حكاوي بالعامية

اسكربت ١٦

أسوأ اللحظات اللي ممكن البنت تعيشها لما تكتشف إنها كانت عايشة في ضلال بسبب أقرب الناس لها، بسبب أمها اللي لو المفروض الناس كلها حاولت تأذيني أمي هي الوحيدة اللي تكون هي حمايتي وسندي ومتخليش حد يقدر يمسني بسوء!

أنا وماما أصحاب أو مش أصحاب لأ احنا شكلنا من برا نبان إننا أصحاب لكن من جوايا عمري ما حسيت إنها قريبة مني، صحيح كنت بحب أحكي لها عن همومي ومشاكلي واهتماماتي لكن كتير كنت بستغرب ردودها ونصايحها وبحس دائمًا إن فيه حاجة غلط!

كنت في الكلية في سنة تانية، لما حصل لي موقف كان أول مرة يحصل معايا، أحمد زميلي جالي وقال لي إنه بيحبني، استغربت الموقف معرفتش المفروض أقول له إيه! كل اللي فكرت فيه وقتها إني روحت حكيت لماما، لاقيتها فرحانة ومبسوطة وطلبت مني إنها تقابل أحمد، أنا استغربت من رد فعلها بس نفذت طلبها ولما أحمد جه يكلمني تاني قولت له ماما عايزة تقابلك وتتكلم معاك، وقد كان وماما كانت مبسوطة جدًا بأحمد وفضلت تشكر لي وتقول عنه شاب ممتاز وطموح وكويس ودماغه حلوة وتفكيره مُتحضر، معرفش ليه كنت مش عارفة اتقبل الموضوع كله كفكرة على بعضها، بابا كان مسافر مكنتش عارفة استشير مين!

كل يوم كان بيفوت كنت بحس إني بقرب أكتر من أحمد أو حاسة إنه بيجذبني أكتر لشخصيته، منكرش إني بدأت أكون معجبة بيه، وبقى يشغلني وألاقي نفسي بفكر فيه وفي كلامه، مرة كنت قاعدة لاقيت تليفوني بيرن رقم غريب لما رديت لاقيته أحمد!

جبت رقمي منين؟

هو ده اللي ازيك اخبارك ايه؟

ازيك اخبارك ايه جبت رقمي منين؟

جبته من مامتك يا إسراء! في إيه؟ على فكرة احنا مش بنعمل حاجة غلط!

انا عارفة إننا مش بنعمل حاجة غلط بس مكنش له لزوم تاخد الرقم يعني احنا بنشوف بعض في الكلية مش محتاجين نتكلم كمان في التليفون!

لأ محتاجين يا إسراء عشان نتعرف على بعض أكتر وبعدين إنتِ مكبرة الموضوع ليه؟ ماما عارفة إننا بنتكلم وبنقابل بعض فين المشكلة ؟

مش عارفة، بس فيه حاجة غلط!

حاجة إيه؟

لو كنت أعرف كنت هقول لك، وكنت ارتاحت لكن مش عارفة!

طب سيبك من الكلام ده وقولي لي بقى اخبارك ايه؟ وحشتيني على فكرة

أنا كويسة إنتَ أخبارك ايه؟

بقولك وحشتيني يا إسراء!

أحمد معلش ممكن اقفل دلوقت عشان مشغولة جدًا، سلام.

..

كنت مضايقة بس مش فاهمة ليه! لاقيت نفسي واقفة قدام ماما وبسألها بمنتهى الغيظ..

ماما ليه خليتي أحمد ياخد رقمي ويكلمني؟

طب وفيها إيه؟