بارت الحادي عشر
صعدت وي ابويه بالسياره واني ابجي حسيت ابويه مهظوم عليه ..
وسألني كال .. شلون صار هيج من شفتي نفسج ممرتاحه يمهم اتصلي بيه تالي هذا الكلب يفرط بشرفنا بهاي السهوله ..
يابا انت عفتني شمرتني ..
ماشمرتج ردت ازوجج واخلص و تعيشين وي مؤيد ..
يابا مؤيد مااعرفه ...
ليش تكذبين اني شفته بعيني يمج وبغرفتج اريد علي يرجع حتى تتزوجين ووتنتهي السالفه ..
سكتت ماجبت طاري سالفه ناديه ومؤيد جانوا علاقه والظاهر ابويه مقتنع بكلام ناديه ..
وصلنا للبيت اتفاجات بيه مو بيتنا جان الاثاث احلى موديل وناديه لابسه ملابس عمري مشفتها بهيج صورة وبناتها كبرانات ماعرفتهم كاعدات يقرون صاروا بالابتدائيه وحده بيهم نسخه من امها هاي الجبيرة اسمها هند والثانيه الصغيره اسمها رند ..
من شافتني اجتي تركض رغم هي ماعرفتني متذكرني بس كالتلي حتعيشين يمنا انتي ..
صاحت ناديه بيها لج رند تعاي هنا. .. اني سلمت من طارف خشمي وطبيت لغرفتي لكيتها مسويتها غرفه لبناتها واسمع عند تكول لامها شنوحتاخذ غرفتنا هاي ... سبحان الله العرگ مال امها واهلها ...
طبيت ردت اخلي غراضي بمكان محد يعرف بيه رجعت على ابويه ..
يابا اريد مكان الي ..
ردت ناديه باستهزاء ابقي هسه يم البنات بين ماباجر ترتبين المخزن ..
ابويه .. ناديه البنيه تعبانه وشلون تكعد بالمخزن ..
ياله عيني على أساس حامل بابن الحلال متعجبه اني شلون لسه مبقيها تشتم الهوى ..
رديت عليها بصوت عالي ...
اسمعي ابويه ظلمني مرة بسالفه مؤيد لكن هالمرة مراح يظلمني وانتي تعرفين الحقيقه كلش زين لاتخليني اذكرج بعد ..
سمعت صوت بجي طفل من الغرفه ..
جان تصيح ناديه بخوف بعد ماشافتني مااسكت والكلمه اردها بعشره وشافت ابويه متأثر بيه ..
شفت بنتك بصوتها العالي كعدت الطفله وفززتها حتصير خرعه بيها .. وراحت للغرفه ..
باوعت لابويه صافن وتعبان ..
يابا هاي منو الطفله بالغرفه تبجي ..
هاي اختج.... ناديه خلفتلي هالبنيه ...
رف گلبي عليها من كال اختج ..
يابا شنو اسمها ...
ريم ..
فرحت كلش عندي اخت صح هيه بت ناديه بس اني وياها نفس اسم الاب ..
طلعت ناديه تأفأف ...
كمت اخذتها منها وبستها جانت تشبه ابويه ..
ناديه فرحت من اخذتها لان تدري بيه احب الجهال حتى تذبها عليه ...
جانت ريم عمرها سنه ونص وصلت تباوع عليه من شايلتها وخليتها بحظني تمنيت ريم من امي وتخيلت بيبي شلون جانت تداريني وتخاف عليه ..
طبيت للمخزن رتبته وباوعت ريم تباوع عليه واكفه بالباب وكعدت صافنه عليه ..
جانت الساعه ٢بالليل واني ارتب المخزن باوعت ريم نعست والمخزن بارد مو مال تنام بيه رحت لكيت ابويه نايم وناديه هم دكيت الباب ردت عليه ناديه نيميها يمج علميها عليج .. ونطتني صوبه وملابسها حتى ابدللها .. خليت الصوبه بالمخزن وبدللتها وشربتها الحليب ونامت راساً ..
ضميت غراضي بالبوفيه مال فراش مالتها ونمت بس جانت نومتي قلقه من وجع بطني ..
ضليت يومين اشتغل واتعب وريم جانت فرحانه بيه وابتسامتها تخفف عليه وبيوم رحت للسوك واخذت هند وياي اشتري كم شغله ورجعت مكدرت امشي هواي من التعب والالام بطني ..
وصلت للبيت .. لكيت ناديه باب الغرفه وشايله الاوراق بايدها ..
واني داانزع الحجاب التفتت على صوتها وهي تكولي كل هاي عندج وماحجيت ..
تفاجات منها وجربت الاوراق منها وكتلها معليج انتي ..
هسه اشوفج منو عليه ..
ضليت بمكاني خايفه ياربي شلون عرفت مكان الاوراق وعرفت الاملاك كلها باسمي هاي امانه مو ملكي خالي راد يحافظ عليها من خيريه توكع بيد هاي الحقيرة ناديه ..
اجا ابويه بالليل مكدرت يكمل شغله من البرد والمطر جان قوي وحتى الكهرباء كامت تطفى وتشتغل ..
اول مااجا اخذته ناديه الغرفه وبدت تحجي برأسه ..
اني خفت منها بس بعدين كلت ليش داخاف لو اعرف ارجع لبيت خالي وانطيه الاوراق واخلص منهم وارجعله كلشي .. بس البيت الصغير الي ..
اجاني ابويه الغرفه ..
هبه صح الي سمعته املاك باسمج ..
اي صح بس هاي الاملاك باسمي حتى اشتري بيها حياتي ..
شلون يعني ..
يعني حتى اتزوج من علي ويعترف بابنه ارجع المال الهم لان خيريه او ولدها رفعوا قضيه حجر بس خسروها وخالي باعلي كلشي حتى يأمن عليهم ..
واني هم اريد أمن عليج ..
شتقصد ..
حولي كلشي باسمي اني ابوج حتى يصير ضغط عليهم ويعترف بزواجه والولد ..
يابا هاي امانه وشكو فرق الامانه اذا يمي او يمك ..
بنتي اريد اذلهم مثل ماذلوج ...
يابا خالي معليه ...
صاحت ناديه انطينا الاوراق وحولي لابوج كلشي وعوفيه لعلي الف واحد يتمناج ..
وشلون اتزوج واني مو بنيه. .
معليج عوفيها على خالتج ناديه اجيبلج احسن قسمه ابن اختي ذاك الشاب ونسويلج عمليه ترقيع ولا علي ولا غيره .. وثمن الي سووه بيج اخذتيه أملاكهم وانسيهم ..ّباوعت عليها هاي شيطان مو مرة ..
