بارت السابع
هبه تدرين وين رحنا اليوم وشسوينا ..
خالي اني ميهمني بس اريدك تبقى طيب وسالم الي اني ماعندي غيرك..
شوفي بنتي اني سجلت كل املاكي باس
مج ..
شلون خالي ..
اي خالو مثل ماسمعتي اني من نطيتج بيت صغير حتى يلمج خاف اموت اني ماجنت اريدج ترحين لناديه وضلمها
بس الله خلاني اسوي هيج حتى يشوفني اني وي منو عايش صح الي صار صعب علينا بس كشفت النا حقائق وعرفنا معادن الناس .. وبنفس الوقت اني اوصيج وصيه وهي امانه بركبتج ليوم الدين اني صح خليت باسمج املاكي حتى تحافضين عليهم واذا اتزوجتي واستقريتي انطي كلمن حقه بس علي دينار لاتنطيه الا اذا تزوج منج واعترف بابنه ....
واذا مااعترف بابنه شلون الولد باسم منو اسجله ..
معليج المحامي كارته يمج هو يقوم بكل شي في حاله اني ماموجود بس اذا موجود اني اتكفل الموضوع ..
ارتاحيت من عرفت الولد الي بطني خالي يتكفل موضوعه وراح يسجله باسم احد ميعوفه بلا اسم ولا هويه ..
مرت الايام ومحد يسال على خالي بس ابنه الي مسافر بره اسمه سامر .. يتصل بيه بين فترة وفترة وعرف بالسالفه كلها وجان مراضي على اخوه وامه ..
وبيوم اني كاعده العصر بغرفتي دارتبها لان هاملتها ودانام وي خالي لان مريض ومحد يمه سمعت الباب اندكت بقوه باوعت من شباك غرفتي وشفت الي ماجان أبالي .. ابويه وناديه بالباب انصدمت ولزمتني الرجفه واسمع خالي يكوله مو يمي راحت ويه خيريه معزومين ..
كاله ابويه .. خيريه زعلانه صار شهر يم اهلها ومحاكم انت وياها ..
هسه انت الي تريده شنو هبه موهنا ..
لعد وين ..
سفرتها ..
جان اشوف ابويه طب للبيت واني ضميت روحي جانت اكو مسافه صغيره وره الكنتور ضميت نفسي لان اني ضعفت بسبب الحمل وكدرت اضم نفسي بيها ..
طبوا للبيت فتشوا مالكوا احد .. وطلع ابويه يصيح على خالي ويكوله اسمع سعدون بنتي اذا مارجعت الي راح ارفع دعوى خطف ..
كال اله خالي .. رحيم بنتك يمي واجتي عليه بعلمك شنو تكول خطف ..
سعدون وصلني خبر بنتي حامل .. اذا هذا الخبر صحيح ماتلوم الا نفسك..
اني ورة الكنتور ارجف من الخوف ولزمتني دوخه كوة لزمت نفسي . ..
لحد ماطلع وراح ..
خالي ضل صافن ومتعجب على خيريه شلون تكول لرحيم هبه حامل .. وضل خالي كاعد بالحديقة وأيده على خده واني بدت عندي الالام ومغص بطني قوي ..
وقررت انهزم من بيت خالي لان ابويه عرف بحملي ومراح يعوفني وصرت بنظره البنت الي جابت العار لأهلها ..
رن تلفون عمار ..
رد عليها جانت ازل ..
يعني مااتصلت ولا اجيت للبيت ..
ليش اجي اني ماكتلج اجي ..
بس تعوفني زعلانه ..
انتي عفتيني وزعلانه ازل اني مفارغ لسوالفج كافي...
اجا محمد بهاللحظه وجاب الجاي بايده .. ودخل على هبه واشرتله الغرفه .. نهيت المكالمه وماجنت الكى سبب لتصرفات ازل فسرتها اني تصرفاتها هاي بسبب أهمالي الها ..
رجعت الغرفه على هبه وكتلها..
هبه هسه ارتاحي وباجر اطلعج من المستشفى ..
بس وين اروح ماكدر اروح للبيوت الي نطاني اياها خالي لان يندلون مكاني ..
حتى لو تكدرين مااعوفج وحدج تجين تسكين وياي بالبيت لحد ما الله يفرجها ..
وطلعت من المستشفى وتوجهت لبيت ازل حتى اراضيها مااحب احد يزعل مني خاصه الي احبه ..
عمار ..
طلعت من المستشفى وجان الجو كلش حلو فكرت اخذ ازل ونروح لمكان لكن شفت نفسي تعبان والساعه عشرة الوقت تاخر وخاصه واني اريد افوت على المركز كلت اجيبلها شي بسيط حتى أراضيها ..
مشيت على كيفي واباوع على المحلات لمحت سيارة فاتت من يمي بس جانت دنيا ليل ماكدرت اميز سيارة ازل لو لا ..
لا مستحيل مو سيارتها شيطلعها بالليل..
طبكت سيارتي يم محل يبيع الورد طبيعي .. كلت خوش هديه حلوة وكل البنات يحبون الورد ..
اشتريت الها باقه ورد طبيعي اخترت الورد كله لون ابيض حسيت شي غريب بداخلي على ازل ماعندي لهفه حتى اشوفها مثل قبل بس كان لازم اكسر هذا الاحساس وارجع طبيعي وياها شمهما يكون هي حتصير شريكه حياتي...
وصلت لبيت ازل ودكيت الجرس طلعتلي امها وهي شافتني كامت تتبلعم ..
هلو عمار ..
هلو خاله شلونج ..
تفاجات مكالتلي اتفضل ..
ها خاله وينها ازل ..
هااا اجتي تعبانه ونامت سيارتها من عطلت بيها تعبت وكفت هواي بشارع لحد مااجا ابن حلال سواها الها ..
هاااا زين سيارتها وين مدا اشوفها بالكراج ..
هااا مو ابوها اخذها عندة شغله وطلع بيها ..
زين خاله سلميلي عليها وانطيها هاي الباقه .. مع السلامه ..
صعدت السيارة واني متاكد الي شفتها جانت ازل مجنت اني غلطان ومشيت بكل سرعه ادور عليها بنفس المكان الي لمحته بيها مالكيت اي شي هو شارع لو شارعين حتى ادور فكرت اتصل بيها لكيته مغلق اتنرفزت ونار صارت بيه عليها ..اخرشي اجا بالي اوكف قريب باب بيتهم وانتظرها من تجي ..
