لـُو صابر أنَت عليَّ... صـدگني أعوضك عُمر...
بـَس أنَت هيچ رحــت ما فكرت تنتظر..!!
....أنَـس#
________
يمكن أسوء شي يمُر علية هـو أنو أدخل السجن! بـس شگلة القادم بعدة أسوء مـِن الأسوء! وكُلها بسبب منو! بسبب حظي! كـعدت مقابل تمامًا لضابط تحقيق... ادياناتي مگلبجة وكاعدة على كُرسي بارد! والغرفة دأحسها ثلاجة! من البرودة! وجسمي كُلة مـگزبر من الخوف ! انطاني الأوراق وهـو يأشر بعيونة عليهم،، چر هويتي ليكـول....
- كـدامج فرصتين يا ست أنـَس، تخلصين من تحقيق وهاي الغرفة وچايات ...
حسيّت بكلامة نبرة تهديد ! - شـ شقصدك ؟ همست أسال ،
- الفرصتين هنة ياما تعترفين ! وياما تعترفين ! بعـد ماكو أسهل من هيج كلأم! والتهمة راكـبتچ راكبتچ، ماكو مهرب منها ..
من الصدمة والخـوف رجفت شفتي السفُلئ بصعوبة كـدرت احجي" بس! بس سيدي انـي أشتغل هناك والله وماعرف شيءٍ عن كلامك ودتحجي بي! آني وحدة انظف بالبيت وبأجور شهرية !"
قاطعني...!
- اعرف كلشي ونعرف انتِي تشتغلين وياج وحدة ثانية هم! وانتن مقسامات الشغل بين يوم ويوم! وأحنا صارلنا اكثر من شهر مراقبين المكان ومكان بيتج وين ترحين وين تجين! بس معقولة إنسانة مثلج ماتعرف وين تشتغل! لـو انطوچ كم فلس وانصُم لسانج؟
هـزيت راسي بـ لا واني أرد" والله العظيم وونبي! اني ماعرف حتى شنو شغلهم اني العلية بس انظف البيت وأطلع! صدكني آني مظلومة ويتيمة !
ضحك ليكـول ..
- ابجي آي ابجي بعد كُلجن اكحاب وتموتن على الفلس وتنطن روحچن علمود دينار! ومن تصير صدك الشغلة ! انـي يتيمة ومظلومة! باعي لچ! كـدامج إقل من يوم وأحد فقط وهذا التوقيع يتوقع علية تمامًا ، وراح تشرف صديقتج الثانية عن قريب وبكل الحالتين الجريمة راكبتج راكبتج.....
مكـدرت أرد علية وهـو يشمر الأوراق على طبلة ويصيح احـد يطلعني من غرفة تحقيق السجن! فتح بابَ السجن ليفتح ادياناتي من الكلبجة.. شامرني داخلة الزنانة! قفل الباب ورأح وعيوني تتجول على المكُان فارغ وبي دوشـك ... گعدت بالكاع وانـي أحَس بدموعي تنزل ... ليش هيج ماعندي حظ انـي إنوب وين ماروح سودة مصخمة... زين سجئ بس لا يلزموها! عزا بعيني أمها تموت والله... ياربي دخيلك شورطت روحي انــي،!
وكـفت كدام البيت تشتغل بية وهـي عيونها العسلية تُراقب المكان بخوف وتـوتر... ذولة منو وليش الشرطة تارسة المكان! والسؤال الاهم وين انس!
معقولة اخـذوها لآن صارلها اكثرمن ساعتين متأخرة على الشقة... هسة وين تروح! وين تنطي وجههاً ! اخـر شي قررت تسال احـد جان واكف علىٰ شارع يتابع المنظر.... تقدمت منة لتسألة...
سجئ.. مرحبًا عمو ، بلا زحمة بـَس ذولة الجيش والشرطة شسيون هنانة؟
- والله يابنتي يكولون اكـو عصابة هنآ للمخدرات والحبوب! ولأزميهم كُلهم.. هذا الكـدرت اعرفة..
فتحت عيونها بصدمة ورعب! أنس! معقولة اخذوها بَس لا تعترف علية او سرة جاي ألي! بـس ذولة منين ياربي ستـرك ... شكرت الحجي وراحت ركض برعب وهي ترجع للبيت... وفكرها كله يم انس معقولة اخذوها لو شسوة وبيها زين يجوز اخذو بس ذولة اهل المخدرات ... وصلت لشقة لتشوف بعيونها أخوها صغير...آحمد جاي ركـض بتجاهة ..
- خير احمد ؟!
لزمها من أيدها وهـو يركض بيها لمكان بعيد عن شقة... " لج اجوي شرطة عليج! ولازمين انس وامي دزني بسكوت منهم حتى اطفرج ومترحين لسجن'!
شهكت لتـرد بقهر...
- زين انس وينه هسة بسجن!! واني وين أروح امي شكالت الك!!
هز راسة ليرد بطفولية..." هآج هاي خمسة وامـي تكول خلي تروح لـ علي وتكله على انـس! واني بعدين اتصل بيج هيج كالتلي هيَ '"
اخـذت الخمسة وبآستة لأخوها وراحـت گبل لبيت علي... همزين انس قبل فترة دلتها بي وانطتها رقمة ... وهسة هي شورطها وراح تروح لهذا زاحف... الادبسزز ما تنسى سوالفة ابداً ويوميا هـو يمهم بحجه اطمئن على انس اننن واحد جذاب.... ما تنسى نظراتـة الها وعيونة تجـدح وهو يباوعلها... بس مضطرة تروحله.... تنهدت وهي توقف تاكسي بمكان قريب على بيتهم ... نزلت لتطلع فونها متصلة بي... وهـي تشد بعبايتها بقهر وخـوف...ثواني وهـو يرد بنبرة بصوتة المنعسة...
علي ... الوو ..
بلعت ريقها بتوتر وهي تسمع صـوتة.. شـدت على العباية أكثر ...
رجع كرر سؤالة...
_ الو منو؟
مكـدرت تحجي بس ركـرز زين بأنفاسها وعرفها هي تماماً كعد نومتة ليشوف الرقم ويرجع يحطة على إذنة!" الو سجى! هـاي انتي؟"
لتـرد هَي ناطقة مرة وحـدة" علي هاي انـي سجى اتـرجاك ساعدني ماعندي غيرك! الشرطة وراية وأنـَس وأنَـس لزومها وخلوها بالسجن وعليها تهمة مخدرآت وآني هسة واكـفة باب بيتـگم "
كـانوا هي حجت دفعة واحـدة! فـ تماما شلتة عقلة بكمية الأخبار صادمة...
بعد ما استعاد وعية طلب منها انو تنتظر وهـو جايها ركـض... قفلتة للفون وانتظرتة شي اقل من خمس دقايق وهـو يمها.... وبطريقة أخذها وياه لمخُلد حتئ يبلغة ويعرفون يتصرفون......
ليلاً ... بغداد " مركز الشرطة "
انَس ... منتظرة مصيري وشـوكت احد يسال بية.. بس محد لهسة اجة وهمة كـل دقيقة يجوني ويباوعون علية ويرحون عبالك انـي داعشية! والاهم من هذا... نظرآت واحـد شرطي منهم إلي ما ارتاحيت الها ابداً... بين فترة وفترة يجي يسأل إذًا محتاجة شيءٍ أو تردين مساعدة! صراحةً عرفت هاي القضية... وعرفت هـُو ليش يريد يساعدني... حتى اگلهم ماَ اكدرت اكـلة... اخاف هواي منهم... خصوصاً ضباط يخوفون كُلش... گمت من مكاني ركُض وانـي اسمع صـوتة لهذا الخبل! مخُلد لزمتها لحديد بيدي وانـي اباوع ... رجف گلبي بقوة وانـي اشوفهم يفتحون الباب ويدخل منه مخُلد ورا علي.... صرخت بقهر وفرحة" مخُلد!!"
اجاني ركـض وهـو يلزم أديناتي من فوك القبضان..." أنس انتي بخير؟ بيج شي؟ سولچ شي؟ ها كوليلي؟؟" هـزيت رأسي بـ لا واني ارد " مخُلد خايفة هواي! يكولولي عليج تهمة مال مخدرات وما طلعين منها مخُلد والله العظيم ماعرف شي أني اني؟!"
قاطعني وأيدة تعصر أيدي بقوة..
- اطلعج منا لـو على گصة رگبتي وهذآ شاربي مو علية إذاً ما اطلعج انس لا تخافين تمام؟؟
- بس مخُلد علية تهمة وهمة عبالهم اني وياهم ذولة الانظف بيتهم اني وسجى !
رد علية بصوتة الخشن" كـتلج لا تخافين راح اطلعج منا وانـي اعرف أتصرف وهسة راح افهم سالفة اكثر واجي ماشي ! علي ابقة يمها .. وهسة جايكم ...
ابتسم إلي رديت الة الابتسامة.. وانـي اشوفة يفتحون الة الباب... وعلي هم طلعوا ما قبلوا يبقونة... بس شراح يسـون... تنهدت براحة واني ارجع لمكاني... احـس براحة بعد لان مخُلد أدخل ... دائماً وجودة وياية يخليني ماخاف ابداً.. وكـانوا هـو درع الحامي إلي... هذا المخُلد نعمة من ربي... تستحق الشكُر هواية.... شي نص ساعة او أكثـر رجع الفتح الباب كمت من مكاني وانـي اشوفهم دخلوأ.... " ها بشرو شنو صار؟"
رد علي بهدوء عكـس مخُلد وعيونة تحولت لنار.." الله كريم انس تطلعين بـس يحتاج يوم لو اكثر، لان ذولة ضباط فد عگرة وحقنة"
ابتسمت براحة" يعني والله راح اطلع منا علي! زين شلون؟" رجعت عيوني لمخُلد وهـو يكول بجمود... " اولاً ما عليج تهمة ولا عليج دليل حتى غير بس مجرد تنظفين بالبيت وهمة جانوا يراقبون بيج ليتأكدون من افعالچ وانتي وياهم لو لا ! هذا العرفتة من ضابط تحقيق بـسَ حالياً ما عليج تهمة وما لكـو عليج شي لا تخافين راح تطلعين ! بس كم يوم ونطلعج " أبتسمت بـراحة واني احـس بهم وانزاح من كلبي الحمدلله ياربي الحمدلله "زين وشغلي؟" سألت ... ليرد مخُلد بغضب...
- مـِن خرا بشغلج ! أول ما طلعين منا تبطلين فاهمة لو ابطلج بطريقتي الخاصة فاهمة!!"
عقدت حاجبي واني ارد بقهر" عفواً استاذ مخُلد! شدخلك بشغلي وشدخلك بية حتى !" قاطعني وأيدة تضرب على قضبان السجن" الي دخل فاهمة!! مدأم انتي بنية وحدج وتفترين وحدج هم وعايشة بشقة وجايبة ناس مدري منين تعيش وياج فـ انتي حتى عقل ماعندج وتفكيرج خرا فاهمة!!وبعدين اول ما طلعين منا راح اعقد علـيچ واخليج تحت جناحي واريد بنت أبوها تفگر تكسر كلامي وتسوي شي براسها!"
فتحت عيوني بصدمة وانـي جسمي يرجف بغضب من كلامة إنوب يريد يعقد علية حتى اعيش ذليلة يمة!!" باع مخُلد انطيتك اكثر من حقك! حياتي واني حـُرة بيها فاهم! لا تدخل بية بعدين شنو اعقد عليج! ها شنو اني هنا عبدة الك وانت تتحكم بية!!"
مخُلد بجمود.. بسببج وبسبب جذبج باع وين وصلتي ، يومياً مكان وشاردة من واحد وناس تركض وراج وفـوك هذا كلة دخلتي سجن ! بسببج وبسبب جذبج راح ازوجج واخليچ يمي ولا عبالج انـي ميت عليج واريدج لا بس اريد اكسرلج ظهرج واخليچ توبين من سؤالفج هاي!!
قاطعتة وانـي اصرخ بجنون... وغُضب..
- ايبااة ،.. علىٰ أساس انت جنت مصدك وانـي جذبت استاذ مخُلد! باع جذب يربي ! بعدين شنو تكسر ظهري!! انت شدخلك بية !!!
رجعت للورأ بخوف وهـو يضرب الحديد بيدة بقوة" لج اخ لو الـزمچ الا اخليچ تتوسلين بس علمود أتـركج بس حسابج عسير انس وربچ راح تشوفين وجه ثاني !
بلعت ريقي وانـي أرد بتوتر" انت مالك دخل بية وماتكدر تجبرني حتى على زواج!! شنو ابن عمي لو من اقـربائي حتىٰ تحجي وياية هالشكل"
اقترب مني وعيونة ظلام ليهمس " جربي وشوفي ولا مراح اخليچ تجربين، رأح تشـُوفين بعيونج ذنـي، ولو بيدي حتى انهي عليچ وروح امي وروح امي ماحلف بيها جذب راح تكونين باجر على ذمتي وراح تشوفين كلمة مخلد"
ردت بقهر من كلامة الحادة وياها....
- وأحد خبل!
- حيوانة!
-ادبسزز!!
- غبية! وحدة المطي متمددة بعقلج ! ولو يجي ربچ ما راح تعرفين شنو مصلحتج!!
- انت شدخلك بية!! عوفني بحالي واحد سوالفة مكسرة ابو نسوان ويجي علية يتأمر !!
مكدرت اكمل كلامي وانـي اشوفة يضرب باب السجن بقسوة وهـو يكفر !
رجعت للورا بخوف وقهر... ليحجي علي بسرعة....
علي... انـي اكول لـو افتح السجن الكم واخليكم هنا تتكافشون ! والسبع يطلع دم والسبع يطلع دم!! انتوو صدكُ دتحجون أحنا بيا حال ! وانتـو تتعاركوون! كافي مخُلد! واطلع واني راح اجي وراك!! وانتِي اسكتي انس رحمة لاهلج وخرب عمج!!!
بلعت ريقي بتوتر وخوف ورهبة من كلامة! ماعرف ليش احَس هذا تهديد!
حقيقي وراح يصير اعرفة لمخُلد لو يخلي شي براسة ينفذة... شفتة طلع وهـو عيونة علية بشـّر ... هزلي راسة بحركة إني الچ! وراح هذا ديحجي صدوك! هسه جان خايف علية ومبي شي...درت وجهي لـ علي وهو يسولف...
- كلامة صحيح انس! انت بنية ودنيا ما الها إمان ابداً يعني انـي وية مخُلد بكل حرف گالة بزواجج منة... ولو تعرفين ليش گال هيج وعصب !
عقدت حاجبي متسالة" خير شنو صار؟" زفـر أنفاسة ليرد " والله ماعرف شكـُول بس بمكانج هنا غلط انس، ومخُلد سمع شي وخلأة يتخبل وبالكـوة جريتة لهنا من دون خسائر يعني اجت تصير مجرزة! واحـد منهم من شرطة جان يحجي بصيغة محلوة بحقچ وعبالك يريد يتحرش بيچ سمعناة! ولو ما لزمت مخُلد جان موتة ! وإنوب گلهم هاي مرتي وشرفي انـي!
وانـوب بالكوة شاف ضابط وقنعة يطلعج وهو شرط علية فلوس! فـ انطاة مليون بـس علمود تطلعين منا والباقي من تطلعين هذا الفهمتة والله"
تنهدت بقهر وانـي احسَ بروحي تعتصر بألم فـوك هذا القهر والضيم ! انـوب منا مخُلد ومنا العالم بجفه ماعرف ليش اني حظي هيج ! ويمكن اني غلطانة دأ الوم حظي بس فكرياً انـي وحدة ما اعرف اتصرف... راح علي وانـي كعدت ساكتة بمكاني بخوف... واحـس بدموعي تنزل شهكت بخفة .. وانـي ابجي... ليش هيج ربي دومي هيج وماعندي حظ.....! اخ ياربي...
___
ركـض ورأ علي وهـو يشوفة يدخل بسيارتة قافل الباب بحٌدة وقسوة... فتح الباب ليكعد بصفة وعيونة تشـوفة شلون يدخن... بگل قهر ... جِر من باكيتة جكارة ليذخن علي وعيونة تماماً على مـركز الشرطة... أكثر من شي نص ساعة كاعدين والهدوء سيد المكان كـان ، علي ونظراتة لمخُلد وهـو يدخن وحدة ورا وحدة ويجُرهم بقهر... لثواني معدودة وهُو يحجي بصوتة الخشن... " ماكدر اتركها علي ، وخصوصاً بعد سمعتة من هذاك الساقط"
علي- انـي اكـول انت سويت العليك واكثر مخُلد وباجر تطلع هي ونجي عليها الصبح نطلعها! كعدتنا هنا ماكو داعي...
نفخ دخآن جكارتة دأخل السيارة ليـرد بعد ثواني طويلة" ماكـدر علي ! هالبنية يتيمة وماعندها احـد غيري، احّسها مثل امـي، من جانت قبل يتيمة وماعندها احـد تسند ظهرها عليه ، وبييتها لآ تنسئ أمنتها عندي، قبل لا تموت.. واني ماكدر اتـرك الأمانة اعرف ساقط أني ونسونجي وكُلشي حرام اسوي! بَس هالبنية داحسها مسؤوليتي ، وحتـى لو ترفض باجر لو عگبة أخذها غصباً ما على خشمها اليابس،اريـد أشوف بطولتها وين تصفى بعد"
عيـونة لـ علي ضيقها بشـگ من اهتمامة بيها! زفر انفاسة مخُلد ليرد " ماكو شيء من بالك علي لا تظل تباوعلي مثل النسوأن من يلزمن سالفة"
علي بضحكة.. وصلي الجواب الأريدة، هسة أني حروح واشـوف سجى خطية تركتها بشقتك خلي ارجعها لبيتها... توصلني لو اأخذ تاكسي،
هـز راسة وهـو يشمر جكارة ، ويشخط سيارة ويـطلع كبل لشقتة... رغم گلبة وروحة ظلن بسجن بـس هو حالياً مجبور يتركها وحدها حتى تفكر بكلامة وتصرفاتها الغلط... وصل علي لشقتة ونـزل علي يركض صعد لشقة وحدة فاتـح الباب وهـو يحجي" احم سجئ وينج !"
ثواني وطلعت من الصالة بثوبها القصير الأحمر وشال جانت لابستة وتاركته علىٰ أكتافها ، اقترب منها وهـو يعض شفتة ، " ما كتيلي الكـيك ليش هيج اسمر صاير انـوب يمشي على كـاع!"
توترت من نظراتة لترجع للورأ بخفه " علي عيب عليك أحنا بيا حـال وأحنا جيران نعتبُر وامي وصتك بية! عفية لا تحجي هيج!"
علي ... اويلي شلون جيران ينكرطون كـرط! بعدين انـي ما سامع اسمي بهيج جمال! ممكن تعيدي ؟ ...
هذا خبل وزاحف رسمياً! شلون وثقت امي بي! وشلون خلتني يمه... لإحظت نفسها مو بالعباية ركضت على صالة لتجيبها ... لبستها لتشوفة واكف يمها.. وايدة داخل بنطرونة الاسود... ليكول " قبل ما اجي لهنا اتصلت بالولدة وكتلها راح ترجع لشقتكم واجيت اخذچ يلا" سالته بصوتها الناعم" زين وشصار بسالفة انس؟" تنهد حتى ما ياگلها ليرد بهدوء" باجر تطلع ولا تخافين ما عليج شي لا انتـي ولا هي! لآن احنا حلينا القضية يلا خلي نروح قبل ما اسوي شي أندم علية باجر"
عقدةً حاجبها بسـتغراب من جوابة ! وأتكـدت هذا عابر مرحلة بزحف!
بس الاهم من هذا كُلة انو انس راح تطلع وهي ما عليها شي... طلعوا من البيت كـبل على شقتها لأنس... ورجعت بشرةْ امها ..ثاني يوم الصبح طلعت انس من السجن ... طلعها علي ومخُلد مختفي... !
انـس.. الصبح اجة عليه علي وطلعني وما سالت حتى على مخُلد! هذا الغبي يريد يتحكم بيه! والله شنو انتي بنية وحيدة واخاف عليج واحد جذاب! اخذني كبل على بيت وارتاحيت من شفت سجى وامها موجودات وما عليهن شي... مر يوم كامل تقريباً وأحنا كاعدين بسلام وخير وانـي وبعدة كلام مخُلد براسي! يزوجني معقولة! يعني من كل عقلة يريد يسوي هيج! يعني موضوع زواج من مخُلد فكرة مو ببالي حتىٰ... وكلت من المستحيلات هيج يصير بس هذا الخبل ماعندة شي مستحيل،.. لك حتى حبُ ما بيناتنا! وهو هسه جاي يريد يتحكم بكولشي يخصني بحجه اخاف عليج! من كل عقله!!!!! للعصر واني كاعدة منتظرة داحـس بشي غريب واني اباوع على سجى بيدها الفون وتضحك! معقولة علي! لان داحسه يتحرش بيها هواي....! مدري بس هي تكرهه انتبهت علية وهي تضحك " مو البالج انس! ارتاحي!!"
ضحكت وانـي اگل بالتفاحة" لعد مُنو غيرة علي الصاك؟ اعترفي"
تركت الفون واقتربت مني لترد بخجل" بصراحة واحـد تعرفت علية بالسوك قبل اكثر من اشهر وهـو شمرلي رقمة بالعلاكة! وانـي ورا فترة اتصلت بي! وصار بينا كلام وحب ! و " عدلت كعدي واني أسال" اي وشنو صار؟ كملي!"
التفت بعيونها لتشوف امها بالمطبخ جانت ،،رجعت عيونها لتكمل هامسة
" هو صحيح ماعندة وحالتة فقيرة بـس يريد يخطبني! وانـي بصراحة اريد احد يحجي وية وماما حتى يقنعها واني احبة انـس صدكيني أحبة من كل گلبي وماشفت حُب عندة زوجي المرحوم مثل هذاً ! واني اريدج بس تقنعين امي! انـس!"
تنهدت وانـي افكر بـ علي حسيتة معُجب بيها او يحبها بس! للحب حظوظ وقسم واعتقد علي قسمتة مو هاية ... هزيت راسي واني اسال اكـثر" زين شنو اسمة وشنو يشتغل!؟ وشوكت يجي يخطب حتىٰ أقنع خالتي "
ردت بحماس" اسمة سجاد ، ويشتغل بمحل مواد غذائية عامل هناك، واكبر مني بسنتين! وگلي قبل شوي حاجي أمج حتى يجن امي واخواتي يشوفنج! شكلتي انس! راح تحجين وي امي؟؟" ابتسمت لحماسها وانـي اشوف لمعة الحُب بعيونها ... ياسوء حظك ياعلي.... " عوفيها علية وشوية واحجي وي خالتي بس ما اكلها ولا اتعمق بسالفة الحب! تمام!"
- أي بعد احسن خليها لا تعرف شي.. وهالحجي بيناتنا انس عفية...
- ادبسزز اكيد بيناتنا هالكلام وهسة تعاي نساعدها بالعشة حتى احجي وياها...
كـد ما فرحت الها بس ضجت على علي حسيته يحبها... سوينا عشة وتعشينا وغسلت المواعين سجى وجابتلنا جاي بالصالة واحنا نتفرج على مسلسل...
غمزلتي انو احجي فـ اني هزيت راسي بـ اي وهي شفتها طفرت للغرفة... فـ سميت باسم الله وحجيت.... لأمها على موضوع زواج واكو عالم جاية الها... ومن هذا الحجي وهي بصراحة عبالي ترفض بس كالت هلا بيهم.. والبنية اخرتها لرجلها وسجى ما تهنت بزواجها الاول كم شهر يمة وراح التحق بالحشد ومات ... ومن هالحجي... فـ اخذت موافقتها ورحت ابشر سجى.... فرحت هواي وراحت حظنت أمها ... وااني رحت كعدت يمهم وجبنا كرزات وهاي سوالف وكعدنا نسولف ونتفرج مسلسل....
ولليل كُلش يلا سبحت وغسلت أسناني ولبست بجامة قطنية بيضة قصيرة شوية .... وبدي نص ردن ضيق شوي هم ابيض بس بي نقاط أسود...... تركت شعري مفتوح ومشطته طولان شوي،، حاب يطول اكثر....
ونمت تقريبًا كعدت مرعوبة بستة مدري بسبعة الفجر وانـي اسمع فوني يرن.... بصعوبة كدرت افتحه واشوف المتصل علي!!
رديت واني كلبي يرجف بخوف!"( الو علي! صاير شي!")
علي.. انـس وينج! مخُلد انضرب طلقة وحالتة كُلش خطرة واحتمال يموت! يريد يشوفچ تعاي بسرعة!! واكو سيارة جوة راح تجيبج! ولو تلحكين لو لا!!
حسيّت بروحي راح تطلع من مكانها...... وكع الفـون من أيدي وانـي ارجف من الخوف نـزلت اركـُض حافية واني افتح باب شقة وأركض... لجوة
كُلشي ولا مخُلد ياربي لا تاخذة مني اتوسل بيك انـي!!!
__________
يُتبع....
القادم أقوى 😎
وهالرواية بيها جزء ثاني 🌚♥️