بسمة مدفونة في خيالي ~ضاقت أنفاسي ~

بارت 30

بارت 30










**
**
••
ام راكان جالسة بالصالة وبعناد : مستحيل باعنا علشان ست الحسن يشبع فيها !
سعاد رفعت حاجب،: انهزمي وخلي حضرتها تأخذ ولدك !
ام لؤي بتأييد : وباكر تعبي رأسه وتخليه يكره أهله
لجين تكمل بخبث : انا لو مكانك ما اخليها تتهنى الا اخذ معي كل احفادي واعلمهم يخربون ويكسرون يقلبون الشقة الى دمار واخليها تقرف حالها !
وخليها تعرف انه بيت ابنك وتدخليه متى ما بغيتي ما هو عاجبها الباب يسع جمل !،
ما رح تتحمل الوضع ورح تظهر على حقيقتها قدام خالي وقتها رح يتركها خالي بعد ما يعرف حقيقتها هالمنافقه!
ام لؤي ابتسمت: والله فكرة مرتبة ومن اليوم رح نطبقها!
يلا يمة لاتخلي لها مجال تقول شوف اهلك رموك وقت مرضك وانت تعرفين كيد الحريم !-
ام راكان بعناد مجروح من ولدها الي باعها وتمسك بالغريبة : دامه باعنا خلاص انتهى كل شيء!
**
**
**
متمدد بالصالة على طوله والهم والتعب واضح عليه ...هذا اليوم الثاني له في شقته وللحين أهله مقاطعينه حتى الجوال ما يردون عليه ...رفع نظره لما طلعت من المطبخ ومبتسمة بسعادة وكأنها مالكه الدنيا كلها : نسيت اسألك تحب الشوربة

قاطعها بابتسامة متعبة : اي شيء !-
هزت رأسها بارتياح : تدري اليوم أمي رح تزورنا !
وقدر معها اشتقت لها كثير !
كملت كلامها لما شافت سكوته وجلست مقابل له تبغى تستفسر عن كلام فياض لكن بإسلوبها : معقول ترفض ترجع مع امي للبيت
قاطعها بهدوء: البنت كبيرة ما هي صغيرة على هذه الحركات ما رح تعمل كذا
رفعت حاجب بتساؤل: انت ما تبغاها تعيش
غمض عيونه لثواني وبعدها رد : لا تستبقي الاحداث يا رونق
صحيح نسيت اخبرك جدتي اليوم جاية تزورنا!
عقدت حواجبها: بس جدتي ام ناصر يقولون ما تقوم من السرير وضعها الصحي تعبان
قاطعها،: جدتي صفية !
وقفت على حيلها بتذكر : نسيت الاكل على النار .دقيقة وراجعة !
بعد دقائق رجعت وابتسمت براحة :لو تأخرت شوي كان احترق الأكل
حك جبهته بابتسامة باهتة اكلها بدون حرق مو ذاك الزود : الحمد لله تدرين
سكت وناظر جهة الباب لما انطرق الباب وبتساؤل: امك ؟!
هزت رأسها بالنفي: امي بالليل رح تيجي الحين الظهر
لحظة اشوف ..
اقتربت من الباب وسألت باستغراب: مين
وصلها صوت تكرهه : افتحي تبغين تفتحين تحقيق !
عفست ملامحها وفتحت الباب بعد ما عدلت ملامحها
سعاد ناظرتها بكره : سنة حتى تفتحين الباب !
ابعدي عن طريقي !،
رونق واقفةوماسكه مقبض الباب وهي تناظر الزوار باندهاش!
ام لؤي بانتقاد:ابعدي عن الباب واقفة وانت بهذا اللبس !
سعاد رفعت حاجب وهي تناظرها ...لابسة بنطلون ابيض وبلوزة حمراء وشعرها رافعيته بكماشه ولابسه عدسات رماديه ...مطت شفتها بغيرة من نعومتها ....الشبه حاليا كبير بينها وبين مريم الفرق لون العيون فقط!
دخلوا وما سلموا عليها !
قفلت الباب وتوجهت لهم ...بعد السلام جراح فرحان بزيارة اخواته : كيفكم! وكيف امي؟
مطت شفته ام لؤي بقهر: مو بخير وانت تعرف السبب !
سعاد بنغزه: لوتهمك كان سمعت كلامها !
جلست رونق وهي تحس نغزاتهم عليها ....
جراح ناظر رونق بمحبة واضحة وبعدها التفت على اخواته : عاد اليوم كنت مخطط ازوركم انا ورونق... اصرت تقول نسلم عليكم
رفعت رونق حاجب باستنكار ما معها خبر لهذا الكلام وبمجاملة نطقت لما غمز لها جراح: ايه كنا
قاطعتها ام لؤي وهي ساحبه عليها وتوجه الكلام لجراح: لا تغلب نفسك ... انا وسعاد كل يوم عندك!
واعطت رونق نظرة تحدي!
عقدت حواجبها رونق بانزعاج من صوت صراخ العيال ..ناظرت بجراح الي يهلي ويرحب بأخواته: البيت مفتوح لكم متى ما بغيتم !
سعاد بتفقد: تغديت ؟! ترى جبت لك معي الاكل الي يحبه قلبك
رونق بمقاطعة: ليه غلبت نفسك جهزت له الأكل
سعاد بسخرية: الحين تقارنين طبخك القروي بطبخي
اسألي جراح خليه يقولك عن طبخي
انقهرت بداخلها من كلامها.وبابتسامه ظاهرية رسمتها على محياها حتى تقهرها : عاد دوبه جراح يقولي بحياته ما ذاق ازكى من طبخي!
جراح ناظرها بفجعة تبغى تورطه مع سعاد اكيد رح تنقل الكلام لامه ويزيد زعلها. ..غمزت له بابتسامه جميلة حتى يسلك لها ....وبتورط نطق وهو يشوف ملامح اخواته : طبخت لي طبخة اول مرة اسمع فيها ما عمره احد طبخها منكم ...يعني اقصد هذي الطبخة ما شاء الله طعمها غير شكل !
خزته رونق وهي تتذكر البارحة ما قدر يأكل الا كم لقمة وطلب من المطعم !
ام لؤي وهي تعلك: وكيف وضعك الحين ؟ !
انا اقول لو تنتقل لبيت اهلي بهذه الفترة انت تعبان والشقة صغيرة حتى ما تقدر تستقبل فيها ضيوف لوحدك بحاجة احد
قاطعها بابتسامة: يا الضيوف مقطعين حالهم!!) ...هنا افضل
رونق انزعجت منهم ومن كلامهم : اجهزلك الغداء
سعاد فتحت حافظة الطعام الي احضرتها: هاتي شيء نفرغ فيه الاكل خلي جراح مرتاح هنا وجيبي بس شيء افرغ فيه الاكل .وطبخك ما له داعي
رونق عقدت حواجبها: ماله داعي بالنسبة لك اما جراح ما يستغني عنه
جراح اصابه صداع هذه اولها .نطق بهدوء: وش فيكم ترى ما رح يبقى شيء من طبخكم ترى ميت جوع !
تحركت رونق من الصالة و ماسكه اعصابها بقوة ....
رتبت الاكل امامه وجلست تراقب الوضع ..وكلما بغى يأكل لقمة من طبخ رونق تسحب يده وتخليه يأكل من اكلها !
رفعت نظرها لاخواته ولجين يتهامسن ويضحكن بهدوء!
ناظرت جراح وتقدمت وسحبت طبق الاكل الي حضرته سعاد : خلاص يكفي.....الحين دور طبخي
سعاد شهقت وبردح نطقت : شفت بعينك وش عملت
لجين بهجوم : انت ما تستحين على وجهك تع
قاطعتها رونق بهدوء: انت ما دخلك
جراح استغفر بداخله ..وضعه لا يحسد عليه واقع بين زوجته واخواته ...ما هو حاب يكسر بخاطر اخواته الي اول مره يدخلون بيته ..تناول الطبق من رونق: لا تخافين رح اكمل اكلكم كلكم !
رونق طالعت اخواته بتقييم وصدت عنهم !
بعد وقت تمدد على طوله بتعب يحس اصابته تخمه ما هو قادر يتنفس ....
رونق جالسه بغرفتها بحجة عليها دراسة لانها ما تقدر تمسك نفسها اكثر من كذا ...قريب العشاء وهم للحين عندهم !
تمنت انها امها ما لغت الزيارة على الاقل تلاقي احد تكلمه !
عضت على شفتها بقهر لما سمعت صوت تكسير ...متأكده المكان صار دمار!
مرت الايام وهذا حالها اخواته كل يوم عنده. والجدة صفية تنام وتصبح عندهم ...تحس المكان صار منتزة يدمرون ويطلعون !
تكتفت وهي تناظر المكان بعد ما غادروا وبقهر: اقنعني إنه هالزيارات ما هي متعمدة !
صفية تمشي بخطوات بطيئة بعد ما كانت بالحمام : عيب هالكلام ...أخواته يبغن يزورن اخوهن
قاطعتها رونق: ما احد منعهم بس قرودهم بالبيت ما هو منتزه !
يعني ما في احساس جراح تعبان وازعاج ما هو طبيعي من صباح ربنا لوقت النوم!
في شيء اسمه الذوق العام !
صفية جلست على الكنبه : وكاد تقصديني اني جالس عندكم !
جراح اعطاها نظره تهديد لو زعلت جدته...زفرت بضيق ونطقت : ما اقصدك انا اتكلم عن الصغار
جراح بمحبة لجدته: البيت بيتك يا جدتي بس رونق متضايقة من هالوضع ..واشر على المكان!
صفيه ضد رونق لأنها تشوفها السبب في خراب علاقة جراح بأهله وإخوانه ...تغير جراح حتى ما كلف نفسه يعتذر من اخوانهاو يبرر لهم اي شيء !
ما تحب الرجال الي يتبع مرته ويخرب علاقته بأهله علشانها وبلوم نطقت: انت خليك خلف سوالف الحريم
رونق تعرف انها متحيزة لصف ام راكان ...نطقت بضيق : جراح ما تزوجني حتى اخدم تحت قذاره عيال اخواته ...انا مب فاضية عندي بيت ودراسة
قاطعتها صفيه بسخرية:من كبر هالبيت!،
يا بنت اسمعي من هالنصيحة لا تكوني من الحريم الي تقطع الزوج عن اهله!
قاطعتها رونق وهي تناظرجراح : انا اقطعك من اهلك؟!
جراح عافس ملامحه من التعب وما هو قادر ينطق حرف واحد ..فوق تعبه مشاكل رونق مع اهله..وبصوت هامس،نطق : اتصلي بابوك يأخذني للمستشفى
صفية قامت على حيلها بخوف : جراح انت بخير
رد بتعب: تعب بسيط
صفية ناظرت رونق واقفه تناظرهم بصمت: تحركي اتصلي بآي احد واقفه مثل الصنم !،
**
*
**
**
في الجامعة
وضعت راسها على الطاولة بروح ميته :مب قادرة استحملهم !،
متأكده متعمدات يقهروني بهذه الزيارات ...وما اقدر اقول لهم ممنوع يزورونا هم اهله ..وما ابغى يأخذ جراح موقف مني او يزعل !
والمشكلة جدته صفية تخيلي تنام وتصبح عندنا ترجع لبيتها كم يوم...اقول واخيرا اتفاجئ اليوم الثالث عندنا !
روعة حطت يدها تحت خدها : انا لو مكانك اطردهم وامسح فيهم الارض والعجوز صفصف نعم خير زوجك مسجل الشقة باسمها كل يوم والثاني بوجهك !
والا مسمار جحا في بيتكم وجايه تتفقده!
وطيب عريس الغفله وين موقعه من الجملة !
رونق رفعت رأسها بملل: منصوب عليه بسالفة المحبه ويبغون يطمئنون عليه !
امي تقول لي اخرتهم يملون !
وزوجها الموقر يقولي مع انك ما تستحقين النصيحة بس علشان امك رح انصحك لا تخسري جراح بتهورك وأهله فترة ويملون لما يشوفون استقبالك الحلو ولما يعرفوا خلاص خطتهم فشلت !
وانا طبقت كلامه واستقبلهم اممم استقبلهم عادي بصراحة ما قدرت انافق واجامل ....جراح متضايق حتى لو ما تكلم احس بضيقه تخيلي زياد الأسبوع الجاي زواجه وما اعطوه خبر ولا عزموه ..وامه مقاطعيته
روعة عفست ملامحها : بصراحة غريبين ...مقاطعينه للحين !!
رونق بضيق : انا ما احب اكون عثرة بينه وبين اهله ...ما أحب تكون هالقطاعة بسببي ....حتى أمه ما هي راضيه عليه ورابطه هالرضى بطلاقي !
وبغصه نطقت والدموع محبوسه بعيونها :روعة انا مو سيئة لذيك الدرجة انا مريت بأيام عصيبة خلتني اكره كل شيء ....انا مو صايعه بالعكس حافظت على نفسي ليه مصرين يشوهون سمعتي ؟!
انا ما عملت لهم شيء يستحق هالمعاملة الي يعاملوني فيها !
الي يخليني اسلك بعض الامور هو جراح لأني ما ابغى اخسره لأنه يختلف عنهم الف درجة !
اضحي من اجل المحبة الي بيننا !
واجه الكل واصر على الزواج فيني وانا لازم اتحمل كل شيء حتى يستمر هالزواج !
لازم نضحي ببعض الأمور حتى تستمر الحياة !
روعة ردت بضيق لحال صديقتها : رح تفرج وتعيشين بسعادة
رونق مطت شفتها بسخريه: بسعادة وأمه على قيد الحياة؟!
الحين صفية ناشبه له حتى نسكن عند جدتي ام ناصر المكان واسع
روعه : وافقتم؟!
هزت رأسها بالنفي : جراح ما هو راضي !
روعه مطت شفتها : وش هذه الجدة !،
وإذا وافق
رونق ردت برفض: اكيد لاااا
بس ابوي يقولي لا تعاندين تخربين بيتك علشان مكان سكن !
روعة : ابوك يعطي نصائح وهو مطلق
قاطعتها رونق : صدقيني بعد التجربة نسبة كبيره من الطلاق راجعة لتدخلات الاهل بالزوجين !،
روعة بتأييد : صادقة !
الا ما قلتي لي وين صفصف عنكم البارحة طالعين ومنزله صورك مع شارل !
ضحكت رونق : هذه سالفه ثانية صرنا انا وجراح نطلع بعد ما تنام سالفتها مطوله !،
روعة ابتسمت بغمزه: دخيل عصافير
قاطعتها رونق :دخيلك ما هو ناقصنا عذال !
روعة ابتسمت : شفتي وحده معلقه لك « جوكر ومتزوجه هالمزيون»،
رونق ضحكت: شفته متأكده انها وحده من اهل جراح
روعه رفعت حاجب: وش عرفك ؟!
رونق بابتسامه: واضحة لاني بالصورة انا متغطيه وما هو ظاهر الا الجانب الايمن يعني اغلب الصورة لجراح وأنا جزء مني طالع ومتغطيه فكيف عرفت اني جوكر ؟!
روعة بملامح رايقه : يا اختي الناس بس تبغى تلقلق اهم شيء زوجك وابنتك ودراستك
اذكر قلتي انه جراح قالك لا تنزلين صوركم
قاطعتها : بس هذه الصورة كلها له وانا مثل ما شفتي ما هي واضحة.
**
**
**
زياد تنهد وهو مشبك اصابع يدينه ببعض ..وبنبره فيها ضيق : يعني انا المبسوط وانا اشوف اخوي كذا بعيد عني وما في تواصل !
لكن ما في حل غير كذا يمكن يصحى
قاطعه راكان بقهر من انتصار رونق عليهم :ما ظنيت يصحى..تذكر لما قلت خليه يتزوجها شهر ونخلص منها مجرد نزوة والحين كم صار لهم متزوجين ؟!
تكلم؟!،
وملتصق فيها وباعنا بالرخص !،
انت مستوعب _ وبنبرة اعلى _،مستوعب انه جراح يفضل هالقروية علينا!،
جراح الي عمره ما نزل كلمتنا للارض الحين
قاطعته ام راكان وقلبها موجوع : صدقني ما هو بوعيه انا اقول مسحور
زياد عقد حواجبه: لزوم نتحرك بس من وين البداية ؟!
راكان عبس بملامحه قهر : انا اعرف كيف اتصرف !،
وقف وهو ناوي على شيء في باله !
غادر وهو مطنش تساؤل زياد وامه عن الي يفكر فيه !،
*
**
•*
جواد ابتسم بهدوء وهو يناظرها : وبعدين!،
رفعت حاجب بتذكر: ما صار شيء طلعنا من المطعم بسرعة ولا كأنه صار شيء !
تنهد وهو بداخله عدم راحه وهو يشوف بناته ما هم مرتاحين بالزواج !
وحده مشاكل مع بيت حماها والثانية
قاطعت افكاره وهي تتكلم : تدري البارحة ضاع وقتي وانا اتابع فيديوهات لك على النت قبل ما اطلع لذي الدنيا !،
مط شفته لما حس كلمتها ملغومه : وش رايك فيهم !
تابعت كلامها بسخرية : بصراحة لما شفتهم تعلمت درس كبير لا تصدق كل ما تسمع لانه لكل بيت اسرار الي يشوف كلامك يقول واوووووو حياته جنة مع زوجته !
رفع عيونه للسقف وهو يردد : لا حول ولا قوة الا بالله !،الحين ترجع لنفس السالفة !
ابتسمت بروقان : ما رح ارجع لنفس السالفة المهم بصراحة ما شاء الله كنت جميل !
ابتسم : يعني الحين صرت شين !
ناظرته وهي تتأمله وبعض شعرات بيض بلحيته الخفيفة .وشعره فيه القليل من الشيب : يمكن لما كنت تتصور تضع فلتر وتضبط امورك وتطلع ،وسيم !
فتح عيونه باستنكار: يعني الحين انا مب حلو يا جوكر !
احلى من جراحووووو
هزت كتوفها بابتسامة جميله: انا اقول رايي
مط شفته : والله!
هاتي مثال لشخص جميل من محارمك خلينا نشوف ذوقك؟
ردت بتفكير : امممم نايف حلو
عقد حواجبه وما عجبه كلامها: والله؟!،
ومين بعد ؟!
تكلمت بابتسامة : بصراحة فياض ما شاء الله جميل وشخصية وهيبة تحسه
سكتت لما حست بشيء بنص جبهتها وبنبره غاضبه: انكتمي
مسحت مكان الضربه بألم : ليه ضربتني!
وليه زعلت !
انت الي سالت !
والا غيران!
زفر بضيق وناظرها: ماكره !
الحين فياض احلى مني، ورجوله وهيبة ليه شايفيتني
قاطعته بضحكة: والله ما قصدت انا جاوبت بمصداقية
رد بقهر استفزته بقوة : ذوقك*****
ناظرته باستنكار : زعلت؟
تنهد ورد بهدوء : ما أزعل من قلبي
خزته : دوبك هفيتني والحين قلبك !
عدل جلسته : الحين خلينا من سوالفك البايخة ما صار شيء بينك وبين بيت عمك ؟!
هزت حواجبها بالرفض : ناس ما يبغوني ليه افرض نفسي عليهم ؟!
زفر بضيق : وجراح ما تصالح معهم البارحة
ناظرته بلامبالاه:- ما تصالح هم رافضين الصلح
ما يهموني دامني سعيده انا وجراح ..وهم رافضين الصلح ما هو جراح
اص
سكتت وهي تشوف مريم داخله ...وقفت بتردد لما شافت رونق وبعدها تقدمت سلمت على ابوها و جلست !،
رفعت رونق حاجب واعطت ابوها نظرة بمعنى شفت !
جواد زاد ضيقته وهو يحس نفسه مكبل ما هو قادر يعمل شيء وهو يعرف انه راكان مانع مريم عن رونق !
جواد ناظر مريم: للحين زوجك مانزل الحطب الي في رأسه !
مريم مخنوقة من العيشة وبقهر نطقت : ما نزل !
من لما طلعت لنا قلبت حياتي !،
ليتها ما رجعت
قاطعها جواد بغضب : مريم
رونق ببرود ظاهري : اتركها تقول كل الي تبغاه ..وخلي حضرة راكان ينفعها !
بحياتي ماشفت إنسانه ممسحة مثلك !
عديمة شخصية راكان يتحكم بتصرفاتك وانت مثل الروبوت ما لك راي !
مريم بشراسه: ما يخصك
رونق بسخريه : ما شاء الله عليك كلهم يتحكمون بحياتك !
ترى كل اخبارك عندي ام راكان قالت لك ممنوع
مريم بشراسه: ما يخصك روحي شوفي نفسك يا ساحرة
ترى الكل يتكلم ا نك ساحرة جراح
جواد نرفزه كلام مريم: وقص يقص لسانك تتكلمي على اختك كذا
قاطعته رونق بابتسامة باهته: خليها تقول الي تبغى هذا من قهركم تقولون كذا !
اكيد سحرته بجمالي وجمال اخلاقي
جواد بغضب ناظر مريم : مين يقول عن رونق الكلام الحين ابغى اعرف
مريم بارتباك ردت : ما احد تكلم انا قلت كذا حتى استفزها
قاطعها بغضب: تقولين عن اختك هالكلام حتى تستفزيها !
تراها اختك تعرفين وش يعني اخت !
ناظريها شوفي كم نسبة الشبه بينكم وبالمقابل كم قلوبكم بعيده عن بعض !
تتكلمين عن اختك وكأنها عدو لك
قاطعته مريم بحرقه: لأنها اكبر عدوة لي ترى كلامها وصل لي تتشمت فيني لما الحمل نزل
رونق بهدوء: انا ما تشمتت فيك
مريم باندفاع: عبود ما يكذب!
رونق مطت شفتها بسخرية : مو مجبورة ابرر لك لكن أنا قلتها و للحين اقولها انا قلت احسن ما تبغى نسل من هالخبيث
قاطعتها مريم باندفاع: حدك راكان ما اسمح
رونق ضحكت من قلبها وهي تردد: صدق ما تسمحين لي!،
جواد اعطاهم نظرات نارية وبغضب: دام علاقتكم كذا مع بعض ما ابغى اشوفكم متى ما صرتو مثل الاخوان وقتها تعالوا
مريم بتبرير: يبه لا تحملني فوق طاقتي لانها ما تنطاق هالبنت !
رونق لمعت عيونها بالحزن غصب عنها ..نطقت وهي تظهر عدم المبالاة :قولي بصريح العبارة السيد راكان مانعك وانتهت السالفة
مريم بتأكيد: بالضبط زوجي ما يبغاني اختلط فيك وما رح افرط براكان وازعله علشانك!
جواد زفر بقهر من راكان وتسلطه حرك شفته يتكلم
قاطعته رونق وهي تبتسم بألم : خلينا كذا افضل عشت حياتي بدونها وما رح توقف الدنيا عليها !
وقفت وهي مستمره بالكلام : بالاذن انا تأخرت!
تحركت خطوة على دخول الجازي وهي تقفل الجوال ...ناظرتها الجازي بهدوءوما علقت !
جواد تنهد وبهدوء نطق: اجلسي رونق اتصلي بجراح وانا ارجعك بعد ما تسهري معنا
هزت رأسها بهدوء: خليها مرة ثانية بالاذن
استأذنت وطلعت من المكان وهي تحس صدرها ضائق .... لمحت جدتها وهي طالعه من المطبخ لما شافتها رجعت مباشرة تعمل نفسها ما شافتها!
مطت شفتها بسخرية وحزن يكمن بداخلها تنقهر من النظرات الدونية من الي حولها وكأنها فعلا بنت أخلاقها بالحضيض ...تكره زياد فضحها عند جدها و اعمامها وجدها اكيد خبر جدتها وجدتها وش يضمن لها انها ما تكلمت !
حتى لو ما تكلمت ...نظرات الي من حولها وكأنها خاطفه جراح او زواجهم حرام وما يجوز وإنها بنت قليلة التربية لانها ملكت عليه بدون علم احد وطلعت معه لزيارة ام مرعي !
حتى. ابوها تحسه يحاول يظهر انه طبيعي وإنه نسي سالفة زياد لكن بالحقيقة ما نسيها واكبر دليل اتصالاته الدائمة والسؤال عن مكان تواجدها !،
يمكن سكوته ما يبغى فضائح !
رفعت نظرها بعد ما طلعت البوابة الخارجية وزفرت بضيق وهي تهمس: حسبي الله ونعم الوكيل !
وقت الغروب المشي فيه ينمو بداخلها مشاعر واحاسيس غير !
رح ترجع على اقدامها ما لها مزاج تشوف احد او تكلمه!
قاطعها رنين الجوال ومرة ومرتين وثلاث ...وقفت ورفعت الجوال ..عقدت حواجبها لما شافت اسم فياض....ردت بهدوء: الو
بدون مقدمات:وينك؟!-
هبط قلبها خافت على قدر: وش صاير؟!،
رد بضحكه قصيرة: علامك خفتي كذا بس طالعين وجراح يقول انك عند اهلك
قاطعته بهدوء: ما ابغى اطلع
قاطعها: جراح يقول عنده مشوار وقدر رافضه تطلع بدونك
كتمت ضيقها قدر نقطة ضعفها...نطقت باستسلام: انا بالشارع الرئيسي طلعت من بيت ابوي صرت عند شجرة
قاطعها: خليك مكانك الحين جايك !!،
قفلت الخط ووقفت تنتظره على جنب الطريق،وهي تفكر جراح ما خبرها إنه خارج!
بالرغم من علاقتهم الحلوة والراحة الي تشعره بوجود جراح الا انه تحسه غامض في امور عقلها ما يستوعبها وما يقتنع فيها واهم هذه الامور حبه وعشقه لها يختارها على اهله ؟!
اي حب هذا الي يكون من نظرة عيون!
شاف عيونه وسقط عاشق متيم بحبها ؟!
هذا الشيء لا تصدقه كيف حبها من عيونها؟!!
وفوق هذا شايفها ملكة جمال مع انها تشوف نفسها عادية عنده مبالغه في هذا الامر ! تفكر بهذه السالفه بس ما لقت جواب لها!
يكذب إخوانه ويصدقها ؟!،
ابوها وجدها صدقوا زياد وكذبوها وهو بكل بساطه يصدقها !
الهدوء الي يغلفه وان عصب لحظات ويروق بسرعة !
ما في شيء يدل على نقصان عقل فيه !،
انسان طبيعي لكن الغموض إلي فيه ما تقدر تفهمه !
ليه اختارها هي من بين كل البنات؟
تحس فيه حلقه ناقصه بالموضوع ...زفرت بضيق واتصلت على رقمه !
اعطاها مشغول ...زمت شفتها بضجروناظرت خلفها وهي تسمع صوت يطرب مسامعها : سلام للحلوين !
ناظر سيارة فياض وجراح جالس جنبه وابتسامته العريضه تزين ثغره !
تقدمت بابتسامة وسعادة ولا كأنها دوبها كانت متضايقة وقفت عند الشباك وخزته: عندك مشوار؟!
توسعت ابتسامته: احلى مفاجأة
قاطعه فياض بضجر: ممكن يا سندريلا تركبين ؟
واقفين بالشارع!

*
**
**
**
يتبع