وبشر الصابرين

البارت التاسع عشر(نهاية الجزء الاول)

مرحبااا ..

///وبشر الصابرين ///
البارت التاسع عشر ..

بقلمي Aseel..

.............

كلها تغيرت من ال ألف للياء
وكت كام الأصم يضحك على النبره

زمن بيه الطبيب ايموت العدلين
زمن بيه الفقير ايعيل بالفقره

زمن لتسوي زين اتعيش بي مرتاح
زمن بيه ألفتك يضحك على الابره

صفه جذع النخل يحترك بلتنور
وعلى جذع الجرح شو كتبوا الذكره

وكت كام اليحب يندفن بالحسرات
عكب ما جان دافن گلبه بالحسره

على درب الفرح ميمرن الضحكات
وعلى درب العيون ادموووع متسطره

وصل بينه الحقد ندفن هدوم العيد
وأخاف ابفكره نفرح ندفن الفكره

.............

صفنت اباوع اني شمسوية بجلال .. فاتحة الجفن ونص شعري منثور عليه .. رحت ارجع على التابوت ..

صار بوجهي نفس الشخص .

_والقران اذا اتقربتي احطج وياه .. وخري عنا مو مرعدتي الولد بتابوتة شلون صلافة وعرامة شايلة .

ايفان :سحبتني سوز هية ولافين .

مجنت واعية للي سويتة ..
بس ماكدرت اسيطر على عقلي وافعالي .. الي اجوفة ملفلف كبالي هذا جلال .. جلال حب عمري وطفولتي ومراهقتي كلها وياه ..

اول نظرة .. اول ابتسامة ..  اول لهفة شوك .. اول نبضة للكلب ...اول كلمة احبك .. كلها جانت الة ..

شلون راح اكدر  بدونة .. .. مجرد شفتهم اخذو ..
حسيت روحي طفت .. راحت وياه كل معنى لحياتي ..

مرت ايام العزة ... عبالك اول يوم .. احس روحي خوت لا اكل لا شرب .. جنت فاقدة وابالي بس اردد شلون حكدر بدونة ..

....

لافين : جانت حالى ايفان تبجي الصخر .. اسبوع كامل هية فاقدة وبس تبجي متعرف شيصير ميصير ..يمكن باليوم تحط لكمة وحدة بحلكها وكوة .. ومي كذلك .. اكثر من مرة تتخربط ونرجع نصحيها

حيل تازمت حالتها .. وصار وضعها صعب ..

بعدعا اعتزلت العالم ورجعت لبيتها .. عزلت روحها عنا ..
صارت قليل تسولف .. حتة النا عافتنا .. بس احنا معفناها ..

بدة العام الدراسي الجديد ..
دخلت مرحلة اولى كلية بجامعة كركوك ..
اما سوز فجانت مأجلة هاي السنة حتة تنقل وياي بالجامعة بس بغير قسم ..

وايفان جانت هم مأجلة بس عساس تنقل لسليمانية .. بس شاء القدر ومصارت .. لذلك اخوها بدة لمعاملة نقلها ويا سوز لان نفس القسم

بلشت دوام .. عالم غريب .. وحدي ماعندي احد  اعرفة ..

احس روحي طفلة وهستوني سجلت صف اول ..
اباوع بالوجوه مثل التايهة ..