بارت السادس
كالتله بعدها نايمه ..
مو طبعها ساعه تسعه وهي نايمه شوفيها صعدي عليها ..
خيريه كالت لبتها الصغيرة ميس صعدي كعدي هبه ..
صار امي ..
صحيت اني وكمت ومكدرت اوكف و وكعت كمت ابجي وانهاريت وبدا صوتي يطلع كمت اصيح خالي سمع صوتي فز من مكانه وميس فتحت باب الغرفه عليه شافت الدم والضرب عليه ..لفيت روحي بالجرجف وكعدت بالزاويا ارجف واعيط بديت افقد السيطرة وصار عندي انهيار عصبي ..
دخل خالي ومرته وشافوني بهالحال خيريه افتهمت وضربت على وجهه وكامت تدك وتلطم عرفت ابنها ورة الموضوع وخالي صافن ميعرف شنو الي صار جان يتصور احد ضاربني بس من شاف الدم انصدم صدمه قويه منو يتجرأ يطب لغرفتي ويعتدي عليه باوع على مرته الي كامت تحجي وتكولي مو كتلج بابج لاتعوفيها مفتوحه الا تقفليها اني كمت اضرب على وجهي ...
اجا يمي خالي وكال .. شلون سوة هيج ابني احجيلي خالي لاتخافين .. حجيتله الي صار واني ابجي وكتله توسلت بيه بس جتفني من ايدي وسد حلكي ..
خالي كعد بالكاع وكام يبجي عليه ويكول جليله بنتج ماحافظت عليها ورحيم الي يكولي اني مااكدر عليها خليها يمك امانه هاي الامانه هيج يسوون بيها..
امي جانت اكبر من خالي وتزوجت اخر وحده لان جانت صحتها تعبانه بس حبت ابويه وتزوجت منه ..
خيريه راحت لغرفه علي تركض تدور عليه ماكو ماخذ هدومه وطالع اتصل بيه خالي مغلق تلفونه مرت خالي انقهرت عليه بس ماتنطي بابنها وتخاف تحجي كدام خالي طبيت للحمام وسبحت وطلعت لبست هدوم نظيفه وكعدت اصلي وادعي ربي الله يباوع لحالي شمعه وانطفيت ضاعت حياتي من ورة ابن خالي وابويه اي ابويه الي ضيعني علمود ناديه حبيبته وباعني وسنين مايحن ويسأل عليه ..
ضل علي ٣ايام ماكو يدورخالي عليه ماكو ويتصل بأصدقائه ماكو واتصل صديق علي وكال لخالي أنه شايف علي بفلان مقهى يلتقي راح خالي عليه بالليل جابه واجا ولزمه بالعصا كلش قسى عليه وخيريه بيناتهم واسمعه يكول لخالي هيه غوتني وذبت روحها عليه وكالتلي هيه وي مؤيد اصلا غلطت ..
لك انت معقوله ابني انت مو بشر انت شيطان تتعدى على عرضك وتتهم بيها فوكاها ... اسمع اكولك غصبن عليك تزوجها ...
والله ماتزوجها مااريدها ..
خيريه .. كل عقلك ازوجها لابني انت شلون تقبلها سعدون ..
لعد من هو سكران وتعدى عليها شعباله وانتي اسكتي ولا كلمه تحجين هسه ارمي اليمين عليج ...
يابا مو بوعيي جنت وهيه غوتني هيه فتحت الباب وجرتني للغرفه ..
اسمع الخميس نبدي باجراءات الزواج سمعت لو لا ..
كامت مرت خالي تبجي وتلعن الساعه الي اجيت بيها .
خالي جان مصر انه يزوجني لعلي وبدت خيريه تحاربني بالبيت وصارت حياتي جحيم وعفت المدرسه واني سادس علمي كرهت نفسي وكرهت ابويه الي جان سبب بلي اني بيه..
ورة يومين علي انهزم بعد ماجان خالي قافل عليه وجان عندي شك أنه خيريه هيه الي هزمته وخالي ضل حاير بيه وبعدها صرخت خيريه من طبت لغرفتها وعرفنا أنه علي بايك الذهب مالتها وفلوسها ومهزوم والذهب جان صندوك بيه ملاوي وشباحيه وبتوت وكلايد ومحابسها الي مو اقل من ٦ محابس يعني خوش فلوس بيها وانهزم ..
ضل خالي مكسور بسببي وخيريه تبجي وتكول من طبت علينا هالفكر فكرتنا واتفككنا من وراها .. خالي جان بيه سكر ومن ورة الي صار بيه جان خايف من ابويه وماعدا تفكيره اني يتيمه وشلون يسوي ابنه هيج بيه..
ضل علي مختفي ومحد يدري بيه وبدت صحه خالي تدهور وبقيت اداري بيه .. لحد ماصارت المفاجئه واكتشفوا اني حامل ...
عمار ...
بهاي اللحظه اتصلت بيه ازل ..
هلو ازل
هلو عمار ..
شبي صوتج ..
تعال عليه سيارتي عطلت ..
هاااا..
عمار شبيك سيارتي عطلت شنو مسمعت ..
اي اي جاي انتي وين ..
اني بالكرادة يم صديقك ابو الموبايلات ..
اوك جاي ..
رجعت للغرفه على هبه لكيتها نايمه فرحت حتى اروح وارجع لها جانت الساعه بالخمسه تقريبا العصر محسيت بالوقت وياها .. رحت على صديقي محمد او وصيته على هبه أنه يدير باله عليها وتوجهت للكرادة جانت الشوارع مزدحمه وكوة وصلت الها لكيتها مموجوده تفاجات رجعت اتصلت بيها جاوبتني ..
هلوو عمار ..
انتي وين اني واكف ..
هااا اني راح اوصل البيت ..
شنووو..
احنا مو متفقين اجيج لان سيارتج عاطله ..
مو اجا واحد وكفلي وطلعت مابيها بنزين وخلالها بنزين واشتغلت ..
غير تتصلين بيه ..
هسه شكو شصار يعني ..
الي صار عفت شغلي واجيت وانتي عفتيني ..
طبعا شغلك اهم مني انت متحبني اهم شي شغلك وراحتك اني اشوف والدي يشوف حل لموضوعنا ..
هسه اني طلعت غلطان ..
اروح اني تعبانه باي وسدت التلفون..
رجعت للمستشفى واني متعجب على تصرفات خطيبتي الطفوليه هواي تغيرت ازل بس شاسوي حبيتها وصارت خطيبتي ...
