وبشر الصابرين

البارت العشرون (بداية الجزء الثاني)

مرحبااا شلونكم انشالله بخير ..

رجعنا من جديد ..

/// وبشر الصابرين ///

البارت العشرون .

بقلمي Aseel

.......

شما اقرب عليك ..
اتزيد حسراتك ...

اذا خايف احرجك ..
گلي ليش اتخاف ... ؟

ماريد آنه اصبح ..
سبب مأساتك ..

احسب للطريق ،
وشوف دربك زين ..

بس آنه اعتقد ..
حاسب حساباتك ..

مرات اني اشوفك ..
قمه بالاشواگ ..

ومرات احس گلبك ..
عكس نظراتك ..!!

اشوفك ترف ،
واطمع ع الترافه البيك اجيك ..

وتنگلب قاسي بعلاقاتك
يـ ( حبيبي) بالكرم ..

واكثر بعد للناس ..
بس وياي .. تبخل ليش ساعاتك

تلعب على اجروحي ..
وتضحك ومرتاح ..

وأنا ابطيبة گلب ..
احمل جراحاتك ..

واضح ويه غيري ..
وغامض انت وياي ..

اتمنى اني غيري ..
واحوي ضحكاتك

بس راح اني اعوفك ..
وانشغل بالروح ..

وما تلگي من يمسح غيري دمعاتك..

.......

لافين : بدينا المرحلة الثانية .. جان كل وحدة منا الها طموح واحلام ..

جنا بداية سنة .. وبداية حياة جديدة .. بالنسبة لايفان جان هلشي عادي مجرد ايام وتمشي .. بقت نفس وضعها والاسود ماقبلت تنزعة ..

سوز جانت فرحانة بالجو خاصة لان انجمعنا من جديد ..

اما بالنسبة لروان فجان هلشي عدها جديد وعالم غريب .. والحياة الجامعية تختلف عن الحياة المدرسية السابقة ..

جنت اروح واجي اول سبوعين كضيناها ضحك وونسة ..
بس هلشي ما استمر بالنسبة النا ...

لان نةنة .. تدهورت حالتها الصحية حيل . ..
جان كل متشوفني اجي يمها تكلي اتمنة اموت قبل لا اشوفج تنزفين لغير ابن عمج .

جنت ابجي وياها .. رغم الي صار وجمال اتزوج بس متكدر تشوفنا مو لبعض ..

وضعها صار اسوء يوم بعد يوم لحد ما اتوفت وانطت عمرها للي خلقها .. بوكتها صارت غمامة سودة على بيتنا ..

ما انسا هلايام ابد ..شكد جان اكو عالم بالبيت بس جنت احس البيت فارغ مابي طعم ..

البيت انترس حزن .. راح الفرح وراح الشقة .. اخواني حيل اتأذو .. جانو على طول فوك راسها رغم حالتها بس يلاشوها .. ويتشاقون وياها ..