Flavors of Your Love 01: Suddenly Brewed One

28 | Beating the Queen Bee

Zach’s Outlook

“Dani, kumalma ka! Mas lalo mo lang palalalain ang sitwasyon n’yo pare-pareho!” sabi ko rito na nauuna ng ilang hakbang pero labas-pasok lang sa tenga n’ya ang sinasabi ko, “Dani, can you please calm? This isn’t helping at all,” sabi ni Klein na halos kasabay ko lang maglakad at pinapahinahon din si Dani na parang torong nakakita ng pulang bagay.

Lakad kabayo ang ginagawa naming tatlo. Ramdam ang mabigat na presensya ni Dani, halos lahat ng makakasalubong namin ay tinatapunan siya ng tingin. Pangalawang beses na ulit siyang siniraan ni Flynn Rider, mukhang hindi ko na maaawat ang galit na galit na leon.

“Dani... ” biglang sumulpot si Wendy sa daan pero nilagpasan lang s’ya ni Dani, “Zach, ano’ng nangyayari? Bakit ganun si Dani?!” tanong ni Wendy na halos lakad kabayo na rin ang ginagawa at sumasabay na sa’min. “Did you open your social media?” tanong ni Klein at umiling si Wendy, “May bago na namang pinost si Flynn Rider! Si Dani na naman ang pinuntirya n’ya,” paliwanag ko at hindi ko na nakita pa ang reaksyon ni Wendy.

Biglang may pamilyar na mukha ang sumulpot sa daan. Napatigil si Dani at hinarap ito, “Tasha, nasa’n ‘yung kapatid mo?!” mabigat na tanong ni Dani, “Ano’ng kailangan mo s—” kaagad napapadyak si Dani, “’Wag mo akong sagutin ng tanong din! Nasa’n si Trixie?!” namumula na ang mata nito at pigang-piga na ang kamao n’ya, “Nasa cafeteria, do’n sila kuma—” hindi n’ya na pinatapos si Tasha at muling bumalik sa paghakbang na parang kabayo.

“Dani wait, I know what you’re thinking about!” sigaw ni Tasha at naglakad na rin na parang kabayo, apat na kaming nakasunod kay Dani, “Dani, hindi si ate si Flynn Rider! Yes, maybe she’s bad but she’ll never do that,” pangungumbinsi pa ni Tasha pero ‘di nakikinig si Dani.

Nakarating kami sa harapan ng cafeteria. Hindi ko alam na nando’n ang mga ka-banda ko. “Axel, pigilan n’yo!” kaagad na naalarma ang tatlo at agad na tumayo sila sa bench pwera na lang kay Bread na busy sa Mp3 n’ya. “Dani ‘wag!” sabi ni Axel at nakaharang silang tatlo sa pintuan. Lumapit ako kay Dani at hinawakan siya sa braso, “Dani, malaking gulo ‘to!” sabi ko at umikot ang ulo n’ya papunta sa’kin, “Zach, bitawan mo ako o tutugtog kayo sa Banda Bangayan ng may black-eye sa mukha?!” umuusok na ilong na sabi nito.

Naging matibay sa paghaharang sila Axel, Cedric, at Steve. Nagdilim ang paningin ni Dani at buong pwersa niyang hinawi ang daan. Nakapasok si Dani sa malawak na cafeteria, marami ang mga estudyanteng kumakain at lahat sila ay napapatingin sa torong galit na galit.

Biglang may humahangos sa likuran namin at kaagad na lumapit kay Dani, “Ano ka ba! Kanina lang, pinapangaralan mo ako na ‘wag gumanti! Pigilan mo ‘yang galit mo,” sabi ni Demi pero binawi ni Dani ang braso n’ya, “Alam ko! Pagbigyan mo na ako rito, huling beses na ‘to, tingnan natin kung umulit pa s’ya!” inikot ni Dani ang mata niya sa paligid, hanggang sa may natanaw siya sa gitna ng cafeteria.

“How dare you, b*tch!” sigaw ni Dani na nagpatigil sa lahat ng mga estudyanteng kumakain.

Mabilis ang naging paggalaw ni Dani, ikinilos n’ya ang paa n’ya papunta sa tuwid na direksyon kung nasaan ang lamesa nila Trixie. Magkakatabi silang tatlo ng kaibigan n’ya at nasa gitna si ito.

Tumungtong si Dani sa flat bench, isinampa n’ya ang sarili sa lamesa. Nakaluhod na s’ya sa ibabaw ng lamesa at buong pwersang ibinuwelo ang kaniyang braso at walang pasabi—kaagad niyang ipinatama nang malakas ang kanang kamao diretso sa gitna ng mukha ni Trixie.

“WHAAA!” nag-hiyawan ang lahat ng taong nakakita ng kaagad na tumihaya si Trixie sa sahig.

“Dani, ano bang ginawa mo!” sigaw ko at kaagad na lumapit sa lamesa. Niyakap ko ang kaniyang t’yan at buong lakas na binuhat pababa sa lamesa. Tumayo siya ng tuwid at susugurin pa sana si Trixie pero kaagad kong pinigilan siya sa dalawang braso.