Blood Contract with her Royal Villainess

♕CHAPTER 24♕

"Ilang oras na lang bago tayo mag-ayos sa huling gabi ng kasiyahan?" Tanong ko sa kaniya at tumingin naman siya sa relo na nasa palapulsuhan niya.

"Kalahating oras," maikli niyang sagot at muli akong sumalumbaba sa mesa at tumingin sa labas.

Nagdaratingan na ang iba pang mga noble family na nais humabol sa pagtitipon ngayong huling gabi, mukhang mas maraming mga tao ang kailangan harapin ni Diana at syempre kailangan ko ring harapin.

"Anong susuotin ko?" Tanong ko kay Viggo at tumingin naman siya sa 'kin.

"May pinadala ang crown prince na bistida para sa 'yo kanina ah, gusto mo bang iyon ang gamitin mo?" Tanong niya at napabuntong hininga naman ako, seryoso ba siyang gusto niya ipasuot sa 'kin ang revealing na damit na 'yun?

"Hindi ba masyadong vulgar?" Tanong ko sa kaniya at tinaas niya lang ang dalawa niyang balikat bilang sagot sa 'kin.

"Kung gusto mong suotin, suotin mo at kung ayaw mong may tumingin ng malaswa sa 'yo, hayaan mo kong dukutin ang bawat mata nila sa pagtitipon," sagot niya at kinilabutan naman ako roon.

"Osige na hindi ko na susuotin 'yun," sagot ko sa kaniya at tinaasan niya lang ako ng isang kilay niya at ito na naman siya mukhang manenermon.

"Suotin mo kung gusto mo, sinasabi ko lang na nasa tabi mo naman ako kung may mangbabastos sayo," sagot niya na medyo nagpakilig sa 'kin.

"Hahaha lakas mong bumanat ah, parang papasukin ka sa loob mamaya," sagot ko dahil kagabi ay hindi siya nakapasok sa loob ng pagtitipon, pero sabagay hindi niya rin naman nais pumunta.

"Pano kung sabihin kong pinayagan ako ng prinsesa pumasok?" Tanong niya sa 'kin sabay salumbaba rin sa harapan ko at tingin lang sa 'kin nang seryoso kaya naman napaiwas ang mga tingin ko sa kaniya. Hirap kasi labanan ng mga titig ng lalaking ito, masyadong delikado.

"Ta-talaga? Pinayagan ka?" Tanong ko at tumango naman siya.

"Kung gano'n may damit ka bang susuotin?" Tanong ko at tinuro niya ang yuniporme niya kaya agad akong umiling.

"Naku Viggo, binilhan kita ng magagarang damit para suotin mo hindi itago sa baul," sagot ko sa kaniya at humalukipkip naman siya sa harap ko na para bang handa na makipagbangayan sa 'kin.

"Bakit kailangan ko pa magbihis ng magarbo kung dadalo lang naman ako doon bilang butler mo?" Sagot niya sa 'kin at napairap naman ako sa kaniya, akala ko iniisip niya rin na isasayaw niya ko, ako lang siguro itong nag-iisip ng gan'ong bagay.

"Osige, sayangin mo 'yung oportunidad na binigay sayo ng prinsesa," sagot ko sa kaniya at lalong kumunot ang kaniyang noo sa harapan ko at parang iniisip kung anong ibig sabihin ng mga sinabi ko.

"Ano bang palabas ang gusto mong gawin?" Tanong niya at napaisip naman ako, bukod kasi sa nais ko siyang isayaw ako ay gusto ko rin ipakita sa mga aristocrats na bawat parte ng Romulus house ay kagalang-galang simula sa mga katulong hanggang sa amo ninto.

Nais ko rin ipakita sa kanila na hindi na ako 'yung Kiera na walang ginawa kung hindi maghasik ng kaguluhan sa bawat pagtitipon na kaniyang pinupuntahan, gusto ko mag-iwan ng kakaibang impression sa mga tao ngayong gabi bago pa man ako magtago sa border ng Lumire.

"Gusto ko maging perfect ang lahat," sagot ko kay Viggo na lalong nagpagulo sa isip niya, halata sa mukha niya ang pagtataka at paghahanap ng sagot sa mga sinasabi ko.