PSYCHO FRIEND (Season-2)

Part 10

မန်နေဂျာ့စကားအဆုံး ရိပေါ်လည်း ခေါင်းအသာညိတ်လိုက်ပြီး

"ကောင်းပြီ။ လက်ခံတယ်လို့ပြောလိုက်ပါ။"

"ဟုတ်ကဲ့။ နောက်ပြီး ဒါက ဒီနေ့မင်းသားရဲ့ အချိန်စာရင်းပါ။ နေ့လည်နှစ်နာရီကစပြီး ပွဲသုံးခုဆက်တိုက်တက်ရပါမယ်။ ပွဲတစ်ခုကို နှစ်နာရီနှုန်းနဲ့ ညရှစ်နာရီအပြီးတက်နိုင်အောင် ကျွန်တော်စီစဉ်ပေးထားပါတယ်။ မင်းသား ဒီအတောအတွင်း တက်ရတယ့်ပွဲတွေဆက်သွားတာမို့ နားချိန်များများရအောင်လို့ပါ။"

အလိုက်သိလွန်းတဲ့ မန်နေဂျာကြောင့် ရိပေါ်လည်း ကျေးဇူးတင်စွာနဲ့ပဲ အသာပြုံးမိတယ်။ သို့ပေမယ့် ခေါင်းထဲ တစ်ဆက်တည်း ဝင်လာတဲ့အတွေးကြောင့် ရယ်လည်းရယ်မိပါရဲ့။ မည်မျှပင် နားချိန်ရတယ်ဆိုဆို ရိပေါ်ကို ကုမ္ပဏီနဲ့သက်ဆိုင်တဲ့ အလုပ်တွေက ဆီးကြိုနေတယ်မဟုတ်ပါလော။

ရိပေါ်လည်း သက်ပြင်းအသာချလိုက်ပြီး မန်နေဂျာကို ကျေးဇူးတင်စကားသာ ဆိုမိတော့တယ်။

"ကျေးဇူးပါပဲ။"

"ရပါတယ်မင်းသား။ ဒါဆို ကျွန်တော့်ကို သွားခွင့်ပြုပါဦး။"

ရိပေါ်ခေါင်းညိတ်ပြလိုက်တာနဲ့ နေရာကနေထထွက်သွားတဲ့ မန်နေဂျာမှာ ယခုမှ တစ်စုံတစ်ခုကို သတိရလာသလို ရိပေါ်ဘက်ကို လှည့်ကြည့်လာတယ်။

"ဪ ဟုတ်သားပဲ။ မင်းသားကို ပြောဖို့မေ့နေတယ်။ ဒီနေ့ နိုင်ငံခြားကနေ ရှောန်းရှောင်ဆိုတဲ့မင်းသား ပြန်လာပြီတဲ့နော်။ လိုင်းပေါ်မှာ သူပြန်လာတဲ့အကြောင်းတွေက ရှာဖွေမှုအများဆုံးနဲ့ နံပါတ်တစ်ချိတ်နေတယ်။ သူ့ပရိတ်သတ်တွေဆို လေယာဉ်ကွင်းအပြည့်ပဲမို့ အခုထိ လေဆိပ်က ထွက်လို့မရသေးဘူးတဲ့။ ကြည့်ရတာ အခုအချိန်ထိ မရသေးဘူးထင်တယ်။"

မန်နေဂျာ့စကားအဆုံး ရိပေါ်လည်း ဖုန်းကိုအမြန်ယူလို့ အင်တာနက်ဖွင့်ကြည့်မိပါရဲ့။ မန်နေဂျာပြောတဲ့အတိုင်း ရှောန်းရှောင်တစ်ဖြစ်လည်း ရှောင်ကျန့်ဟာ လေဆိပ်မှာတင် ပိတ်မိနေပြီး လက်လှမ်းမီသမျှ ပရိတ်သတ်တွေကို လက်မှတ်ထိုးပေးနေရတယ်။ ဘေးမှာရှိတဲ့ သက်တော်စောင့်တွေမှာတော့ ရှောင်ကျန့်ကို အကာအကွယ်ပေးရင်း လေဆိပ်ကနေ ထွက်နိုင်ဖို့ရာ ကြိုးစားနေကြတော့တယ်။