وبشر الصابرين

البارت السادس عشر

مرحبا ..

////وبشر الصابرين ////

البارت السادس عشر ...

بقلم  Aseel...

......

وسلاماً لمن أردو بنا كسراً
فخيب الله ضنهم وازددنا قوة بعد قوة❤🥀

.........

الـوعُــــودُ الگـــــاذبــة💔

  كَالشمُوع المضِيئةُ ليلًا .. تُــفـرحُـــنــا كَــثـيــرًا
      لَكنها تـــَــذوبُ ... سَـــــريـِـــعًــــا

...........

لافين :جنت مدنكة واسمع كلام امي واختي جيهان لازمتني تواسي بية ..
مااسمع غير صوت شي وكع .. اباوع الكة ابوية ازرك وواكع من طولة .. .

تهسترت واني اشوف ابوية بلا نفس ..

اخذو اخواني للمستشفى واني متهسترة بعدني ...
اباوع الامي تلطم وملخت روحها كوة خلوها ترةح وياهم ..

واني واكفة ودخلت بحالة سكوت وصدمة من الجاي يصير...

بيتنا انكلب الكل يبجي على ابوية .. وكلها تباوعلي بشفقة لان اطلكت ..

بيتنا صار كابوس ..

لازمة راسي واباوع عليهم شلون يعيطون .. ابوية اخذوه ازرك وبلا نفس.. ومنعرف عنة شي ..

مرت ساعتين واحنا نفس الحال ..

طب اخوية زيدون .. ركضت عليه

لافين :زيدون شبي بابا عليك الله مات مو .. مات من وراية .. كمت اضرب بوجهي .

زيدون :اهدي  .. اهدي كولي يالله ادعيلة .. ماميت والله ..

لافين: انت شفت شكلة ...صار ازرك وميتنفس

زيدون : بس ادعولة .

جيهان :ليش اشبي ابوية احجي كلبنة خلص .

زيدون: ضاربتة جلطة كلش قوية وحاليا بالانعاش ..
كعد على الكرسي وكمل ..

مادري شكللكم .. الدكتور كال منا ليومين اذا ما صحة ووضعة تحسن نأيس منة ..

لافين : سودة علية يابة .. كمت املخ بخدي .. ولكم حيروح مني اني السبب كلة من وراي .

عاط بية زيدون .
زيدون :كااافي لخاطر ربج مناقصين احنا البينا مكفينا .. وكافي بجي لا تفاولين ادعولة بدال هلطم

وابن عمج اني اعلمة .. الا اطلع حركة گلبة بي

جيهان: وهسة شلون شنسوي بهلمصيبة الي وكعت على راسنا .

زيدون: كلت كافي نواحي ولطم ادعولة احسن .. روحي جيهان حضري غراض لامي وملابس

جيهان :يعني شنو غراض

زيدون: شبيج جيهان ركزي وياي .. يعني فراش وبطانية .. متقبل تجي وماكو فراشات هناك .
وملابس الها .

لافين : اريد اروح وياكم .

زيدون : وين تروحين ميقبلون شبيج .

لافين والقران واقسم بالله اذا مااخذتوني اروح بوحدي .. وشيصير خل يصير .

زيدون: استغفر الله .. امشي يلة بسرعة .

لافين : رحت عسريع صعدت ويا وجيهان جابت الغراض .. وصاها على البيت وتدير بالها ..لان احتمال منجي .

طلعنا ورحنا للمستشفى .. اول مطبيت رحت اركض حضنت امي وابجي

شيرين :ولج ابوج حيروح ادعيلة ماما ..

لافين :كلة مني اني السبب كلة من وراي ابوية حيموت .

شيرين :لا بنتي ابوج انكسر من ورة ابن اخوه .. شحجي وشكول ...

لافين : الله يكسر كلبة مثل مكسر كلب ابوية ..

ضلينا ننتظر يومين لا اكل ولا شرب نفسنا مسدودة .. امي كوة نوكلها حتة لا تتخربط .. واني ماطبت اللكمة بحلكي .. وماضكت طعم النوم ..

الي متمدد ابوية .. هذا روحي من الدنيا .. مو هين الي صار وياي. .. كسرة خاطري .. وكسرة ابوية .. وكلة من ورة جمال ... لو بيدي على حركة كلبي اشرب من دمة وهم مايبرد كلبي ..

مر اليومين امر من المر .. اجة الدكتور وبشرنا انو ابوية تحسنت صحتة .. بس يرادلة بعد عناية كم يوم لحد ما يستقر وضعة .. وراها نكدر نطلعة ..

ضل بالعناية تقريبا ٥ ايام .. من ردنا نطلعة راح زيدون يسوي  الخروج ..

شيرين: ماما لافين .. الدكتور كال ممنوع الزعل والقهر علية حتة ما تنتكس حالتة .. اذا تحبين ابوج لا تشوفي دموعج .. وسوي نفسج قوية كدامة .. داري حزنج بكلبج كدام ابوج ..  ترة وكعتة صارت لان شاف كسرة عيونج ودموعج ..

اذا متريدين تخسري لا تشوفي كسرتج وتخلي يحس بالذنب ..

لافين: بدون متوصيني ماما .. هذا ابوية .. شلون اكسرة

طلع ابوية .. ورجعنا للبيت .. جانت جيهان محضرتلة السرير .. ومطلعة الجهال برة البيت لان ممنوع هوسة .. فارشتلهم بالحديقة وخلتهم يلعبون برة .

طببوه خواني .. ونيموه . والي يبدل والي يرتب مكانة شالوه بعيونهم ..

طبعا اخواني محمد واحمد محد كللهم بالي صار مردنا نخرب فرحتهم .. وهذا الطلب من امي .

ثاني يوم رجعو ومحمد كلب الدنيا لان ماكلنالة .. وتحلفو لجمال الي ميدري شكو .. لان بنفس الليلة رجع لخانقين .
واحنا بقينا بسليمانية .

استقر وضع ابوية وصار يكدر يسولف وياكل على حيلة ..صاحلي .

شاهين :بابا لافين تعالي يمي اشوية .

لافين: رحت يمة تقربت باسني من راسي .

شاهين  : اعذريني بابا كسرتج بهلقسمة ..

لافين :لا بابا انت مالك دخل .. وبعدين اني ممقهورة بالعكس هلشي احسن .. احنا من البداية ممتفاهمين .. ليش نتزوج ونخلف وبعدين ننفصل ويتبهذلون الاطفال .. يجوز الله خلة هلعرضة من البداية ..

شاهين: انتي بنتي وتربيتي .. عفية عليج بابا لا تخلين احد يكسرج ..

لافين: وانت تدري بية اريد اكمل .. وجمال مجان رايدني اكمل غير السادس .  فهيج احسن الي ليش اتعب وبتالي اكعد ربة بيت .

شاهين :ماريد تذكرين اسمة بهلبيت كلبي مفور منة لهلكلب .. ااااخ لو بس الزمة .

لافين: بابا دعوفة خل يولي .. راح وطلع من حياتنا . لا تقهر روحك اني وين اكدر بلياك اذا صار عليك شي .

شاهين :اوووف الله كريم ... انشالله انشالله ..

لافين :يلة خلنطلع وانت نام لا تتعب روحك .

شاهين :كولي لامج تحضر غراضنا باجر نرجع للبيت .

لافين: بس بابا انت بعدك ماصرت زين .

شاهين: يا بنتي مااصير زين طالما اني بهلبيت .. اريد ارجع لبيتي واستقر .اشوية تتعدل نفسيتي وصحتي .

لافين :ماشي بابا الي تريدة يصير انشالله .

طفيت الضوة عليه واني كلبي نار واني اشوف نظرة ابوية شلون عيونة مكسورة ..

لو بيدي احركة لجمال .. ابوية انكسرت فرحتة .. كمت ابجي بس بدون صوت كعدت يم الحايط الي بصف الغرفة وامغطية عيوني ..

اجة محسن ..

محسن: لافين .. كومي بسرعة اريد احاجيج برة ماريد ابوية يسمع .

لافين :جان يحجي همس .. وجر ايدي وطلعني برة وعاط بية .

محسن :انتي تريدين تموتين ابوية .. انتي مخبلة .

لافين :اني شسويت ..

محسن: ماسويتي شي .. تدرين لو طلع وشافج بهيج وضع جان مات .. انتي ليش انانية .

لافين: اني انانية .. اني بجيت لان شفت عيونة شلون مكسورة .. انت تعرف شنو يعني تشوف ابوك مكسور بسببك .

محسن: وانتي هيج راح تواسي .. هيج راح تكسرينة اكثر ..

لافين: على عياطة اجتي امي واخواني ركضون .

شيرين :صوتك ولك .

زيدون :شبيك تعيط .

محسن :هاي متفكر بس بنفسها .. لكيتها يم باب غرفتة مسويتها مناحة علمود كلب ميسوة

شيرين: ليش ماما تريدين تموتين ابوج بالف يا ويل عدة هلمرحلة

لافين: والله مجنت ابجي على نعال .. جنت ابجي على ابوية ووضعة شبيكم متصدكوني .. ترة اني مميتة على جمال اصلا جان يخنكني بتصرفاتة .. والحمد لله خلصت منة لان مجنت اكدر اكول لابوية حتة مااكسر فرحتة .. وهاي اجتي منة .. وتتصورون بعد كل هاي ابجي عليه .

عفتهم وطبيت لجوة وكبل لغرفتي صعدت .
ضليت ابجي وبردت كلبي ..

الكلب الحقير كسر كلبي .. صح ماجنت احبة بس صعبة .. ابن عمي ويطلكني .. وابوية مريض من وراه .. ربي ليش ديصير وياي كل هذا .

كسر خاطري حيل .. بس رغم هذا حمدت ربي وشكرتة لان ماحبيتة جان عذابي زاد اكثر .

ثاني يوم رجعنا لبيتنا .. ورجعو العرسان ويانا ..

ورة يومين من رجعتنا

رجعو زيدون وخالد سافرو .. لان اجازتهم خلصت ..
رغم جانو ضايجين غلينا وشايلين همنا شلون يروحون ويعوفونا ..

بس سامر كلهم لا تخافون بامانتي .. راح ابقة هنا لحد ما يتحسن وضع ايوبة .

ودعناهم وامي نفس المناحة الي البجي .. الي كل مايروحون تسويها .  احنا تعلمنا على فراكهم .. بس امي ماتعلمت ..

اجتي المدارس واني بديت السادس الاعدادي ..

جنت مالي واهس بالدنيا .. مالي واهس ادرس ..بس لخاطر ابوية اضغط على روحي ..

مستواي صار بالنازل .. كل مااسمع حجي الناس اني واهسي ينقطع .. .

من اشوف ابوية يراقبني .. واني ادرس .. يجي يشوفني بدون مااحس .. بس اعرف بي يراقبني .. اسوي نفسي اقرة وبالي مو يم الكتاب ..اصلا.

صرت بكل مناسبة اسمع اشكال والوان الحجي ..

ليش تطلكتو ..

شسويتي وطلكج .

شلون ابن عم يطلك بنت عمة .

جان جوابي واحد ماتفاهمنا ..

بس اقوة حجاية سمعتها والي خلتني ماروح لاي تجمع عائلي او مناسبة وهية ..

والج عين تطلعين وتطبين وانتي مطلكة وفوكاها تدرسين .. بوكتها امي رزلتها رزالة غسل ولبس وسكتت الكل عني .

شيرين :شوفي عيني بنتي ما تزوجت حتة تتطلك انخطبت عقد سيد .. وفصخت والي يسأل عن السبب هذيج ام الولد واسألوها ليش .. ما تفاهمو ونفصلو لا تضلون تحجون .. ترة عدها ٨ اخوان وابوها ال٩ .. يعرفون شلون يسكتوكم وهمة لهسة ميدرون شتحجون ..

لافين :من وكتها واني انعزلت عن العالم ..

فد يوم اجتي امي صاحتني ..

شيرين: ماما لافين مرت عمج انس تريدج .

لافين: مانزل مالي خلك احد .

شيرين: عيب ماما جتي هنا لخاطرج تكول عندي حجي وياها

لافين: نزلت لمرت عمي لكيتها ضعفانة وكاتلها القهر ..

سلمت علية وباوستني ..

سهير :شلونج لافين .

لافين :بخير باجي .. انتي شلونج .

سهير: مو زينة يا باجي .. مو زينة ابني ضاع مني .

شيرين: اسم الله ليش شصاير .

لافين: ابنج هوة ضيع روحة محد ضيعة .

سهير: ابني مو طبيعي .. من يوم ما رجع من السليمانية وهوة  مريض .. منعرف علتة شنو ..
كضيناها من دكتور لدكتور..

شيرين م:افهمتج دادة .. الرايدتة شنو من لافين .

سهير: بس اريد لافين تجي وياي للبيت بلكت من يشوفها تتحين حالتة .

لافين :اعتذر باجي .. بس بابا ميقبل اطب لبتكم بعد .

سهير: اجيبة لهنا واخلي يبوس ايدج .. بس ترضين .

شيرين: دادة .. جمال ميقبل تنفتح سيرة جمال بهلبيت بعد.مو انوب يجي .. واني اخاف على رجلي ماريدة يوكع مرة ثانية . 
لو بيدي ماقصر تعرفيني

سهير :ماتقصرين اعرف اصولج .. وطبعج .. بس هذا ابني وماعرف شسوي .. والله بيتنا انطفة .. من يوم عملتة السودة

لافين :عفتهن يسولفن وصعدت فوك ع اساس اني ناقصني قهر حتة تجي تهيج السالفة بعد ما خفت بكلبي .

اخوية محسن كمل جامعة ورجع ويانا  بلبيت وحاليا ينتظر التعيين .

جنت شكد احاول اقرة بس ماكدر اركز .. تفكيري تعبان وعقلي شارد ..

شفت خيال ابوية سويت نفسي مندمجة ..واقرة ..

اجة يمي كعد ..

شاهين: ادري بيج مو يم الكتاب اصلا ...

لافين: لا بابا بالعكس دقرة الامتحانات مبقالها شي ..

شاهين: بنتي .. اني مو غشيم عنج .. حتة مااعرف تفكيرج شنو .. بس صدكيني يابنتي دراستج تفيدج .. ماكو شي يسوة تنزلين دمعتج عليه غير اذا خسرتي دراستج ..

اريدج ترفعين راسي .. اريدج تجيبين معدل واكول بنتي قوية .

لافين: انشالله بابا .. بس صدكني اني ممقهورة غير بس على وضعك الي تدهور بسببي ..

شاهين: مابية شي شوفيني صعدتلج .. بس لتخلين بالي يمج .

لافين: انشالله روح انزل وبعد لتصعد مو زين على كلبك مصارلها عمليتك هواي ارتاح حبيبي ولتشيل همي ..

باسني براسي وراح ..

رجعت لزمت الكتاب وغصبت روحي اقرة ..

هنا طبينا سنة ٢٠٠٢ ..

الامتحانات قربت.. والمواد كلشي ماضابطة وماكدر اسيطر على كلشي ..

اهلي كلهم يكلولي اتركي وغيدي السنة ..

شيرين :يمة كتلج اتركي وعيدي السنة اشوفج مامسيطرة على دروسج . هم حتة تطلعين معدل عالي

لافين : ماما كتلكم ماريد اعيد .. شلون اقبل اشوف صديقاتي سابقاتني بسنة .. وهنة جامعة واني بعدني اعدادية .. اريد امتحن وشيصير خل يصير . 

عاندت وامتحنت .. الخوف والقلق الي جان صايبني بوكتها ميتسولف

ضليت تقريبا شهر انتظر النتائج ..

ماانسه هليوم .. بيوم الي استلمت النتيجة ورجعت لبيتنا ..

طبيت ابوية جان كاعد بنتظرني بالمطبخ هوة وامي

شاهين: ها بشري .

لافين :ناجحة ..

شاهين :والمعدل ..

لافين :٧٧ % 
شفت ابوية دنك راسة وانقهر ..
وامي كامت تتحسب على ابن عمي .

بيومها الكل انصدم لان اني المعرف كلة اعفائات وشاطرة ليش طلعت هيج ..

الا ابوية جان كاتلة القهر .. صاحني بليل .. وحجة وياي .

شاهين :سامحيني يا بنتي اني ضيعت مستقبلج .

لافين: لا حبيبي بالعكس اني فرحانة بمعدلي واني ماحب الكليات وتعبها .
احب تدريس اريد اصير تدريسية واكمل ماجستير ودكتوراه حتة اصير استاذة جامعية .. متذكر شكد جنت احب اصير معلمة .

شاهين: هههه اذكر جنتي تلبسين نظارة جدج الله يرحمه .  وتكولين اني الست .. سمعو كلام لا اضربكم بالعودة .

لافين :ههههه شفت بابا اني جانت طموحي اصير استاذة .. والله لا ضايجة ولا شي ..

شاهين: احلى واغلى استاذة جامعية شفتها

لافين: حضنتة .. فدوة اروحلك اهم شي اشوفك تضحك تسوة الدنيا .

.........

بهاي الفترة هواي اخبار جنت اسمعها من امي بخصوص جمال من جانت تسولف لمرت عمي خليل ..
جنت اسوي روحي مامهتمة بس فضولي يجبرني اتسمع ..

شيرين :وشلونة هسة .

نور :تكول امة احسن ..

شيرين: زين شطلع هوة بي .

نور  :طلع مسويلة عمل .  والعمل كلش قوي ممخلين سيد مرايحيلة بعدين ولد الحلال مدلينهم على واحد بالموصل شيخ .. هوة معالجة ورادة روحة .. بس من عارف هوة مطلك لافين مثل المتخبل يكلهم جذابين اني مطلكتها ..

لافين :هزيت ايدي باستهزاء ومشيت والله يالله ..

دك التلفون الارضي شالة اخوية محمد .. وسدة .

لافين :ها هم محد حجة .

محمد :خبلوني راح اشيل التلفون واركعة .

لافين: انت عليمن هلعصبية على كيفك ..بس لا يطلع ابنك مدري بنتك هيج عصبي يمة شيحملة .

محمد :هسة خل يجي اول لعبتها لروحي عبالك بس هية حامل .

لافين :يلة غير تدلل عليك .

محمد :هاي مو اختها وياها اشو جنها زيبك تفتر ومو بس اختها اشوف النسوان كلها من تحبل تتحرك ويشتغلن الة هية شايلة خشمها علية ..

لافين :ديسولف واجتي امي ..

شيرين :شبيك ياامي مو كلنالك حامل وتتنسة .

محمد: يمة لعبتها لروحي

شيرين: على كيفك حبيبي اتحملها كلها شهرين وتخلص . .شجاك متتحمل صاير .

محمد: امري لله

لافين :ضل ينافخ ويكلب بالتلفزيون ..طلع فلم مصري قديم وضل صافن بس مبين بالة مو يم التلفزيون ..

بس حقة اذا مرتة لسان ووكحة وحتة ترادد امي واكثر من مرة اسمعها ترفع صوتها عليها وامي متقبل احجي في سبيل متصير مشاكل ..

بهاي الفترة اجة عمي انس وحاول يقنع ابوية نرجع اني وجمال .. بس ابوية جان يكلهم

شاهين  :شغلة وانتهت لحد يفتح موضوع جمال بهلبيت

اذكر اجة عمي خليل ضل يومين يحوص يم ابوية وميكدر يحجي الة ابوية حاجاه .

شاهين :خليل صارلك يومين تفتر على راسي احجي شبيك .. طلعها للحجاية .

خليل :والله مدري شلون اكلك بس اني دزوني واسطة خير ..

شاهين :شوف خليل قبل لا تكمل عرفت موضوعك شنو .. شوف هلحجاية توصلها للي وصاك

اني قدرتة وانطيتة روحي وهوة كسرها لو مايبقة رجال بالدنيا غيرة ماانطيها بعد.وتحرم بنتي على جمال ووصلها الهم .

كل عمامي تجمعو واجو يمنا .. في سبيل يقنعون ابوية

وحتة  بيت عمي راحو لخوالي وخوالي اجوي.  بس ابوية قافل .

جانو يجون خطابة من اقرباءنا ... وابوية جان يرفضهم يكلهم مانطي لاقرباء .

وحتة من اجوي من الجوارين  جنت اني ارفضهم لان متخوفة من الارتباط واحس روحي مامستعدة بعدني

......

فد يوم دك الارضي مجان اكو احد بس اني وامي ..

رحت شلتة كلت الو .

جمال :بغلات ابوج لا تسدينة
...بس احجي وياج .

لافين :عرفتة جمال من صوتة .. وانعاد الشريط كبالي وسوايتة وابوية ووكعتة ..

احجي شرايد ...

جمال: بس اسمعيني لافين .. اني لحد هاي اللحظة ممصدك الصار والله .. ماعرف ليش هيج سويت

ماعرف شجاني وهيج تصرفت احس روحي جمت بحلم وصحيت منة وكالولي انت طلكت لافين ..

لافين: انت شتريد هسة .

جمال :ابوج ليش ما يقتنع واني دزيتلة كل هلناس .

لافين: هوة يحجي واني افكاري بللحظة الي طلكني وكسر ابوية بيها .

كتلة: ابوية حقة ميأمن بيك بعد

جمال: وانتي

لافين: اني ماكدر اثق بيك

جمال : انتي ماتعرفين الي اني اعيشه هسه كل لحظه اموت الف مرة وانتي ماطلعتي معدل يليق بيج واموت الف مرة من اسمع احد يتقدم لج

لافين :شوف جمال .. اني فكرة الزواج شايلتها من بالي .. دراستي حاليا اهم شي بحياتي صارت

جمال: يعني مراح ترجعيلي لافين والله رايدج وندمان حيل .

لافين: لا تتعب نفسك بعد لان لا اني ولا ابوية نقبل بيك والاحسن تنسة لان ابوية محرم اسمك ينذكر بلبيت

جمال: لهدرجة كارهني عمي .

لافين: واكثر مما تتصور .

جمال: بس بعدني اريدج .

لافين: واني بعد ماريدك ورجاءاً بعد لا تتصل لان ماكدر اكسر كلمة ابوية واحاجيك .

طبكتة بوجهة.. فور دمي ..

رحت سولفت لامي على كلشي .. وشحجة ..

شيرين :عوفي الموضوع ولتفتحي ويا ابوج ابد ..
من يوم ماخطبج واني كلبي مارتاح ابد عبالك الله علمني حتصير هلسالفة بس الحمد لله صارت بالخطبة ولا بزواج ..

....
لافين  :رغم كتلة بنفسي ماريدك بس مابطل وضل يدز بعمامي ..

عمي انس حجة ..

انس :بس كلي ليش متقبل مو كنالك جان مريض ومو بوعية .

شاهين: اني هلموضوع انتهة بالنسبة الي .. وجمال فقد الثقة عندي ماكدر اظلم بنتي مرتين

وراها ابن عمي الجبير الشهيد .. تقدملي .. بوكتها ابوية جمع الكل وكال .

شاهين: اسمعوني كلكم والحاضر يعلم الغايب ولد اخواني وولد خواتي مانطيهم مرة .. من هسة اكللكم حتة لحد يحرج نفسة ويجي .. شغلة انطيها لاقرباء انسوها .. ماكدر اظلمها بعد اكثر منما انظلمت .

ومن يومها انسدت سالفة جمال ومحد بعد توسط لان ملو منة وابوية قافل ..

قدمت انسيابية وطلعلي كلية تربية ببغداد ..

اني الوحيدة الي طلعت بغداد رغم الوياي طلعت كلهن موصل وتكريت ..

شلت هم .. شلون اروح وحدي لمحافظة غريبة وابقى بالقسم الداخلي واني ماعرف احد .. استصعبتها وحتة ابوية مقبل اروح ..

اقترحو علية انقل لموصل لو تكريت اقلها جماعتي وصديقاتي وياي ..

وافق ابوية على النقل .. ورحنا اني ومحسن لبغداد باعتبار هوة عاش بيها ويعرف طريق الكلية والاجراءات ..

رحنا وكالو تنو لازم اأجل هلسنة حتة اكدر اسوي النقل ..

كملنا الي مطلوب من عدنا ..
ورحنا ببيت اقاربنا ببغداد .. خابر محسن على ابوية وفهمة السالفة ..

شاهين :خل تأجل ماكدر اعوفها وحيدها ببغداد .. اجلو وتعالو .

لافين  :بتنا يمهم وثاني يوم رحنا اجلنا السنة ورجعنا لخانقين . ..

رجعنا للبيت .. بهاي الشهر ولدت زوجة محمد .. 
جابت ولد..

بس مرتة بقت على طبعها .. عكس اختها الي عبالك نسمة مينسمع صوتها ..

جانت بعدها مولدانة ..

بس الي صار زوجة محمد صارت تصرفاتها لا تطاق بس مشاكل ويا زوجها وتغار حيل مني ومن خواتي لان مدللات رغم محد مقصر وياها. ..

وحتة بدت تتجاوز على امي وامي متقبل تحجي تكول ماريد اخرب بيت اخوج .

الة مرة نزلت عصبية وتركع بالمواعين عود دتغسلهن.
اجتها امي .

شيرين :علكيفج ماما الحجية نايمة .. شبيج بنتي متعاركة ويا محمد كولي حتة اهدي

سوسن: انتي كلة من وراج عود انتي عمتي

شيرين: ليش ماما شسويتلج .

سوسن: انتي تعبين براس محمد علية ها ماشتغلت ها ماتتصخر كافي مرة شكبرج .. احترمي شيباتج .

لافين :اكول انتي هييي اشو كمتي تمسلتين شبيج .

سوسن :بلة انتي العانس اسكتي مني لا تتدخلين .

لافين: لا ادخل ونص طالما هاي الي دتتجاوزين عليها امي .لا عبالج نسكتلج كل مرة لان خايفين منج لا والله بس منريد نهجم بيت اخوية من وراج

شيرين :ماما عوفيها ....بنتي انتي منو اجة صوبج .. اذا متعاركة ويا محمد علمود شغل فأني ماريد شغلج ..

واذا كان لغير سبب لا تدخلين احد بعركتج .

سوسن: لا تسوين روحج خيرة انتو لو براسكم خير مجان بنتج طلكها ابن عمها ..

لافين: اني هنا فتحت عيوني وردت اهجم طب محمد

هية كامت تطك سن بسن .

محمد :ولج .. هاي عليمن صارلج ساعة تلعلعين ..

شيرين: ابني دنسولف نسوان بيناتنا .

محمد :يمة لخاطر ربج  صارلي ساعة اسمع حجيها وياج.   والظاهر هاي مو اول مرة تتجاوز بس انتي صوجج تسكتين لهيج شكولات

شيرين :عوفها ماما اني اادبها ..

لافين :ماسمع لامي وكمشها من شعرها و وشمرها للدرج ..

محمد: لج الج ٥ دقايق تلمين زعابيلج وماريد اشوف وجهج .

شيرين: يمة ابني اهدئ لا كلشي تاخذة بعصبية عيب من خالك .لخاطرة عوفها

محمد؛ يمة خالي لو يدري بيها تتجاوز عليج يدفنها بكاعها ..ترة ميقبل احد يتجاوز مو انوب بنتة .

شيرين :لخاطري يمة ابنها بعدة صغير تعلعلة ليش .. اهدء وتفاهمو .

محمد :قسم بالله متبقة .. والة اشمرها شمرة الجلب الاجرب .. ماطول غلطت عليج .. متبقة يمي هاي متعرف تحترم اريد اخليها تتوسل وهم مارجعها بعد .

لافين: نزلت سوسن وتباوعلنا بحقد اني وامي  عبالك هية ام الحق .. جانت شايلة ابنها الب عمرة مصار ٤ اشهر .

محمد :لافين اخذي مصطفى ...

سوسن :ليش ..

محمد :اش انجبي لا تحجين .. لافين كتلج اخذي الولد .

شيرين: ماما ميصير هيج ..

لافين :اجة سحبة منها وحطة يمي واخذها من ايدها وهية تبجي على ابنها ..

طبعا الاحداث كلها صارت كدتم اختها حتة تجاوزها على امي بكل مرة .. بس اختها مجانت تحجي لان ماما متقبل .. وهية من نوع تحب امي وتحترمها حيل ومتكسر كلمتها عكس اختها
..

بعد.نص ساعة ورجع اعصاب ووجهة نار احمر..

شيرين :ها ماما شبيج .. لافين جيبي مي لاخوج خل يبرد دمة  اشوي

لافين :شرب المي الجبتة الة.

شيرين :يمة احجيلي شبيك .. شصار وياك .

محمد: اريد اطلك بعد ماكدر اكمل وياها .

شيرين: لكمت على صدري ...

.......

يتبع ..

لا تنسو التصويت حبايبي .. ..

ترة كل بارت اكتبة بال٣٠٠٠ كلمة واكثر .. كتعويض عن تأخيري ..

ملاحظة .. اذا لكيتو سحك اعذروني .. وعبروها 😂💋

احبكم ..❤❤

تحياتي Aseel💋💋