أماكن مسكونة بقلم سمر إبراهيم

مثلث برمودا

هنتكلم النهاردة عن مكان من اكتر الأماكن مثيرة للجدل فى القرن العشرين ولحد دلوقتى بيحاول العلماء حل اللغز المحيط بيه (مثلث برمودا )
مثلث برمودا ‏ هو منطقة جغرافية على شكل مثلث متساوي الأضلاع ومساحته حوالي مليون كم²، يقع في المحيط الأطلسي بين برمودا، وبورتوريكو، وفلوريدا .
الغريب أن مش مثلث برمودا بس هو الوحيد المثير للجدل فى مثلث تانى فى المحيط الهادى جنب اليابان اسمه مثلث التنين انتشرت حواليه هو كمان الأساطير بس ده عايز نتكلم عنه فى حلقة لواحده .
اتسمى مثلث برمودا بالاسم ده نسبة إلى جزر برمودا البريطانية ودى عبارة عن ٣٠٠ جزيرة لكن ٣٠ منها بس هى إللى مأهولة بالسكان .
بدأت شهرة مثلث برمودا من ١٩٥٠م لما بدأت مجموعة من الصحف تنشر عدد من المقالات عن المثلث ده وان فى لغز حواليه هو إللى بيسبب غرق السفن وتحطم الطائرات إللى بتمر فيه ورصدت الصحف دى مجموعة من الحوادث المرتبطة بالمثلث.
بدأت الحوادث دى من ١٤٩٢م لما عدا كريستوفر كولومبس من المكان وهو بيكتشف الأمريكتين وقال انه لما قرب من مكان المثلث البوصلة بتاعته اتعطلت ودى حاجة استغربلها جدا .
بعد كدا توالت الحوادث الغريبة ففى ٣٠ ديسمبر ١٨١٢م غرقت السفينة باتريوت ودى كان عليها بنت نائب رئيس الولايات المتحدة الأمريكية أرون بور وكان اسمها ثيودوسيا بور ألستون فى ناس قالت السبب فى غرق السفينة مثلث برمودا وفى ناس قالت لأ السبب القراصنة ولسة لغز اختفائها متحلش لحد دلوقتى.
سنة ١٨٤٠م اختفت السفينة الفرنسية روزانى وبعد كام شهر لقوها لكن من غير الطقم بتاعها كله🤔🤔🤔🤔 .
اتكرر الوضع سنة ١٨٧٢م مع السفينة مارى سيليست إللى اختفت برده ولما لقوها بعد كام شهر كانت مفيش عليها اى حد من الطقم بتاعها😱😱😱😱😱 .
اما بقى سنة ١٨٨١م دى كانت اللغز الكبير إللى حصل ان مجموعة من البحارة كسبوا جايزة الجايزة دى كانت عبارة عن سفينة كبيرة اسمها إلين اوستن وبعد ما ابحروا بيها اختفت السفينة زيها زى غيرها إللى مش طبيعى بقى انها ظهرت بعدها بكام شهر سليمة من غير خدش لكن من غير ولا واحد من الطقم بتاعها ولما ابحر عليها مجموعة تانية من البحارة اختفوا هما كمان من غير اى أثر😱😱😱😱😱.
فى ٤ مارس ١٩١٨م وأثناء الحرب العالمية الأولى حصلت أكبر فاجعة فى تاريخ البحرية الأمريكية حيث اختفت حاملة الجنود يو اس اس سايكلوبس بقيادة الجنرال جورج ورلى  فى منطقة مثلث برمودا وكان عليها حوالى ٣٠٩ شخص ومظهرش ليهم اى أثر .
٥ ديسمبر ١٩٤٥م خرجت ٥ قاذفات صواريخ أمريكية لتدريب روتينى عادى جدا كان كل الطيارين إللى على الطيارات من المتدربين عديمى الخبرة ما عدا قائد السرب هو إللى كان طيار متمرس وكان اسمه تشارلز تيلور واشتهرت الرحلة دى باسم الرحلة ١٩  وكالعادة اختفت الطيارات بغير رجعة والجدير بالذكر أن آخر اتصال لاسلكى بالطيار قال أنهم فى خطر وان المياه قدامه بيضاء وبعدين قال انها اتحولت للون الأخضر وبعدين انقطع الاتصال ولما طلعوا طيارة انقاذ علشان تلحقهم اختفت هيا كمان من غير أثر وراح فى الموضوع ده ٢٧ شخص ومظهرتش حتى حطام للطيارات دى ومن ضمن الكلام إللى اتقال عنها ان الكائنات الفضائية خطفت الطيارات وخدتها المريخ 😁😁😁😁😁.
٢٨ ديسمبر ١٩٤٨م اختفت الطيارة  دوغلاس دى سى ودى كانت خارجة من سان خوان فى بورتريكو رايحة ميامى ودى راح ضحيتها ٣٢ شخص .
وفى سنة ١٩٦٣م اختفت طيارتين من نوع كى سى ١٣٥ بنفس الطريقة 🙄🙄🙄🙄.
مش ملاحظين ان معظم الحوادث كانت فى شهر ديسمبر يا ترا فيه سبب لكدا ولا مجرد صدفة 🤔🤔🤔🤔🤔.
دى كانت بعض الحوادث إللى حصلت فى مثلث برمودا مش كلها طبعا انما دى كانت أشهرها تعالوا بقى نشوف ايه الكلام إللى اتقال عن أسباب الحوادث دى سواء أسباب منطقية أو أسباب أسطورية.
فى ناس قالت ان سبب الحوادث دى هو غرق قارة اطلانتس داخل المثلث ده وان الاهرامات إللى كانت موجودة على قارة اطلانتس واللى دلوقتى موجودة فى قاع المحيط بيصدر منها اشعاعات هى إللى بتسبب الحوادث دى فى إللى قال ان الاهرامات دى كانوا اهل اطلانتس بيستخدموها لتوليد الطاقة وفى إللى قال لأ دى كانت بتستخدم كبوابة للعبور لأزمنة مختلفة آلات زمن بمعنى اصح 😁😁😁😁
وفيه إللى قال ان المثلث ده بيقع فيه عرش الشيطان ومليان بالشياطين والجن وهما إللى بيوقعوا الطيارات ويغرقوا السفن🤔🤔🤔😒.
وفي بقى إللى قال لأ دول يأجوج ومأجوج هما إللى ببعيشوا فى المثلث ده وهما إللى بيعملوا كدا😁😁😁😁😁
وفى إللى هبت منه خالص وقال لأ دا المهدى المنتظر وعيلته وأتباعه هما إللى عايشين هناك 🙄🙄🙄🙄
وطبعا فى إللى طلع وقال دول الكائنات الفضائية إللى بتعمل كدا لأن المثلث ده هو بوابة عبورهم من وإلى الارض😂😂😂😂.
وفى إللى قال ان فيه وحش ضخم بيعيش فى المكان ده وهو إللى بيعمل كدا فيه إللى قال انه اخطبوط ضخم وفيه إللى قال انه كائن محدش يعرف نوعه وفيه إللى قال انها مجموعة من أسماك القرش بس أصحاب النظرية دى احب اقولهم طب ده بالنسبة للسفن طب الطيارات بقى وقعها ازاى كان بيتف عليهم يقعوا مثلا ولا ايه 😂😂😂😂😂
طبعا كل دى استنتاجات قالها ناس مؤمنين بالحاجات الخارقة للطبيعة ومسيطرة عليهم الفكرة دى تعالوا بقى نشوف اهل العلم قالوا ايه الأسباب ورا الحوادث دى.
العلماء قالوا ان السبب فى الحوادث دى أسباب طبيعية جدا من ضمنها غاز هيدرات الميثان وان الغاز ده موجود فى قاع البحار والمحيطات وبيصدر فقاعات بتغير خصائص المية بتحول المية لمية رغوية قليلة الكثافة ممكن تؤدى لغرق سفن عملاقة فى لحظات قليلة (وحسب ما نقلت صحيفة سبوتنيك نيوز إن مجموعة من الباحثين من جامعة القطب الشمالي النرويجية أكتشفوا حفراً في قاع البحر ناجمة عن انفجارات ضخمة لكريات فقاعات من غاز الميثان  والتي تراكمت عبر الزمن أسفل البحر مبيّنين أنّ قطر تلك الحفر المكتشفة يصل إلى 500 متر، فيما يبلغ عمقها حوالي 45 مترا، ويقدر الباحثون أن انبعاث الغاز من تلك الحفر قد أدى إلى ارتفاع في حرارة مياه المحيط، بعدما اختلطت المياه بنسبة من الغاز. ويرجح العلماء أن تكون مياه "المثلث" قد فقدت نسبة مهمة من كثافتها جراء الاختلاط بالغاز، مما أدى إلى غرق السفن التي تعبرها)
ده بالنسبة للسفن اما الطيارات فقالوا السبب فى وقوعها هو الغيوم حيث ان المنطقة الموجود بها المثلث بيزيد فيها كثافة الغيوم وده بيعمل زى قنابل جوية ودوامات هوائية كفيلة بإسقاط الطائرات .
فى كمان ارتفاع المجال المغناطيسي للمكان وهو ده إللى بيعطل البوصلات واجهزة التحكم فى الطيارات والسفن وبيؤدى لتحطمها.
فى الأمواج المحيطية القاتلة ودا ارتفاعها عالى جدا ممكن يبلغ عشرات الأمتار ويبلع أكبر سفينة .
فيه كمان العواصف الاستوائية وفيه الأسباب الطبيعية إللى بتؤدى للحوادث بشكل طبيعى عادى جدا وفيه الأخطاء البشرية زى ما شوفنا على مر العصور ممكن خطأ بشرى يؤدى لكارثة ومن ضمن الأسباب إللى اتقالت عن اختفاء الرحلة ١٩ ان تشارلز تيلور كان معروف عنه ضياع الطريق وكان سكير ومكانش اصلا المفروض هو الى يطلع  بالرحلة بس مكانش فيه بديل وبما ان باقى السرب كان من المتدربين عديمى الخبرة حصل إللى حصل.
كمان اتقال ان من ضمن الأسباب هو القرصنة ودى منتشرة فى البحار من القرن ال ١٦ وكانت سبب فى سرقة وغرق كتير من السفن كمان قالوا ان سبب غرق يو اس اس سايكلوبس هو عمل عدائى من الدول المعادية فى الحرب العالمية الأولى مش المثلث ولا حاجة .
وفيه بقى مجموعة من العلماء إلى شايفين ان مفيش اى لغز ولا اى حاجة غريبة وان المنطقة زيها زى غيرها من المناطق البحرية فى المحيط معرضة للحوادث وزى ما فيه حوادث فيه كمان سفن وطيارات عدت من هناك ومحصلهاش اى حاجة وان الموضوع كله عبارة عن شو اعلامى وبروباجندا اعلامية هى إللى عملت الحوار ده كله و طبعا المخرجين والمؤلفين السينمائيين كان ليهم دور كبير فى تضخيم الأحداث لحد ما وصلت للشهرة دى كلها انما الحكاية ولا حاجة خارقة للطبيعة ولا لغز ولا اى حاجة.
دى كانت معظم الآراء إللى اتقالت فى الموضوع ده ولكم مطلق الحرية فى تصديق الرأى إللى يعجبكم .
كدا خلصت قصتنا النهاردة اتمنى تعجبكم والى لقاء آخر ان شاء الله ❤❤❤❤
Samar Ibrahim