رواية (الوسيم والكاذبه)

البارت الرابع

-أيوه يا بت ..يعني طولتي هناك ..مش ناويه تيجي ولا إيه

دي كانت رؤيا اللي رايحه جايه في مكتبها وهي ماسكه الموبايل وبتكلم زميلتها في السكن "مروه"

مروه وهي بتقفل باب أوضتها كويس وبتوطي صوتها :شكلي كده هلبس هنا علطول يا رورو ..بابا راسه وألف سيف أقعد وما اسافرش ..مش عارفه ليه ..هو بيقولي أنه عايزني في موضوع مهم بس مش عايز يكلمني فيه ..بيقول لما ييجي الوقت المناسب هقولك

رؤيا بفكاهه:يكونش ناوي يتجوز علي أمك

مروه بغيظ:رؤيا ..مش نقصاكي

رؤيا:خلاص بهزر معاكي ..بت انتي وحشتيني جدا..مش عارفه أقعد من غيرك ..
مروه:قصدك مش لقيه حد تصدعيه برغيك زي ما كنتي بتصدعيني ..
رؤيا ومنشكحه جدا لأن مروه بتفهمها بسهوله :قفشاني أنتي علطول ..بقولك أوعي يكون أبوكي عرف موضوع السكن ..عشان قرر انك متسافريش ..

مروه وقلبها دق من الخوف بس رجعت قالت:لأ ما أظنش ..لو كده كان حبسني أو حتي زعقلي ..بس هو بيتعامل معايا طبيعي . وبعدين هيعرف منين ..عمتي وعدتني أنها مش هتجيبله سيره بالموضوع ..

رؤيا:مش عارفه بقي ربنا يستر

ولقيت باب مكتبها بيخبط،فقالت:أكلمك بعدين عشان شكل فيه حد عايزني ..سلام..

مروه:سلام ..
وبعدين حطت الموبايل علي الكومدينو وراحت ناحية البلكونه اللي في أوضتها ..وتأملت الطبيعه حواليها زي العاده ..وعقلها خدها لأفكار كتير ..من أول ما سافرت عشان تقعد مع عمتها..

مروه بنت عايشه في بلد أرياف ليها عادات مختلفه عن أي بلد ..عادات ظالمه ومحجفه ..ولسوء الحظ ..عايلتها من اللي بيقدسوا العادات والتقاليد..ومن العادات عندهم ان البنت مينفعش تكمل تعليمها بعد الثانويه ..من الأفضل تتجوز وتتستر في بيت جوزها..وده اللي حصل مع مروه..بس هي رفضت ولأنها عارفه تشدد والدها في الموضوع ده..قررت تلجأ للحيله..بعد ما أقنعت والدتها بموضوع أنها تكمل تعليمها وطبعا والدتها كانت مرحبه وبتتمني ده ..مروه طلبت من والدتها تساعدها عن طريق أنها تقنعه أنها تروح تقعد عند عمتها وبالمره تغير جو وتونس عمتها اللي قاعده لوحدها بعد جوزها ما توفي ..ولأن عمتها بتحب مروة جدا ساعدتها وزنت علي أخوها لحد ما وافق ..وأتنقلت فعلا لمكان تاني وناس تانيين وعادات وحريه جديده ..وأتفقت مع عمتها تكمل دراسه من غير علم والدها ..وطبعا عمتها رحبت ووفرتلها كل حاجه أحتاجتها ..بعد ما مروه خلصت تعليمها حبت تجرب جو الشغل والأعتماد علي النفس والمسؤليه ..فقالت لعمتها أنها هتبعد عنها وتاخد سكن وتشتغل ..رغم ان عمتها رفضت في الأول بس بعد إلحاح مروه وأصرارها المستميت أضطرت العمه المسكينه لتلبية رغبتها..وأبتعدت وخدت سكن مع رؤيا وبعد فتره قصيره أصبحت رؤيا أعز صديقه لمروه ..والحياه كانت ماشيه عادي لحد ما والدها طلب أنها ترجع البلد ..كل يوم تسأل نفسها مية سؤال والأجابات كانت مليانه خوف..خوف من المستقبل اللي مش عارفه هيوديها علي فين..خوف من والدها اللي رغم حبها الشديد ليه إلا انها بتكره فيه خضوعه للعادات والتقاليد حتي لو علي حساب حياتها ..
...........
كتفت شيماء ذراعيها وبصت ل رؤيا بضيق وقالت:تعالي شوفي اللي أنتي بلتينا بيه ده
رؤيا:عادل ...ماله ؟؟؟
شيماء:يا رؤيا ده قعد يقطع في بصله واحده في ساعتين ..وقال إيه لابس نضاره شمسيه..ليه فاكر نفسه في رحله