"ဒီကလေး မျောက်နဲ့စပ်ပြီးများ မွေးလာသလား။ ငြိမ်ငြိမ်ကိုမနေဘူး။"
ရှောင်ပါးပါးက လေသံကို အနည်းငယ်မာသလိုလိုနဲ့ ဟောက်ပြီးပြောလိုက်တဲ့အခါ ရှောင်ကျန့်က ကြောက်ရွံ့ဟန် ဇက်ပုပြပြီး သွားဖြဲရယ်ပြတယ်။ ရှောင်မားမားကတော့ ရှောင်ကျန့်ကိုကြည့်ရင်း အသာပြုံးနေရာက တစ်ခုခုကို သဘောပေါက်သွားသလို တခစ်ခစ်နဲ့ ထရယ်တာမို့ ရှောင်ပါးပါးနဲ့ရှောင်ကျန့်တို့နှစ်ယောက်လည်း ပြူးတိပြူးကြောင် လှည့်ကြည့်လာကြတယ်။ ရှောင်မားမားကတော့ ရယ်ရင်းတန်းလန်း ရှောင်ပါးပါးကိုလှည့်ကြည့်လို့ ပြောလာတဲ့စကားကြောင့် ရှောင်ကျန့်ပါ ထရယ်မိတော့တယ်။
"မျောက်နဲ့စပ်ပြီး မွေးတယ်ဟုတ်လား။ ဟားဟားဟား။ သူက ရှင်နဲ့ကျွန်မနဲ့ရပြီးမွေးလာတာလေ။ ရှင်က အခုလိုပြောတော့ ဘယ်သူက မျောက်ဖြစ်နေပြီတုန်း။ ဟားဟားဟား။"
ရှောင်မားမားစကားအဆုံး သူ့ကိုယ်သူပြန်ထိသွားမှန်း သိလိုက်ရတဲ့ ရှောင်ပါးပါးကတော့ ပါးစပ်အဟောင်းသားနဲ့ ဘာမှပြန်မပြောနိုင်။ ခဏအကြာမှာ အရှက်ပြေချောင်းတစ်ချက်ဟန့်ပြီး မနက်စာကို ခပ်တည်တည်နဲ့စားရင်း ပြောလာတဲ့စကားကြောင့် ရှောင်မားမားခမျာ ရှောင်ပါးပါးနောက်ကျောကို တဖုန်းဖုန်းနဲ့ ထုရိုက်တော့တယ်။ ရှောင်ကျန့်ကတော့ ရှောင်ပါးပါးနဲ့ရှောင်မားမားကိုကြည့်ရင်း အူတက်လို့။
"မသိပါဘူးကွာ။ ကိုယ်က မင်းကိုယ်နဲ့မတွေ့ခင် မင်းအမြဲတမ်းတားပြီး စီးနေကျ ကားဒရိုက်ဘာနဲ့များ အ အ စတာပါကွ။ အ!"
"ဟားဟားဟား။"
မီးဖိုခန်းထဲမှာ အလုပ်လုပ်နေကြတဲ့ အိမ်စေတွေအားလုံးဟာလည်း ရယ်ကာမောကာနဲ့ မနက်စာစားနေကြတဲ့ မိသားစုလေးကိုကြည့်ရင်း ပီတိပြုံးတို့ဝေဆာနေတော့တယ်။
မနက်စာစားသောက်ပြီးနောက် ရှောင်ပါးပါးနဲ့မားမားက ရှောင်ကျန့်ပါးကို တစ်ယောက်တစ်ဖက်စီမွှေးကြူတယ်။ ထို့နောက်မှာ ရှောင်ကျန့်ကိုနှုတ်ဆက်လို့ ကုမ္ပဏီကိုသွားကြတယ်။ ဟိုအရင်အချိန်တွေတုန်းကလိုပါပဲ။ ရှောင်ကျန့်ဟာ သူ့ပါးပါးနဲ့မားမားရဲ့ကားလေးပျောက်ကွယ်သွားတဲ့အထိ လက်ပြနှုတ်ဆက်ရင်း ကျန်ရစ်တယ်။ ကားလေးပျောက်ကွယ်သွားတဲ့နောက် ရှောင်ကျန့်လည်း သက်ပြင်းအသာချပြီး တက္ကသိုလ်ကိုသာ ထွက်လာခဲ့တော့တယ်။
YOU ARE READING
PSYCHO FRIEND (Season-2)
Mystery / Thriller🐺Unicode🐍 အိပ်မက်လေလား...တကယ်လေလား... #Monster Start Date: 23.6.2021 End Date: ... 🐺Zawgyi🐍 အိပ္မက္ေလလား...တကယ္ေလလား... #Monster Start Date: 23.6.2021 End Date: ...
Part 3
Start from the beginning
