وخلي افرض طاوعتج ليش احول الاملاك باسم ابويه تبقى الي شنو الفرق ..
الفرق اذا تزوجتي واجا خالج يريد أملاكه خاف يرفع قضيه او موقعج على شي وانتي متدرين المحكمه اكيد حتراجع وراح واشوف عندج أملاك لو لا واذا عرفت اكو املاك حتسحب الاول والتالي منج ...
بس خالي مموقعني على شي ..
وانتي شمعرفج يجوز عنده اثبات ..
ابويه .. بنتي كلام ناديه صح خليني الزمهم من ايدهم الي توجعهم ..
زين وابني شلون الي بطني ...
انزله الج واذا متقبلين احنا نربيه الج .... ناديه كالت ..
ضليت ساكته خفت احجي حتى يأمنون بيه مستحيل احول شي لابويه مو لان مااثق بيه اني ادري ابويه يريد ينتقم منهم ويذلهم لكن ماامن او اثق بناديه لاتلعب لعبه وتقنع ابويه يسلمها كلشي ..
ضلت بطني توجعني وناديه تتلوك الي بهذا اليوم وكتلهم اني موافقه ابيع لابويه انتظرتهم ينامون وخليتها تفرح وانهزمت بالليل اخذت اوراقي والذهب وكلت انهزم لغير مكان اروح اخذ الايجارات واعيش بيها بغير مكان لحد مااجيب واتصل بخالي واكوله على ناديه شقرت براس خالي والله يحلها ..
انطفت الكهرباء وناموا الكل وجانت ريم يم امها لان كتلها بطني دتوجعني حتى من اطلع لاتضلين وحدها بالغرفه ..
صارت الساعه ١٢ تقريبا والكل نايم طلعت امشي على كيفي ... مشيت بالشارع الدنيا ظلمه ومحد بالشارع .. قريب مااوصل الشارع العام ركض ورايه چلب من الخوف ركضت سريع وقررت ارجع للبيت من خوفي وجان بيتنا قريب على الشارع وكعت بحفره قويه لان جان الشارع كله طسات وحفر وانضربت على وجهي او وكعت على بطني .. صار الم بطني وشفت نفسي انزف كمت بالكوه ردت ارجع بس سمعت صوت الچلاب اقترب خفت اقتربت للشارع شفت سيارة تمشي على كيفها بس جنت خايفه ودايخه وأتوجه ابو السيارة عليه وصدمني بسيارته ومشى شويه او وكف نزل عليه واني بديت افقد الوعي وهو فتح ضوة الجداحه وباوع عليه ... وشالني بسيارته .... حسيت الدم ملى السيارة اريد اكوله رجعني للبيت ومكدرت احجي ..
هبه ..
تذكرت من صحيت وشفته كدامي بالمستشفى وكالي الحمدلله على السلامه ..
شفته اول مرة حسيته قريب مني وكأنه اعرفه من زمان وخاصه من كال اسمعج اذا مضلومه اساعدج .. سمع قصتي وفهمني ومن جنت ابجي يتألم عليه إلا بيوم اجاه تلفون وطلع وكال باجر اجي اطلعج من المستشفى اخليج يم امي واختي ..وأخذ حقج من الي ظلمج وين رحت عمار ليش مااجيت طلعتني من المستشفى وحميتني من هاي المصايب معقوله هاي العيون تكذب وتخلف وعدها وياي ...
بهاللحظه نوريه جابت صينيه الجاي والكليجه .. شلون سويتلج كليجه والجاي المهيل .. شبيج بنيتي ليش صافنه ..
لا ماكو شي بس داافكر بخالي ...
اشبيه .. راح ترحين عليه ..
اي خاله لازم ...
ليش صار شي جديد ..
اي ابويه يريد يشتكي على خالي على أنه خطفني ..
يومه شلون قهر هذا ..
اي خاله مو خوش وكت ..
اتصلت بخالي ثاني يوم واتفقت وياه اشوفه ثاني يوم الصبح .. كعدت الصبح واخذت اوراقي وشربت كوب الجاي من ايد خاله نوريه باوعت جانت حزينه ومبين عليها حزينه وتكابر كوة ودعتها وبجيت حسيتها امي الي فقدتها وحنانها مثل ماجانت بيبي تحن عليه او وعدتها ازورها وماانسى طول عمري وكفتها وياي ...
التقيت بخالي وعزمني على مطعم جنت مشتاقه اشوفه ومن شفته شبكته وبجيت .. وحجيتله على سوالف ناديه وشلون قنعته لابويه حتى احول الاملاك باسمه .. وشلون طلعت بالليل وصدمتني سيارة وتعرفت على ضابط وكال اساعدج واختفى مااعرف ليش ..
خالي كال لاتوافقين على بيع الاملاك واذا جبروج كولي عليه صكوك اذا بعت الاملاك خالي يسوي عليه القاء قبض .. حتى انتي تضمنين هو مايجبرج على شي وياخذون منج شي .. سوينا صك مصدق وخالي صور منه نسخه وخلاها يمي والنسخه الاصليه تلفها لان الاصليه اكيد حتكون يم خالي وبنفس الوقت من يشوفون صورة من الصك يصدكون .. خلي يبسطني ابويه بس المهم ماافرط باملاك خالي وحتى تأخذهم ناديه .. وكال ياله اوديج للبيت وافهم ابوج علمود زواجج من علي لان علي اقتنع وخضع للأمر الواقع ..
اخذني خالي لبيت اهلي .. كلش خفت بس لازم افض موضوع زواجي واخلص من ضلم ناديه تعبت صار سنين من مكان لمكان اريد ارتاح واحس عندي بيت حتى لو كان زواجي من علي رغما عنه لازم يتحمل مسؤوليه غلطته ويدفع الثمن ..
جانت رند بالباب تلعب وريم كاعدة باب الحوش كاعدة تاكل نستله من شافتني ريم راحت تركض للبيت تبلغ اهلها اجونا خطار ..
طلع ابويه بالباب
وخالي كال السلام عليكم
ومن شافني ابوي كال ..هاا انتي وين جنتي وبيش جايه هالمرة ..
كاله خالي اول شي رد السلام ..
سعدون مابيناتنا سلام ..
يتبع....
