بارت ثالث عشر
كال غرفتي عمي ..
كتله ماطبيت عليها خلي اشوف ..
راد يجي وياي ..
مراد سأله حجي مااعرف وين شايفك اني .. راد يلهيه عني ..
دكيت الباب فتت ..
لكيت وحدة كاعدة متوسطه بالعمر كامت تعدل بنفسها جانت خايفه ..
طبوا وياي كم واحد هما يفتشون واني سالتها ..
انتي زوجه هالرجال ..
اي ..
عدكم سلاح ..
لا والله خيي ماعدنا .
اسمعي زوجج ماموجود .. منو عباس ..
هااااا ..
مثل ماسمعتي ..
هذا مجرم خطير ولو انتي متعلمه عندج طبيعي عباس يطلع مؤيد يرجع ..
كامت ترجف وتخاف .. هاي شنو هاي شتحجي سيدي ..
اسمعيني بعد اي احد يطب للبيت غريب متلومين الا نفسج احنا جينا على هالاساس البيت مشبوه ..
هاي مو اني هاي بنته بت رجلي هبه ..
شبيها بنته ..
ذولي اصدقائها ..
لج تافهه ريحتج فاحت الصغير والجبير يعرفج وديري بالج تجيبين سيرتها لهبه وهيه وينها هبه
شو ماكو ..
غير زوجناها ..
شنوووو ....
شبيك سيدي ميصير وحده تزوج ..
لا اقصد المن تزوجت ..
لا علي ابن خالها بيتهم بالعطيفيه ..
بهاللحظه طب مراد وابو هبه ..
ها خويه اكو شي ..
لا ماكو شي بس تعرف .. شفت صندوگ أشرت عليه .. خليت الولد يفتشو هو والكنتور ..
هااا نتوكل لو بعد اكو شي ..
ابقى ابني نسويلكم عشه ..
جاوبته لا عمي لا تسلم تعبانين ورانا شغل هواي ....
اريد بس اطلع اختنگت ونفسي أحسه كام يصعد وينزل ..
سلمنا عليهم .. وطلعنا ..
اشبيك عمار ..
مراد مالحكت متزوجه لكيتهم مزوجيها ...
هاي شنو ..
اي مراد ..
لاول مرة حسيت بالحب نار اشتعلت بيه وكمت الوب حسيت وجع بداخلي تذكرت صوتها عذوبه كلامها رقتها يعني راحت مني هبه ..
على كيفك عمار يجوز البنيه مغصوبه ..
اكيد مغصوبه .. بس شاسوي ..
عمار لازم تؤمن بالقسمه والنصيب هاي البنيه مو قسمتك شكد حاولت توصللها وكلشي سويت بس ماوصلت هاي مو نصيبك .. انساها عمار وعيش حياتك ..
ولاتنسى انت ماوعدتها بزواج .. .
بس وعدتها مااعوفها ..
انت ضليت تدور عليها بس ربك شاء أنه تزوج بهالفترة انت عفتها ماصار ٦ اشهر واجتي قسمتها .. عيش حياتك واطوي كل شي الزمن كفيل يخليك تنسى كل شي ..
تشكرت منه لان تعبته ..
وصلت للبيت كعدت بالحديقة اريد اشتم هوه اريد ابجي احس اكو فراغ صار بداخلي يسالني ويكولي وينها هبه ...
ضليت تعبان ومتأذي والامل الوحيد الي جان عندي فقدته .. بس ضل بداخلي شي يكولي تلتقي بيها بيوم ...
هبه ..
بعد ماكعدوا الكل على صوتي جتي خيريه تركض وبتها الصغيره ختلت وراها وتبجي من الخوف ... علي جان نايم وسكران فز على صياحي وهو دايخ .. شكو شصاير .. شاف ابوه ميت باوع عليه وكام يبجي ..
كلنا خسرناه وافتقدناه حتى خيريه شكد اذته بس اتاذت على فراكه حسه بالبيت وحنيته يتفقد الصغير والجبير اجا ابوي للفاتحه بعد ماعرفت بيه جاي رف گلبي عليه ودزيت عليه اجا وهو يسالني ويكولي شلونه هذا وياج ..
زين يابا لاتشيل هم ..
الحمدلله ..
يابا مشتاقه لريم اريد اشوفها ..
عود تعاي زوريها ..
تخليني اجي ..
اي ليش لا هذا بيت ابوج بنتي ..
جنت اشتغل بالفاتحه وابجي على خالي وامي والنسوان كلها منتبهه عليه حتى بناته مو مثلي منار جانت تفتر وتسولف وي النسوان ولا كانه ابوها راح .. سامر جان يتصل ويبجي ميكدر يجي ويحجي وي امه ويكوللها راح اموت بالغربه ..
اما علي جان يفتر وكلشي مايعرف يتصرف وكلسع يجي عليه ويكولي البيت هوسه ديري بالج على الغراض لايتكسرون ..
وبالليل صعدت دانام تعبانه ذبيت روحي على الجرباية ونمت وهو اجا نام بصفي ويتلمسني ..
كتله هاي شبيك اتخبلت ..
شو هذا ضربني راجدي ومال شنو تخبلت مرتي واريدها ..
لك شتريد مني ..
متعرفين شأريد ..
ضربت على وجهي لك انت من يامله لك ابوك بعده مصارله يومين بالگبر وتريد تعاشرني انت بشر لو شنو كلي ..
لج انجبي لاتصيرين ام مبادىء وقيم هو ابويه مو ابوج .. وجرني بقوه وأخذ حاجته ولا كانه ابوه ميت مستحيل هذا من البشر..
خلصت الفاتحه وعدت ايام وبدا الكل يسأل على الورث وكلمن يريد حصته مجان احد يعرف الاملاك كلها باسمي جانوا يتصورون بس البيت الصغير الي خفت اكوللهم على الاملاك .. وبيوم اجا علي طب يصيح .. واني دااطبخ الغدة ..
لج هبه ياك.......ه يا كذا ....وكذا ...
كلشي باسمج ومتحجين مسويه نفسج مثاليه وتبيعين علينا اخلاقيات ..
شبيك ليش دتغلط .. اني ماناكرة حق احد ..
اجتي خيريه تركض جانت ملثمه ولازمه العده نزعت الخمار شافت ماكو غريب ..
شبيكم صوتكم وين واصل ..
طبعا ماادري الي صار انهجم بيتنا ابوي الخوش آدمي بايعلها الاول والتالي ...
ضربت خيريه على وجهها .. منو كالك يامصخم..
