وبشر الصابرين

البارت السابع عشر

مرحبااااا ..

///وبشر الصابرين ///

البارت السابع عشر ..

بقلمي Aseel..

......

ما احب الخفيف الما يثبت الراي...☝🏻

ياهي الشافها كال الها احبنها

يعجبني الرزن بحجايه الوفاي

يختار الاصليه وصاح اريدنها.

ليضحك ع البنات ما يهم ابهاي

هذا ملطلط وطلعاته اغمنها....

..........

بعد.نص ساعة ورجع اعصاب ووجهة نار احمر..

شيرين :ها ماما شبيج .. لافين جيبي مي لاخوج خل يبرد دمة  اشوي

لافين :شرب المي الجبتة الة.

شيرين :يمة احجيلي شبيك .. شصار وياك .

محمد: اريد اطلك بعد ماكدر اكمل وياها .

شيرين: لطمت على صدري .... شجاك ولك .. شنو تطلك .

محمد: يمة لعبتها لروحي والله مرة متحترم احد لا جبير ولا صغير

شيرين: ولك شصمخت انتة احجي شسويت .

محمد :شبيج يمة شنو شصخمت حجيت لخالي كلشي ..
وكتلة حتة اختها شاهدة على قلة ادبها ويا امي وصوتها العالي .

شيرين :وشكالك .  خما سوالها شي .

محمد :كلي عوفها يمي اادبها وارجعها .. وابنها تنحرم منة حتة يصيرلها درس .

شيرين: ولك انت شسويت هذا خالك قاسي بهاي السوالف .. مو بعيدة يموتها .

محمد: لعد تتجاوز عليج واسكتلها خوش والله حتة تركبني .

شيرين: اني اسولف لابوك احسن .
رحت للارضي ودكيت رقم بيت اخوية مازن .

دك .. دك ...رد علية ..الو

شيرين :شلونك حبيبي .

مازن: هلة هلة بام سامر ..

شيرين: شوف سامر اني راح اطب كبل بالموضوع ..ماكو داعي انطيك مقدمات بس بداعت عزيز كلبك تسمعني بالاول

مازن: كولي وامري .

شيرين :شوف بداعت عزيز كلبك لا تأذي سوسن .. بنية وغلطت وعرفت غلطها

مازن :انتي شتحجين شيرين .. هاي غلطت على عمتها ورفعت صوتها ..

شيرين :انت مالك شغلة ام وبنتها واكيد اتصير مشاحنات بين الام وبنتها... واني عاذرتها

مازن: بس اني معاذرها. ..يعني بربج لو احد من عيالج سامعها غالطة عليج مجان كالو هاي ممترباية ..

شيرين :محد يدري يا مازن مجان اكو احد. ..وعمتي جانت نايمة متسمع. ..

مازن :واني انتظر يسمعون شيرين البنية غلطت وياريت لو غالطة علية ولا عليج .. خليها يمي تتأدب وارجعها اني ..

شيرين :بس بداعة امي لا تضربها

مازن: حلفتيني بالعزيزة .. انشالله. .. يصير خير .

شيرين: بس اقنع محمد اجيب ابنها خطية طك بجي عليها من جتكم لهسة .

مازن :لااا ماريدة ابد واذا جبتي ارجعة وياكم. خليها تنحرم منة حتة تعرف النعمة الجانت بيها

شيرين :بكيفك بعد هاي بقت يمك انت ابوها وادرى .. بس حلفتك متأذيها .

مازن: هاهية الله كريم لا تشيلين هم ..

شيرين :سديتة منة وانتظرت شاهين يجي حتة اسولفلة ..

وهم مقصر رزل محمد لان تصرف من كيفة وماانتظر ابوه .. وراح لمازن ومازن نفس الحجي ميقبل يرجعها ...

ضلت يم اهلها والطفل يمنا ..

لافين :جان مصطفى يبجي ويدور بالوجوه .. وياهو الي يشيلة يدفن راسة بالحضن ويبجي .. يدور ريحة امه.

طك كلبنا من وراه امي تبجي ويا بجية .. واني ابجي من اشوف شلون طفل مفرفح على امه وابوه قافل ..

كاعدة اسكت بي .. ودك الارضي ..

شايلتة واهز بي حتة يسكت
رديت الوو. منو

ايفان: ولج كلبة شلونج .

لافين :ولج هلووو  حقيرة مشتاقتلج .. وين غايبة .

ايفان :مو انقبلت كلية بالموصل وودكمل المعاملة ..واضطريت اروح هناك علمود هوسة الطريق بشريني انتي وين انقبلتي .

لافين: بغداد انقبلت بس مراح اداوم اجلت هلسنة..

ايفان: ليش ولج حرامات ..

لافين: ابوية ميقبل يخاف علية اداوم وحدي .. ورحت اسوي نقل كالو الة أاجل السنة ..

ايفان :حرامات يعني راح نسبقج اني وسوز مو .

لافين: اسكتي لا تذكريني غصبة بكلبي .. عبالي نطلع سوة .. الة صدك اشو سوز هم ماكو وينها .

ايفان: هاي حايرة بغير عالم ...

لافين: بعدها مشاكل ويا اخوها .

ايفان :اي والله شاد وياها هلمرة حيل مدري شلون راح تداوم حتة نص الاجراءات بعدها ..اليوم امر عليها واحتمال نجي يمج .

لافين: علواه مشتاقتلجن حيل .

ايفان :هاي شنو صوت الطفل ولج بس لا خلفتي .. شنو رجعتي لجمال ومكلتي .

لافين :هههه لا شرجع غير ابوية يطردنا .. بس هذا ابن محمد وامة زعلانة وهوة باقي يمنا وبس يبجي على امة .

ايفان: اووه بعدة اخوج عصبي ومينجرع .

لافين : لا صار اكثر من تزوج .

ايفان: يلة خل اسدة العصر احتمال نمرلج .. ابوية يصيحني ..

لافين :سلميلي على عمو هواي

ايفان: يوصل انتي هم سلميلي .

لافين: يوصل ... ختمتها ويا ..ورحت انطي مصطفى لامي حتة ابدي احضر الكيك وسوالف عصريات لان هلفترة صرت اهتم بالطبخ حتة الهي روحي اشوية ..

نسيت اعرفكم على ايفان وسوز ..
ايفان هية تصير بنت ابن عم ابوية .. وقوت علاقتنا بالمدرسة واعدادية سوة .. .. كل وحدها الها قصة تختلف عن الثانية بس متختلف بالمعاناه ..

وسوز جانت ويانا بالمنطقة وهم تعرفنا بالمدرسة وصرنا ثلاثي مرح ..

اتذكر  بالاعدادية بالخامس جانت معجبة ببيت عمي من جنت اسولفلهة من اروح شلون يعاملوني ..

سوز :اكلج همة ثلاث اخوة واحنا ثلاث ليش ما كل وحدة تاخذ واحد ونصير احلى ثلاثي مرح .

ايفان: اني طلعوني من القائمة .. عندي جلال يسوة الزلم .

لافين :وانتي منو كلج اصلا يريدج عادي اخذ سوز وياي حتة نضل سوة وانتي خليج بعيدة علينا .

ايفان :والله اجيبة واجي يمكم .

سوز :حبابة اني وياج واذا ولدة ميريدوني  عادي اقبل بعمج اهم شي من ريحة هلبيت هذا .

لافين: غير باجي سهير تخنكج .

....ايفان ..
مثل معرفتو اني اصير الصديقة المقربة من لافين ..  مواصفاتي عادية .. حنطاوية وعيوني جوزي عاديات  طولي مثل لافين نفس لقالب .. وحتة بالشكل انطي شبه للافين حتة المدرسات جانن عبالهن احنا خوات .  بس الفرق اني شعري سرح عكس لافين شعرها كيرلي وكفشة ..

جنا مثل الفريق بالاعدادية .. وحتة سوز .. جنا احنا الثلاثة سرنا واحد ..

جنا منهتم بهاي السوالف مال بنات .. ماعدنا غير دراستنا والمعدل والشهادة .. كل هذا جان تفكيرنا ..

ايجوز اني الي اختلف بيهن لان جنت اني احب ابن خالي جلال .. جان يداوم كلية ضباط باربيل ..

مافد يوم سولفنا غير السلام .. بس جانت نظراتنا قوية بس هلشي مخلاني اسوي شي غلط ولا لهاني عن دراستي ..اسمرينا هيج .. لحد ما كملت السادس وخطبني رسمي ..

جانو عمامي ماخذين خواتي الي اكبر مني .. ثنين .
ويردوني اني هم بس امي قفلت كالت انطيتهم ثنين وهاي انطيها لكرايبي .

فجان الموافقة سهلة على جلال لان من البداية اتفقو انو اني لكرايب امي .. وجلال جان مايتفوت وحلم كل بنية شكل وهيبة وشهادة .  والاهم يحبني وشاريني .

رغم عمامي عارضو هلشي بس امي كدرت تقنع ابوية ..

وحاليا مخطوبين اني وجلال ..

.....

سوز ..

اني صديقة لافين .. وايفان .. عرفتو شكل علاقتنا .

مواصفاتي طويلة وضعيفة وعيوني صغار وملامحي ناعمة كلش..

جنت اني الوحيدة الي عايشة غير عيشتهن ..

جنت عايشة تحت رحمة اخوية لان ابوية توفة من جنت بالمتوسطة ..

وهلشي خلة اخوية يسيطر على البيت .. وعيشنا تحت رحمتة .

جان كل مرة يريد يزوجني بس امي جانت توكف بوجهة لان تريدني اكمل ... ودائما الي يجيبهم ماعدهم شهادة وماعدهم مرة تكمل ..

لذلك جان شرط امي انو اكمل .. ورغم هلشي اخوية مبطل .. وكل ميشوف مني رفض جان اشكال وانواع المسبة والضرب .. في سبيل اخضع بس لان جانت امي وياي مجنت اهتم .

جنت اروح ادرس يم عم لافين جنت اباوع لاسلوب عمها واكول بكلبي هنيال الي ماخذتك .. جان حباب بشكل .. ومؤدب واسلوبة حلو بالكلام اخلص المحاضرة واني مركزة بي. 

مو حب انما اعجاب بشخصيتة .. جنت دائما اكوللهن اتمنة يجيني هيج زوج .. نفس اسلوب عم لافين ويضحكن علية ويصنفن لان عبالهن احبة .

حاليا اني وايفان بلشنا بمعاملة الدوام بكلية الموصل .. طلع اسمنا هناك .. وتقريبا كملنا كل الاجراءات بقا بس نبلش دوام .

......

لافين: .. صافنة اتذكر ايام الاعدادية شلون جنا ضاربين الدنيا بعرض الحايط .. وشلون جانن يواسني بوكت مصيبتي .. واكثر اثنين تأذو بعد امي وابوية هنة سوز وايفان ..

اتذكر شلون فرحن من انخطبت يجوز اكثر مني ...

جانت عود سوز تواسيني تكلي

سوز :يلة احنا ثلاث ولد و٨ بنات وانتو ٣ بنات و٨ ولد .. نتبادل شنو رأيج ..

لافين :اايييع واخذ اخوج الخبل .

سوز :لعد اني مو راح اخذ اخوج الخبل هم .

لافين :صح محمد عصبي بس مو مثل خبالات اخوج ضرب وغلط .

سوز :هاي بعد هوة تصميمة هيج شسويلة يلة انتي لسان وتغيري بطريقتج .

لافين :جان كدرت اغير حظي ...
صدك نسني القهر الي بية .. وجانن يحفزني اقرة علمود ابوية وارفع راسة رغم بالبداية انعزلت عنهن وتركتهن بس هنة معافني ..

جنا منعرف شنو زعل وشنو قهر وشنو يعني حياتج تتغير بدون سابق انذار .

وهلشي بلش من السادس ويانا ..

اني انفصلت ..
سوز صارت مشاكلها اقوة بسبب اخوها ..
ايفان انخطبت ومشاكل ويا عمامها ..

من هلحظة حياتنا اتغيرت نهائي .. كبرنا ووعينا على حياتنا وصرنا نفهم اكثر . 

راحت فترة المراهقة وبلش الجد ويانا ..

........صافنة واندكت الباب رحت اركض عليها ...

فتحتها وشفتهن كبالي ..

لافين :ولجن ممصدكة شفتجن ..يمة  شكد شكد محتاجة اسولف وياكم .

سوز :شو دوخري خل نطب عيب من الباب نسولف .

ايفان: هلبيت بيتنا .. ياما وياما اكلنة دولمة بي من ريحة الوالدة ...

لافين: نسولف ونمشي بالطرمة حتة نفوت جوة .
تذكرن من جنا ابو الخط يوصلني اول شي وبالتالي تشتمن ريحة الدولمة وتجلبن هنا وابوية يرجعجن ..

سوز :ياريت لو ترجع هاي الايام ..
ايفان احلى ايام .. لا حسيب ولا رقيب .

لافين: كعدن هسة اجي اصيح امي رادت تشوفجن
ومن ارجع سولفيلي الاخبار وانت هم سوز .
.

....ايفان ..

بعد مااتصلت بلافين وقررنا نلتقي اتصلت بجلال .

جلال :هلة بالعافية واهلها .

ايفان :انت العافية .. شلونك اليوم

جلال: زين الحمد لله .. استلمت اول واجب الي ... وكلش متحمس .. شعور حلو من تصيرين مسؤولة على شي ويحطون بيج الثقة ..

ايفان: انشالله وادري بيك كد الثقة .... اكول حبيبي.

جلال :كولي يروح حبيبج ..

ايفان :راح امر على سوز ومناك نمر على لافين بنت عمي .. تدري صارلي هواي ممنجمعات لان جنا حايرين بالاجراءات

جلال :حبيبتي .. وين متروحين موافق اهم شي مو وحدج لان اخاف عليج منو حيوصلج .

ايفان :بابا حيوصلني لان عندة شغلة قريبة عليهم .

جلال :ديري بالج على روحج .. واني راح اطلع هسة من المكتب .. يعني لا تتصلين اني من اكمل واجب اتصل حتة لو اضل هواي ليضل بالج كل متصحلي فرصة اخابرج .

ايفان :شوكت تنزل كلش مشتاقتلك .

جلال :نهاية هلشهر نازل انشالله ..

ايفان :انشالله تجي بسلامة ..

ختمتها ويا ..
واني الابتسامة شاكو حلكي ..

وبدلت وطلعت بالسيارة حتة اروح اخذ سوز من اهلها ونطلع .لبيت لافين .

....سوز..

جنت كاعدة انظف وهوسة خواتي الصغار وميتة تعب وقرف من العيشة .. اخوية مشوفني الويل ..

صارلة يومين مدري وين دايح .. عساس ابيت عمامي لان هوة علاقتة زينة ببيت عمي .

وعلى كولة امي ولد عمج ولا يصادق غربة .ويفسدوه .

عساس هسة هوة نبي .. استغفر الله .

دك الارضي وطلعت ايفان اتفقنا تمر علية .

رحت استأذنت من امي وكملت شغلي .. وتحضرت سمعت صوت باب ..رحت اركض طلع اخوية جتي هوةوابن عمي .

شافني مبدلة حجة ..

اياد: ها خيرج وين

سوز :راح تمر علية ايفان ونروح لبيت لافين .

اياد :هاي ماعدها شغل وعمل بس تفرفر وحيدها ..

سوز :ابويها يوصلها متفتر وحيدها

اياد :نفس الشي ترة واني بديت اضوج ترة منها .. خففي اشوية من علاقتج بيها مارتاحلها ..

سوز: اي ماشي ..سمعت صوتة وهوة يسلم واكثر صوت اكرهة واشمئز منة ..

سراج :شلونج سوز اشو مسلمتي

سوز: اعتذر مشفتك ..
دك هورن سيارة ايفان ..

يلة اترخص اجتي البنة رايحة .

سراج: الله وياج ..

اياد :مو تتأخرين .

سوز  :طلعت ادردم بالسيارة .. بصوت ناصي .. انتبهت ايفان .

ايفان: شبيج كالة الوجه جنج مطلقة .

سوز :اياد حيل ديضايقني .وتالي هسة يكلي خففي من علاقتج بايفان مارتاحلها .

ايفان :هههههه هذا كارهني حيل .

سوز: اسكتي من صديتي هوة كرهج وحقد عليج والا هذا منو تصدة هلمغرور مكيف بعيونة الصفر عبالك بس هوة عيونة صفر .. لا وفوكاها جيب سراج ويا ..يجوز بس ارجع اغسل البيت بديتول .

ايفان: بس افهم ليش تكرهين سراج يعني مافد يوم اذاج لو سمعج حجاية .

سوز: اي شي من طرف اياد اكرهة ..وخاصة سياج مدري سراج ..هيج بس مجرد اسمع صوتة تصعد عندي الدوخة ولعبان نفس عبالك وحدة تتنسة .

ايفان :ههههه كبر ليش يولي خطية الولد مبين حباب

سوز: روحي عاشري اياد وتعرفين ليش اكره سراج .. لان نفس الطبع ثنينهم ..ولد عم واصدقاء و٢٤ سوة .. شتريدين يصيرون .. اكيد نفس الطبع .ماعدهم احترام للبنية

ايفان: دسكتي سكتي وصلنا .

...... لافين ..

رحت كلت لامي انو هنة وصلن وامي تموت عليهن .
طبت سلمت عما حضرت الضيافة ..

هنة اجني للمطبخ كعدن .

ليش هنا امشن بالاستقبال .

ايفان :اكلج شنو نستي لو اول مرة نجي .

سوز: بالنسبة الي اليوم مااطلع اذا ماذوق الي مسويتة الريحة عمتني .

لافين :سويت كيك وشوية معجنات فطاير يعني .

سوز :تدرين ليش احبج ...

لافين: ليش

سوز : لان انتي اكثر وحدة تحسين ببطني .

لافين :ههههه ادري بيج ..
حطيت الاكل على الميز وضلينا نسولف وسوز مندمجة اكس ومربع على اخوها ..ماعدها غير اخوها تحجي بي من كد ما مضوجها ..

لافين :والله اخوج يسوي هيج من حرصة عليج

سوز :حرصة انو يبطلني حتة اتزوج واحد هوة جايبة .

لافين: غير يريد يشوفج مستقرة .. مو زوج خواتج حتة يستقرن .. كلهن قسمهن زينة ومرتاحات واذا على المشاكل عادي اي مرة ورجال يتعاركون .. بس كل بنية لازم تزوج .

ايفان :والله عجزت افهمها ترة سوز انتي هواي مكبرة الامور ..

سوز: زين والضرب هم يخاف علية .

ايفان :اذا انتي لسان ووكحة لعد شلون يسكتج .متكليلي .

لافين :معلينا هسة صدك محمد صار عزابي شنو رأيج بي .

سوز :يمااااا ابقة يم اياد احسلي .
هذا مثل طبعي نار وشرار على اتفه شي ..
هوة لسان واني لسان غير نموت من ورة العرامة والوكاحة ..

هاي اذا ماصعد علينا عمي شاهين وفاككنا من الجلاليق وهد واني اهد شتحجين انتي .

لافين: بس علكيفج دشاقة ترة .

ايفان: صارلها شكد زعلانة الخاتونة ..

لافين :اشش صوتج لا تسمع اختها .. صارلها سبوعين وحنطب بالثالث .

ايفان :هااااا سبوعين ومشايفة ابنها .

لافين :غير محمد قافل وخالي قافل ميقبلون يرجعوها الة تتأذب .. صح هية وكحة .. بس الطفل يكسر الخاطر والله يعلم بحالها هسة بدون ابنها اني من ينام اشتاقلة شحال هية امة وصارلها هواي مشايفتة .

ايفان: الله يهديهم .

شيرين :يمة ابن اخوج بس غسليلية ماكدر اغسلة ظهري يوجعني .

لافين :جيت ماما ..
رحت اغسل لمصطفى وابدلة وامي بقت يمهن .

....

ايفان :خالة ليش مترجعين مرت محمد والله الطفل يكسر الخاطر من ايد لايد

شيرين: شسوي ياخالة مازن ومحمد ثنينهم نفس الطبع واذا قفلو على شي هايهة بعد .

ايفان: زين مسألتي اختها شلون حالها .

شيرين :تكول محبوسة ومتقبل تاكل وتشرب الة غصب وبس تبجي تريد ابنها ..
اني هم اليوم احاجي محمد اذا يبقة قافل احاجي ابوه يغصبة يرجعها الولد حيموت حتة رضاعة مديرضع بس يبجي عل امة .

لافين: كملت لمصطفى وجيت حطيتة بحضن امي .
جنت اسمع سوالفهن لان بالمطبخ وغرفة امي بصف المطبخ صاير والبيت هدوء فالصوت ينسمع وهنا يحجن بصوت عادي

كملنا كعدتنا واجة ابوية وسلمن عليه .. واشوية وترخصن حتة يروحن ..

ابوية اخذهن وصلهن لبيوتهن جان يكول طالما تحبيهن اني هم احبهن اهم شي اشوفج فرحانة وياهن ...

بعد ما رجع وتعشة .. شفتة مهموم وضايج رحت كعدت بحضنة مثل عادتي ..وحضنت ركبتة .

لافين :شبي الحلو ضايج .

شاهين :ضايج منج بابا

لافين :يمة حبيبي يضوج مني ليش بابا شكو شصاير .

شاهين :ليش رفضتي الولد الي اجاج امج سولفتلي انو انتي رفضتي الولد بدون ما تفكرين ليش بابا بعدة جرحج ماطاب

لافين: باوعت لامي لان هلشي عكس فهم بابا .. ميدري انو ام الولد طلعت بعد ماسمعت اني منفصلة من ابن عمي ترخصت وطلعت وماحجت شي .

بس امي غمزتلي حتة ماينغث .

بابا ليش عبالك اني ضايجة لان انفصلت والله بابا ولا يمي السالفة اصلا هوة خسرك الك ماخسر زوجتة .

وهذا من حسن حظي وكتلك ليش .. شوف هسة ماما .. شكد جانو يحجون عليها لان مااخذت ابن عمها وجانو يكولون خطية حتزوج رجال ارمل وبركبتة ٦ جهال .

وهسة امي اكثر مرة محظوظة بزواجهة منك .. اني قررت وانتهت .

شاهين: شقررتي .

لافين :حضنتة حيل وبستة من راسة ..
قررت مااتزوج الة واحد مثلك ..

والله امي الله يحبها اني بنتها لان لو مو بنتكم جان اخذتك من امي وتزوجتك غصب انت حبي الاول والاخير .. شنو زواج شنو هم شنو قهر وانت يمي .

شاهين :فدوة للبنات العاقلات ..الي يعرفن شلون يقشمرن ابوهن ..

لافين: ههههههه لا والله مدقشمرك بس صدك اكون محظوظة اذا لكيت واحد مثلك يصوني ويحافظ علية .

شاهين: الله يسعدج باباتي .. ويوفقج وتاخذين الشهادة الي تحلمين بيها ..

صدك مكلتي صديقاتج شطلعلهن .

لافين: طلعن سوة كلية بالموصل وراح يداومن بعدكم يوم ..

شاهين: انشالله الله يوفقهن

لافين :رحت من يمة وضلينا نتواصل اني وايفان وسوز ورجعنا للمتنا .. وبدة الدوام وراحن للموصل وعافني من جديد .. بس مرات يتصلن على الارضي من يكدرن..

مرة امي اشوفها تلوب تباوع للشباك وترجع تفتر .
جنت شايلة مصطفى

يمة متكليلي شبيج دخت ترة من الفرة وراج .

شيرين: وانتي شكو تفترين وراي اني اليوم نويت وهاي هية

لافين: شنويتي يمة كمتي تخوفين .

شيرين: انتظر ابوج واخوانج يجون ويصير خير .

لافين: مقبلت امي تحجي شنوت .. بس مبينة اعصاب صايرة .

اجوي ابوية واخواني وهية استلمتهم .

شيرين: شوف شاهين .. من هسة اكلك قبل لا تطبون يااما تروح وياي نرجع مرت محمد لو اطلع اني واروح يم مازن

شاهين: شبيج علكيفج .. فهمينا شكو

شيرين:  الولد حيموت على امة صارلة يومين مضخن ويبجي وحتة الرضاعة شبه انقطعت اذا مات خطيتة بركبتكم .

لافين: اباوع لامي تحجي باعصاب وتدك برجلها من العصبية ..

ماما علكيفج لا تتخربطين مو زين عليج هيج .. غمزت لمحمد بمعنى اقبل .

محمد :يمة هسة ارتاحي ونتفاهم لا يصير بيج شي

شيرين: كلت هسة يعني هسة ..

.........

يتبع ...

....

هذا البارت ضفت شخصيات الهن دور ويا البطلة واكيد كل وحدة الها قصة تختلف ..

اليوم نبذة تعريفية عليهن .. وانشالله بالبارتات الجاية راح تعرفون قصتهن ..

لا تنسو التصويت .. ❤

تحياتي Aseel..

احبكم 💋💋