وقعت سماح فى الأرض من أثر دفشة ابيها ولكنها وقعت تحت اقدامه لتجعل قلبه يتمزق على ما أصابها
نظرت سماح للأعلى وقالت بصوت حطم حصون قلبه... ياسين امشي بسرعة
فضل بغضب... ولك عين تيجى لحد اهنا ياواكل ناسك
محمود كاد أن يضربه ولكن فارس اوقفه ووقف حائل بينهما وساعد اخته على النهوض
ياسين بغضب... ازاى تقدر تعمل كده فى بنتك ومن غير ما تتأكد من أى حاجة ازاى
فضل أقترب منه وكاد أن يصفعه لكن تدخل عابد فى الوقت المناسب مع ادهم
عابد... أقف عندك يافضل
فضل بصدمة... عابد ؟!
عائشة اقتربت منه بصدمة... انت هنا ازاى؟!
عابد... القدر يا اختى الغالية ، انتى زمان بعتينا عشان جوزك و النهاردة انا هنا عشان انقذ بنتك من جوزك ومن ظلمكم
فضل بدهشة ... وعلاقتك اى ببتى يا ابن الاكابر
عابد... ياسين وادهم يبقوا ولادى يافضل
عائشة بصدمة... كان قلبى حاسس وقلت لك يافضل فى حاجة بينا انا حاسة
فضل بحرقة ... وانتقمت منينا عن طريق ولدك
عابد... هتفضل متسرع ومش بتفكر انا لسه عارف النهاردة ان بنتك بتشتغل عند ياسين وجيت قبل ما تغلط غلطة عمرك بعد رجاء ياسين
عائشة... انا مش فاهمة حاجة حد يفهمني قبل ما اتجنن
ياسين... انا مش جبان ولا خاين زى ما انت فاكر يا حج فضل انا من البداية عرفت ان سماح تبقى بنت عمتى وسماح كمان عارفة انى ابن خالها وانا اللى طلبت منها تسكت عشان عارف العداوة إللى بينكم وعملت حساب الوقفة دى
فضل... بس حديتك ولا له عازه ياولد عابد إللى عملته مع بتى عقابه الموت
ياسين وقد تملك الغضب منه... اسمع يا حج فضل انا مش جبان عشان اخاف من تهديدك، وسماح لحمى ودمى ومستحيل اعمل حاجة تخليها توطى رأسها وبنتك ب ١٠٠ رجل و كرامتها وشرفها اغلى عندها من روحها وانا دايما هكون سندها مش الغدار اللى يأذيها
محمود فى محاولة تكذيبه ... ومفكرنا إياك هنصدق حديتك المعسول بعد إللى حوصل
فارس ... ممكن الكل يهدى وانتى ياجنا ادخلى مع سماح جوه وخلى الرجالة تتكلم بحرية اكتر لأن الكلام كتر ولازم نقطع لسان الحية من البداية قبل ما تكبر اكتر
ياسين.. لحظة يافارس عشان الآنسة جنا عندها إجابات كتير وكلام لازم نعرفه منها
الخوف احتل ملامحها فهى تعلم المقصود من كلام ياسين
فارس بعدم فهم... قصدك اى وأى علاقة جنا بالموضوع
ياسين... إللى حصل مع سماح لعبه حقيرة من تخطيط زميلتها همس وتنفيذ ابن عمك وبنت عمك ولا كلامى غلط يا آنسة ولا اى يا استاذ محمود
