بارت الثاني
باوعت عليها واني مستغرب هاي شتحجين ..
دكتور ماريده نزلوه الي اذا مانزله ابات بالشارع ..
انتي فقدتي الجنين اطمأني ..
صدك .. كالتها بفرح
اي ..
الحمدلله ..
ماكو ام تفرح بمكانج..
دكتور المن اجيبه للعذاب او هو ....
المهم اني مو دكتور اني الي صدمج بالسياره ..
انت ..
اي اني ..
ليش ماموتتني ..
ليش هيج تحجين واذا الطفل ماتريديه شكو تزوجين وتخلفين ...
صدكني مظلومه اني ..
المهم انتي شنو اسمج هويتج ..
ليش ..
ابلغ اهلج واعوضج عن الي سويته بيج ..
ماعندي اهل ..
هاااا ..
مثل ماسمعت ..
زين بشنو اكدر اخدمج احجيلي اني ضابط شرطه وبخدمه الناس ...
صدك انت ضابط ساعدني بس بدون فضايح الله يخليك ...
اذا اكدر اساعدج ليش لا بس كون فعلا مظلومه وشنو تقصدين فضايح..
اني ..... اني تعرضت للاغتصاب والطفل الي بطني ابن حرام ...
عمار ...
منو الي اتعدى عليج تعرفيه ..
اي اعرفه ...
احجيلي قصتج من البدايه واذا صدك اخذلج حقج ..
احجيلك بس طويله قصتي ..
واني اسمعلج ..
اني هبة عمري ١٨ سنه .. امي توفت واني عمري ١٠ سنين جنت اني وحيدتها وهيه صحتها مو تمام گلبها ضعيف حتى من صرت اني جانوا خايفين عليها لاتروح بيها ابويه جان يحبها هيه حلوة وامورها الماديه زينه عدها اخت وحده وأخوة اثنين .. خالتي مسافره هي وخالي الجبير .. بس خالي الصغير عايش هنا ...
ضلت تتعب امي والي يزيد تعبها اني وشلون تعوفني وحدي والمن ..
بدت تدهور حالتها وبيوم مثل هيج جو باردة الدنيا ومطر قوي امي انتكست كلش وسلمتها جنت ادري هذا اليوم راح يجي بس ماتصورت راح لهدرجه اعاني وراها صح جانت مريضه بس جنت شاده حزام ظهري بيها ...
ابويه انهار بسببها ودنيا طلعت من عيونه كام يكره يطب البيت واني كاعده وحدي بين فترة وفترة تجي مرت عمي وعمي يمنا يجيبون بيبتي ام ابويه ويضلون ايام ويرحون مرت عمي علمتني على الطبخ لان بعد محد النا كمت اتعلم بس يادوب اوكف على الطباخ اضل خايفه من النار والجدر خاف يوكع عليه ..
بيبتي ام ابوي ضلت تنوح وتبجي على امي الي من تزوجت لحد ما ماتت ماصحت ابد وهما اخذوها وردة مفتحه لكن يمهم بدت تذبل يوم يوم لحد ماراحت لدار حقها...
بيبيتي ..
ابني رحيم ..
ها يوم ..
جم دوب تبقى بلا مرة ...
يمه شازوج جربت حظي ..
لا يمه هاي قسمتها وهاي بتك صغيره خليها ترجع لمدرستها شنو ذنبها فوكاها بلا علام ...
يمه منو الي ومنو تاخذني ..
يااا اشبيك اعمى اعرج وياهو التاخذك الف وحدة تتمناك واكو ناس جدد كاعدين هنا من جوارينا الجدد عدهم بنيه حليوة اخطبها الك ..
اني بالمطبخ سمعت حجيهم وبجيت ..
عمار يباوع على هبه وهي تحجي وتبجي ..
اجتي الممرضه ... بهاللحظه شلون صرتي ..
عندي الالام تروح وتجي ..
طبيعي تصير الالام اني حانطيج ابره ترتاحين ..
باوعت على ساعتي جانت ٣ الفجر ..
هبه اني رايح باجر جاي ديري بالج تطلعين بدون علمي هاج رقمي خاف تحتاجيني كل شئ يصير ..
بس ماعندي تلفون ...
ميخالف خلي يمج كلشي يصير باجر اني جايج ..
تصبحين على خير .. .
صعدت سيارتي المطر جان واكف والنجوم طلعت بس الجو جان بارد والهوى عذيبي يرد الروح ... مشيت واني افكر بيها جان يعجبني اكمل قصتها بس الممرضه ولو هي هم تعبانه جانت ..
طبيت للبيت لكيت مريم نايمه على القنفه مو بفراشها.
مريم ..
هاااا عمار اجيت بشر شخبار البنيه ..كالتها بصوت ناصي الحمدلله زينه ..
الحمدلله اسويلك عشه ..
لا روحي كملي نومتج بغرفتج ..
صعدت مريم لغرفتها ضليت كاعد بالهول واني افكر بهبة وبكلامها لحد ما نمت .. صحيت على صوت امي ..
ماما ليش هنا نايم ..
ها امي حبيبتي شلونج ..
زينه اني ابني اذا انت زين شبيك يوم ...
لا يوم مابيه ..
ياابني شوكت تزوج تبقى هيج ..
امي مضل شي ولو هو الزواج شراح يسويلي ..
كمت من يمها سويت الجاي ودخنت جكارتي وكملت الفطور وكعدنا اني وامي ونزلت مريم من غرفتها ...
ها تسوون اكل ومتكعدوني صباح الخير ..
صباح النور ياله تعاي على اولها حبيبتي ..
ضلينا نسولف ونضحك وكملت اكلي طبيت سبحت وبدلت ملابسي وسلمت على امي وطلعت واخذت ملابس وياي من مريم لهبة ..
اتصلت بالمركز وبلغتهم اني مااجي اليوم عندي شغل واكو ضابط اخر وياي اسمه محمد جان يخلصلي شغلي باوقات اني ماموجود بيها وبالعكس اني هم ..
وصلت للمستشفى ورحت راسا على غرفه هبه لكيتها يم الشباك تباوع وهي بعالم ثاني .. كعدت يمها ..
اي هبه شلونج ..
هاي ملابس بدلي وحتى اكو جواريبات من اختي جبتلج بدلي الدنيا باردة بين مااادخن هالجكارة طلعت برة وانتظرتها بين ماتغير ملابسها ..
فتحت الباب وكالت كملت باوعت عليها صاحبه جسم وطول وعيون رماديه والشعر اسود رافعته لكن وجهه كله كدمات..
يتبع....
