﺰ ﻟﺮﻫﻒ ..
ﺭﻫﻒ ﺑﻤﻜﺮ : ﻫﻜﻲ ﺃﺣﺴﻦ ﺑﺎﺑﺎ ..
ﻟﺒﻨﻲ ﺗﺨﺎﻑ ﺗﺮﻗﺪ ﺑﺮﻭﺣﻬﺎ ... ﻭﻣﺎ ﺗﺤﺒﺶ ﺗﻘﻌﺪ ﺑﺮﻭﺣﻬﺎ ﻓﻲ ﺍﻱ ﻣﻜﺎﻥ ﺗﻜﻮﻥ ﻓﻴﻪ ..
ﻟﺒﻨﻲ ﺑﺨﻮﻑ : ﻣﺎﻣﺎ ﻣﺶ ﺣﺘﺨﻠﻴﻜﻢ ..
ﺭﻫﻒ : ﺗﻮ ﻧﻘﻨﻌﻬﺎ ﻋﺎﺭﻓﻪ ﻗﺪﺭﺗﻲ ﻓﻲ ﺃﻗﻨﺎﻋﻬﺎ ..
ﻧﻀﺎﻝ ﺑﺈﺑﺘﺴﺎﻣﻪ ﻣﻜﺮ : ﺣﺘﻰ ﺍﻧﻲ ﺣﻨﺤﺎﻭﻝ ﻓﻴﻬﺎ ...
ﻟﺒﻨﻰ ﺭﺳﻤﺖ ﻉ ﻭﺟﻬﻬﺎ ﻣﻼﻣﺢ ﺍﻟﺰﻋﻞ : ﻫﻜﻲ ﻳﺎﺑﺎﺑﺎ ﻟﺒﻮﻧﺘﻚ ﺣﺒﻴﺒﺘﻚ ﺗﻬﻮﻥ ﻋﻠﻴﻚ .. ﺯﻋﻠﺖ ﺍﻧﻲ ..
ﻧﻀﺎﻝ : ﻫﻬﻬﻬﻬﻬﻬﻬﻬﻪ ... ﻗﺪﻡ ﻭﺣﻀﻨﻬﺎ ... ﻋﺎﺭﻓﻪ ﺍﻧﻚ ﻣﺎﺗﻬﻮﻧﻴﺶ ﻳﺎﻛﺮﻛﻮﺑﺘﻲ .. ﻭﺑﺎﺳﻬﺎ ﻉ ﺭﺍﺳﻬﺎ ﻭﻫﻲ ﺣﻀﻨﺎﺗﻪ ﻭﺿﺤﻜﺖ .. ﻭﺭﻗﺼﺖ ﺣﻮﺍﺟﺒﻬﺎ ﻣﻜﺮ ﻓﻲ ﺍﺧﺘﻬﺎ ﺭﻫﻒ ﺍﻟﻠﻲ ﻗﻌﺪﺕ ﺗﻀﺤﻚ ..
ﺭﻫﻒ ﺑﻀﺤﻜﻪ : ﺻﺒﺎﺡ ﺍﻟﺨﻴﺮ ﺑﺎﺑﺎ ..
ﻧﻀﺎﻝ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﻔﻞ ﺣﺒﻲ .. ﻭﺑﻌﺘﻠﻬﺎ ﺑﻮﺳﻪ ﻃﺎﻳﺮﻩ ..
ﻟﺒﻨﻰ : ﺻﺒﺎﺡ ﺍﻟﻮﺭﺩ ﺑﺎﺑﺎﺗﻲ ..
ﻧﻀﺎﻝ ﺑﻀﺤﻜﻪ : ﺻﺒﺎﺡ ﺍﻟﻌﺴﻞ ﻳﺎﺭﻭﻭﺡ ﺑﺎﺑﺎﺗﻚ ..
ﻟﺒﻨﻰ ﺑﻌﺪﺕ ﻣﻦ ﺣﻀﻨﻪ ﻭﻫﻲ ﺷﺎﺩﺍﺗﻪ : ﺍﻣﻤﻤﻢ .. ﺷﻦ ﺍﻫﻢ ﺷﻲ ﻋﻨﺪﻙ ﺍﻟﻴﻮﻡ ..
ﻧﻀﺎﻝ ﺭﻓﻊ ﺣﺎﺟﺒﻪ ﺍﻟﻴﺴﺎﺭ ﻭﺿﻴﻖ ﻋﻴﻮﻧﻪ ﻭﺩﺍﻳﺮ ﺭﻭﺣﻪ ﻳﺮﺍﺟﻊ ﻓﻲ ﺭﺍﺳﻪ ﺷﻦ ﻋﻨﺪﻩ ﺍﻟﻴﻮﻡ : ﺍﻣﻤﻢ .. ﻋﺎﺩﻱ ﺯﻱ ﻛﻞ ﻳﻮﻡ ﻣﺎﻓﻴﺶ ﻣﻬﻢ ﻫﻠﺒﻪ ..
ﺭﻫﻒ ﺿﺤﻜﺖ ..
ﻟﺒﻨﻰ ﺑﻀﺤﻜﻪ : ﻋﺎﺭﻓﺎﺗﻚ ﻣﺴﺘﺤﻴﻞ ﺗﻨﺴﻰ ... ﻟﻜﻦ ﺑﻨﺪﻳﺮ ﺭﻭﺣﻲ ﺻﺪﻗﺖ ﺍﻧﻚ ﻧﺴﻴﺖ ﻭﻧﺰﻋﻞ ﻭﺑﻌﺪﻳﻦ ﺗﻔﺎﺟﺌﻨﻲ ﺑﻬﺪﻳﻪ ﻭﺍﻧﻲ ﻧﺪﻳﺮ ﺭﻭﺣﻲ ﺩﺧﺖ ﻣﻦ ﺍﻟﻤﻔﺎﺟﺄﺓ ...
ﻧﻀﺎﻝ ﻭﺭﻫﻒ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ...
ﻟﻮﻃﺎ ...
ﻛﻴﻒ ﺧﺸﺖ ﻟﻠﺤﻮﺵ .. ﺳﻤﻌﺖ ﺻﻮﺍﺕ ﺿﺤﻜﻬﻢ ﺍﺑﺘﺴﻤﺖ ..
ﺳﻜﺮﺕ ﺍﻟﺒﺎﺏ ... ﻗﺪﻣﺖ ﺣﻄﺖ ﺍﻟﺒﺎﻗﻪ ﻉ ﻃﺎﻭﻟﻪ ﻻﺻﻘﻪ ﺗﺤﺖ ﺍﻟﺮﻭﺷﻦ .. ﻭﺗﻮﺟﻬﺖ ﻟﻠﻜﻮﺟﻴﻨﻪ ﺣﻄﺖ ﺍﻟﺒﺮﻳﻮﺵ .. ﻭﻭﻟﺖ ﻟﻠﺒﺎﻗﻪ ﻭﻫﻲ ﻣﺒﺘﺴﻤﻪ ﺣﻄﺖ ﺍﻟﻮﺭﺩ ﻓﻲ ﺍﻟﻔﺎﺯﺓ ﺍﻟﻠﻲ ﻛﺎﻧﺖ ﻣﻔﻀﻴﺘﻬﺎ ﻗﺒﻞ ﺗﻄﻠﻊ ...
ﺗﺄﻣﻠﺘﻬﺎ ﻟﻠﺤﻈﺎﺕ ﺑﻌﺪﻳﻦ ﺗﻮﺟﻬﺖ ﻟﻠﻜﻮﺟﻴﻨﻪ .. ﻓﻲ ﻃﺮﻳﻘﻬﺎ ﺣﻮﻟﺖ ﺍﻟﻮﺷﺎﺡ ﺣﻄﺎﺗﻪ ﻉ ﺍﻟﺸﻤﺎﻋﻪ ... ﻭﻋﺒﺎﻳﺘﻬﺎ .. ﻭﻟﻤﺖ ﺷﻌﺮﻫﺎ ﻛﻌﻜﻪ .. ﻭﺧﺸﺖ ﻟﺒﺴﺖ ﺍﻟﻤﺎﺭﻗﻪ .. ﻭﺑﺪﺕ ﺍﺩﻳﺮ ﻓﻲ ﺍﻟﻔﻄﻮﺭ ...
ﻧﺎﺯﻝ ﻧﻀﺎﻝ ﻣﻦ ﻓﻮﻕ ﻭﻫﻮ ﻳﺸﻮﻑ ﻟﺘﻠﻴﻔﻮﻧﻪ .. ﺳﻤﻊ ﺣﺮﻛﻪ .. ﻋﺮﻓﻬﺎ ﺭﻭﺣﺖ ... ﻗﺪﻡ ﻟﻠﻜﻮﺟﻴﻨﻪ ..
ﻧﻀﺎﻝ ﺑﺈﺑﺘﺴﺎﻣﻪ : ﺻﺒﺎﺡ ﺍﻟﺨﻴﺮ .. ﺭﺑﻲ ﻳﻌﺎﻭﻥ ..
ﺣﻨﺎﻥ ﺷﺒﺤﺘﻠﻪ ﻭﺑﺈﺑﺘﺴﺎﻣﻪ ﻭﻧﻈﺮﻩ ﻛﻠﻬﻢ ﺣﺐ : ﺻﺒﺎﺡ ﺍﻟﺨﻴﺮﺍﺕ ... ﻧﺎﺿﻮﺍ ﺍﻟﺒﻨﺎﺕ ..
ﻧﻀﺎﻝ : ﻧﺎﺯﻻﺕ ﻭﺭﺍﻱ ... ﻫﻴﺎ ﺍﻧﻲ ﻃﺎﻟﻊ ﻣﺎﺗﺒﻲ ﺷﻲ ..
ﻗﺪﻣﺖ ﻭﻋﻄﺎﺗﻪ ﻣﻖ ﺳﺘﻴﻞ ﻓﻴﻪ ﻗﻬﻮﻩ ﺑﺎﻟﺤﺒﻬﺎﻥ ﺍﻟﻠﻲ ﻫﻮ ﻳﺤﺒﻬﺎ : ﺳﻼﻣﺘﻚ ..
ﻧﻀﺎﻝ ﺑﺈﺑﺘﺴﺎﻣﻪ : ﺳﻼﻡ ..
ﺣﻨﺎﻥ : ﻭﻋﻠﻴﻜﻢ ﺍﻟﺴﻼﻡ
ﺿﺤﻚ ﻭﻣﺸﻲ .. ﺑﻌﺪﻳﻦ ﺍﺫﻛﺮ ﺣﺎﺟﻪ ﻭﻟﻰ ...
ﻧﻀﺎﻝ : ﺍﺣﻤﻢ .. ﺣﻨﺎﻥ ..
ﺣﻨﺎﻥ ﺑﺄﻧﺘﺒﺎﻩ : ﻧﻌﻢ ..
ﻧﻀﺎﻝ : ﻣﺎﺗﺤﺴﺒﻨﻴﺶ ﻓﻲ ﺍﻟﻐﺪﻱ .. ﺑﻨﺮﻭﺡ ﺑﻌﺪ ﺍﻟﻤﻐﺮﺏ ..
ﺣﻨﺎﻥ ﺣﺎﻭﻟﺖ ﺗﺨﻔﻲ ﺿﻴﻘﻬﺎ ﻭﺗﺼﻨﻌﺖ ﺍﻹﺑﺘﺴﺎﻣﻪ ﻭﻫﺰﺕ ﺭﺍﺳﻬﺎ ﺑﺈﻳﺠﺎﺏ ... ﻭﻫﻮ ﺍﺑﺘﺴﻢ ﻭﻟﻒ ﻭﻃﻠﻊ ..
ﻭﻫﻲ ﺗﻨﻬﺪﺕ ﻭﻭﻟﺖ ﺗﻜﻤﻞ ﻓﻲ ﺑﺎﻗﻲ ﺍﻟﻔﻄﻮﺭ ﺣﻄﺎﺗﻪ ﻉ ﺍﻟﻄﺎﻭﻟﻪ ﻣﺎﺑﻴﻦ ﺍﻟﺼﺎﻟﻪ ﻭﺍﻟﻤﻄﺒﺦ ﻧﺰﻟﻮﺍ ﺑﻨﺎﺗﻬﺎ ﻳﻔﻄﺮﻭ
ﻫﺎﻟﻤﺮﺓ ﺣﻨﻮﺻﻒ ﺍﻟﺤﻮﺵ ... ﺑﻨﺎﺋﻪ ﺣﺪﻳﺚ ﺣﻨﺎﻥ ﺻﻤﺎﻣﺎﺗﻪ ﺳﻜﻨﻮﺍ ﻓﻴﻪ 6 ﺳﻨﻮﺍﺕ ﻣﻦ ﺑﻌﺪ ﻣﺎﺍﻧﺘﻘﻠﻮﺍ ﻣﻦ ﺷﻘﺘﻬﻢ ...
ﺍﻭﻝ ﻣﺎﺗﺨﺶ ﺍﻟﺤﻮﺵ ..
ﻣﻦ ﺑﻌﺪ ﺑﺎﺏ ﺍﻟﺤﻮﺵ ﻉ ﺍﻟﻴﺴﺎﺭ ﺗﻤﺸﻲ ﻣﺴﺎﻓﻪ ﻓﻲ ﻣﺮﺑﻮﻋﻪ ﻭﻋﻨﺪﻫﺎ ﺣﻤﺎﻡ ﺑﺤﺪﺍﻩ .. ﻣﻔﺼﻮﻻﺕ ﺑﺒﺎﺏ ﻋﻦ ﺍﻟﺤﻮﺵ ﻣﻦ ﺩﺍﺧﻞ
ﻭﻉ ﻳﻤﻴﻦ ﻓﻲ ﺻﺎﻟﻪ ﻛﺒﻴﺮﻩ ﻓﻲ ﺑﺪﺍﻳﺘﻬﺎﺻﺎﻟﻮﻥ ﺑﺴﻴﻂ .. ﺗﻜﻤﻞ ﺍﻟﻘﺪﺍﻡ ﻉ ﺍﻟﻴﺴﺎﺭ ﻓﻲ ﻣﻄﺒﺦ ﻛﺒﻴﺮ ﺍﻟﺒﺎﺭ ... ﺗﻄﻠﻌﻲ ﻣﻨﻬﺎ ﻓﻲ ﺍﻟﻮﺳﻂ ﻣﺎﺑﻴﻦ ﺍﻟﺼﺎﻟﻪ ﻭﺍﻟﻤﻄﺒﺦ ﻃﺎﻭﻟﺔ ﻃﻌﺎﻡ .. ﻧﻜﻤﻠﻮﺍ ﺍﻟﺼﺎﻟﻪ ﻓﻲ ﺗﻔﺮﻳﺸﺘﻴﻦ ﺟﻠﺴﺔ ﺍﻓﻨﺮﺟﻴﻪ ﻭﺟﻠﺴﻪ ﻋﺮﺑﻴﻪ ...
ﻉ ﺍﻟﻴﺴﺎﺭ .. ﻓﻲ ﺩﺍﺭ ... ﻓﺎﺿﻴﻪ ﻭﻣﺴﻜﺮﻩ .....
ﻃﺒﻌﺎ ﻓﻲ ﺍﺧﺮﻫﺪﺍ ﻛﻠﻪ ﻓﻲ ﺩﺭﻭﺝ ﻳﺮﻓﻊ ﻟﻠﺪﻭﺭ ﺍﻟﺜﺎﻧﻲ ﻧﻈﺎﻣﻪ ﺣﻠﺰﻭﻧﻲ ﻭﻓﻲ ﺳﻴﺎﺝ ...
ﺍﻟﺪﻭﺭ ﺗﺎﻧﻲ ﻧﻈﺎﻡ ﺩﻳﺎﺭ ﺩﺍﺭ ﺍﻟﻨﻮﻡ .. ﻭﺩﺍﺭ ﻟﻠﺒﻨﺎﺕ ﻭﺻﺎﻟﻪ ﻓﻴﻬﺎ ﺻﺎﻟﻮﻥ ﺑﺴﻴﻂ ... ﻭﺣﻤﺎﻣﺎﺕ ﻓﻘﻂ ...
ﻭﺯﻭﺯ ﺑﺎﻟﻜﻮﻧﺎﺕ ﻓﻲ ﺩﺍﺭ ﺍﻟﺒﻨﺎﺕ ﻭﻭﺣﺪﻩ ﻓﻲ ﺍﻟﺼﺎﻟﻪ ... ﺑﺮﺍ ﺍﻟﺤﻮﺵ .. ﻓﻲ ﺟﻨﺎﻥ ﻳﻬﺒﺒﺒﺒﺒﺒﻞ ... ﻛﻠﻪ ﻧﺒﺎﺗﺎﺕ ﺯﻳﻨﻪ ﻭﻭﺭﺩ ... ﻣﺤﺎﻭﻃﻬﺎ ﺳﻮﺭ ﻣﺶ ﻃﻮﻳﻞ ... ﻭﺑﺎﺏ ﺍﻟﺤﻮﺵ ﻣﺮﺵ ﻓﻴﻪ ﺣﺪﻳﺪ ﻣﺰﺧﺮﻑ .." ﺗﺨﺎﻳﻠﻮﺍ ﺍﻥ ﺍﻟﺪﻧﻴﺎ ﺃﻣﻦ ﻭﺃﻣﺎﻥ ﻭﺍﻟﺤﻴﺎﻩ ﺣﻠﻮﺓ ... ﻭﺣﺎﻭﻟﻮﺍ ﺍﻧﻜﻢ ﺗﺘﺨﺎﻳﻠﻮ ﺷﻜﻞ ﺍﻟﺤﻮﺵ ﻭﺃﻧﺘﻢ ﺗﻘﺮﻭﺍ ﻓﻲ ﺍﻟﻮﺻﻒ ﺣﺴﻴﺘﻮﺍ ﺭﺍﺳﻜﻢ ﺻﺪﻉ ﺩﻳﺮﻭﺍ ﺍﻟﺤﻮﻟﻪ "...
ﺍﻟﻐﺮﻳﺐ ﺍﻥ ﺣﻨﺎﻥ ﻛﺎﻧﺖ ﺭﺍﻓﻀﺔ ﺗﺰﺭﻉ ﻭﺭﺩ ﺍﻟﺘﻮﻟﻴﺐ ﺑﺮﺍ ... ﺗﺒﻴﻪ ﻳﻜﻮﻥ ﻓﻲ ﺍﻟﺤﻮﺵ ﻣﻦ ﺩﺍﺧﻞ ﻭﺑﺲ ... ﻣﺪﺍﻳﺮﻩ ﻓﺎﺯﺍ ﻟﻮﻃﺎ ﻭﻓﺎﺯﺍ ﻓﻮﻕ ﻓﻲ ﺍﻟﺼﺎﻟﻪ ﻭﻓﺎﺯﺍ ﻓﻲ ﺩﺍﺭ ﺍﻟﻨﻮﻡ ... ﻭﻓﺎﺯﺍ ﻓﻲ ﺍﻟﻤﻤﺮ .. ﻭﻛﻠﻪ ﺗﻮﻟﻴﺐ ....
ﺳﻘﺪﺕ ﺣﻨﺎﻥ ﺑﻨﺎﺗﻬﺎ ﺭﻫﻒ ﺍﻟﻠﻲ ﻛﺎﻧﺖ ﺗﺴﻮﻕ ﻭﺗﻤﺸﻲ ﻟﻜﻠﻴﺘﻬﺎ ﺑﺎﻟﺴﻴﺎﺭﺓ ... ﻭﻟﺒﻨﻰ ﺍﻟﻠﻲ ﺗﻤﺸﻲ ﻟﻠﻤﺪﺭﺳﻪ ﻓﻲ ﺍﻟﺒﺎﺹ .. ﻭﻫﻲ ﺗﻔﺮﻏﺖ ﺑﺶ ﺗﻜﻤﻞ ﺑﺎﻗﻲ ﺭﻭﺗﻴﻨﻬﺎ ﺍﻟﻴﻮﻣﻲ ...
***
ﻓﻲ ﻣﻜﺎﻥ ﺁﺧﺮ ...
ﺷﺮﻛﻪ ﻓﻴﻬﺎ ﺍﻟﻤﻮﻇﻔﻴﻦ ﺯﻱ ﺧﻠﻴﺔ ﺍﻟﻨﺤﻞ .. ﻳﺨﺪﻣﻮﺍ ﺑﺠﺪ ﻭﺍﺟﺘﻬﺎﺩ ﻟﻤﺪﻩ 12 ﺳﺎﻋﻪ ﺗﻔﺼﻞ ﺑﻴﻨﺎﺗﻬﻢ ﺳﺎﻋﻪ ﻭﺣﺪﻩ ﺑﺶ ﻳﺘﻐﺪﻭﺍ ﻓﻴﻬﺎ ﻭﻳﺮﺗﺎﺣﻮﺍ ...
ﺟﻤﺪﻭﺍ ﻓﻲ ﻣﻜﺎﻧﻬﻢ ﻣﺠﺮﺩ ﻣﺎﻫﻮ ﺧﺶ .. ﻭﻭﺭﺍﻩ ﺍﻟﺴﻮﺍﻕ ﻣﺘﺎﻋﻪ ﻓﻲ ﻳﺪﻩ ﺷﻨﻄﻪ ﺣﻮﻝ ﻧﻈﺎﺭﺗﻪ ﻭﻣﺎﺷﻲ .. ﻳﺘﺼﺒﺤﻮﺍ ﻋﻠﻴﻪ ﻭﻫﻮ ﻳﺮﺩ ﺑﺘﻌﺎﻟﻲ ... ﻛﺎﻥ ﺷﺨﺼﻴﻪ ﺗﺘﻤﺘﻊ ﺑﺎﻟﻜﺒﺮ ﻭﺍﻟﻐﺮﻭﺭ ... ﻻﺑﺲ ﺍﺳﻮﺩ ﻓﻲ ﺍﺳﻮﺩ ﻭﺃﻧﻴﻖ ﺑﺸﻜﻞ ﻣﻠﻔﺖ ... ﻛﺎﻧﻮﺍ ﻛﻠﻬﻢ ﻳﻬﺎﺑﻮﻩ ﻭﻳﺨﺎﻓﻮﺍ ﻣﻨﻪ ﻷﻧﻪ ﻛﺎﻥ ﺭﺋﻴﺲ ﻭﺍﺍﺍﻋﺮ ﻭﻣﺎﻋﻨﺪﺍﺵ ﻳﺎﺃﻣﻲ ﺃﺭﺣﻤﻴﻨﻲ ..
ﺗﻮﺟﻪ ﻟﻸﺻﻨﺼﻴﺮ .. ﺧﺶ ﻭﺧﺶ ﺑﻌﺪﻩ ﺍﻟﺴﻮﺍﻕ ﻟﻴﻦ ﻭﺻﻞ ﻟﻠﺪﻭﺭ ﺍﻟﺜﺎﻟﺖ ﻃﻠﻊ ﻣﻦ ﺍﻷﺻﻨﺼﻴﺮ ﻭﺗﻮﺟﻪ ﻟﻤﻜﺘﺒﻪ ... ﻃﺒﻌﺎ ﺑﺶ ﻳﻮﺻﻠﻮﺍ ﻓﻴﻪ ﻻﺯﻡ ﻳﻔﻮﺗﻮﺍ ﻉ ﺍﻟﺴﻜﺮﺗﻴﺮﺓ ﺍﻟﺴﻜﺮﺗﻴﺮﻩ ﺗﺨﺒﺮ ﺍﻟﻤﻌﺎﻭﻧﻪ .. ﺍﻟﻤﻌﺎﻭﻧﻪ ﺗﺨﺒﺮ ﻣﺪﻳﺮ ﻣﻜﺘﺒﻪ ﻣﺪﻳﺮ ﻣﻜﺘﺒﻪ ﻳﺨﺒﺮﻩ ...
ﻭﻫﻮ ﻣﺘﻮﺟﻪ ﻟﻤﻜﺘﺒﻪ ﺣﻮﻝ ﺍﺟﺎﻛﻪ ﺟﺎﺗﻪ ﺍﻟﺴﻜﺮﺗﻴﺮﻩ ﻣﺪﺗﻠﻪ ﻓﻨﺠﺎﻝ ﺍﻟﻘﻬﻮﺓ ﺍﻟﻜﺒﻴﺮ ﺍﻟﻠﻲ ﻉ " ﻫﻴﺌﺔ ﻃﺎﻭﻭﺱ " ﺑﻴﺪ ﻭﺍﻟﻴﺪ ﺍﻟﺘﺎﻧﻴﻪ ﺧﺪﺕ ﻣﻨﻪ ﺍﻟﺠﺎﻛﻪ .. ﻭﻫﻮ ﺑﻴﺪ ﻣﺪ ﺟﺎﻛﻪ ﻭﺑﻴﺪﻩ ﺧﺪﻱ ﺍﻟﻔﻨﺠﺎﻥ ..
ﺍﻟﺴﻜﺮﺗﻴﺮﺓ : ﺻﺒﺎﺡ ﺍﻟﺨﻴﺮ ﺍﺳﺘﺎﺩ ﻣﻌﺎﻭﻳﻪ .. ﺍﻟﻴﻮﻡ ﺍﻟﻮﻓﺪ ﺍﻟﻨﻤﺴﺎﻭﻱ ﺟﺎﻱ ﺍﻟﺴﺎﻋﻪ 12 ﺍﻟﻈﻬﺮ .. ﻭﺣﻀﺮﺗﻚ ﻋﻨﺪﻙ ﻣﻮﻋﺪ ﻓﻲ ﻭﺯﺭﺍﺓ ﺍﻹﺳﻜﺎﻥ ﺍﻟﺴﺎﻋﻪ 4...
ﺧﺶ ﻟﻤﻜﺘﺒﻪ ﻭﻫﻲ ﻭﺭﺍﻩ ﻭﻳﺴﻤﻊ ﻓﻴﻬﺎ ﺷﻦ ﺗﻘﻮﻝ ...
ﺍﻟﺴﻮﺍﻕ ﺣﻂ ﺍﻟﺸﻨﻄﻪ ﻉ ﺍﻟﻜﺮﺳﻲ .. ﻭﺣﻴﺎﻩ ﺑﺄﻧﺤﻨﺎﺀﻩ ﺑﺴﻴﻄﻪ ﻭﻃﻠﻊ .. ﻭﺍﻟﺴﻜﺮﺗﻴﺮﻩ ﻋﻠﻘﺖ ﺍﻟﺠﺎﻛﻪ ﻉ ﺷﻤﺎﻋﻪ ﺑﺤﺪﺍﻩ ..
ﻭﻫﻮ ﻗﻌﻤﺰ ﻉ ﺍﻟﻜﺮﺳﻲ .. ﻫﺰ ﺭﺍﺳﻪ ﺑﺈﻳﺠﺎﺏ ﺭﺩﺍ ﻉ ﺍﻟﻠﻲ ﻗﺎﻻﺗﻪ .
ﺍﻟﺴﻜﺮﺗﻴﺮﻩ ﺣﻴﺎﺗﻪ ﺑﻨﻔﺲ ﺍﻹﻧﺤﻨﺎﺀﻩ ﺍﻟﻠﻲ ﺩﺍﺭﻫﺎ ﺍﻟﺴﻮﺍﻕ .. ﻭﻃﻠﻌﺖ ﻣﻦ ﺍﻟﻤﻜﺘﺐ
ﻣﻜﺘﺐ ﻣﻌﺎﻭﻳﻪ ﻛﺎﻥ ﻛﺒﻴﺮ ﻫﻠﺒﻪ .. ﺍﻭﻝ ﻣﺎﺗﺨﺶ ﻉ ﻳﻤﻴﻦ ﻓﻲ ﻃﺎﻭﻟﻪ ﺍﺟﺘﻤﺎﻋﺎﺕ ﻛﺒﻴﺮﻩ .. ﻉ ﺍﻟﻴﺴﺎﺭ ﺻﺎﻟﻮﻥ ﺍﺳﻮﺩ ﻣﻦ ﺍﻟﻄﺮﺍﺯ ﺍﻟﺤﺪﻳﺚ .. ﺗﻘﺪﻣﻲ ﺍﻛﺜﺮ ﻳﺠﻲ ﻗﺪﺍﻣﻚ ﺩﺭﺟﺘﻴﻦ ﻃﻮﺍﻝ ﻉ ﻃﻮﻝ ﺍﻟﻤﻜﺘﺐ ﺗﺮﻛﺒﻴﻬﻢ ﻓﻴﻬﻢ ﻣﻜﺘﺐ ﻣﻌﺎﻭﻳﻪ ﺍﻟﻠﻲ ﺍﺛﺎﺗﻪ ﻭﺟﻮﻩ ﻛﻠﻪ ﻛﻼﺳﻴﻜﻲ ﻭﻓﺨﻢ ﻫﻠﺒﻪ ... ﺍﻟﻜﺮﺳﻲ ﺍﻟﻠﻲ ﻳﻘﻤﻌﺰ ﻋﻠﻴﻪ ﺍﻟﻈﻬﺮ ﻣﺘﺎﻋﻪ ﻛﺒﻴﺮ ﻭﻃﻮﻳﻞ ﺷﻮﻱ ﻭﻣﻨﺤﻮﺕ ﻣﻦ ﻓﻮﻕ ﺑﺰﺧﺮﻓﻪ ﻣﻜﺘﻮﺏ ﻋﻠﻴﻬﺎ ﺍﺳﻤﻪ ﺑﺎﻟﺨﻂ ﺍﻟﻌﺮﺑﻲ ﺍﻟﺤﻠﻮ ﻫﻠﺒﻪ .. ﻣﻜﺘﺒﻪ ﺍﺷﺒﻪ ﺑﻌﺮﺵ ﻣﻠﻜﻲ ...
ﻓﻴﻪ ﺣﻤﺎﻡ ﻟﺪﺍﺧﻞ ... ﻭﻭﺭﺍ ﻣﻜﺘﺒﻪ ﺑﻤﺴﺎﻓﻪ ﺑﺎﺏ ﻓﺘﺤﻪ ﻭ ﻃﻠﻊ ﻣﻨﻪ ﻭﺍﺣﺪ ...
" ﻳﺎﺻﺒﺎﺡ ﺍﻟﻨﻮﺭ ﻉ ﺍﻹﻣﺒﺮﺍﻃﻮﺭ "...
ﻣﻌﺎﻭﻳﻪ ﻭﻫﻮ ﻳﺸﻮﻑ ﻓﻲ ﻣﻠﻒ ﻗﺪﺍﻣﻪ : ﺻﺒﺎﺡ ﺍﻟﺨﻴﺮ .. ﺗﻌﺎﻟﻰ ﻗﻌﻤﺰ ﻭﻗﻮﻟﻲ ﺷﻦ ﺻﺎﺭ ﻣﻌﺎﻙ ..
ﺃﻳﻤﻦ " ﻣﺪﻳﺮ ﻣﻜﺘﺒﻪ ": ﻛﻠﻪ ﺗﻤﺎﻡ .. ﻭﻣﺒﺮﻭﻙ ﻋﻠﻴﻚ ﺍﻟﻤﻨﺎﻗﺼﻪ ﻣﻦ ﺗﻮﺍ ...
ﻣﻌﺎﻭﻳﻪ ﺷﺒﺤﻠﻪ ﻭﺣﻂ ﺭﺟﻞ ﻉ ﺭﺟﻞ ﻭﺍﺗﻜﺎ ﻉ ﺍﻟﻜﺮﺳﻲ : ﻛﻮﻳﺲ .. ﻛﻮﻳﺲ ..
ﺃﻳﻤﻦ : ﺧﻼﺹ ﺍﺭﺣﻤﻬﻢ ﻣﻬﻤﺎ ﻛﺎﻥ ﻓﻲ ﻧﻬﺎﻳﻪ ﻋﻤﻚ ﻭﻭﻻﺩ ﻋﻤﻚ ..
ﻣﻌﺎﻭﻳﻪ : ﻭﻗﺖ ﺍﻟﺮﺣﻤﻪ ﺗﻢ ﺧﻼﺹ ... ﻳﺎﻣﺎ ﺣﺬﺭﺕ ﻳﺎﻣﺎ ﻧﺒﻬﺖ ﻭﻟﻤﺤﺖ ﺍﻧﻲ ﻋﺎﺭﻑ ﺑﻠﻌﺒﻬﻢ ﻣﻦ ﻭﺭﺍﻱ .. ﻧﻘﻮﻝ ﻳﺎﺍﺍﻋﻤﻲ .. ﻣﺎﺗﺤﻄﺶ ﺭﺍﺳﻚ ﺑﺮﺍﺳﻲ .. ﻣﺎﺗﺤﻄﺶ ﺭﺍﺍﺍﺍﺍﺳﻚ ﺑﺮﺍﺍﺍﺍﺳﻲ .. ﻣﺎﺗﺤﻄﺶ .. ﺭﺍﺍﺍﺍﺳﻚ ﺑﺮﺍﺳﻲ .. ﻭﻫﻮ ﻣﺎﺑﺎﺵ ﻳﻌﻘﻞ ﻭﻳﺴﻤﻊ ﺍﻟﻜﻼﻡ ﻗﻠﺖ ﻧﻜﺴﺮﻟﻪ ﺭﺍﺳﻪ ﻭﻧﺮﺗﺎﺡ
ﺃﻳﻤﻦ ﺑﻀﺤﻜﻪ : ﻗﻮﻝ ﺗﻘﺼﻪ ﻭﺗﺮﺗﺎﺡ ..
ﻣﻌﺎﻭﻳﻪ ﺿﺤﻚ ﺑﺘﻬﻜﻢ : ﻣﺎﻓﻴﺶ ﻓﺮﻕ ...
ﻃﻖ ﺍﻟﺒﺎﺏ ﻃﻘﺘﻴﻦ ﺧﻔﺎﻑ ..
ﺧﺸﺖ ﺗﻤﺸﻲ ﺯﻱ ﺍﻟﻌﺎﺭﺿﺎﺕ ﻭﻉ ﻭﺟﻬﻬﺎ ﺑﺄﺑﺘﺴﺎﻣﻪ ﻋﺮﻳﻀﻪ ..
ﺃﻳﻤﻦ " ﺻﺒﺤﻨﺎ ﺭﺑﺤﻨﺎ "...
ﺇﻗﺒﺎﻝ : ﺻﺒﺎﺡ ﺍﻟﺨﻴﺮ ...
ﻣﻌﺎﻭﻳﻪ ﺑﺄﺑﺘﺴﺎﻣﻪ : ﺻﺒﺎﺡ ﺍﻟﻨﻮﺭ .. ﺗﺄﺧﻴﺮ ﺍﻟﻴﻮﻡ ..
ﺃﻗﺒﺎﻝ ﺑﻀﺤﻜﻪ : ﻃﻮﻟﺖ ﻓﻲ ﺍﻟﺴﻬﺮﻩ ﺍﻣﺲ ... ﺯﻱ ﻣﺎﺗﻌﺮﻑ ﻋﻴﺪ ﻣﻴﻼﺩ ﻣﺎﻣﺎ ...
ﺍﻳﻤﻦ ﻣﻼﻣﺢ ﻭﺟﻬﻪ ﺗﻜﺮﻣﺸﺖ ﻣﺶ ﻃﺎﻳﻘﻬﺎ ﺑﻜﻞ ..
ﻣﻌﺎﻭﻳﻪ : ﻋﻘﺒﺎﻝ ﻣﻴﻪ ﺷﻤﻌﻪ ﺯﻱ ﻣﺎﻳﻘﻮﻟﻮﺍ ..
ﺍﻳﻤﻦ ﺑﻌﻔﻮﻳﻪ : ﺍﻛﺜﺮ ﻣﻦ ﻫﻜﻲ !!
ﻣﻌﺎﻭﻳﻪ ﺭﻓﻊ ﺣﻮﺍﺟﺒﻪ ﻭﺷﺎﺩ ﺿﺤﻜﺘﻪ ..
ﻭﺍﻗﺒﺎﻝ ﻃﺎﺭﺗﻠﻬﺎ : ﺷﻦ ﺗﺸﻮﻑ ﻓﻴﻬﺎ ﻋﺰﻭﺯﻩ ..
ﺍﻳﻤﻦ ﺑﺘﻬﻜﻢ : ﻻ ﺍﺑﺪﺍ ﻓﻲ ﻋﻤﺮ ﺍﻟﺸﺤﺮﻭﺭﺓ ﻗﺒﻞ ﻟﺘﻤﻮﺕ ﺑﻌﺎﻣﻴﻦ ..
ﻣﻌﺎﻭﻳﻪ ﺷﺎﺩ ﺿﺤﻜﺘﻪ ..
ﺇﻗﺒﺎﻝ ﺷﺒﺤﺘﻠﻪ ﻣﻦ ﻓﻮﻕ ﻟﻠﻮﻃﺎ ﻭﺑﻌﺪﻳﻦ ﺷﺒﺤﺖ ﻟﻤﻌﺎﻭﻳﻪ : ﺍﺣﺘﺮﺍﻣﺎ ﻟﻴﻚ ﻣﺶ ﺣﻨﺮﺩ .. ﻉ ﺍﻟﻌﻤﻮﻡ ﺷﻜﺮﺍ ﻣﻌﺎﻭﻳﻪ ﻉ ﺍﻟﻬﺪﻳﻪ ﻭﻛﻠﻚ ﺫﻭﻕ ...
ﻣﻌﺎﻭﻳﻪ : ﺍﻟﻌﻔﻮ .. ﺧﺎﻟﺘﻲ ﺳﻤﻴﻪ ﺗﺴﺘﺎﻫﻞ .. ﻭﺗﻮﺍ ﻳﻠﻼ ﺑﺮﻱ ﺷﻮﻓﻲ ﺧﺪﻣﺘﻚ .. ﻭﺷﺒﺢ ﻷﻳﻤﻦ ... ﺣﺘﻰ ﺃﻧﺖ ...
ﺇﻗﺒﺎﻝ ﺑﺈﺑﺘﺴﺎﻣﻪ : ﻧﺴﺘﺄﺫﻥ ... ﻟﻔﺖ ﻭﻧﺰﻟﺖ ﻭﺗﻮﺟﻬﺖ ﻟﻠﺒﺎﺏ ﻭﻃﻠﻌﺖ ...
ﺍﻳﻤﻦ ﺭﺟﺎﻫﺎ ﻟﻴﻦ ﺻﻜﺮﺕ ﺍﻟﺒﺎﺏ : ﺍﻷﻛﺴﺠﻴﻦ ﺗﻢ ..
ﻣﻌﺎﻭﻳﻪ : ﻫﻬﻬﻬﻬﻬﻬﻬﻬﻪ .... ﺧﻴﺮﻙ ﻣﻌﺎﻫﺎ ..
ﺍﻳﻤﻦ : ﺍﻧﺖ ﺗﺴﺄﻝ ﻓﻴﺎ ﺧﻴﺮﻙ ﻣﻌﺎﻫﺎ !! ﺗﻲ ﺧﺎﻧﻘﺎﺗﻚ ﺍﻛﺜﺮ ﻣﺎ ﺧﺎﻧﻘﺘﻨﻲ ﺩﻳﻤﺎ ﻭﻫﻲ ﻓﺠﺮﺗﻚ ﻭﻻﺻﻘﻪ ﻓﻴﻚ .. ﻭﺍﻟﻠﻪ ﺟﺎﻱ ﻉ ﺑﺎﻟﻲ ﻧﺪﻳﺮ ﻳﺎﻓﻄﻪ ﻭﻧﻌﻠﻘﻬﺎ ﻉ ﺑﺎﺏ ﻣﻜﺘﺒﻚ .. ﻣﻜﺘﻮﺏ ﻓﻴﻬﺎ ﺇﻟﻰ ﺇﻗﺒﺎﻝ ... ﻟﻦ ﻳﺘﺰﻭﺟﻜﻲ ..
ﻣﻌﺎﻭﻳﻪ : ﻫﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻬﻪ ... ﻧﻮﺽ ﺍﻃﻠﻊ ... ﺧﻠﻴﻨﺎ ﻧﺨﺪﻣﻮﺍ ﻉ ﺣﺎﻟﻨﺎ ..
ﻧﺎﺽ ﺍﻳﻤﻦ ﻭﻫﻮ ﻳﻀﺤﻚ .. ﻓﺘﺢ ﺍﻟﺒﺎﺏ ﺍﻟﻔﺎﺻﻞ ﺑﻴﻦ ﻣﻜﺘﺒﻪ ﻭﻣﻜﺘﺐ ﻣﻌﺎﻭﻳﻪ ﻭﺧﺶ ﻟﻤﻜﺘﺒﻪ ﻭﺻﻜﺮ ﺍﻟﺒﺎﺏ .. ﻭﻣﻌﺎﻭﻳﻪ ﻛﻤﻞ ﺧﺪﻣﻪ ..
***
ﻓﻲ ﺍﻟﻤﺪﺭﺳﻪ ...
ﺣﺼﻪ ﺍﻟﻌﺮﺑﻲ ...
ﻛﺎﻥ ﻣﻮﺿﻮﻉ ﺗﻌﺒﻴﺮ ... ﺍﻷﺑﻠﻪ .. ﻛﺎﻧﺖ ﺍﺩﻳﺮ ﻓﻲ ﺍﻟﺘﻌﺒﻴﺮ ﺷﻔﻮﻱ ﻭﻛﺘﺎﺑﻲ .. ﻭﺍﻟﻤﻮﺿﻮﻉ ﻫﺎﻟﻤﺮﻩ ﻋﻦ ﺍﻟﺤﺐ .. ﻭﺻﻞ ﺍﻟﺪﻭﺭ ﻑ ﻟﺒﻨﻰ ..
ﺍﻷﺑﻠﻪ : ﺷﻦ ﻟﺒﻨﻰ ﺷﻦ ﻋﻨﺪﻙ ﺗﻘﻮﻟﻲ ﻋﻦ ﺍﻟﺤﺐ ..
ﻟﺒﻨﻰ ﺑﺄﺑﺘﺴﺎﻣﻪ : ﻣﻤﻜﻦ ﺑﻨﺠﺎﻭﺏ ﺃﺟﺎﺑﻪ ﻣﻦ ﺍﻹﺑﺘﺪﺍﺋﻲ ﻭﻫﻲ ﻣﻌﺎﻧﺎ ﺍﻭ ﻣﻦ ﺍﻭﻝ ﻣﺎﺑﺪﻳﻨﺎ ﻧﺘﻜﻠﻤﻮﺍ ﻭﻧﻔﻬﻤﻮﺍ ﻣﺸﺎﻋﺮﻧﺎ .. ﺑﺎﺑﺎ ﻭﻣﺎﻣﺎ .. ﻫﻤﺎ ﺍﻟﺤﺐ .. ﻭﻫﻤﺎ ﺍﻟﻠﻲ ﻳﺴﺘﺎﻫﻠﻮﺍ ﺍﻟﺤﺐ ﻭﻫﻤﺎ ﺍﻟﻠﻲ ﻋﻠﻤﻮﻧﻲ ﺷﻦ ﻫﻮ ﺍﻟﺤﺐ .. ﻫﻤﺎ ﺗﺰﻭﺟﻮﺍ ﻋﻦ ﺣﺐ .. ﻭﻋﻴﺸﻮﻧﺎ ﻓﻲ ﺣﺒﻬﻢ .. ﻣﺎﻣﺎ ﺣﻨﺎﻥ ﺍﺳﻢ ﻉ ﻣﺴﻤﻰ ... ﻣﺎﺭﻳﺘﻴﺶ ﺑﻄﻴﺒﻪ ﻗﻠﺒﻬﺎ ﻭﺣﻨﻴﺘﻬﺎ .. ﺗﻌﻠﻤﺖ ﻣﻨﻬﺎ ﺍﻥ ﺍﻟﺤﺐ ﻋﻄﺎﺀ ﺍﻧﻚ ﺗﻌﻄﻲ ﻣﻦ ﺗﺤﺐ ﻭﻣﺎﺗﺴﺘﻨﺎﺵ ﻣﻨﻪ ﺃﻱ ﻣﻘﺎﺑﻞ ﻏﻴﺮ ﺍﻧﻚ ﺗﺸﻮﻓﻪ ﻣﺒﺴﻮﻁ ﻭﻣﺮﺗﺎﺡ ... ﻭﺿﺤﻜﺖ ﻭﻗﺎﻟﺖ .. ﺍﻣﺎ ﺑﺎﺑﺎ ﻫﺬﺍ ﺍﻻﺏ ﻭﺍﻟﺼﺪﻳﻖ ﻭﺍﻷﺥ ﻭﺍﻟﺤﺒﻴﺐ ﻭﺍﻟﺴﻨﺪ .. ﺑﺎﺑﺎ ﻋﻤﺮﻩ ﻣﺎﺣﺴﺴﻨﺎ ﺍﻧﻪ ﻣﻀﺎﻳﻖ ﻷﻥ ﻣﺎﻋﻨﺪﺍﺵ ﻭﻻﺩ ﺑﺎﻟﻌﻜﺲ .. ﻓﺮﺣﺘﻪ ﺑﻴﻨﺎ ﻟﻤﺎ ﻳﺸﻮﻓﻨﺎ ﺗﺒﻴﻨﻠﻨﺎ ﻗﺪﺍﺵ ﻫﻮ ﻣﻤﻨﻮﻥ ﻟﺮﺑﻲ ﺍﻥ ﻋﻄﺎﻩ ﺑﻨﺎﺕ .. ﻫﻮ ﻳﻘﻮﻝ ﻓﻴﻬﺎ .. ﻳﻘﻮﻝ ﺍﻧﻲ ﻣﺤﻈﻮﻅ ﻫﻠﺒﻪ ﻷﻧﻲ ﺭﺑﻲ ﻋﻄﺎﻧﻲ ﺑﻨﺎﺕ ﻳﺤﺒﻮﻧﻲ ﻭﻳﺤﻨﻮﺍ ﻋﻠﻴﺎ .. ﺑﺒﺴﺎﻃﻪ ﻫﻮ ﻫﺬﺍ ﺍﻟﺤﺐ ﻓﻲ ﻧﻈﺮﻱ ﺣﺒﻬﻢ ﻫﻤﺎ ﻭﺑﺲ ...
ﺍﻷﺑﻠﻪ ﺍﺑﺘﺴﻤﺖ : ﺭﺑﻲ ﻳﺤﻔﻈﻬﻢ .... ﻭﻳﺨﻠﻴﻜﻢ ﻟﺒﻌﺾ ..
ﻟﺒﻨﻰ ﺑﺄﺑﺘﺴﺎﻣﻪ : ﺗﺴﻠﻤﻲ ...
ﻓﻲ ﺃﺧﺮ ﺍﻟﻔﺼﻞ .. ﻓﻲ ﺃﺧﺮ ﻣﻘﻌﺪ ﻛﺎﻧﺖ ﻓﻲ ﺑﻨﻴﻪ ﺗﺴﻤﻊ ﻓﻲ ﻛﻼﻡ ﻟﺒﻨﻰ ﻭﺩﻣﻮﻋﻬﺎ ﺗﻨﺰﻝ ﻗﻠﺒﻬﺎ ﻣﻜﺴﻮﺭ .. ﻭﺯﺍﺩﺕ ﺣﺴﺖ ﺑﺎﻟﺘﻌﺎﺳﻪ ﺍﻛﺜﺮ ﻭﺃﻛﺜﺮ ... ﺑﺮﻏﻢ ﺍﻥ ﻫﻲ ﺑﻨﺖ ﻣﻠﻴﺎﺭﺩﻳﺮ ... ﻟﻜﻦ ﺗﺸﻮﻑ ﻓﻲ ﻧﻔﺴﻬﺎ ﺍﻓﻘﺮ ﻣﻦ ﺧﻠﻖ ﺭﺑﻲ .. ﺍﻷﻡ ﻭﻓﻘﺪﺗﻬﺎ .. ﻭﺍﻷﺏ ﻭﻻﻛﺄﻧﻪ ﺑﻮﻫﺎ ﻧﻬﺎﺋﻲ ...
ﺍﻷﺑﻠﻪ ﻭﺻﻠﺖ ﻓﻴﻬﺎ : ﻣﻬﺎ ....
ﻣﺴﺤﺖ ﺩﻣﻮﻋﻬﺎ ﻭﻧﺎﺿﺖ : ﻧﻌﻢ ..
ﺍﻷﺑﻠﻪ : ﺗﻜﻠﻤﻲ ﻋﻦ ﺍﻟﺤﺐ ﺷﻦ ﻫﻮ ﺍﻟﺤﺐ ﺑﺎﻟﻨﺴﺒﻪ ﻟﻴﻚ ..
ﻣﻬﺎ ﺑﻘﻠﺐ ﻣﻜﺴﻮﺭ ﻭﺑﺄﻟﻢ ﺷﺪﻳﺪ ﺍﺑﺘﺴﻤﺖ ﺗﻬﻜﻤﺎ ﻭﻗﺎﻟﺖ : ﻭﻻﺷﻲ ﺑﺎﻟﻨﺴﺒﻪ ﻟﻴﺎ ﻭﻣﺎﻧﻌﺮﻓﺎﺵ .. ﻭﻧﺰﻟﺖ ﻣﻦ ﻋﻴﻮﻧﻬﺎ ﺩﻣﻌﻪ ﺳﺨﻮﻧﻪ ..
ﻛﻠﻬﻢ ﺷﺒﺤﻮﻟﻬﺎ ﻭﻟﺒﻨﻲ ﻗﻠﺒﻬﺎ ﻭﺟﻌﻬﺎ ﻋﻠﻴﻬﺎ ..
ﺍﻷﺑﻠﻪ ﺍﺿﺎﻳﻘﺖ ﻣﻦ ﻧﻔﺴﻬﺎ ﻫﻠﺒﻪ : ﺍﺳﻔﻪ ﻣﻬﺎ .. ﻗﻌﻤﺰﻱ ﺑﻨﺘﻲ ..
ﻗﻌﻤﺰﺕ ﻣﻬﺎ ﻭﻋﻴﻮﻧﻬﺎ ﻓﻲ ﺍﻟﻤﻘﻌﺪ ﻫﺎﺭﺑﻪ ﻣﻦ ﻧﻈﺮﺍﺕ ﺍﻟﺸﻔﻘﻪ ﻭﺍﻟﻔﻀﻮﻝ ﺍﻟﻠﻲ ﻓﻲ ﻋﻴﻮﻥ ﺍﻟﺒﻨﺎﺕ ﻓﻲ ﺍﻟﻔﺼﻞ ..
ﺑﻴﻨﻤﺎ ﻟﺒﻨﻰ ﻓﻜﺎﻧﺖ ﻣﻮﺟﻮﻋﻪ ﻋﻠﻴﻬﺎ ﻭﻫﻲ ﻣﻦ ﺯﻣﺎﻥ ﺗﺤﺎﻭﻝ ﺗﻘﺮﺏ ﻣﻨﻬﺎ ﺑﺲ ﻣﻬﺎ ﺭﺍﻓﻀﻪ ﺗﻤﺎﻣﺎ ﻭﺩﻳﻤﺎ ﻣﻨﻌﺰﻟﻪ ﺑﺮﻭﺣﻬﺎ ﻭﺗﺮﻓﺾ ﺗﺨﺎﻟﻂ ﺍﻱ ﺣﺪ ...
***
ﻛﻤﻠﺖ ﺿﻤﺎﻥ ﺍﻟﺤﻮﺵ .. ﺣﻄﺖ ﺍﻟﻐﺪﻱ ﻉ ﺍﻟﻨﺎﺭ ... ﺭﻛﺒﺖ ﻟﺪﺍﺭ ﺍﻟﻨﻮﻡ ﺑﺶ ﺗﺎﺧﺪ ﺣﻮﺍﻳﺠﻬﺎ ﻭﺩﻭﺵ .. ﻗﺪﻣﺖ ﻟﻠﺰﻳﺎﻧﻪ ﻭﺗﺸﺒﺢ ﻟﺸﻌﺮﻫﺎ ﻛﺎﻥ ﻓﻲ ﺷﻴﺐ ﻃﺎﻟﻊ ﺑﺶ ﺗﺼﺒﻐﻪ .. ﺍﺑﺘﺴﻤﺖ ﺑﺈﺭﺗﻴﺎﺡ ﻟﻤﺎ ﻣﺎﻟﻘﺖ ﺷﻲ .. ﺟﺖ ﺑﺘﻤﺸﻲ ﺑﺲ ﻟﻔﺖ ﺍﻧﺘﺒﺎﻫﻬﺎ .. ﺩﺑﻠﻪ ﻧﻀﺎﻝ ﻉ ﺍﻟﺰﻳﺎﻧﻪ .. ﺍﺳﺘﻐﺮﺑﺖ ﺑﺲ ﺳﺮﻋﺎﻥ ﻣﺎﺯﺍﻝ ﺍﺳﺘﻐﺮﺍﺑﻬﺎ ﻟﻤﺎ ﻗﺎﻟﺖ ﻓﻲ ﻧﻔﺴﻬﺎ ...
" ﺑﺪﺕ ﺗﻀﻴﺎﻕ ﻋﻠﻴﻪ ﺷﻜﻠﻬﺎ ﺣﺘﻰ ﻫﻮ ﺑﺪﻱ ﻳﺰﻳﺪ ﻓﻲ ﺍﻟﻮﺯﻥ ﻫﻬﻬﻬﻪ ..." ﻓﻜﺮﺕ ﻓﻲ ﺣﺎﺟﻪ ﻭﺍﺑﺘﺴﻤﺖ ﻭﺧﺪﺕ ﺍﻟﺪﺑﻠﻪ ﺣﻄﺘﻬﺎ ﻓﺸﻨﻄﺘﻬﺎ ﻭﺗﻮﺟﻬﺖ ﻟﻠﺪﻭﺵ ..
***
ﺷﺎﺩ ﺗﻠﻴﻔﻮﻧﻪ ﻳﺘﻜﻠﻢ ﻗﺪﺍﻡ ﻭﺣﺪﻩ ﻣﻦ ﺍﻟﻔﻨﺎﺩﻕ .. ﺑﻌﺪ ﻣﺎﺣﻀﺮ ﺍﺣﺪ ﺍﻟﻨﺪﻭﺍﺕ ﺍﻟﻠﻲ ﺗﺘﻜﻠﻢ ﻋﻦ " ﺍﻟﺘﺤﺮﺭ ﺍﻟﻔﻜﺮﻱ ﻭﺍﻟﺴﻴﺮ ﻧﺤﻮ ﺍﻹﻧﻔﺘﺎﺡ "
ﻧﻀﺎﻝ : ﺍﻳﻪ ......... ﺗﻤﺎﻡ .... ﺑﺈﺫﻥ ﺍﻟﻠﻪ ..
ﻛﺎﻧﺖ ﺗﺮﺍﻗﺐ ﻓﻴﻪ ﻣﻦ ﺑﻌﻴﺪ ﺑﻨﻈﺮﺍﺗﻬﺎ ﺍﻟﻤﻌﺠﺒﻪ ﺗﺤﺮﻛﺖ ﻣﻦ ﻣﻜﺎﻧﻬﺎ ﻭﻗﺪﻣﺖ ﻧﺎﺣﻴﺘﻪ ...
ﻧﻀﺎﻝ : ﺧﻼﺹ ﻧﺘﻼﻗﻮﺍ 6 ... ﺗﻤﺎﻡ ﻣﻊ ﺍﻟﺴﻼﻣﻪ ...
" ﻧﻀﺎﻝ "..
ﻧﻀﺎﻝ ﻗﻠﺒﻪ ﺩﻕ ﺑﺎﻟﻘﻮﺓ ﻭﺍﻟﺘﻔﺖ ﻭﺣﻮﻝ ﺍﻟﺘﻠﻴﻔﻮﻥ ﻣﻦ ﻭﺩﻧﻪ ﻗﺒﻞ ﻳﺼﻜﺮ ﺷﺒﺤﻬﺎ ﺍﺑﺘﺴﻢ ﻣﻦ ﻗﻠﺒﻪ ..
ﻳﺎﺭﺍ ﺑﻀﺤﻜﻪ : ﻗﺼﺪﻱ ﺃﺳﺘﺎﺫ ﻧﻀﺎﻝ ..
ﻧﻀﺎﻝ ﺑﻀﺤﻜﻪ : ﺗﺤﺒﻲ ﺗﻠﻌﺒﻲ ﺑﺎﻷﻋﺼﺎﺏ ..
ﻳﺎﺭﺍ : ﺍﻣﻤﻢ ﻣﺶ ﻫﻠﺒﻪ ﺷﻮﻳﻪ ..
ﻧﻀﺎﻝ ﺿﺤﻚ ﻭﻗﻌﺪ ﻳﺸﺒﺢ ﻟﻌﻴﻮﻧﻬﺎ ﻭﻫﻲ ﻛﺬﻟﻚ ..
ﻳﺎﺭﺍ ﺍﺭﺗﺒﻜﺖ ﻣﻦ ﻧﻈﺮﺍﺗﻪ : ﺍﺣﻤﻢ .. ﺷﻦ ﺻﺎﺭ ﻓﻲ ﺍﻟﻌﺰﻭﻣﻪ ..
ﻧﻀﺎﻝ ﺑﺄﺑﺘﺴﺎﻣﻪ : ﻧﺴﺘﻨﻰ ﻓﻴﻚ ...
ﻳﺎﺭﺍ ﺍﺑﺘﺴﻤﺖ : ﻭﺍﻧﻲ ﺟﺎﻫﺰﺓ ... ﺟﺖ ﻋﻴﻨﻬﺎ ﻉ ﺗﻠﻴﻔﻮﻧﻪ ﻋﻀﺖ ﻉ ﺷﺎﺭﺑﻬﺎ ﻭﻓﻨﺼﺖ ... ﺳﻜﺮﺗﻪ !!
ﻧﻀﺎﻝ ﺑﺴﺮﻋﻪ ﻗﺎﻣﻪ ﻭﺑﻀﺤﻜﺔ ﻓﻴﻬﺎ ﺍﺣﺮﺍﺝ : ﻧﺴﻴﺖ ﺑﺎﻟﻤﺮﺓ .. ﺑﺲ ﻛﻮﻳﺲ ﺻﻜﺮ ﻫﻮ .. ﻭﻭﺭﺍﻫﺎ ﺍﻟﺸﺎﺷﻪ ﻭﻫﻮ ﻳﺤﺮﻙ ﻓﻴﺪﻩ ﺍﻳﻤﻴﻦ ﻭﻳﺴﺎﺭ ..
ﻫﻲ ﺿﺤﻜﺖ ﻭﻗﺎﻟﺖ : ﺑﺎﻩ ﻫﻴﺎ ..
ﻧﻀﺎﻝ ﺍﺑﺘﺴﻢ : ﻫﻴﺎ ...
ﻭﺗﻮﺟﻬﻮﺍ ﺍﻟﺰﻭﺯ ﻟﻤﻄﻌﻢ ﻗﺮﺑﺐ ﻉ ﺍﻟﻔﻨﺪﻕ ﺑﺶ ﻳﺘﻐﺪﻭﺍ ﻣﻊ ﺑﻌﺾ ...
.... ﻳﺘﺒﻊ .
١١ / ١٠ / ٢٠٢٠ ·ﺪ 💕
ﺇ
